Ads by Google Ads by Google

TALA I VAIFANUA


[ata: foa'i]

Pago Pago, AMERIK SAMOA

2 ITUAIGA VAILAAU MO LE CORONAVIRUS – ESEESE TAIMI E AOGA AI & MALULU E TEUINA AI:

Ua fa’ailoa mai e lua ituaiga vaila’au mo tui puipuia mai le COVID-19 ua faailoa mai, peita’I o lo’o ua fa’ailoa mai ma le ituaiga malulu e teu ai ma le umi fo’i e aoga ma ua tatau ona fa’aaogaina vave.

O le ituaiga vaila’au muamua o le Pfizer ma le isi o le Moderna. O le Pfizer, ua manatu le Komiti Fa’afoe ua tofia fa’apitoa mo le fa’atautaiga o tuiga i le atunuu, ona o lea fo’i ua maua mai i le taimi nei, o le a aoga lea mo le aufaigaluega lea e ta’imua i galuega tau tuiga o le atunuu, ma suesuega o tagata o ulufale mai po’o maua i le  Covid-19.

Ae o le Moderna, le vaila’au lea fa’ato’a mafai ona maua mai i le amataga o le tausaga fou, ua sili ona fa’atali i ai le mamalu lautele o le atunuu, e fa’aaogaina. O le Pfizer, ua fa’ailoa mai e tatau ona teuina i le 80 tikeri Fahrenheit ae na’o le 20 aso le umi e teu ai ae ua tatau ona fa’aaogaina. O le Moderna e teuina lea i le 20 tikeri Fahrenheit ae 4 masina e teuina ai ae ua tatau loa ona fa’aaogaina.

Ua fa’ailoa mai o le a tufatufaina mai le Vaila’au o le Pfizer e amata nei i le amataga o Tesema 2020. O le vaila’au o le Moderna, o le a fa’ato’a tufatufaina mai i Amerika atoa ia Ianuari 2021.

Ua fa’ailoa mai le manatu o le Komiti Fa’afoe mo le Fa’atautaiga o Tuiga mo le Coronavirus, o le a latou taliaina uma vaila’au e lua, o le Pfizer mo le aufaigaluega e ta’imua i le tuiga o le a fa’atautaia mo le atunuu atoa, ae fa’aaogaina le vaila’au lea e mulimuli to’ai taunuu mai mo le mamalu lautele o le atunuu.

O le fonotaga o le aso o le a fa’amautu a’ia’i ai le fa’aiuga ale Komiti Fa’afoe o Tuiga Puipuia mo le Covid-19, ma fa’aalia ai fo’i ni manatu o le afioga le Kovana Sili ma i si sui uma lava o le Komiti Fa’afoe o le Coronavirus.

Ua fa’ailoa mai ua mae’a ona talanoa sa’o lava Kovana Lolo Moliga i le vaega a le Operation Warp Speed o le matagaluega o le Soifua Maloloina a le Malo Tele ina ia mautinoa ua fa’auia fo’i se sao o Amerika Samoa ina ia vave fa’auia mai le oka o vaila’au mo tuiga a le teritori ina ia mafai ona vave fa’aoo tuiga mo tagata uma o Amerika Samoa.

O le vaiaso fo’i ua te’a, na tofia ai e Kovana Moliga lana Komiti Fa’afoe o le Tuiga o le atunuu i vaila’au e puipuia mai ai i latou mai le maua i le Covid-19.

O i latou e to’a 17 o sui o ali’i ma tamaitai foma’i uma lava ma e o galulue i tofiga ta’ita’i o vaega eseese o le Matagaluega o le Soifua Maloloina, se’i vagana ai Iulogologo ma le Ofisa o le Kovana Sili ma le tamaitai Loia Sili o Mitzie Ta’ase.

I le fa’atasiga i le Gov. Rex Lee Auditorum, sa fa’ailoa atu ai e Kovana Lolo Moliga lona agaga fa’afetai ina ua fa’ailoa aloaia mai e le Operation Warp Speed a le Matagaluega o le Soifua Maloloina a le Malo Tele, ua i ai nei vaila’au mo tuiga e puipuia mai ai tagata i le a’afia i le Covid-19, ma o le a tufatufaina mai ia Tesema 2020, ma o le a fuafua le aofai o nei tui e auina mai i le aofai ua maea faitauina o le atunuu.”

 

Ua aofia i nei foma’i ua tofia mo le Komiti e fa’afoea Tuiga i le atunuu, ua aofia ai foma’i mo le vaega o Vetereni  O lo ua ta’ita’ia lea Komiti Fa’afoe e le susuga le CEO o le Falema’i Faumuina John Faumuina ma le Fa’atonu o le Soifua Maloloina Motusa Tuileama Nua, ma ua atoa i ai le to’a 19 o sui tofia mo lea Komiti.

FA’ATULAGA LE ULUA’I MALAGA FA’AFO’I MAI TATOU TAGATA IA IANUARI 19, 2021:

Ona o lea ua alia’i mai ataata o taulelei, ua amata fo’i ona nofo sauni le atunuu mo le taumafaiga e fa’atautaia tuiga puipuia o le Covid-19, o lea ua fa’ailoa ai e Kovana Lolo Moliga, ua ia manatu mo Ianuari 19, e amata ona galulue aga’i i ai le Matagaluega o le Soifua Maloloina, e fa’ataunuu ai le malaga o tau fa’afo’i mai ai o tatou tagatanuu mai Hawaii.

