Pago Pago, AMERIKA SAMOA

FA’AAUAU LE SOLO TETE’E A FAIAOGA SPA – 700 SAINIA LE PEPA E SAPAIA LEA SOLO:

O le vaiaso ua te’a na amata ai le solo tete’e a faia’oga o le South Pacific Academy ina ua le lagona e nisi o faia’oga, ua le talafeagai le fa’aiuga ua faia i nisi o faia’oga ua leva ona galulue ma aoao le fanau i le SPA. 

Ina ua lagona e i latou ua tatau ona uia se isi ala e mafai ai ona amana’ia lo latou fa’alagona o’otia ona o lea fa’ai’uga i faia’oga e to’alua, sa latou tutufa’atasi ma fuafua le solo tete’e ina ia fa’ailoa fa’alaua’itele atu ai o latou e tusa o lea fa’aiuga a le Komiti Fa’afoe mo le SPA.

I le aso na tapunia ai le a’oga mo le fa’amoemoe na faia ai le fonotaga a Faia’oga uma, le PTA i totino na mafai ona auai fa’apea ma le Komiti Fa’afoe e fa’afofogaina ai o latou fanoga o lo ua manana’o e fa’ailoa atu i le Komiti Fa’afoe e faia i ai se latou fa’ai’uga.

O le latou fonotaga na toetoe lava lua itula ma ua taua’aoina mai ai le faaiuga a le Komiti Fa’afoe:

“Ua maea feutaga’i le Komiti Fa’afoe ma le vasega o faia’oga o lo ua auai i le Solo tete’e ina ia fa’afofogaina e i latou le mafuaaga o le latou solo tete’e, fa’atasi ai ma ni mana’oga o lo ua manatu i latou ua fesasia’i ai ni fa’aiuga a le Komiti Fa’afoe ma o latou fa’alagona.”

“O le tele o manaoga o faia’oga na fa’ailoa mai i le Komiti Fa’afoe ua malilie i ai le Komiti Fa’afoe ina ua latou fa’afofogaina. Na le mafai ona so’o le fau ma le fau i manatu o le Komiti fa’afoe ma le vasega o faia’oga o lo’o solo tete’e ina ua fa’aalia e le mana’oga o Faia’oga ina ia toe fa’afaigaluega mai Faia’oga e to’alua sa fa’ate’a mai le a’oga, o se fa’aiuga a le Komiti Fa’afoe.”

“Ina ua mae’a ane le talanoaina o le mataupu lea ma fa’ailoa mai le manatu o le Komiti Fa’afoe e te’ena e i latou, o iina loa na fa’afaigata uma ai ona toe fa’aauau ona toe talia e le vasega o faia’oga uma fa’ai’uga a le Komiti Fa’afoe.”

Peita’i, ua fa’ailoa mai fa’aiuga tau le fa’atautaiga o le SPA e le Komiti Fa’afoe, o le a toe tatala faitoto’a o le SPA mo a’oga a le fanau.

“Ua matou sasa’a atu uma mea o lo ua matou o’otia ai. Ua matou iloa fo’i e le o ni mea e le o talafeagai ma le tulaga o talosaga fa’atagata faigaluega. Ua na’o ni talosaga ina ia toe fa’afaigaluega faiaoga nei, ae sailia auiliili mafuaga e tatau ai e tusa ma tu’uaiga e faasaga ia i la’ua ae o lo’o fa’aauau pea lava fo’i a’oga a le fanau e pei ona masani ai. Peita’i e matua le fia fa’aliuliu mai lava lagona o le Komiti Fa’afoe e talia ai lena fanoga o i matou uma.”

“O le tu’uaiga ua fa’asili e i latou, ua fa’ailoa mai, ua taumafai faia’oga nei e poloka aoaoga a le fanau. Ua le manatu i matou e sailiilia e le Komiti fa’afoe fa’amaoniga e tusa o latou tu’uaiga, aua o se mea e tatau ona faia, ae le o le fa’ate’a o faia’oga e aunoa ma se fa’amaoniga atoatoa o tu’uaiga ua fa’asaga ia i latou pe ua talafeagai, o se mea e le tonu.”

Ona o lea tulaga ua fa’aauau ai le solo tete’e a Faiaoga i le aso na soso’o ai.

O Faia’oga e to’alua ua mae’a fa’ao’o atu tusi tea mai le Komiti Fa’afoe o Sam Lei Sam ma Mr. Jen, o se tasi o IT o le SPA.

I le taeao o le aso Faraile na toe fa’aauau ai ona tutula’i faia’oga o loo solo tete’e lava e taumafai ona talia ai e le Komiti Fa’afoe o latou fanoga e toe talia ai le faafaigaluega o faia’oga sa fa’ate’a mai le latou galuega.

