Pago Pago, AMERIKA SAMOA - 

TOE SA’AFI ALI’I FAIPISINISI & FAIPULE - SU’A CARL SCHUSTER

Ina ua litaea mai le afioga Su’a Carl Schuster mai le US Air Force ma le US Navy, na toe taliu mai i fanua ma amatalia ai lona olaga tautua i ona tagata e ala i ana pisinisi ma fa’alapotopotoga ua avea ai o ia ma totino, ae maise o lona fo’i agava’a i matata fa’apolotiki.

O ana galuega na galue ai e aofia ai lona avea ma Faipule o le itumalo lona fitu lea e aofia fa’atasi ai Fagatogo ma Utulei ma e tolu ana nofoaiga sa it tautua ai i lea fo’i faiva fa’apolotiki.

O lona auai lava i mataupu tau faigamalo sa avea ai o ia ma Taitaifono o le Vaega Fa’aupufai a le Temokalasi

O ia o se tasi o totino malosi fo’i o le Lions Club of Pago Pago, ma o se tasi e iloga lana tautua ma tofiga sa galue ai i lana Ekalesia a Iesu o le Au Pa’ia o Aso e Gata Ai i Amerika Samoa nei. Na oo lava ona tofiga ina avea ma Epikopo o le Uarota a le Pago 2nd mo le 8 tauaga o lana lea tautua i lena tofiga.

O ia o se faipisinisi ma o lo’o i ai pea lea pisinisi “Triple S” Pamu Kesi i Tafuna ma ua aofia ai ma le vasega o fale’aiga o lo’o lisia le isi vaega o lea fale o pisinisi.

Na tautua Su’a i nisi o Komiti taua i lona taimi a’o avea ma Faipule e aofia ai le komiti o le ASPA ma le Mea Toso Va’a i Satala. I se tasi o ana tautua i lea Komiti Fa’afoe sa avea ai o ia ma Fa’atonu Sili o le ASPA ma sa tautua fo’i o le fesoasoani fa’apitoa a Kovana Lutali i galuega eseese a le Malo sa fa’atautaia i lena vaitau. 

O lana tautua i le USAir Force ma le US Navy na mautu ai ona tomai i matata fa’ainisinia i le toe fa’aleleia o vaalele ma ina ua suia mai lana galuega i le Matagaluega o le Puipuiga Lautele o le Malo Tele sa toe galue ai Mea Toso Va’a i Hunter’s Point  Shipyard ma e fitu tausaga o galue ai o ia i lena tautua, o se tasi e fa’atautaia galuega fa’aeletise.

Na siitia mai lea o lana galuega i le Long Beach Naval Shipyard ma avea ma Inisinia o Komapasa i lena Mea Toso Va’a ma i’u ai lava ina avea ma Supevaisa i lana galuega lea.

Na litaea mai o ia ia Me 1984 ma sa toe fo’i mai ma lona faletua o Salote Starr Lutu Schuster ma fa’ato’a amatalia loa le la’ua auaunaga i Amerika Samoa ia Ianuari 1985 lea sa galue amata ai i le Matagaluega o Galuega Lautele.

Saunoa le afioga a Pulu Ae Ae Jr., “O le afioga Su’a, e tasi lava le mea ou te iloa i lona agaga, e fia tautua i ona tagata. E le o se tasi e fe’aloalofa’i i ona lagona moni. o tama o le milikeli e sa’o lava i le sa’o le tala e fai mai. E matua agaga moni lava o ia i ona tagatanuu i lona itumalo sa tula’i mo i latou i le Maota o Sui.”

“E le o se sui faipule e taumafai e saili sona manogi pe o nisi e fiafia ia te ia, ae matua mafai lava e ia ona feso’ota’i ma so’o se tasi. E le o ia o se faipule e tau fa’a’alo’alo ni ana fa’amatalaga e tuu sa’o mai lava ona manatu fa’aalia i fonotaga ma tauaofiaga e sailia ai se tofa autasi a le Maota o Sui.”

“O sina fa’aupuga e talafeagai lelei ma le fa’amatalaga o lea ituaiga o tagata, e tautala i le sa’o ma e fa’amaoni i ona tiute. E taua ia te ia lona tofi na tula’i ai mo tagata o lona itumalo.”

Na manatua e Pulu le vaitau sa tautua fa’atasi ai i latou i le Maota, o le vaitaimi fo’i lea na matua fa’agasegasea ai le afioga le Faipule o Maluali’i Alexander Young. O Su’a lava le sui Faipule na matua tu malosi ina ia mafai ona sau se va’alele a le Malo e auina atu ai i fafo lenei uso a faipule mo togaifitga . Ua fa’ailoa mai ua i ai le va’alele a le Malo ua mafai ona sau, peita’i e tatau ona i ai le $45,000. E le’i fa’atali Su’a sa ia oo ia Kovana Tauese Sunia ma sa maua lava lea tupe na sailia ina ia fa’ao’o mai ai le va’alele togipau mo le fa’atafa gasegase o Maluali’i. O le ituaiga tagata lena e i ai Su’a, o se tasi e le fo’i pe afai ua ia iloa e mafai ona fa’atino so’o se tautua mo tagata lautele.”

