Pago Pago, AMERIKA SAMOA

FA’AMANUIA MAI LE KERISIMASI & TAUSAGA FOU – FAIPULE UIFA’ATALI AMATA

Mo lenei vaitau fiafia o le tausaga, ua molia mai ai fo’i fa’amanuiaga o le Kerisimasi ma le Tausaga Fou fiafia mai le tatou Faipule i le Konekeresi a le Malo tele, Uifa’atali Aumua Amata i le atunuu pele. Ua ia toe fa’atepa fo’i i tatou uma I ala fita sa tatou savalia mai i lenei tausaga o le a tau faaiui’u ae o le alofa o le Atua ua tatou manuia mai ai pea lava.

“Pe afai tatou te vaai atu i le 2021, e matua anoanoa’i ala e tatau ai ona tatou matua faafo’i le fa’afetai i le Atua, aua ana le seanoa lana puipuiga malu, e tatou te le aulia mai e i tatou uma lenei tausaga fou. Ua leai ma se tasi o le atunuu o lo ua lutia le soifua i le fa’ama’i oti o loo ua a’afia ai le aotelega o atunuu o le lalolagi, a’o lona a’ao ta’ita’i ua malutia ai lo tatou atunuu itiiti lava mai lenei pagatia.”

“Ua faliu fo’i e fa’alogoina le oi o i latou ua opea i fafo mai o Amerika Samoa, mai o latou aiga ma laufanua, ona o le fa’asa o lo’o fa’amalosia, ia le maua lava nisi o le atunuu i le fa’ama’i i le lotoifale o tatou lava aiga, le fa’alapotopotoga o i latou ua a’afia ma o lo’o una’ia malosi le mau ina ia tatala mai se avanoa e toe ulufale atu ai i latou, Tagata Tutu Faatasi Alliance o Amerika Samoa, ua matou lagonaina lo outou pagatia, e taumafai pea i auala ua mafai ai ona oo atu se fesoasoani e tausoa ai le mafatiaga o feagai ma outou.”

“E faafetaia le avanoa ua maua ai vaila’au mo tuiga e puipuia ai mai lenei fa’ama’i, ua maua tonu ae ua tau fa’aiuiu lenei tausaga, ma ua fa’agae’etia i tatou uma i le agaga fa’afetai, ona o lea ala, ua manino ai le mata o le vai, e le o toe mamao ae tatala feoa’iga i le va o si tatou teritori ma le lalolagi atoa. Peita’i e fa’afetai tele i le maumaua’i o le fa’amoemoe ma le fa’aiuga a Kovana Lolo Moliga ma Lutena Kovana Lemanu P. Mauga, lea fo’i ua filifilia e ta’ita’ia le malo i le faigamalo fou, mo lo oulua mataala ma tumau o le fa’aiuga, ina ia mautu le saogalemu o tagata uma o Amerika Samoa i ona laufanua.”

“O le fa’afetai i ta’ita’i ae maise le Atua, aua o lenei ua amata tufatufaina atu vaila’au mo le puipuiga o le atunuu mai le Coronavirus, ae leai lava ma se tasi e to’atasi o le tatou malo ua maua i le Covid-19.”

“Ona o lea ua maua tui puipuia nei, ua amata fo’i ona va’ai toto’a atu i se suiga lelei ma le si’itia o le tulaga o le tamaoaiga tausi ma le atina’e o le tatou Malo, ona o le a toe fa’asolo aluga tuai o galuega sa i ai, a’o le’i lutia le laloagi atoa i lenei fa’ama’i pipisi tele. O le a tatala ai ma femalaga’iga i so’o se malo.”

“O se aso fiafia tele o le a toe molimauina ai le fa’asologa ona toe fa’afo’ia atu o tatou tagata i o tatou laufanua ma aiga.”

“E le galo foi a tatou fanau uma ma aiga o lo’o opea i fafo ona tiute o sui o aiga i vaega eseese o tautua ai i le Vaega Au a le Malo Tele, o nisi ua na’o fanau o lo’o tiute ma ia talosia uma pea o latou faiva aua le fa’amautuina o le saogalemu o le tatou atunuu atoa, i setete eseese fa’apea ma teritori o le Iunaite Setete ma isi malo uma o le lalolagi. Fa’amalo mo lo outou faiva ma la outou tautua tuavae i lo tatou malo ma o tatou tagatanuu uma.” 

Sa ia fa’ailoa mai fo’i nisi o mea ua fuafua e ono fa’atele ai manuia mo tatou tagata ma pisinisi pe a mae’a fa’auia mai e le Malo tele mo i tatou, ae ao pea ona talitalia aiaiga o lo’o fa’aauau i le Laumua e le o toe mamao, ona fa’ato’a manino lea o nei alamanuia.

