Pago Pago, AMERIKA SAMOA - 

TAOFI MAU TAITAI O LE LBJ MA LE SOIFUA MALOLOINA- E LE I LAVA TAPENA MO LE TATALAINA O FEMALAGAIGA

Ua fa’ailoa mai e le ali’i foma’i fa’apitoa mo fa’ama’i pipisi, Dr Aifili John Tufa, o le Matagaluega o le Soifua Maloloina, “Ua tumau pea le mau e taofia pea le toe fa’afo’ia mai o tagata o le tatou atunuu o lo’o opea i malo i fafo, se’ia i ai se taimi ua maua ai se vaila’au e puipuia mai ai le to’atele mai lenei fa’ama’i pipisi tele o le Covid-19. Ua tatau lava fo’i ona fa’aauau ma le tapunia pea lava o femalaga’iga i le va o Amerika Samoa ma isi malo tuaoi.

Na fa’aalia foi e le CEO o le falema’i a le LBJ Medical Center, e le’i taitai ona gafatia le falema’i (LBJ) e togafitia le silia ma le 300 o nisi e fa’agasegasea pe afai o le a ulufale mai le Covid-19 i le atunuu. I le taimi nei e nao le 150 moega ua i ai i le falema’i tele i Faga’alu, ae o fale fo’i ua fa’anofo va’ava’aia ai tagata ulufale mai i le atunuu, e le’i lava fo’i lena tapenaga, ae fa’apefea le itu I foma’i ma tausima’i? O lo’o le lava fo’I lena itu o le tausia lelei ona nisi e to’atele atu I le 300-500 tagata ua pesia pe oo mai le Covid-19.”

AMIOGA TAUFA’AFEFE & SAUAGA – A’AFIAGA MA FESOASOANI MO I LATOU UA A’AFIA AI

Ole vaiaso na te’a nei, na fa’ataunuu ai i le Kolisi Tu’ufa’atasi a Amerika Samoa (ASCC) se fetufaa’iga e fa’ailoa ai taofi o le fanau a’oga fa’atasi ai ma a latou faia’oga, e tusa o le fa’afitauli ua matauina ua pipisi e pei se fa’ama’i i tupulaga talavou o le atunuu, I lo latou pule I o latou soifua.

O nisi sa avea ma sui o le Laulau e fa’afoea lenei fa’atalanoaga na aofia ai Lornalei Meredith, peresetene o le Asosi o Loia a Amerika Samoa; o le susuga Adney Reid  o se Fautua laiseneI le Behavioral Health i totonu o le Matagaluega o le Soifua Maloloina, ma le Vetereni; fa’atasi ma Alvina Savali ma Soonafai Seloti, o nisi ua oo nisi o latou aiga i lea tulaga o le pule i le ola.

I le tatalaina o lenei fetufaaiga, sa folasia ai e Meredith ala uma ua tau fa’amata’ua ai nisi o fanau ma ua avea ma ala e matua popole ma atuatuvale ai nisi o le fanau, ma ua mafai foi ona lipotia nei ituaiga faiga ina ia fa’asalaina i latou o taufa’amata’u i nisi.

O le tau fa’amata’u o lagona o nisi, ua aofia ai le fa’asalalauina o ni fa’amatalaga e fa’atiga pe fa’amaasiasi ai nisi o e manatu e fa’ao’otia i au fa’amatalaga ua fa’alauiloa fa’alaua’itele. O nisi o fa’amatalaga ua fa’alauiloa na fuafua e fa’ama ai se tasi, ma ua avea ma mea ua le fia fa’atasi ane ai se tasi o a’afia i ana uo masani, ma aloalo ese mai ai o ia i fa’atasiga masani.

Poo le a lava le ala ua faia ai so’o se ituaiga o taufa’amata’u, ua mae’a tamau nei soligatulafono e mafai ona fa’ao’o I le fa’amasinoga ma fa’amaonia ai mo le fa’asalaga ua fa’atulagaina. Ae maise pe afai ua oo ai le oti i se tasi.

Na faailoa e le susuga Adney Reid, sa mua’i avea o ia ma se tasi na galue faufautua i se a’oga sa tupu ai lenei ituaiga o faalavelave i se talavou, ma sa latou galulue maumaua’i ina ia le soso’o mai ma se isi tamaititi e fa’atinoa fo’I lea lava ituaiga o ala sese e maliu ai.

Na mafai ona taofia lea ituaiga o fa’aletonu mai le toe tupu i lea a’oga, peita’i ua iloga mai, ua le mafai ona taofia i le tatou atunuu, ma ua mafua ai ona sofa’i mai taumafaiga ia maua e nei fanau se suiga o latou fa’aiuga, a’o le’i latou fa’atinoa lea ituaiga o agasala matuia.

