Ads by Google Ads by Google

Tala I Vaifanua


[ata: foa'i]
ausage@samoanews.com

Pago Pago, AMERIKA SAMOA

 

2 ITULA TAGATA FAIGALUEGA E FAI AI LANA PALOTA –MAUA LE TOTOGI I GALUEGA

 

I le vaiaso lenei sa fa’ailoa ai e Kovana Lolo Matalasi Moliga i fa’atonusili o le malo tulafono o lo’o i ai nei, e lua itula ua fa’amatuu mai i tagata faigaluega uma ina ia alu ai e fai lana palota, ae maua pea lona totogi.

 

O lea fa’amanatu a le kovana e aofia ai tagata faigaluega i kamupani tua. 

 

O le lua itula lea e le taulia ai le taimi e alu ai le tagata faigaluega e fai sana malologa itiiti ma fai sana mea taumafa. O le aso 3 Novama, 2020 ua fa’amau fa’ailogaina o le aso mo le palotaga a Amerika Samoa.

 

“Pe afai e to’esea e sui faigaluega mai ona tiute ma faiva o galue ai i so’o se matagaluega poo le ofisa o le Malo, ua le tatau ona a’afia ai lana galuega, pe sala ai fo’i i lana galuega, Ua le tatau ai fo’I ona to’esea se vaega o lona totogi.”

 

Ua le fa’aaogaina lea aiaiga tau le tagata faigaluega e le’i faigaluega i lea aso atoa, pe ua ia fa’aaogaina fo’i le 2 itula a’o le’i amata ona itula faigaluega i le taeao ma le afiafi i le manava ai o galuega masani i lea aso.

 

“Ua fa’atulaga fo’I le vasega o supavaisa I galuega ina ia mautinoa ua fa’asologa lelei taimi e o ai tagata e fai a latou palota ae ua mautinoa o faigaluega pea nisi aua le tautuaina o le mamalu lautele e moomia ona tautuaina I itula faigaluega e matala ai tautua eseese a le Malo.”

 

ASOSI O PISINISI AMERIKA SAMOA – FA’ATALANOAGA SUI TAUVA FAIPULE UOSIGITONE

 

O le aso 29 Oketopa, ua fa’atulaga nei e le Asosi a le Aufai Pisinisi a Amerika Samoa ina ia fa’atautaia ai se fa’atalanoaga ma sui o lo’o tauva i le tofi Faipuleo Amerika Samoa i le Konekeresi a le malo tele. O le aso Tofi o le vaiaso a sau mai le itula e 5:00 seia oo i le 7:00 i le afiafi e fa’atautaia ai lea faatalanoaga i le Wayland Baptist University i Fagaima.

 

O sui e to’atolu o le a auai e aofia ai le Faipule o tula’i mo Amerika Samoa i le Konekeresi i le taimi nei, Uifa’atali Aumua Amata, Meleagi Suitonu Chapman ma Oreta Tufaga-Mapu Crichton.

 

O le avanoa lea o le a folasia ai e nei sui tauva uma o latou auau ua mafua ai ona fia tautua ae maise fo’i o le a latou talia fesili e tuuina mai e le mamalu ole aufaipisinisi ia i latou. O latou tali o le a mafai ona faia ai filifiliga a le aufaipisinisi po’o ai o i latou e talafeagai ma o latou manatu e tatau ona tula’i, ina ia fa’aleleia atili ai le auaunaga mo i latou ma latou fo’i galuega atina’e o le atunuu ma latou kamupani tumaoti.

 

O le a fa’asalalauina fa’alaua’itele fo’i lea fa’atalanoaga, mo le silafia a le mamalu lautele o le atunuu, pe a mae’a fo’i e mafai ona toe fa’asalalau mo le silafia e nisi e le o avanoa e fa’alogologo ai i le taimi o fa’atautaia ai lea fa’atalanoaga.

