Pago Pago, AMERIKA SAMOA

SUNIAGA LOTU - KOVANA & SUI KOVANA FILIFILIA – TAIMI O LE FA’AFETAI

Na fa’atumulia le malumalu EFKAS i Matuu & Faganeanea ina ua toe poto le Komiti atoa fa’atasi ai ma le Kovana filifilia Lemanu Peleti Mauga, ma le Sui Kovana filifilia Talauega Eleasaro Ale ma o la’ua faletua ma aiga, ina ia si’i a’e le fa’afetai i le Atua, ae o le fa’afetai fo’i i le pa’ia o le afio’aga ma Aiga sa latou nopiai fa’atasi i le fa’amoemoe ua mae’a ma ua talileleia.

O le ta’ita’i o le sauniga mamalu o le Fa’afeagaiga Taulagi EFKAS Matuu ma Faganeanea, Rev. F.Asiata  ma sa ia fa’asolo maia le polokalama i le aso ua te’a nei. 

O le avanoa e tula’i ai se tasi o le Kovana filifilia po’o le sui kovana filifilia, ma o le tofa Talauega Eleasalo na saunoa. “Le mamalu e, o lenei le sauniga ua tapena ina ia mafai ona tatou si’ifa’atasi le fa’afetai i le Atua, aua o Ia e to’atasi ua tali mai, ma ua fa’afiafiaina uma i tatou, ua tali so tatou mana’oga sa nofo tatalo atu ai, ua ia talileleia lo tatou fanoga. O la outou tali fo’i lea i so ma’ua manatu osaosa ma le me’eme’e, lea ua fa’amanuiaina ai le kovana filifilia ma lo’u sui fa’atauva’a.”

“Lea ua oo mai i le taimi o le a tatou tu’u ese uma ai o tatou manatu sa faafoea mai ai le tatou taumafaiga, lea ua talia mai e le Atua ma tagata uma o Amerika Samoa lo tatou fanoga. E moni lava, na foa’i mai lava e le Atua le tamai mamoe e osi ai le taulaga. Ua tatou iloa fo’i le finagalo o le Atua ia i tatou uma, ua mae’a atu na fatiga, ua oo mai i le taimi lenei, o le taimi o le leleiga.”

“O lea ua oo mai le taimi e mate fa’ataunuu uma ai folafolaga sa folasia i tagata, a oo mai i le taimi nei, ua tatau ona amata loa ona talitali i folafolaga, e fa’amautu ai le ‘auga o le taumafaiga sa fa’alauiloa, mo se faigamalo e mau fa’atuatuaina e tagata uma. E tatau fo’i ona tatou tutu fa’atasi umai tatou ma isi uma o le tatou atunuu.”

“Ua mae’a le la’asaga muamua o le taumafaiga, lea ua tatou to’ai taunuu mai i le la’asaga lona lua, tali atu i folafolaga ma o se manulauti na mafua ai ona manatu e fia tauva mo le tofi o le atunuu. Ua mautu fo’i o ma’ua manatu ma fuafuaga, e ao ina fa’ataunuu folafolaga na faia ma fa’afofogaina e le atunuu atoa.”

“Ona o i tatou na tutu fa’atasi mo lenei fa’amoemoe, o le a toe fa’atalosagaina lo outou sapaia ma mau fa’atuatuaina e outou ma’ua taumafaiga, filifiliga ma fa’aiuga o le a faia mo so’o se mataupu e alia’i mai. E mautinoa o le a i ai nisi o outou e le malilie I nisi o fa’aiuga ma te faia, ae o iina e galue mai ai lou mau fa’atuatuaina o ou ta’ita’i na e filifilia.”

“Ma te mana’omia la outou sapaia o i ma’ua e oo lava ina tula’i e fa’atino le tofi sa naunau i ai. Ma te manaomia a outou tatalo. “O le tatou faiva i le taimi nei, o le tutu fa’atasi ma taumafai faatasi, galulue ma tatou fausia fa’atasi se malo e mau fa’atuatuaina e i tatou uma. O ai ma te talosaga i ai mo le fa’amalosi’au mai i taimi faigata o le galuega, ia outou alofagia e mana’omia la outou tatalo."