I le aso Faraile foi ua mae’a ai ona sainia e le to’a 700 o tagata o lo ua latou sapaia le solo tete’e, o le vasega o matua o le fanau a’oga ma nisi lava ua latou silafia lea solo tete’e ma ua latou manatu e tatau ona sapaia lea mau, e agaga i latou I le fa’amoemoe o faia’oga o le SPA. O le tusi lea sa fa’asalalauina fa’alauaitele i luga o so’otaga i upega tafailagi, ma ua mae’a lomia fo’i kopi e tele o la lava lisi o e sapaia lea fa’amoemoe.

Ua fa’ailoa I lenei tusi fa’alauaitele a le Solo Tete’e, e ao i le Komiti Fa’afoe o le SPA ona:

1] Toe fa’afaigaluega mai Faia’oga nei e to’alua Mr Sam Lei Sam ma Mr Jenward Montalbo, ao fa’atautaia se latou suesuega i tuuaiga ua fa’asaga ia i la’ua, ia le poloka ai a’oga a le fanau.

2] Ia solofua le sui o tulai mai o le Peresetene o le PTO o i ai i le taimi nei, Ben Sauvao, ae toe fono le PTO e toe sailia se isi latou peresetene fou.

3] Ia ‘ave’esea fo’i le Taitaifono o le Komiti Fa’afoe o le Aoga SPA, Ms Salamasina Satele, ina ia toe fa’afo’ia ai le tulaga fai fa’aiuga tonu o le Komiti Fa’afoe ma ia fa’amoemoeina ai le Komiti Fa’afoe i a latou fa’aiuga faia i le fa’atautaiga o le Aoga SPA.

4] Ave’esea le sootaga a le Pulega o le A’oga, le taitaifono ma le Komiti Fa’afoe e latou te gafatia ai ona va’aia togi o le fanau a’oga i luga o le PowerSchool ae o le a mafai ona taga’i ma so’otaga i ai nao le le Pule A’oga, Pule o le IT ma le Fa’atonu o le Ofisa o le SPA, e ese mai i faia’oga ta’itasi o fanau a’oga.

I lea tusi fa’alauaitele o lo’o ua sainia le to’atele o tagata, ua mae’a lomia ai ma le maliliega a i latou uma ua sinia lea tusi, ”Ua matou nofo sauni fo’i matou te le toe sapasapaia le South Pacific Academy pe afai e le mafai ona fa’ataunuuina o matou nei mana’oga ua fa’aalia.”

Ua fa’ailoa mai, o le mafai ona feso’ota’i o totino o le Komiti Fa’afoe ma le PowerSchool, le polokalama ua mafai ai ona va’aia ai e matua togi o latou fanau e fa’aaoga ai so’otaga tau initeneti, o se tasi lea o mea ua mafua ai ona fete’ena’i Faiaoga ma sui o le Komiti Fa’afoe o le SPA.

E ese mai i lea tusi ua faasalalauina ina ia sainia e matua ma so’o se tasi e auai lona faigalo e sapaia le fa’amoemoe o le solo tete’e lea, e i ai fo’i leisi tusi fa’asalalau fa’alaua’itele ua mae’a sainia e le to’a 13 o faia’oga o le SPA. O lea tusi ua fa’ailoa mai ai le popolega o faiaoga, ona o lo ua mafai ona maimoaina e sui o le Komiti Fa’afoe o togi o le fanau a’oga. O le avea ma mea e fe teena’i ai lagoa o le Komiti Fa’afoe ma Faiaoga i le fa’amauina o togi o le fanau a’oga. “O le a avea ma mea e faigata ai le galuega a faia’oga o le fa’amauina o togi sa’o o le fanau a’oga sa ausia. O le faiga o togi o le fanau, e tatau ona faia i se ala e le silafia lautele e nisi o le a’oga ma le vasega o matua le latou galuega le, ae o lo’o mausali le fa’atuatuaga ia i latou, o lo’o faia le galuega a faia’oga ma le tonu i taimi uma.”

O fa’asea a nai faia’oga ua mafai ona fa’ailoa mai,”Ao i matou fo’i o faia’oga ua i ai taimi ua fa’amaina ai i matou i fa’amatalaga mamafa ma tu’uaiga e le tatau ma le tusa ai ma le matou galuega, ae a matou o atu e avatu se fa’asea i totino o le Komiti Fa’afoe, e  le ano mai i ai.”

“E tatau ona I ai se matou sui faia’oga i le Komiti Faafoe ina ia mafai ona finaua se taimi e faia ai se suesuega i ni mataupu matou te fa’aalia atu, ma fa’alogo mai fo’i i matou atugaluga fa’auia mo se iloiloga a le Komiti Fa’afoe. Ia faia i ai ni fa’aiuga ua talafeagai ma le taualoaina.” O se toe mau lea ua fa’ailoa mai e le vasega o Faia’oga o tete’e.