“I le taimi nei i le Konekeresi olo’o fa’amaea ona aiaia le pili fa’aulu mo le faatupega e fesoasoani I pisinisi laiti, ma o le aoga tele lea e si’itia ai teisi le tinoitupe e fa’atautaia ai le Malo o Amerika Samoa, toe amata ai ona fa’aa’e le fesoasoani mo totogi o tagata faigaluega Payroll Protection Program, fa’auia mai ma le fesoasoani i le tamaoaiga na a’afia o le Malo o Amerika Samoa i taimi na lutia ai i fa’asa o le Covid-19, mafai foi ona fa’atutu nogatupe mo pisinisi na tetele a’afiaga ona o le fa’asa o le Covid-19 ua tapunia ai latou galuega ma ofisa, ma ua mafai foi ona fa’atupe mai ma le faiga o tuiga o tui puipuia o le Covid-19 ma le 3% lea la’a siitia ai totogi o fitafita tiute uma a le Vaega Au atoa a le Malo Tele, ae aofia ai fo’i ma fesoasoani mo mea taumafa mo le tausiga o le mamalu lautele o le atunuu e vaivai le tamaoaiga maua.”

570 TUI PUIPUIA O LE COVID - 19 MAE’A FAIA  –  ASO LUA TALU AI

Talu mai le aso Lua ua te’a, ua fa’ailoa mai ai fa’amaumauga o i latou ua mae’a faia tui puipuia o le Covid-19 ua tula’i mai i le aotelega e 570 i latou. O i latou nei ua mae’a faia tui ua afua mai i le aumalaga lea e fia o i fafo ia Ianuari, fa’atasi ai ma i latou o e ta’imua mai i galuega tima’i ma galuega puipuia o le atunuu i le ulufale mai o se tasi ua a’afia i le Covid-19 i le atunuu.

Ua aofia i nei sui ua mae’a tuia i le tui lenei, o le afioga le Kovana Sili Lolo Moliga ma le fa’atina o le atunuu, fa’atasi ai ma le fa’atonu o le Matagaluega o le Soifua Maloloina Motusa Tuileama Nua, e vasega  ali’i ma tamaitai Foma’i ma Tausima’i uma ae maise sui o lo’o galulue i Potu Suesue o le tatou matagaluega o le soifua Maloloina ma le falema’i tele i Faga’alu, ma le vasega o tagata faigaluega i luga o le Uafu Tele i Fagatogo ma le Malae Va’alele i Tafuna.

O le aso Lulu o le vaiaso na te’a o le lona fa ai lea o aso talu ona faia tuiga o le Tui Puipuia mo le Coronavirus, peita’I ua fa’aaogaina ai le ituaiga tui o le Pfizer.

Ua fa’ailoa mai e le ali’i foma’i o fa’amai pipisi, Dr Aifili Tufa, “O lea ua tula’i mai le aofai o tagata e mafai ona tuia i le aso e 200.”

Ua taofia la tuiga mai le aso Lulu na te’a nei se’ia fa’ato’a toe fa’aauau nei tuiga i le aso Gafua ananafi.

Peita’i mai le to’a 570 o i latou ua mae’a faia le tui muamua o le Covid-19, ua na’o le to’alua na toe fo’i ane i le falema’i ona ua i ai se suiga ua va’aia i o la’ua tino. O i la’ua nei ua pata le tino ma ua mageso na taofia mo sina taimi i la’ua i le ER ma ua va’aia ua toe te’a malie ese ina ua togafitia e foma’i tiute. Ua toe te’a i la’ua i tua ae le’i atoa le 24 itula o taofia ai.

TOAI TAUNU LE MV MANUATELE I O TATOU LAUFANUA

Na va’aia le taula mai o le MV Manu’atele i lo tatou Gataifale i le aoauli o le aso To’ona’i na te’a, ma ua iloga ai ua to’ai i fanua lea folauga mamao sa fa’atautaia mai mo le tasi le vaiaso atoa.

Na faia le sauniga lotu e faafetaia le alofa o le Atua i le au malaga ma ua faatulaga fo’i ina ia nofova’ava’aia i latou ona sa malaga mai le setete o le lutia fo’i i le Coronavirus.

O le sauniga sa ta’ita’ia lea e Rev Iasepi Ulu o Fagatogo EFKAS ma ua vi’ia lava le agalelei ma le alofa o le Atua ua to’ai taunuu le malaga.

Sa saunoa le le afioga le Kovana Sili Lolo Moliga mo lana saunoaga fa’apitoa ma ia tolaulauina ai lana lisi, o i latou e na te fia fa’afetaia a’o le’i uma lana nofoaiga.

“Ona sa tuua lava e lenei aumalaga le saogalemu o latou aiga, ae malaga fa’apitoa atu ina ia auina atu le va’a, fa’atali se’ia mae’a lipea ona fa’ato’a toe taliu mai ai lea, o se sao ua tatau ona fa’afetaia.” O se tasi lea o vaega o le tautalaga a le afioga Kovana Lolo Moliga.

Na tuua iinei e le MV Manu’atele ia Iuni 2020, ae o lea ua faato’a toe faato’ai mai ia Tesema 26, 2020. O se taimi umi ma o le umi fo’i lea o valavala le auva’a ma o latou aiga o e pele ia i latou. Na faia galuega lipea nei i le Marisco Shipyard i Honolulu.

Na fa’aluaina fo’i le fa’afetai na siitia e le Kovana e le tamaitai fa’atonu o Uafu ma Malaeva’alele Taimalelagi Dr. Claire Poumele.

Na fa’afetaia fo’i le fa’atupega mai le Ofisa o le Initeria e $1.6 miliona, lea na mafai ai ona toe fa’aleleia mai lenei va’a mo le Manu’atele.