Pago Pago, AMERIKA SAMOA

UIFAATALI AMATA  - O SE TASI O SAPAIA LE PILI TOE TAUALOA O PISIKOA:

Ua aofia nei Uifaatali Aumua Amata o se tasi o le to’afitu o sui o le Konekersi ua latou sapaia ma fa’aulu le pili e toe fa’atula’ia ai le Peace Corps Reauthorization Act lea na toe fa’aulu i iloiloga a le Konekeresi i le vaiaso na te’a nei. E to’afitu fo’i ia te ia le vasega o sui o le Konekeresi ua latou toe fa’atula’ia maia lea pili mo le vasega o Pisikoa.

O isi sui o le konekeresi ua aofia ai le John Garamendi o Kalefonia; Grace Meng o Niu Ioka, Dean Phillips o Minesota, Ed Case o Hawaii, Albio Sires o New Jersey ma ua mae’a sainia foi e le National Peace Corps Association le latou pili.

O lenei pili fa’aulu e taualoa ai le pisikoa ua talafeagai lava fo’i ma le atoaga o le 60 tausaga talu ona sainia e Peresetene John F. Kennedy, ma le fa’atauaina fo’i o le Vaiaso fa’apitoa mo tautua a le Pisikoa.

O le isi la’asaga o le a oo i ai le fa’asologa o lea Pili o le auiliilia lea e le Komiti a le Maota i Mataupu o le Va i Fafo. O lenei lava polokalama o lo’o sapaia pea e nisi o sui o le Konekeresi ona e i ai nisi o latou aiga sa tautua ai, ae mautinoa fo’i sa i ai nisi na aoga i ai le polokalama lea i le aoaoina o i latou aiga.

O le tatou fo’i Sui i le Konekeresi, Uifaatali Aumua Amata sa auai lona alo tamaitai o Kirsten Radewagen, sa tautua o ia o se Pisikoa ma sa tautua i Bulgaria.

“O le polokalama lenei o le Pisikoa sa fa’aaogaina e tagata Amerika ina ia tautua ai i latou i atunuu o lo’o i ai le mana’omia e fa’aleleia a’oga, ma isi lava tautua lautele, e aoga mo le manuia lautele o na atunuu. O le tele o nei mataupu sa faaaogaina i ai le vasega o Pisikoa, o le fa’aleleia lea o a’oga a le fanau i atunuu o lo’o tau atina’e ma sa aofia ai Samoa i lea fo’i tautua lautele a Pisikoa.”

O le vaiaso o le a fa’ataua ai le vasega o tagata o lo’o tautua i le Pisikoa ma le latou galuega lelei sa faia mo tagata o atunuu tau atina’e. O le aoaoina o latou famau ua a’e malo ai latou taumafaiga ina ia fa’amautu lenei vaitau o latou faigamalo mo latou tagata lautele ma pisinisi. E ese mai lea ua taua tele lea fo’i vaiaso ua fa’ataua ai le pisikoa i le toe fa’amanatuga o le tautua sa faia e nei tagata ina ia fa’aeaina ai nisi malo sa i ai le mana’omia.

O le fa’afetai e tatau ona fa’auia i le sui i le Konekeresi Garamendima Garret Graves mo le galulue malosi e fa’aeaina lea fo’i tautua ma le fa’auluga o lea fo’i pili taua. O i la’ua nei o sui e to’alua na avea ma taitaifono o le Pisikoa.

Ona ua mae’a sainia nei le Peace Corps Reauthorization Act o le 2021 ma o le a toe soso’o ai le fa’atupega a le Feterale e fa’aleleia ma toe fa’atupu tele ai le mea latou te fa’aaogaina e fa’aleleia atili ai le tautua mo i latou e fa’ataunuu’a lea tautua ua ofoina atu e le Pisikoa i nofoaga ma atunuu ua fa’atulaga ai.

Ua tatalia nei le taimi e sainia ai lea pili ina ia fa’atulafonoina ai lenei tautua e fa’aa’e ma fa’atupeteleina ai lenei tautua aoga a pisikoa.

TOFIA SUI E TO’ALIMA MO LE KOMITI FA’AFOE O FEMALAGA’IGA

Ua fa’aulu sui fou e to’alima a le Kovana mo le Komiti Fa’afoe o Femalaga’iga, ma o i latou nei latou te iloiloa talosaga mo i latou o lo’o fia nonofo faaletulafono ma faigaluega i Amerika Samoa. 

O i latou nei ua filifilia e Kovana Lemanu P. Mauga ua aofia ai Misi Taua’i, Fa’afetai Ialiva, Fiamatai Leomiti, Senatoa Satele Aliita’i Lili’o ma Faipule Tuumolimoli Moliga.

