Ads by Google Ads by Google

TALA I VAIFANUA


O le vasega o fanau a’oga ma le latou faia’oga ina ua mae’a ona matua fa’aalia e I latou ituaiga o siva eseese fa’ale-aganuu I malo ua latou filifili e fa’aautu I ai latou folasaga. O le vasega a le ASCC/BAOA International Communications. [ata: Leua Aiono Frost]

Pago Pago, AMERIKA SAMOA

 

ASCC/BAOA AOAOGA FA’AVAOMALO – TOMAI E FESO’OTA’I AI MO MAKETI

 

O le aso Lua na fa’atautaia ai e le vasega a le ASCC/BAOA -Fesoota’iga Fa’avaomalo le latou taumafaiga ina ia latou a’otauina tu ma aga a nisi malo ua latou manatu e tetele ai so’otaga fa’apisinisi ma Amerika Samoa e ala i fefa’ataua’iga.

 

O atunuu na filifilia e le fanau a’oga i lea kosi, sa latou filifilia ai Korea i Saute, Aferika i Saute, Initia ma Italia. Ona o lea vasega e le to’atele na’ua le fanau a’oga o lo’o tau’avea i lenei tausaga, ua na’o le taito’afa pe to’atolu fo’i i latou sa fa’atinoa nei taumafaiga mo latou togi.

 

“O le fa’atinoga o latou tu ma aga nei, o latou ia taumafaiga fai fa’atasi ina ia maua ai togi. Ua masani le fanau aoga i le taumafai fa’atasi, peita’i i le tulaga o pisinisi, e te taumafai i le to’atele ina ia mafai ona taulia au oloa, alumia au oloa ma fa’aaoga e le to’atele o tagata au oloa. O lea e taua ai ona e mafaia ona ola feso’ota’i ma le isi ou uso a tagata, e le to’atasi ae ia to’atele, ina ia ausia lau sini, ia taulia ma alumia au oloa gaosi, po’o oloa fefa’ataua’i,” o se fa’amatalaga lea a le tamaitai Faia’oga o lea kosi, Dr Faofua Va’apu’u Fa’atoafe.

 

O fa’atinoga o nei tu ma aga sa amata mai i le latou fa’amatalatala auiliili mai lea o nisi o fa’amaumauga taua tele e fa’atatau i malo ta’itasi ua latou filifili e fa’ailoa mai i le mamalu na fa’afofogaina latou taumafaiga.

O i latou na aotelega i lea potu a’oga mo le fa’amoemoe o fanau a’oga, sa aofia i ai le pulega o le Kolisi Tuufa’atasi, le peresetene Rosevonne Pato ma isi fa’auluuluga o le Kolisi, o le pule fo’I o leoleo a le Kolisi, ma sui na mafai ona avanoa o latou taimi e maimoaina ai le fa’atinoga matagofie a le fanau.

 

Ua le gata i fa’amatalaga e fa’atatau i mea e iloga ai nei malo i le lalolagi, o latou tu ma aga, o latou ituaiga o la’ei e te iloa patino ai o i latou e o mai lea malo, ae ua fa’amatala mai le aofa’i po’o le faitauga o lea malo i le 2020. O latou oloa fa’atau atu i fafo, o oloa fo’i e manana’o I latou e fa’aulufale atu mo le latou atunuu, ae maise o latou mea tausami alumia i lo latou fofoga taumafa.

 

Na tapena mai uma e le fanau le fofoga taumafa felanulanua’I mai nei malo, ina ia fa’amautu ai lo latou silafia a’ia’i o atunuu ua latou fiafia e fa’alauiloa i lenei tausaga a’oga. I le matau a le aofia na poto e fesoasoani i le toniga o nei galuega fa’atino, sa matauina lelei lava sui ua faigata ona saunoa e fa’amatala fa’amaumauga i nei atunuu, o i latou e le’i lava le suesuega ma fa’asolo o latou fa’amaumauga sa fa’atulaga mo le fa’amoemoe i folasaga. Peita’i e leai se tasi o i latou na fa’aletonu i le tulaga tau le fa’atinoga o siva ma fa’afiafiaga masani a latou malo na filifili.

 

TAUVA SE TASI O LE KAPENETA A LOLO I LE  PALOTAGA SAMOA  2021

 

I se lipoti mai Apia, Samoa o lo’o fa’ailoa ai se tasi o le Kapeneta a le Kovana i le lisi o sui e tauva i tofiga faipule i Samoa, le susuga fo’i le Faipisinisi o Pa’u Fuiavalili Dr Roy Ausage o Malaeloa ma Leone ao Samatau Falelatai i Samoa.