Na maliu Su’a ia Setema 28, 2020 ae ua atoa le 89 o ona tausaga. Ua soifua pea o ia e ala i lona faletua, ma le to’aono o le la’ua fanau, 15 o fanau a la’ua fanau, ma le to’a 4 o fanau a fanau a la’ua fanau.

O ona toe sauniga sa fa’atautaia lea i le aso Too’na’i na te’a nei i le Malumalu LDS i Malaeimi. O lona sauniga amata i lona aiga sa molimauina ai e le to’atele o lona aiga, i lana fanau ma e pele ia i latou le tama, o se tama e sili ona alofa mo i latou i so’o se mea, i so’o se taimi. O le tama e galue malosi ma e le fesuisuia’ia ona manatu, e matua mautu ona manatu ma e iloga ai lona a’oa’oina lelei ia faia le mea sa’o ma le tonu i taimi uma.

Ona ona toe sauniga sa ta’ita’ia lea e Bishop Fainuulelei Tanielu ae fa’amamaluina e le susuga Peresetene Sonny Aiono. 

FAIAOGA ECE - LE’I MAUA LAVA TOTOGI MAI TUUAGA UMI O A’OGA

E tusa ma le 50 faia’oga o le ECE ua leva ona tatalia latou siaki totogi na faapea e maua ona o le galulue o i latou i le vaitau o le taumafanafana po’o le tu’uaga umi o a’oga na te’a nei.

Peita’i e oo mai lava i le aso Faraile na te’a nei, sa manatu lava atonu e maua mai lea fa’aopoopoga i siaki na maua mo le Lotu a Tamaiti, ae ua leai lava se mea o toe maua mai mo faia’oga uma nei.

O se mea sili ona faigata ona ua leva ona taumafai mai nei siaki, ae o le tali lava e tasi! “O lo ua i lea ofisa ma lea ofisa, o lo’o fa’atali se’i uma ona faia latou galuega i ai ona faato’a fa’agasolo atu ai lea i le Ofisa o Tupe, e fa’ato’a saunia mai ai le siaki.”

Ua oo foi le tapenaga i le vaega o tupe, ae toe fa’ailoa mai, “Talofa e, ua fai mai le Ofisa o Tupe ua le toe aoga le vaega tupe lea sa aumaia mo le polokalama lea e tatau ona totogia ai outou. Ua leai la se siaki e mafai ona taua’aoina atu.”

Na amata mai ona tapena nei siaki ae le’i taitai oo ina mae’a le taimi atofa e fa’aaogaina ai le vaega tupe lea sa aumaia mo le Head Start Program lea e fa’atupe ai totogi o nai faia’oga sa auai i nei a’oga fa’apitoa i le taumafanafana.

O le tali ua fa’amalamalama lelei mai e le Ofisa o le ECE, “E moni lelei faia’oga, ua le toe maua ni a latou siaki sa tatalia. Aisea? aua ua tuai ona tapena mai siaki a’o le’i uma le 6 masina mai fafo e ao ina fa’aaogaina ai le tupe lea mo le Head Start Program. O a’oga a faiaoga o se mea e agava’a ona fa’aaogaina i ai lenei tinoitupe. Peita’i, na mae’a lelei uma fo’i a’oga a faia’oga a’o le’i mae’a le taimi mo le tinoitupe lea. Ae le mafai ona fa’atopetope atu e se tasi le fa’atinoga o galuega a isi matagaluega o le malo, lea e fa’asolo i ai tapenaga o totogi o nai tagata faigaluega.”

“A mae’a galuega a le DOE ona avatu lea i le vaega a le Tupe Fa’asoa, a mae’a ona avatu lea i le Matagaluega o Tupe ina ia fa’atoa maua ai le siaki. Peita’i e oo atu i le taimi ua sauni ai le Matagaluega o le tupe e saunia lea siaki, ua le aoga le tinoitupe lea e mafai ai ona toe totogia faia’oga.”

“O le mea e ao ina faia mo nei faia’oga, o le taofia lava lea o nei siaki se’i toe va’ai pe mafai ona toe talia mai le fa’atupega lea mo lenei tausaga fa’aletupe, a mafai ona fa’atoa totogia lea o nei siaki ua mae’a tapena mo nei faia’oga. Ae a leai, o le a le toe i ai la nei siaki mo faia’oga uma nei a le ECE,” o lea se fa’apupulaga ua oo mai le Ofisa o le ECE.