O sui uma ua tofia nei o lo ua mae’a aiaia mai le tai tai tausaga i le 4 tausaga e nofoia ai e i latou lea tofiga.

Ua fa’ailoa fo’i e Lemanu, “O Sui uma lava ua tofia nei mo le Komiti Fa’afoe o Femalaga’iga ua mae’a i ai le tomai ma agava’a e silafia lelei ai e i latou tulafono ma fa’aiuga e tatau ona faia mo talosaga uma e fa’auia mo i latou e iloilo toto’a ma faia fa’aiuga tatau i ai. Ua latou silafia lelei lava tulafono uma e mautinoa ai le saogalemu o Amerika Samoa ma e tatau foi ona mautinoa o lo’o fa’ataua le puipuimalu o tatou tuaoi ma ia fa’apea fo’i ona mautu le taumaoaiga tausi o le atunuu ma avanoa lelei e mafai ai ona fa’amautu atili lena tulaga mo tagata Amerika Samoa.”

TALIA SENATE SUIGA MAOTA IA PASIA AI LE PILI SIITIA LAFOGA SIKALETI:

O le fonotaga tuufa’atasi a le Komiti o le Maota o Sui ma le Komiti o le Senate lea sa faia le latou fonotaga e iloilo ai le si’itaga o le Lafoga fa’ae’e i le sikaleti ma o le a siitia i le 3% ae solofua ai le lafoga 2% mai totogi o tagata faigaluega a le Malo.

O le fofoga fetalai Savali Talavou Ale o le taitaifono o lea fonotaga fa’apitoa a komiti tuufa’atasi nei e lua i le aso Toona’i, sa ia fa’aalia lona naunau e pasia lea pili e ui lava ina sa i ai nisi o sui o komiti e lua sa fa’aalia nisi o latou manatu e ao ai ona fa’apasia lea pili e i latou.

O le suiga ua faia e le Maota ua manatu ai i latou e soloia le 2% mai totogi o tagata faigaluega ae manatu le Senate e soloia na’o le 1% o le lafoga mai totogi o tagata faigaluega. Peita’i e malilie fa’atasi nei Komiti e lua ina ia siitia le lafoga o le sikaleti i le 3%.

Ua manatu le Maota o Sui e avatu le 3% lea o le siitaga o le lafoga o le sikaleti i le taugatupe tele a le Malo, ae o lo ua manatu le Senate e tuuina le tupe e aoina mai le siitaga e fesoasoani ai i le falema’i tele i Faga’alu.

Pe afai e solofua le lafoga fa’ae’e i totogi o le aufaigaluega a le Malo lea e 2%, e tatau ona i ai se isi fa’atupega e ao ina suia ai lea vaega tupe ma sa fa’aalu lea i le fa’atupega o le falema’i.

Ua fa’ailoa fo’i finagalo faaalia o afioga ia Senatoa Magalei, Senatoa Tuiagamoa, Senatoa Muagututi’a, Senatoa Malaepule, Senatoa Togiola Tulafono ma Senatoa Soliai Tuipine ua latou fa’ailoa mai ua mae’a faailoa atu e Faumuina John Faumuina, o lo’o mana’omia e le falema’i le fa’atupega.

Ua fa’ailoa fo’i, afai ae le toe maua e le falema’i lea fa’atupega, o le a fa’aletonu nisi o galuega patino i le falema’i. Na faailoa mai e le ta’ita’ifono o lea fonotaga, ua maea faafofogaina e le Maota o Sui le tele o molimau o lo ua i ai nisi o fa’atupega ma e tatau ai ona fa’atulaga lea tinoitupe e fa’aalu i le teugatupe tele ina ia fa’asoasoa mai ai e le Ofisa o Tupe a le tatou malo mo galuega eseese e aofia ai lava fo’i ma le Falema’i.

O Senatoa Soliai sa ia fa’ailoa atu loa i le fonotaga ina ia fa’apasia lea pili e aoga fo’i le tuu o le vaega tupe e fa’asoasoa mai ai.

Na faia le palota ma ua maua ane le fa’aiuga e 15 e auai finagalo i le pili ua aiaia  i le 12 e tete’e i lea lava pili.

Ina ua toe faaauau le fonotaga mulimuli ane, sa tula’i ai Senatoa Togiola Tulafono ma finau mai e tatau ona te’ena e le Komiti le pili lenei. O lana fa’afinauga ua ia fa’ailoa ai, e matua tele le afaina o le falema’i pe afai o le a fa’auia lea vaega tupe i le teugatupe a le malo ae le fa’aoo sa’o i le falema’i sa fa’aaogaina ai muamua.

Ua taualoa lava fo’i lea fa’ai’uga ua pasia lava le pili e siitia ai le lafoga totogi mo le sikaleti ma suiga na faia i ai e le Msota o Sui.