 

Ua faailoa mai o le a tele fesili e fa’atutu aga’i i ala e fa’aleleia atili o le tamaoaiga o le atunuu ma ala o le a fesoasoani mai ai le Faipule le Konekeresi e fa’atino lea tulaga. O nisi o mea taua nei, o le fa’asoa mai lea o ala e mafai ai ona fa’aleleia maketi e fa’atau atu i ai oloa gaosi i totonu o Amerika Samoa.

 

PISINISI & KAMUPANI E FA’ATAU I AI OLOA GAOSI SAMOA

 

O le taimi nei ua le toe fa’atamala lava le va’ai toto’a o le Malo o Samoa ini ala e fa’atele ai maketi i fafo e faatau atu i ai Oloa gaosi ae maise o fua o fa’aeleeleaga a le aufai fa’ato’ga a Samoa.

 

Ua fa’ailoa e le afioga le Palemia o Samoa, Tuilaepa Sailele Malielegaoi, i lana folasaga sa fa’asalalauina mai i ala fa’asalalau i ala ata o televise, “O le vaiaso lenei ua fa’aleleia atili ai auala o lo’o maketi atu ai oloa gaosi a le atunuu ma auina atu i maketi i fafo mo fefa’ataua’iga. O le ala fou ua fa’aaogaina ai le SROS po’o le latou matagaluega fou o Suesuega Fa’asaeanisi a le Malo o Samoa ina ia mafai ona tuufa’atasia ai nisi o oloa e mafai ona mana’omia tele e maketi i fafo.

 

O oloa nei ua mae’a gaosia i ni ituaiga o oloa e mafai ona alumia tele i fafo i le taimi nei e lea matagaluega ua aofia ai le Falaoamata ua gaosia mai le Ulu, o le ga’o e gaosia mai le Avoka, ma le vaila’au fa’amama lima e gaosia mai le Talo.

 

“E pau lea o se auala ua fa’ateleina ai maketi mo le atunuu, o le gaosia lea o oloa e afua mai mataiai ma la’au e ta’atele i le tatou atunuu, ma fa’auia loa e sailia ai maketi e avanoa mai fafo mo fefa’ataua’iga, aua o le ala lea e maua ai le tupe e le faifa’ato’aga o lo’o fia mana’o ia taulia ana meatoto,” o se tala lea a le Palemia.

 

O le matagaluega fou lea a le Malo o Samoa sa fa’ato’a fa’atula’ia i le 2005 ma o ala nei e mafai ai ona fa’alautele maketi i fafo mo fefa’ataua’iga a le atunuu ia mautinoa le fa’ateleina o le tamaoaiga tausi o le atunuu. “O le to’atele o tagata e le faigofie ona latou fa’atuatuaina nisi e avea ma latou maketi mo latou oloa ma fua o fa’ato’aga aua e fefe i latou ina ne’i mao toto latou fa’ato’aga e fuafua i maketi e fa’atau atu i fafo, ae te’i ua toe solofua mai nei maketi, ae lusi uma ai le galuega tele ua mae’a totoina ma fa’atalitali mo le seleselega, ua maumau uma!”

 

“Lea la ua fa’afaigofieina e le matagaluega lea, lea tulaga mai ua mautinoa ai fo’i le tamaoaiga mo le aufaifa’ato’aga lea e faigata tele le latou matafaioi tau’ave o le gagauina o le vao. Peita’i o i latou o le poutu o le malo i le sailiga o le tamaoaiga tausi o le atunuu, fa’atasi ai ma le aufaipisinisi,” o se fa’amatalaga fiafia lea a Tuilaepa.

 

E ese mai lea fesoasoani tele ua tapena e le faigaamalo a Samoa mo le aufaifa’ato’aga, ae ua toe fa’ailoa fo’i e le ali’i Palemia, “I le taimi lenei o lo ua galulue malosi le malo ina ia fa’aleleia uma auala e mafai ai ona femalaga’i faifa’ato’aga ma fela’ua’iga o latou fua o fa’aeleeleaga.”