Pago Pago, AMERIKA SAMOA

TUSI FAITIO FA’ATONU LE TUMAU DHR  – TAULIMAINA E LE FONO FAITULAFONO:

Na fuafua tatau lava le tusi na taulimaina e sui mamalu uma o le fono faitulafono, o ni fa’asea e tusa o le amataga o le galue ai o le sui fa’atonu filifilia ia Lynn Pulou Alaimalo. O lea tusi ua fa’ailoa ai lona oo atu ma ua le feutaga’ia lelei ma nisi ua galulue i tofiga o le a suia e ia i le Ofisa o tagata faigaluega a le Malo.

O le tusi ua sainia, “O tagata faigaluega tumau a le Malo ua so’ona fai ma a’afia o latou galuega i le suiga o le pulega ua i ai nei.” Ua le lisia se suafa patino, ae ua fa’alaua’itele fa’apea ona sainia lea tusi. O le tusi ua fa’atuatusia i le afioga le Kovana Sili Lemanu Mauga, Sui Kovana Talauega Ale, ALJ Marie Ala’ilima, taitai o le Fono Faitulafono faapea ai ma faipule ma senetoa.

Fa’ailoa i le tusi, “O le ulufale mai o tofiga fou e ta’ita’ia le Matagaluega o tagata faigaluega a le Malo, ua ulufale mai lava ma le pulega tau fa’amata’u, ua fa’amaina lagona o nisi o le aufaigaluega o lo’o faigaluega tumau pea i lea matagalega, ma ua ia fa’aaogaina gagana e le talafeagai ai ma se ta’ita’i.”

Ua fa’amatalagaina i lea tusi, o nisi o tagata faigaluega i le matagaluega o Tagata Faigaluega a le Malo, lea ua fesuia’ia tofiga ma tulaga e galulue ai, e aunoa ma tusitusiga e fa’ailoa mai ai nei suiga o tofiga ia i latou, ae ua na’o na fa’atonuina fa’amalosi. O lea faiga ua le tusa ai ma ala o le galuega ua mae’a fa’ataoto mai fa’aletulafono o tagata faigaluega ma tofiga e galulue ai.

“O le fa’aoo mai o le fa’atonuga tu’usa’o i nei tagata faigaluega o le aufaigaluega a le matou Ofisa, ina ia tu’ua le laulau ma le nofoaga ia fa’aavanoa mo nisi o le a fou mai i le matagaluega, o se faiga ua le tusa ai ma tulaga o suiga tofi ma ala e fa’aoo mai ai le suiga i e sa galulue i nei tofiga muamua,” se tasi lea o lagona ootia ua fa’ailoa mai i le tusi.

“O tofiga nei ua oo mai ma le suiga tofi fou lenei a le faigamalo, e le o fa’atupea mai le paketi fa’asoa a le matagaluega. Ua le o aofia ai foi nei tofiga fou i le lisi o le fa’atulagaga o le matagaluega o Tagata Faigaluega a le malo. Ma ua leai se faiga fa’apea ua matauina e fa’apea ai ona fa’atula’ia ni avanoa fou i totonu o le Ofisa, e ao ina talosaga mai e talia atu le talosaga mo avanoa fou i mataglauega ta’itasi.”

O na mea ua lisia mai, o mea ia ua le mulimulita’ia e le tamaitai Sui Fa’atonu fou o Tagata Faigaluega a le malo. Ua faailoa mai ai foi le tamaitai ua avatua e avea ma Sui Fa’atonu o lea Matagaluega, o se tasi sa galue i le Ofisa o le Kovana ua mae’a nei lana nofoaiga, ona o le ua litaea le tamaitai sa Sui Fa’atonu.

E lua sui fa’atonu ua masii mai ma le Sui Fa’atonu tofia a Kovana Lemanu Mauga. 

“O a nei mea e maea ona fa’alauiloa mai ua avea ma sui fa’atonu, ma o le a amatalia ona faia a’oa’oga a le matagaluega i le fa’atinoga o tiute fa’apea ma le fa’atulagaga o le matagaluega, ae emo ane le ata ua le toe I ai le sui fa’atonu muamua, ae leai se tala e fai mai i le isi sui fa’atonu o le a tu’ua le atunuu,” o se isi lea mau ua fa’ailoa mai e le vasega o tagata faigaluega ua gugulu i suiga ua faia, ae le mautu lelei.

O le talosaga ua fa’ailoa mai e le tusi lenei, “Fa’amolemole i le faigamalo fou, o ta’ita’i na filifilia, toe taga’i toto’a i sui ua lua filifili pe o agava’a i pulega ma tomai e mo’omia ona latou umia muamua a’o le’i tula’i i nei tofiga. E ese lava fa’ailoga, ae matua osi ma le iloa lelei le va ma isi tagata faigaluega tumau a le malo. O i latou ua tofia mai mo le lua faigamalo, ae suia fo’i i le taimi e agatonu ai.”

O le aso Lulu na pasia ai e le Senate ia Lynn Pulou Alaimalo e avea ma fa’atonu o lea vaega o le malo. O lo’o fa’atalia le iloiloga ma le palota a le Maota o Sui.