I lana toe upu sa ia fa’afetaia ai le matagofie o pesega ma vi’iga o le Atua i le sauniga. “Ae ou te fa’ailoa atu, e matua sili atu pesega a le matou aufaipese i Nua ma Seetaga i sauniga uma lava e faia a le matou ekalesia. Fa’afetai mo vi’iga o le Atua, i le aso lenei ua matua 100% lava.”

O le upu fa’amalosi a le Atua sa saunia lea e le susuga le Fa’afeagaiga EFKAS i Nua ma Seetaga, lea sa ia fa’aautu ai lana lauga, “E avanoa le Atua i Taimi Uma!”

FA’AMANUIA ATU AUMUA AMATA - KOVANA & SUI KOVANA FILIFILIA

Ua mae’a fa’ailoa atu e Uifa’atali Amua Amata Radewagen ana fa’amanuiaga ma le fa’amalo i le afioga le Kovana filifilia Lemanu Peleti Mauga ma le susuga le Sui Kovana Talauega Eleasaro Ale ma o la’ua faletua, ina ua a’e manumalo o la’ua faiva i le palota 2020 e ta’itaia le malo fa’ateritori o Amerika Samoa.

“Ua ou nofo sauni e matou te galulue fa’atasi nei ma ta’ita’i ua filifilia e le atunuu, aua o le mea e ao ina faia e i matou uma ua mae’a filifilia e le atunuu ia matou galulue fa’atasi e tautuaina i latou i mea e tatau ma agava’a ai le atunuu ato. E aofia faatasi uma i matou o taitai tofia o le faigamalo, taitai uma o le fono faitulafono ma lo’u fo’i sui fa’atauva’a,” o se vaega lea o le fa’amalo a Aumua.

“Ou te le o masalosalo i lo matou sao e mafai ona faamautu mo le mamalu lautele o le atunuu pe afai o le a matu tutu faatasi ma galulue fa’atasi e faatino matou faiva ua tofia ai, ia mautinoa ua matou ave le fa’amuamua i le tautuaina o le atunuu lea ua nofo sauni e tauto e tautuaina.”

“O le a ou faia le mea sili, i le va o le tatou malo ma o tatou manaoga e fia fa’atino pe feso’ota’i fo’i ma le Konekeresi, fa’aauau fo’i nisi o galuega o lo’o tatau ona fa’amae’a lelei mai, ma ua mae’a fa’ailoa mai fo’i nisi o manaoga o le atunuu, ua taumafai ia maua ni tali mo nei fanoga uma. E mana’omia lava ona tatalo mai mo matou faiva. E galulue feso’ota’i i matou uma ina ia tautuaina lava Amerika Samoa ma ona tagata”.

FAUSIA TANE VAI – ITUAIGA FOU I LUGA O LE MAUGAOALII UTULEI

I le taimi nei ua toetoe a mae’a le fausaga o le Tane Vai tele I luga o le Maugaoali’i i le nofoaga lava sa fa’aaogaina lea mo le Ato po’o le Cable Car. Ua fa’atautaia lea galuega e le Kamupani Faufale & Auala a Tony’s Construction Comapany.

Ua fa’ailoa mai ua ese ai lava le fausaga o lea tane, ona ua mae’a i ai le pa ma’a fa’asima ua sautualuaina ai le tane lava latou, ma ua avea o se ituaiga fou ua fausia i le tatou nei malo. Ua fa’atuina fo’i le tane lea i le nofoaga maualuga, o le tumutumu mauga o Maugaoali’i. 

O le nofoaga lea sa i ai muamua le tane vai apa, peita’i ua ese le fausaga o le tane fou lenei, ma o le a i ai fo’i ma suiga o paipa mo le sapalai o le suavai e toe fa’atautaia mai  laina uma e fesoota’i ma lea  tane vai fou.  O lo ua vaava’aia toto’a lea galuega e ali’i Inspector o galuega o le vai a le ASPA Samuela ma Greg.

Ua  fa’atautaia fo’i galuega o le fa’atanoa vai i le alatele o lo ua suaina ma fa’alelei nei i Leapaga -Fagaima Road ma ua fa’aigoaina lea galuega o le Vai #7. Ua siitia ese ma fausia le pamu vai fou mo lea itu o le atunuu, ona o lea ua sua e fa’aleleia le alatele lea. O lo’o galulue ai le Happy Construction i lea galuega. Ua mataituina lea galuega e Andre Milford ma Samuela fo’i.