Ads by Google Ads by Google

TALA I VAIFANUA


[ata : foa'i]

Pago Pago, AMERIKA SAMOA

 

FAIGALUEGA FESO’OTA’I MA TA’ITA’I OLE FAIGAMALO ILE OFISA O LE KOVANA

 

O le malosi ma le mautu o fa’amaumauga ma tala feso’ota’i ma fofoga o le faigamalo i ona ta’ita’i, e fa’amoemoe tele i la’ua aufaigaluega o lo ua tuu atu i ai le la’ua fa’amoemoe, ua fa’auia atu fa’amaumauga ma mana’oga o lo’o mana’omia e i la’ua ona silafia i so’o se mea o augani, mana’omia ma fia silafia e le atunuu lautele. O lona uiga, o le la’ua aufaigaluega o lo’o nafa ma faiva eseese i le la’ua Ofisa autu, e ao ina mata’alia ma fa’amaoni i taimi uma e latou te talia ai nisi e soloa’i atu mo le fia fa’asoa, sailia finagalo pe fia maua fo’i se fesoasoani mai ta’ita’i o le faigamalo ua tula’i nei.

 

E mautinoa lava, a suia le faigamalo i so’o se taimi e mae’a fa’atauto ai, e suia fa’atasi atu ai fo’i ma le aufaigaluega totofi, sei vagana ua toe tula’i mai se faigamalo tuai.

 

O le Pule o le Aufaigaluega a le Ofisa o le Kovana ua tula’i mai ai Tuimavave Tauapa’i Laupola, lea sa avea ma CPO o le Matagaluega o Oloa a le Malo i le faigamalo na te’a atu nei. E umi fo’i lona silafia o le afioga Kovana Lemanu P. Mauga ona sa la’ua tautua vavalalata i le US Army Reserve ma le vaega au.

 

O le sui Pule o le Aufaigaluega Ofisa o le Kovana o Lydia Amisone, ua loa lana tautua i le Matagaluega o A’oga, lea sa mulimuli nei fa’auluulu i ai le ERATE a le Matagaluega o A’oga i le faigamalo ua tuana’I a Kovana Lolo Moliga.

 

O le fesoasoani muamua i le Kovana e tua i ai i taimi uma ua tula’i mai ai le susuga Timusa Tini Lam Yuen, lea sa tula’i mai i le tofi Faipule mo lona itumalo o Tualatai.

 

O le Fesoasoani muamua mo le Lutena Kovana Talauega E. Ale o Neil Pilcher, lea sa faigaluega i le ASEPA ma sa avea ma Pule o le Aufaigaluega i lena matagaluega o le tatou malo.

 

O le fesoasoani muamua i le Pule o le Aufaigaluega a le Kovana o Melesio Gurr lea sa avea ma se tasi o le aufaigaluega mo le Tapenaga o le Ituaiga Faigamalo e manana’o i ai Amerika Samoa, toe iloilo le Fa’avae o le Malo ma aiaiga o lo’o feso’ota’i ai ma le malo tele o Amerika i le Faigamalo ua te’a nei.

 

O le Faufautua mo Aiaiga o Feagaiga ua tuuina i ai le susuga Patrick Ti’a Reid, lea fo’i sa faigaluega i le Matagaluega o Fefa’ataua’iga ma o ia fo’i o le Taitaifono o le Vaega Fa’aupufai o Malo a le Temokalasi i Amerika Samoa nei.

 

O feso’ota’iga ma fa’amaumauga ua tuuina lea faiva i le susuga Fiafia Sunia, o ia fo’I lea sa ia fa’atautaia ia galuega I le vaitaimi o le faigamalo a Tauese/Togiola ma Togiola/Faoa.

 

O le Pule o le Tupe i le Ofisa o le Kovana o Victor Tuiasosopo, o se tasi foi sa faigaluega i le ASEPA, ma sa ia va’aia fo’i le Tupe Fa’asoa a lea Matagaluega.

 

O le a va’aia le aufaigaluega atoa i nisi e fa’afaigaluega ma latou totogi ua tuuina lea i le tamaitai o Mealefu Malemo Tausaga, lea fo’I sa tula’i i lea lava tofiga i le Matagaluega o le Tupe a le tatou Malo I le faigamalo ua tuana’i.

 

Fuafuaga ma fa’atautaiga o galuega fa’atino a le Ofsia o le Kovana o le tuuina lea ia Tiana Trepanier, o se tasi sa galue o le Pule Aoga o South Pacific Academy ma o se isi fo’i sa tautua o le Pule Aoga o le Manumalo Academy.

 

O le Taitai o Loia Fautua a le Ofisa o le Kovana o Jason Mitchell lea sa galue o se Loia mo le Lautele ma o le Consumer Protection Bureau o le Matagaluega o le Legal Affairs a le Malo, na fa’amavae lea i le tausaga ua te’a, ma fa’atuina lona ofisa Loia tumaoti.