“E matua mana’omia lava e nai fanau ua amata ona gaua’i o latou loto e pule i lo latou soifua, pe afai e i ai lava se isi e mulimulita’i ia i latou ma fa’aalia pea lou agaga alofa ia I latou. Ia e fa’alogo ma ia e fa’ataunau ia te ia, ia va’ai i le itu sili ona taua, fa’amagalo atu i nisi ua faia nei fita ia i latou, ia fa’atuatua fo’i i le Atua na te suia mea fa’aletonu o feagai ai e avea ma se fa’amanuiaga pe a onosa’i ai,” o le saunoaga lea a Reid.  “Pe afai tou te onosa’i ma fa’alogo i o latou fa’afitauli o lo’o fa’asoa mai ia te outou, e mafai ona e fa’ailoa atu Ia i latou o lo’o e alofa moni ia i latou, e mafai ai ona gaua’i i latou e fiafia e ola pea ma outou. Suia ai o latou lagona ootia ae fiafia ma fia mafuta pea ma outou.”

O isi sui e to’alua, mai aiga o i latou ua maliliu fa’afuase’i i le pule i le soifua, sa la’ua fa’ailoa atu le a’afiaga o lagona ma le ootia fo’i e oo i aiga o e ua pule i o latou soifua. O le tamaitai o Savali, sa fa’ao’o e so a alo le oti ia te ia lava i le tausaga na fa’auu mai ai o ia i le a’oga maualuga.

“Ua atoa le 20 tausaga talu ona tupu lena mea tiga i lo’u olaga, ae ui ina ua mafai nei ona ou fa’agalogalo lea mea, ae o lo’o tu’ufesili pea lava lo’u mafaufau, pe aisea lava na faia ai e la’u tama lea mea matuia?”

Mo Seloti o le fa’alavelave e le’i mamao atu e lona tuagane. 

E tasi le mea sa mautinoa, e matua alolofa lava i la’ua i nai o la’ua pelega ua maliliu.,

Ua iloga lava i fa’amatalaga a Savali ma Seloti le malosi o le toe taumafaiga a aiga ina ia mafai e i latou ona toe soofa’atasi o latou lagona ootia. E ui ina tiga ma matuitui le oti fa’apea o latou pelega, ae matele lava ina fefa’amafanafana’i i latou ma toe fa’aauau pea latou olaga e pei ona masani ai. Ua iloga ai e vave tele ona toe fa’afo’ia mai i aiga le fiafia, aua sa tausia ma fa’afailele nei pelega ma le alofa, ae ua le mautinoa lava le mafuaaga ua faia ai e i latou nei ituaiga o fa’aiuga.

Ua fa’ailoa mai fo’i e le tamaitai peresetene o le SGA, o Perosi Vaofanua, “O le fa’atasiga lenei ua i ai lona taua i le soifuaga o fanau a’oga a le tatou Kolisi, ua mafai ona fa’alogo i nisi o fa’afitauli e feagai ai ma i latou ua manatu e pule i latou soifua, ua fa’alogo i nisi o mafuaaga ma ala e mafai ona puipuia mai ai nisi mai le maliu fa’apea. Ua iloa nisi o ala e fa’ataumata’ua ai nisi i ala eseese e oo lava i le fa’aaogaina o le initeneti.”

“O loo i ai lava le fa’amoemoe i so’o se taumafaiga ina ia taofia lea fo’i faiga fou ua manatu nisi o tupulaga o se mea lelei, ae ua le iloa, o le agasala lea e le fa’amagaloina e le Atua, ma ua mautinoa lava e le o toe lava se taulaga e fa’amagaloina ai.

Pe afai e te va’aia se tasi ua manatu ina faia lea solitulafono, e ao ina e fa’afeso’ota’ia mai le imeli: www.amsamoa.edu.

TATALA FALEA’OGA FOU A LE MANUMALO BAPTIST ACADEMY:

O le Aso Faraile, Oketopa 9, 2020 ile itula e 8:00 i le taeao na alausu ai le a’oga a Manumalo Baptist Academy, le latou pulega ma le PTA ina ia latou tatala aloa’ia le latou falea’oga fou, lea sa fa’atupeina mai e le Matagaluega o A’oga a le Malo, lea sa saunoa ai le Taitaifono o le Komiti Fa’afoe o le Manumalo Baptist Academy i le fa’au’uga ia Iuni 2020 ma ia fa’ailoa ai o le faleaoga ua fausia e le’I mae’a i lena taimi, o lo’o fa’atupeina mai e le DOE.

O lea falea’oga sa o’otia le lipine e le faletua o le afioga le Kovana Sili, Cynthia Malala Moliga. Sa auai uma fo’i Kovana Lolo Moliga ma le faletua, aua o i la’ua fo’i o matua matutua o le fanau aoga a le Manumalo.

E oo fo’i i le fanau a’oga sa matua fa’atasia uma i lea sauniga mamalu, ma fa’ailoa fo’i lo latou fiafia, aua ua mae’a lelei lo latou fale’ai, o faleta’ele fou ma ua iloga ona fausia i le ituaiga fausaga e talafeagai ma fausaga ua fa’atulaga mai e le Covid-19, lea e faigofie ona fufulu mama e fa’aaogaina ai vaila’au eseese ua faatulaga aua le tapenaga mo le faama’i pipisi o lo’o olioli mai i o tatou tuaoi.

