Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

195 I LATOU NOFO VA’AVA’AIA  I HAWAII - E MALAGA MAI IA MATI 10,2021:

 

Ua faailoa COVID-19 Task Force e to’a 195 le aumalaga o lo ua nofova’ava’aia nei mo le fa’amoemoe e faimalaga mai ia Mati 10, i le tatou nei malo. Ua fa’ailoa mai fo’i e to’a 120 o nisi sa mua’i fa’amauina o latou suafa i lea lisi, ua latou le manana’o e malaga mai i lea faigamalaga. Ua tele ni mea ua fa’ailoa mai ua mafua ai ona latou le manatu e malaga mai, ma ua avea ma mea ua fai ai si tuai o galuega uma e fa’atino ona fa’amauina ai lea o le nofova’ava’aia a le pasese ua tapena mo mo Mati 10, 2021.

 

Ua fa’alauiloa mai e se puletini ua fa’asalalauina e le matagaluega o le Homeland Security, e tatau ia i latou uma e fia malaga mai i Amerika Samoa  ona lisia o latou igoa I le lisi a le DOH I le latou upega tafa’ilagi website [https://americansamoapublichealth.com/] to undergo medical clearances. Ma le Upega tafailagi a le Homeland Security  [http://www.legalaffairs.as.gov/repatriation-document-upload]

 

O le so’otaga fo’i lea o le a mafai ona fa’auia atu ai lou suafa ma ou fa’amaumauga uma ina ia mafai ona mautinoa ua fa’amauina sou avanoa e te malaga mai ai i malaga toe fa’afoia mai o tagata nuu Amerika Samoa i aiga ma fanua.

 

O le aofai la lea e 195 o i latou ua fa’amautu ane nei i le Hawaiian Quarantine Site i Waikiki Ohana East Hotel Outrigger, ia Mati 10, 202, lea ua atoa nei le 4 aso talu ona i ai i latou i lea nofoaga. O Mati 01, le latu ulua’i tui suesue o le Covid-19.

 

O le tulaga o le peimeni ua mae’a fuafua mo i latou uma e malaga mai e ta’i $500. Mo le nofova’ava’aia ai i nofoaga ua fa’atulagaina a’o le’i malaga mai ma le oo mai fo’i i Amerika Samoa, ua na’o le to’atolu o lea aumalaga ua mae’a totogia latou vaega lena mo le aumalaga mai ia Fepuari 01, 2021.

 

Peita’i o le aumalaga fou lenei mo le va’alele o Mati 10, 2021, e na’o le to’a 10 ua totogia latou vaega tupe e $500.

 

Ua fa’ailoa e Sandra King Young o le Medicaid Office i le tatou teritori, “O le le mafai ona totogia pe sainia fo’I se feagaiga ma le ofisa o le Medicaid e totogia ai e le tagata malaga le $500. lea e fesoasoani ai I le totogia o le nofova’ava’aia, o le a le mafai ai ona e malaga mai i nei faigamalaga toe taliu mai i aiga ma fanua.”

 

O le isi taimi ua mafai ona totogia ai lenei aofai o le seleni, o le taimi lea ua mae’a nofoia ai le nofova’ava’aia i Amerika Samoa nei, ma e mafai ona fesoasoani i ai aiga i le totogia o lea aofai o le seleni.

 

O lo ua fa’atauanau mai pea e le fa’atonu o le Medicaid i le mamalu o le pasese o Fepuari 01 ma Mati 10, 2021 ina ia totogia ia mae’a mai latou siea nei o le totogia o le nofova’ava’aia. Ua mafai ona faia ni peimeni mo lea tinoitupe e totogia e le pasese ua amata nofova’ava’aia i Hawaii ma i latou na malaga mai ia Fepuari 01, 2021 i le ofisa o le Medicaid i Tafuna.

 

I le taimi nei ua mae’a saunia atoa le aumalaga i Hawaii mo le malaga mai ia Mati 10.

O le tulaga o tuiga, ua mae’a fa’atulaga foi i le puletini taimi atofa mo tuiga suesue o le covid mo le aumalaga ua nofoia le faletalimalo i Hawaii, se’ia oo mai fo’i i le ulufale mai i Amerika Samoa ma nofoia ai le faletalimalo mo le isi 14 aso, fa’ato’a tatala ai i tua.

 

Ua faailoa mai e le fa’atonu o le soifua maloloina, Motusa Tuileama Nua, “Ua mae’a fa’amautu mai le 6,283 suega o le Covid-19 ma le 18,436 swaps. Ua amata foi tuiga sa fa’atulaga mai e Gov. Rex Lee Auditorium i Utulei mo le mamalu o le falelima i sasa’e ma sa amatalia lea ia Mati 02,2021. O le a toe faia I le aso Lulu ma le aso Faraile mai le itula e 8:00 ile taeao se’ia oo i le itula e 1:00 I le aoauli. O le a tapunia lea nofoaga mo tuiga nei se’ia toe tatala pe a mae’a le Science Fair a le fanau a’oga o le atunuu.

