Ads by Google Ads by Google

TALA I VAIFANUA


O se tasi lea o ‘au na fa’aulu I le Ta’amilosaga Tapolo a le Rotary Club of Pago Pago lea sa faia I le fa’aiuga o le vaiaso ua te’a, le latou ta’amilosaga. Na maua e le tina o Chande Lutu Drabble se tasi o fa’ailoga ma ua matua fa’afiafiaina o ia, e ui ina leva o tauva mai I lea fa’a amataga, ae o lo’o maua le malosi ma le tomai e manumalo ai pea. [ata: foa’i]

Pago Pago, AMERIKA SAMOA

 

FOA’I A LE ROTARY CLUB, ASOSI A FITI MA PETELI ACADEMY:

 

O vaiaso ua te’a na faia ai le foa’i taua tele a le Rotary Club of Pago Pago i le sailiga fesoasoani a le Asosi a Uso Mai Fiti i le tatou atunuu nei. O lea foa’i na faia ma le agaga alofa ona ua lagona fo’i e lea Kalapu aoga tele, le o’otia ma le afaina o i ai i le soifua lautele o tagata uma o alaala i Fiti ona o le lutia ai i afa tetele i le amataga o lenei tausaga. Ua le gata i lea, ae o le fa’aiuga fo’i o le tausaga ua te’a, o Fiti lava lea ua matua a’afia lava i lenei vaitau i fa’alavelave fa’anatura.

 

“Ona o le a’afiaga o lo’o ua le tasi ae ua lasi e a’afia ai o tatou uso i Fiti, ua manatu ai le Rotary Club ina ia faia lenei foa’i taua. Ua na’o se seleni fa’atauva’a ua a’ao i ai le tatou Kalapu a le Rotary, ae ua afifi atu ai ma o matou agaga alofa ma fa’amaise fo’i i nisi o aiga ua amia ai le soifua o aiga ona o afa tetele ua lutia ai Fiti i lenei vaitau o le soifuaga,” o le saunoaga lea a le Peresetene o le Rotary, Frank Baron.

 

O le aotelega o le meaalofa tupe na taua’aoina e $5,000 ma sa talia ma le agaga fa’afetai tele e le tamaitai ta’ita’i le asosi a Fiti i le teritori, Vineeta Nand.

 

Ua fa’aalia e Nand, “O lenei meaalofa, o le a matou va’ai toto’a i lona tufatufaina atu e fesoaoani atili lea i le itulagi o Fiti o alaala ai tagata o lo ua sili ona a’afia i le tele o afa ua mae’a lutia ai Fiti. O lenei vaitau, ua toetoe ina leai se vaipanoa o Fiti e le o afaina se aiga o alaala ai, ona ua le tasi, ae ua lasi afa ua fiafia tele e uia si o matou atunuu. Peita’i o le agaga foa’i o Amerika Samoa ma so’o se fa’alapotopotoga ma Ekalesia uma aofia ai, o se mea sili lea ona mafanafana ai lagona o’otia, ua tatou oia fa’atasi ai ona o pagatia o feagai ma o matou aiga i lo matou malo. Fa’afetai Amerika Samoa, fa’afetai lava le foa’i, fa’afetai le fai uso i le tatou Atuvasa o le tatou Alamoana.”

 

O afa tetele na afaina ai Fiti o Yasa ia Tesema 2020 ma Ana i le masina o Ianuari 2021. O a’afiaga tetele fo’i ma le ogaoga ua aumaia faatasi e nei afa ua a’afia ai sologe tetele ma lologa ae maise o matagi malolosi ua a’afia le gataifale ma le laufanua o lea malo atoa. Ma ua lisia fo’i nisi ua maumau ai le soifua. O tele o atufalega o aiga ua matua lutia lava i timuga ma ua lutia i matagi malolosi, o le ala lea ua fa’atulaia ai letele o aiga ma nonofo i nofoaga ua saunia e le malo e faanofoia ai i latou ua le sefe o latou lotoifale se’ia mae’a le louloua o le tau ona fa’ato’a toe tapena lea o latou falenofo, ma toe se’e atu i ai.

 

O le aoga lenei o foa’i ua tuufa’atasia nei, o le fesoasoani atu lea i aiga e toe fa’aleleia ai latou falenofo ma mea tau le lotoifale e toe tau fa’afo’i atu ai le olaga mautu sa i ai a’o le’i lutia i latou i afa nei. Ua le na’o tupe ua faia atu ai le foa’I a o tatou tagata, ae ua fa’apea fo’i ona foa’i mai o lavalava ma isi mea uma e fa’aaoga i le lotoifale o soo se aiga. O le fa’aetai e maualuga, aua ua tele fo’i le alofa ua fa’atino i soo se ala ua foa’i atu ai.

 

O le isi poloketi na taua’aoina lea i le amataga o lenei vaiaso tusi Lomi Fefiloi i vasega tolu ma le fa o le a’oga tumaoti a Peteli Academy i Ottoville, Tafuna.  O lo ua fa’ailoa ua tele na’ua latou Lomifefiloi ua tapena mo le foa’i i lenei tausaga, ma ua oo ai le fa’asoa i le vasega o fanau i a’oga tumaoti i totonu o Amerika Samoa.

 

Na taua’aoina le foa’i i le tamaitai pule a’oga faapea le faia’oga o le vasega tolu ma le vasega fa i lea Laumua, ma o i latou na sa faia le fa’afetai, i sui o le Rotary sa malaga atu e fa’ataunuu lea fa’amoemoe lelei mo le fanau.