O lona uiga o nei fale fou, ua fausia i le apa e le elea, ma ua mafai ona fufulu ma le toto’a ua mama lelei.

Ua oo lava i nofoa ma laulau e fa’aaogaina o ituaiga e fa’amoe mai le atuganofoa mo le laulau e tasi, ua fa’aaogaina foi ma ua faailoa mai e le tamaitai fa’atonu o a’oga, Dr Ruth Matagi Tofiga, “O nei seti o laulau ma nofoa e fa’amoe lelei pe a mae’a ona fufulu ma fa’aoga e le fanau a’oga i a latou tausamiga, o seti nofoa mai le matou matagaluega.”

O le fogafale lua o le falea’oga lea, o lo ua i ai potu a’oga fa’aopoopo mo vasega a le fanau a’oga i lea Laumua.

O le sauniga mamalu na fa’ai’u i faaaloaloga o le toe tali mai a le Manumalo, lana komiti fa’afoe, le PTA ma le Laumua ae maise le Pulega atoa, I le agalelei ole malo ma le Matagaluega o a’oga i le latou fa’atoga mo se falea’oga fou e aofia ai le fale’ai ma faleta’ele mo le foagafale a lalo, ae o lona fogafalelua ua i ai isi potu a’oga.

FAAMANATU LE SISIGA FU’A A FITI I TOTONU O AMERIKA SAMOA

Sa faataunuuina I le Aso Toonai, Oketopa 11, 2020 I le Paka Liona se faatasiga tele a Tagatanu’u o Fiti o lo’o alaala ma aumau I totonu o Amerika Samoa, e faamanatuina ai le atoaga 50 Tausaga o le Tutoatasi a lo latou malo, e pei ona sa faamanatuina i Aso Faraile Oketopa 10, 2020.

Ona ua amata lava ona to’atele mai tagatanuu o Fiti o lo’o tautua i ituaiga galuega eseese i le tatou nei teritori, o lea sa va’aia ai le to’atele na auai i lea fa’amoemoe lelei, faatasi ai ma a latou uo mamae.

O le aso na sisi a’e ai le latou fu’a muamua i o latou laueleele o Oketopa 10, 1970, lea la ua atoa nei le latou Iupeli Siliva i lenei tausaga. Sa le’i faigofie nisi tausaga i le folauga, peita’i e fa’afetaia le Atua e manumalo lava le agaga filemu i le lautele o tagatanuu o Fiti.

O le susuga Jimmy Sword, o le tagata Amerika Samoa na soifua a’e i Fiti, o ia lea sa avea ma fa’amautu o e uma mai Fiti i tausaga o soifua mai o ia. Ma o ia fo’i sa lalamua i le tele o fa’amanatuga o lenei sisigafu’a a le malo o Fiti mo nai ona tagata o lo’o tautua ma aoga mo le tatou nei malo fa’ateritori o Amerika.

O le susuga le foma’i Dr. Emioni ma Liz To’afa o i la’ua nei sa tutu i le foe mo le taumafaiga e tuufa’atasia se latou polokalama matagofie mo le fa’amanatuga o le 50 tausaga o si latou faigamalo iinei. 

Sa fa’aalia fo’i le agaga fiafia o le Sui Faipule I le Konekeresi a Amerika Samoa, ia Aumua Amata, I sana saunoaga “Fa’amalo ma le fa’amanuiaga ia i latou uma o tatou uso ma tuagane mai Fiti ua tatou nonofo fa’atasi i le tatou teritori nei ona ua aulia ma le manuia le atoaga o le 50 tausaga o le tou faigamalo tuto’atasi mai pulega fa’amalumalu mai a Peretania. Ua iloga lo outou loto saili ma tautua I lo outou faigamalo, ma o le vi’iga e sii i le Atua aua ua fai ua mafai, ua va’aia fo’I le tele o manuia ma sosia o le Atua ua outou aeae ai I lenei vaitau o le soifuaga. Fa’amalo I le ali’I Peresetene o Ratu H. E. Jioji Konrote ma le mamalu o la outou taupulega ua avea ma fa’auluuluga o lo outou malo i lenei vaitau. Fa’amalo atu mo le ta’ita’iga lelei mo outou tagata, fa’afetai fo’i ua mafai ona fa’asoa mai nisi o outou tagata matou te galulue fa’atasi ma nonofo lelei ma i matou uma i Amerika Samoa nei. O lo latou malutia i se tausiga lelei i’inei, o se sao fo’i lea o Amerika Samoa mo lo outou malo ma lona tamaoaiga tausi.”

“Sa i ai se vaitau o lou olaga na asia ai fo’i Fiti ma lo outou faigamalo, sa matua fa’afiafiaina fo’i lou sui fa’atauva’a i lo outou talimalo lelei ma le puipuiga malu. Ia manuia lo outou aso o le sisigafu’a Fiti, bula vinaka! Isa Lei!”