 

Toe TATALA GALUEGA A LE NOFOAGA TOSO VA’A I SATALA

 

O le aso Lua o le vaiaso nei, ua fa’amauina i le tala fa’asolopito o le Uafu Toso Va’a i Satala, ua toe a’e ai le tautua a lea aseta a le tatou Malo, ua silia ma le lua tausaga talu ona motusia, ona o fitaituga o le leaga ai o le filifili sili ona tele ma le aoga, e mafai ai ona fa’afuata i luga va’a i le nofoaga lelei, e mafai ai ona fa’atautaia galuega lipea. O le igoa o lea filifili o le wench.

 

O le va’a o le malo, o le va’a ta’iala mai i totonu ma fa’afo’i i fafo o so’o se va’a e ulufale mai i le tatou Uafu, le Sailele lea ua ta’imua i lea tautua toe amata mo galuega lipea.

 

Na mataituina le toe amataga o lenei tautua a lea vaega o le Malo e sui iloga o le Komiti Fa’afoe tofia a le Malo mo lea tautua, lea fo’i e aofia ai ma le afioga le Matua, Senatoa Togiola Tulafono. Ua le gata i lea ae ua i ai fo’i ma sui mamalu mai le Ofisa fa’alotoifale o le US Coast Guard, i le ali’i Lutena taitai ma le sui ua va’aia toto’a le tulaga o va’a folau ma fagota i le atunuu, Frank V. Thomsen.

 

O le afioga le Kovana sili, Lemanu Peleti S. Mauga sa ia fa’aalia lona agaga fa’afetai ona ua molimauina se isi toe amataga fou o lenei galuega, ua toetoe atoa le 3 tausaga o taoto, ona sa tatalia lava fa’atupega ma le mae’a ai o galuega lipea o le filifili e toso ai i luga va’a I le pa’u matu  e amatalia ai gauega lipea.

 

“O lenei taeao o se taeao fiafia i le faigamalo fou, ona ua toe amatalia lenei tautua aoga tele, i sona amataga fou. E mautinoa ua leva ona momiti le aufaigaluega sa galulue mai i lenei tautua a le Malo, ina ia toe oo mai I lenei aso, a’o tumau pea lo latou fa’amoemoe, e tautua le atunuu, e ala i ona va’a folau, ma va’a fagota. Fa’afetai I le tapua’iga a le tatou Malo, e leai se faiva e asa ma se maumau. Ua loa o tapuia lenei tautua, ae aoga tele lenei tautua i le tatou malo. E iloga ona tele le tamaoaiga e sasa’a mai I totonu o le atunuu, ona o lenei tautua mo va’a folau ma va’a fagota. Ona o le tatou Kamupani I’a, e tatau ai lava ona mautu le Uafu toso va’a, e tautuaina le vasega o va’a fagota e fia faia ni galuega lipea, a’o le’i toe pasia e le US Coast Guard e toe tuuva’a ese atu ma nisi e folau pe fagogota foi,” O se tala fiafia lea a Lemanu.

 

Sa fa’afetaia le tapua’iga, “O le tapuaiga mau a le pa’ia lasi o le atunuu, fa’afetai. Ua iloga lo outou nofo tapua’i i faiva ao taumafai ina ia a’e malo lenei tautua e pei ona tatou molimauina nei. O lea ua toe a’e le tautua lea, o le a matauina fo’i la, le fa’asolosolo mai o tatou lava va’a folau la’u uta ma la’u pasese ina ia toe fa’aleleia, aua le soifua saogalemu o le atunuu i folauga i luga o le vasa.”

 

Sa va’aia fo’i le suesueina lelei e le vaega a le US Coasat Guard ile pe’ape’a o le va’a o le Sa’ilele, aua o lea sa toso mai i luga lea va’a, ina ia taga’i toto’a i ona totoga ua fa’aletonu, ma o galuega ia e nafa nei ma le aufaigaluega a le Uafu Toso Va’a ina ia latou fa’afoea. E toe fa’aa’e nei lea tautua le ae ua mae’a tofia le fa’atonu e pulea lea tautua e le faigamalo, le susuga Carlos Sanchez, o se tasi sa galue muamua ai i le vaitau o le faigamalo a le afioga le matua, Kovana Togiola Tulafono.

 

“Sa muamua lava mea e tatau ona fa’amuamua ina ua tofia mai, ia tapena le lotoa mo galuega uma ma fa’avasega lelei mea faigaluega o lo ua mae’a i ai mo le fa’atinoga o galuega. O le fa’amamaina o le nofoaga, o se mea e mua’i mautinoa ai, ua saunia le aufaigaluega mo latou tiute fai mo le toe a’e mai o le tautua lenei.” O se tala fiafia lea a Sanchez ina ua fesiligia.

 

O le fa’atupega mai le matagaluega o le Initeria, lea sa matua fa’aaogaina tatau lava e le tatou Malo, ina ia toe faaleleia atili ai le filifili tele lea o le Uafu Toso Va’a i Satala.