O isi mea na talosagaina e faia’oga e fa’atatau lea i o latou totogi, o ni penefiti e totogia mo latou itula pe a faigaluega ovataimi, ae maise ai o le taimi o ta’aloga i le tu’ua ai o a’oga a le fanau, poo ni vasega fa’apitoa ina ia malamalama lelei fanau a’oga Iesona o fa’atautaia i potu a’oga.O le latou litaea ma nisi o mea e fa’atino tau le galuega ina ia pasia ai le agava’a o le a’oga, o nisi o galuega o lo’o fa’atino lava e faia’oga, ae le o maua ai se totogi, poo se taui lele e pei o se ponesi fa’aletausaga.

Ina ia fesoasoani mo i latou ina ia mausali le latou mau, ua latou tofia ai le ali’i Loia Charles Alailima e tula’i mo i latou ma fautuaina le latou mataupu, aua ua i ai fo’i le ali’i fa’amasino Muagututi’a Fiti Sunia, o le loia fautua a le Komiti Fa’afoe i lea fonotaga.

O le solo tete’e lenei sa amatalia mai lava i le aso Gafua o le vaiaso na te’a, ma ua fa’ailoa fo’i le agaga fa’asea o nisi o matua, ona o lo’o taugata le pili o totogia o le fanau, ia mautinoa o fa’atino a’oga ale fanau i aso ta’itasi.

Ua fa’ailoa mai ua tatala a’oga a le fanau, peita’i o nisi matua sa fa’ailoa mai i sui fa’asalalau, “Na vave tu’ua mai la’u tama i le fale, ona ua leai ni faia’oga o lana vasega.

O sui totino o le Komiti fa’afoe a le SPA ua aofia ai:

• Salamasina Satele, Taitaifono

• Jose Rose, Sui Taitaifono

• Kristine Soule, Failautusi

• Lina Petaia-Suisala, Teutupe

• Ben Sauvao, PTO Peresetene

• Maria Gayapa, Totino o le Komiti Fa’afoe

• Fa’amasino Lagolago Fiti Sunia, Totino o le Komiti Fa’afoe

• Fanene Kava Wyberski, Sui o le Komiti Fa’afoe

• Noanette Snow-Tafao, Sui Pule A’oga.

LATALATA I LE 24,000 TUI PUIPUIA UA MAE’A FAIA I LE ATUNUU:

Ua fa’ailoa mai ua latalata lava i le 24,000 tui puipuia o le Coronavirus ua mae’a faia o taata lautele o le atunuu, ma ua tula’i mai e tusa lea o le 42% o le faitauga aofai o le atunuu ua ame’a faia tui. Manatua o le isi vaega tele o le atunuu lea e le mafai ona tuia i latou. O i latou nei e le’i atoa le 16 tasuaga, fa’apea ma tina o lo’o ma’itaga.

O se fa’amaumauga lea mai le ali’i Foma’i Dr Aifili John Tufa, lea e nafa ma le tele o fa’amaumauga ma ala o togafitiga o lo’o fa’agasolo i le atunuu ona o fa’ama’i pipisi e a’afia ai le atunuu.

Mai le nofoaga fou sa fa’atuala’ia e faia e faia ai tuiga, Gov. Rex Lee Auditorium i Utulei, ua a’ailoa mai e 500 tusi na faia ai i le aso e tasi. Peita’i o lea tapunia atoa lea nofoaga mai le fa’ataunuu ai o tuiga i lenei vaiaso atoa, ona o lo ua mae’a fa’atulaga ai le Fa’aaliga o Galuega Fa’atino Fa’asaeanisi mai le aso Lua se’ia oo i le aso Tofi o lenei vaiaso.

Ua fa’ailoa mai, o le taimi na fa’aalu e le tagata e to’atasi e fia faia lona tui, mai le amataga o le fa’asologa atu i tausima’i e siakia latou numera se’ia oo i le aimi e faia ai loa lona tui, e na’o le lua minute, mai le 3 sa sau a’i.

Ua le aofia ai le taimi e faia ai loa lou tusi ma sau i fafo toe fa’atalitali ai le 15 minute, pe i ai sou a’afiaga ogaoga e alia’i mai ona o le tui Covid-29.

O le taimi nei o le a toe tatala fo’I na’o le tasi le nofoaga mo tatou tuiga, Tafuna Communitu Health Center mo le aso Gafua, aso Lulu ma le aso Faraile mai le itula e 8:00 i le taeao se’ia oo i le aoauli.

Peita’i ua fa’ailoa mai, o Mati 13 o le a mafai ai ona tatala le Malaeva’alele e fa’atino ai tuiga, ma e alu atu lava le ta’avale ma sui e fia faia tui, ma e tatala mai le itula e 7:30 i le teao se’ia pa’ia le aoauli. O se fa’aaliga lea mai le tamaitai foma’i o Dr Francine Amoa, ma o le a aoga tele lea mo matua ma e ua tausia i moega i latou. O se ala lea ua tautuaina ai i latou ina ia le tu’ua e i latou o latou moega ma nofoaga ua fa’amautu i ai i totonu o latou ta’avale.