 

I le taimi nei, o lo’o tau’avea e ia le tofi Sui Fa’atonusili o le Matagaluega o Talavou & Tamaita’i i le faigamalo a Lolo ma Lemanu. 

 

“O agava’a fa’afatuoaiga mo tina uma, e le faigofie, ae a toe fa’aopoopo i ai se isi la’asaga o le tomai e fa’aleleia atili ai ana taumafaiga ma sailia ai se tamaoaiga tausi mo lona aiga, ona si’itia lea o le tautua a tina i le isi la’asaga matagofie ma fa’afiafiaina atili ai lotoifale o latou aiga e pele ia i latou,” o se tala lea a Pa’u. 

 

O lo ua olioli le sui mai Amerika Samoa e tauva fa’atasi ma le susuga le Minisita o Matagaluega fou o le Malo o Samoa “Punaoa Fa’anatura ma le Siomaga” le susuga Taefu Lemi Taefu fa’atasi ai ma le sui sa tautua mai I le EPC po’o le Pulega o le Eletise a Samoa, Tologata Tile Lei’a.

 

O Pa’u Ausage ma le faletua o Gloria Pulou Ausage e la te faatautaia se faletalimalo i Mulifanua e tautuaina ai le mamalu fegasoloa’i i le va o Mulifanua ma Salelologa, le nofoaga tonu sa i ai le faletalimalo e ta’ua o le El Mocambo i aso ua tuana’i. O lana manulauti ua fa’aosofia ai lana taumafaiga ua fa’aigoaina - Fa’atuatua i le Atua, Samoa ua Tasi [FAST].

 

Ua fa’aalia e Pa’u Ausage lona lagona e tusa o lenei taumafaiga, “Ua tatau fo’i ona aoga i lena itu o le vai, e le o eseese o tatou tagata, e malaga atu fo’i ua aoga mai i lena itu, e tasi lava aiga, e tasi fo’i Samoa i le Atua. Ua na’o se taumafaiga, a maua se ‘ai fa’afetai e fa’ato’i i le Atua, a manuia ona fa’ato’a maua lea o nisi manatu.”

 

Ina ua fesiligia pe ua mae’a fa’amalieina e ia tulafono uma tau le palotaga a Samoa, ae fa’ailoa e Pa’u Ausage, “Ua ou mautinoa ua mae’a ona ou fa’amalieina uma na aiaiga uma fa’aletulafono o palota a Samoa.”

 

O i latou uma fo’i o opea i fafo ona o le covid-19 e tatau ona i ai i latou i Samoa toe 14 aso oo i le aso o Palotaga ia Aperila 2021.

 

FILIFILIA SUI VAEGA FA’AUPUFAI TEMOKALASI I AMERIKA SAMOA 2020-21

 

O Oketopa 22, 2020 na fono ai le Vaega Fa’aupufai a le Temokalasi i le atunuu ina ia latou filifilia nisi o le latou laulauafono e galulue e fa’atautaia fo’i latou fa’amoemoe i lenei vaitausaga 2020-2021. Na faia lea fonotaga taua i le Naumati Room o le faletalimalo a le Tradewinds i Tafuna.

 

O le laulaufono ua tofia mai nei ina ua mae’a le palotaga na faia e i latou uma na auai ua tula’i mai ai Ti’a Reid e avea ma Taitaifono. Sui Taitaifono o Petti Matila; Teutupe o Justin Tuiasosopo  ma le Failautusi o Renee Leotele Togafau Matautia, ae ua filifili le ali’i o Andrew Berquist e avea ma sui o le Komiti Tama. 

 

Ao le’i faia le latou filifiliga o nei tofiga na mua’I filifilia lava e i latou le komiti mo le palota ina ia fili fa’apitoa ai ni sui se to’aono e tula’I mai mo lenei tausaga o le a savalia i galuega fai a le Vaega Fa’aupufai a le Temokalasi i Amerika Samoa. O le sui o lo’o tumau pea e le’i fa’amautu i lea palotaga o le Sui o le komiti tamaita’i. O i la’ua na filifilia i lea po, sa la’ua te’ena uma lea tofiga. Ua taoto ai faapea lena tofiga se’i toe filifilia I se fonotaga o soso’o mai a le Temokalasi.

 

O le fonotaga e soso’o ai a lea vaega fa’aupufai o le a ta’ita’ia lea e le Laulauafono fou ua tofia nei.