O le fa’aiuga lea a Kovana Lolo Moliga, na fa’ailoa lea i lana tusi ia Novema 16, sa fa’alauiloa ai lona lea fanoga, ma ua fa’atulaga ai ina ia galulue fa’atasi le tatou matagaluega o le Soifua Maloloina ma le vaega a le Hawaii Quarantine Operation, ia fa’ataunuu manuia lea taumafaiga.

E tusa ma le fa’atulagaga sa fa’alauiloa e le DOH ma le CTF i fonotaga sa faia i masina ua te’a, sa fa’ailoa ai o le lisi o i latou e muamua malaga mai i nei malaga e tuufa’atasia lea e le matagaluega o le Soifua maloloina ma e galulue feso’ota’i ai ma le Ofisa o le Loia Sili ona o i latou sa muamua talosaga mo avanoa e fia fo’i mai ai i aiga ma le atunuu.

Ua fa’atulaga fo’i o le a nofo va’ava’aia uma i latou nei e malaga mai i Hawaii mo le 10 aso a’o le’i malaga mai. O le a latou nonofo i se faletalimalo ma ua i ai fo’i le PIHOA i Hawaii ina ia latou galulue feso’ota’i ma lea taumafaiga ia mautinoa o lo’o ua fa’ataunu’u sa’o ma lelei.

E ese mai le nofoia o nofoaga va’ava’aia toto’a i Hawaii o le a toe nofo va’ava’aia fo’i i latou i Amerika Samoa nei, mo le 14 aso e afua lava i le tulaueleele mai o le aumalaga.

Ma ua manatu fo’i Kovana Lolo Moliga, ia fa’atulaga lelei se ala e mafai ai ona mautu le lisi o i latou e tatau ona mua’i malaga mai, ma ia faailoa a’ia’i le sui tonu e fa’afeso’ota’i pe afai ua fia iloa patino pe o e malaga mai i le ulua’I malaga. O le to’atele ua manatu le Kovana e malaga mai muamua e na’o le 140, ua na’o se vaega o i latou ua fa’ailoa mai e tusa ma le 600 ua i ai i Hawaii i le taimi nei e fia fo’i mai.

Ua talia fo’i e Kovana Lolo le fanoga ua faatulaga ai le Faletalimalo o le Tradewinds e fa’aaoga fa’atasi ma le Falema’i na fausia fa’apitoa mo lea fa’amoemoe i Tafuna e nofovaavaaia ai i latou uma nei o le a malaga muamua mai ia Ianuari 19, 2021.

Ona o lo’o fa’aalia pea e le matagaluega o le Soifua Maloloina e le o lava tagata faigaluega mo le tali atu i se taimi e ono a’afia ai nisi i le Covid-19, o lea na toe fesiligia ai lava e Kovana Moliga, “Poo le a la se faiga fou ua fuafua ma fa’atulaga e le matagaluega o le soifua maloloina e latou te faia ai suesuega o le toa 140 o le ulua’i pasese lea o le a malaga mai i le amataga o le tausaga?”

“E mautinoa lava o le tele o tiute uma o le nofova’ava’aia o lenei to’atele o tagata e pa’u tonu lava i le mataglaueg ao le soifua maloloina, ma ua toe fesiligia ai, pe ua lava tapena i ai le aufaigaluega a lea matagaluega pe leai? E le gata i lea ae pe ua lava fo’i mea uma e fa’aaogaina?”

“Ua fa’atulaga lava le aso 19 Ianuari mo le aso e fa’ataunuu ai lea ulua’i malaga peita’i e mafai lava ona toe suia pe afai o le i ai nisi mea e ao ina fa’amautu e le’i lava tapena mo le fa’amoemoe i lea taimi. O le a tatou galulue atu lava mo le fa’amoemoe e fa’ataunuu i lea aso le malaga, ae a i ai ni fa’aletonu, o le a toe tu’u atu lava i tua le aso i le mea e talafeagai ai.” O se isi lea fa’amatalaga a le Kovana i lana tusi ua ia fa’ailoa ai ua manatu e fa’ataunuu lea malaga.

Sa ia fa’afetaia le fa’atonu o le Ofisa o le Initeria Insular Affairs, Nikolao Pula i lana fesoasoani tele ina ia mafai ai ona fa’aoo mai i fanua ma aiga i latou o lo’o opea i fafo ona o le fa’asa o le Covid-19.

Ua ia fa’afetaia fo’i le tamaitai o Eileen Tyrell ma le vaega a le Tagata Tutu Fa’atasi Alliance ona o le latou tula’I mai ma fa’ailoa aloa’ia le tele o a’afiaga o lo’o feagai ma i latpu ua le mafai ona toe taliu mai i fanua, ona le fa’asa lenei. O se taimi muamua foi lea ua fa’ailoa ai se taofi o le afioga Kovana Lolo Moliga e tusa o le taumafaiga a le Tagata Tutu Fa’atasi Alliance.