 

Ua latou fa’ailoa i le fanau le fa’aaogaina o tusi lomifefiloi i le gagana peretania, ma ua va’aia le fiafia o fanau e susue ma amata fa’aaoga latou tusi e siali ai le uiga o le upu, ituaiga o upu, poo se nauna poo se veape poo se sui nauna ma mea fa’apena, e manaomia ona iloa patino e le fanau e fa’aleleia atili ai lo latou tomai e faitau ma le malamalama lelei i uiga o upu fa’aperetania.

 

O lea foa’i ua uma foi ona malaga ai nisi o le Rotary i le Manu’atele ina ia latou fa’aoo i fanau a’oga I vasega 3 ma le 4.

 

Ona o le fa’atupega o le Rotary Club e i ai a latou ala o sailiga e faia fa’aletausaga, o lea sa fa’asalalauina fa’alaua’itele ai le latou Ta’amilosaga Tapolo lea na faia i le fa’aiuga o le vaiaso ua te’a. Ua fa’afetaia fo’i e le Rotary ma le latou laulauatofi le auai o le to’atele o i latou na fa’aulu latou ‘au tapolo ina ia fesoasoani i fa’atupega o le Rotary fa’aletausaga.

 

Ua fa’ailoa mai e 50 ‘au na fa’aulu ma tauva, a o tupe uma lava na maua i lea Ta’amilosaga Tapolo, ua fesoasoani lea i le fa’atupega o polokalama eseese a le Rotary mo le tausaga nei ma le fotuai mai o le nofoa’iga fou mo le tausaga e soso’o mai.

 

AOFIA AMERIKA SAMOA – STIMULUS FOU I LE KONEKERESI

 

O le aso Gafua na fa’ailoa ai e Uifa’atali Aumua Amata le aofia ai o Amerika Samoa i le lisi o setete me teritori o le Malo tele ua agava’a i le Stimulus ua pasis nei e ta’i $1,400 mo tagata faigaluega ma latou aiga. O nei foa’i tupe ua mafua ona faia pea e le malo tele ona o le fesoasoani lea i le tausaga o aiga i le Iunaite Setete o lo’o a’afia ona o le fa’ama’i pipisi Covid-19. 

 

O le pili ua mae’a pasia nei i le maota o sui i le Konekeresi ua fa’atulaga ai nisi o fesoasoani mo tuiga o lo ua fa’asolo mo le puipuiga o le lautele mai le fa’ama’i Covid-19, tupe stimulus ma nisi o fa’atupega mo malo ta’itasi e fa’atautaia lelei ai a’oga a le fanau mal tausiga o le soifua maloloina lelei e ala i mea’ai paleni ma isi alamanuia.

 

“O le mea muamua lava e ao ina faia I lenei tupe tele ua fa’amatuu ese mo le fa’atupega pea, o le fa’atulaga lelei o le fa’asoa tatau e tusa o le tele o le faitau aofai o tagata i setete ma teritori uma o le Malo tele o Amerika. Ona fa’ato’a vaevae sa’o lea I ai o le tupe toina mai mo malo ta’itasi,” o se tala lea a Uifaatali.

 

“Ou te iloa e le o toe mamao ae oo atu fo’i lea faasoa i le tatou malo fa’ateritori mai le feterale, O le tupe aofai ua fa’amatuu ese mo lea fa’amoemoe e $1.9turiliona mo le aotelega uma o Malo o Setete ma teritori o Amerika. O le tasi o vaetolu lea o le aotelega atoa o le paketi a le Malo tele, ma e tauau e toe i ai ni suiga e faia i ai e le Senate fa’ato’a mautu ai lenei fa’amoemoe.”

 

“Mai lea tinoitupe atoa ua fa’atulaga ai le $2piliona e fa’atupe ai le vaega e pulea mai e le Matagaluega o le Initeria lea e aofia ai Amerika Samoa.”

 

“O lona uiga o le a fa’amatuu mai ai le $511miliona mo Amerika Samoa mai lea $2piliona ua fa’amatuu mo faigamalo e pulea mai e le Initeria. Ua matou galulue fa’atasi lava ina ia mautinoa o lo’o aofia pea i tatou uma o malo laiti i le vasa pasefika i nei alamanuia uma ua fa’amatuu mai aua le tapenaga o le tausiga fa’alotoifale o aiga i vaitau nei o le fa’ama’i Covid-19,” o se toe tala mai lea a Uifa’atali. 

 

Ua mae’a ona fa’aalia se finagalo o le alii taitaifono o le Komiti o le Enetia & Punaoa a le Senate Joe Manchin, i le ituaiga tupe o le a fa’amatuu ese mo lea pili pe a pasia lea pili ma o le a fa’aalia fo’i manatu o afioga i Senatoa e tusa o le tupe fa’aalu mo lea pili. Ua mae’a ai fonotaga a le Maota o le Konekeresi ina ua latou pasia ma le fa’aaogaina o lea vaega tupe tele, ma ua pasia e fa’auia atu ai mo iloiloga ma aiaiga a le Senate o le Konekeresi.

 

“I lau tusi na fa’auia sa’o i le taitaifono o Manchin, sa ou fa’ailoa i ai le taua tele o le aofia atu ai o Amerika Samoa i lea alamanuia mo le tausiga o aiga, tapenaga mo le fa’aleleia o le tautuaina o le soifua maloloina, fa’asologa o tuiga o le Covid-19, fa’atasi ai ma le anoanoa’i o tautua a le malo e ao ina fa’aleleia atili mo aoaoga a le fanau ma le aotelega o nisi ua le toe faigaluega ona o le fa’ama’u, ua le mafai fo’i ona tatala nisi o pisinisi sa galulue ai nisi ma tausia ai aiga, o nisi ua fa’aitiitia itula faigaluega ma ua ola ai tagata ae ua faaleatoa lo latou fiafia,” o se toe fa’aopoopo lea a Uifa’atali.