 

Failautusi a le Kovana ua tula’I mai ai Sally S.L. Faumuina, lea fo’i sa avea ma Failautusi a Lemanu Peleti Mauga a’o avea ma Lutena Kovana mo tausaga e 8 o le faigamalo ua tuana’i nei.

 

O le failautusi a le Sui Kovana Talauega Eleasalo Ale o le tamaitai o Filoi Fuavai Burgess, o lana failautusi lava fo’i lea a’o avea ma Loia Sili a le Malo o Amerika Samoa i le taimi o lana tautua i le faigamalo ua tuana’i nei, Kovana Lolo Moliga ma Lemanu P. Mauga.

 

SAINIA PRES. TRUMP PILI AOAO NISI E FAIFAIVA – I ITUAIGA FAIGAFAIVA ESEESE:

 

Ua fa’afiafiaina le tatou Faipule I le Konekeresi, Uifa’atali Aumua Amata ina ua mae’a sainia fa’aletulafono e Pereseetene Trump le pili ua fa’aigoaina “Young Fishermen’s Development Act H.R. 1240.” O lea pili o le a sili ona aoga mo le au faifaiva o le tatou atunuu.

 

Ona o lea ua matua to’atele foi i latou ua mae’a gasolo atu ma fa’atumu a latou talosaga i le vaega o Faigafaiva mo le penefiti ua mai mai mo lea tautua, o le avanoa la lenei e mafai ai ona toe aoaoina lelei i latou i ituaiga faigafaiva eseese, e mafai ona faaleleia atili ai latou tomai tau faigafaiva, ma atina’e ai ni a latou taumafaiga e maua ia tele ni I’a, sapalaia ai Kamupani I’a ma faleoloa, ma fa’ateleina ai le tamaoaiga tausi o aiga Samoa.

 

O le tatou sui i le Koneneresi Uifa’atali Amata sa la’ua faaulua lenei pili, soo tau’au atu i le sui na ia tusia ma taumafai e fa’aulu mai i le Maota lea pili, Le Faipule mi Alaska Con. Don Young, Con. Jared Golden [D. Maine], ma Con. Seth Moulton [D. Massachusetts]

 

“Ua mae’a sauni mai fo’Ii le afioga i Senatoa mai Alaska Sen. Dan Sullivan ma ia senatoa e matele ina fa’amoemoe i faigafaiva latou setete ina ia pasia lenei pili aoga mo i tatou i le Senate ma fa’auia ai loa i le Peresetene mo lana saini e fa’atulafonoina ai,” o se tala fiafia lea a Uifa’atali i lea pili ua pasia e le Konekeresi.

 

Ua fa’ailoa i le fa’aupuga o lea pili numera HR 1240, le matua maulalo lava o le faitau aofai o nisi o tupulaga talavou e fiafia i lea faiva aoga mo le atina’e o setete ma teritori o Amerika, o lea ua tatau ai ona toe tagai i ai ta’ita’i o le Iunaite Setete ina ia aoaoina fanau talavou ma toe fa’aosofia le naunau o i latou e fiafia e faia lea taleni aoga mo galuega atina’e i o latou malo.”

 

Ua le gata la i le aoaoina o i latou i ala e mafai ai ona fagogota, fa’aleleia atili latou tomai o i ai i tulaga o fagotaga, ae ia aoaoina lelei fo’i i aiaiga ma vala o le tulafono tau faigafaiva i le aloalo po’o le moana sausau i sone o latou malo po’o sone fa’avaomalo fo’i.

 

“O se tala fiafia tele lea mo tatou tagata fagogota, ua le gata i e o i ai vaa fagota ae ua mafai ona aoaoina nisi fa’apitoa i faiva tau fagota ia mafai ona fa’aosofia latou naunau e fia faia le matata lelei, ma i’u ai ina auva’a i se va’a fagota, pe fa’atautaia foi sona va’a fagota alia e amata ai lana taumafaiga.”

 

“O lenei vaega tupe o le a toina mo Amerika Samoa o le a mafai ona fa’aagava’a ai le to’atele o le tupulaga ua mae’a tusia nei igoa i le lisi umi a le DMWR, aua ua maea ai ma sui e to’alua sa va’aia ma molimauina latou fagotaga, ia avea ma tautai faifaiva o le atunuu i le lumana’i,” o se tala fiafia lea a Vaifanua o le DMWR.

 

“E le gata i lea ae ua maua mai fo’i lea vaega tupe ina ia mafai ona soso’o mai ma le $4.4miliona lea na maua mai e fa’aleleia ai fagotaga ile atunuu, pisinisi laiti tau fagotaga ma aoaoga faapitoa ina ia agava’a tagata faifaiva i le olaga i luga o va’a fagota ma tomai e mana’omia mo e folau ma fagogota i le tai,” o se fa’amalosi mai lea a le tatou faipule i le Konekeresi.