Pago Pago, AMERIKA SAMOA

MALAGA MAI LE TALOFA AIR - 5 PASESE AE LE’I NOFOUTA I AI LE DOH:

O Mati 11, 2021 na fa’ate’ia ai le aufaigaluega a le DOH i le malaeva’alele i Tafuna, ua sese’e mai le va’alele a le Talofa Airways ma le pasese e to’alima tagata, ae le’i i ai se tala muamua, o lo’o malaga mai lenei aumalaga.

Na tau sailia pe na fa’apefea ona tuufa’atasia lenei faigamalaga, aua o lea lava fo’i e oo i le malaga i Samoa e aiaia muamua ma soalaupule ta’ita’i o malo na lua, ona fa’ato’a faia lea o malaga moomia.

O le va’alele lenei a Samoa o lo’o latou femalaga’i i le va o malo fa’aatumotu i le taimi nei, i malaga togipau. Ua le fa’aaogaina lea va’alele i malaga mai I Amerika Samoa, ona o lo’o fa’aaoga le Samoa Airways.

Na fa’ailoa mai e le Ofisa a le Talofa Air I Samoa, sa totogipau mai Samoa lea malaga e fia o mai i Pago Pago.

Ua le maua se tali mai le taitaifono o le komiti fa’afoe o le Covid-19, Lutena Kovana Talauega Eleasalo Ale, e tusa o lea mataupu, ae masalo e sau se taimi tali mai i fa’afesili ua fa’auia atu i le emeli.

Talu mai lava le taofiga o femalaga’iga tau vaalele i le va o Samoa ma Pago Pago nei, o le Samoa Airways lava lea tu le latou vaalele i le tatou malaeva’alele ina ia fa’aauau ai faigamalaga i le va o Tafuna ma Malaeva’alele laiti i Fitiuta ma Ofu.

O le Talofa Air, lea ua fa’aaogaina tele i le va o Tonga ma Samoa, Fiti ma Samoa, Vanuatu ma Samoa poo Fiti ma Solomona ma Fiti.

O lea kamupani  Va’alele o lo’o fa’afoea fa’apisinisi Tumaoti.

MAEA SOALAUPULE LE SOLO TETE’E A FAIA’OGA & KOMITI FA’AFOE O LE SPA:

O lo ua mae’a nei ona feutaga’i le Komiti Fa’afoe o le South Pacific Academy ma le vasega o Faia’oga na solo tete’e, i le mae’a lelei ai o le lua vaiaso talu ona faia lea solo tete’e.

Ua tali ane fo’i le Komiti Fa’afoe i nisi o mana’oga tupito sa fa’aleo ma tusia e faia’oga, ua mafua ai ona le saogalemu o latou ma o latou galuega ona o fa’ai’uga tu’usa’o a le Komiti fa’afoe sa fa’ate’a ai nisi o i latou.

Ona o lea maliliega, ua talia ai e le Komiti Fa’afoe le sainia e i latou o faia’oga i le SPA o se maliliega fai fa’atasi e tusa ai o latou aia tatau o nisi e faigaluega o faia’oga i le South Pacific Academy.

Ua toe mafai nei ona faaauau a latou galuega o le aoao o fanau a’oga i potu a’oga, Ua aofia fa’atasi e faia’oga ma nisi fo’i o lo’o avea ma fesoasoani i faia’oga.

Ina ua mae’a sainia lea MOA, ua fa’ailoa mai, o le pitola’au a faia’oga sa tete’e, ia toe fo’i atu e fa’aauau ona a’oa’o le fanau. 

O lea ua tuuina mai le avanoa i le tamaitai Sui Pule Aoga i le taimi nei, Noanette Snow -Tafao na toe fa’atulagaina uma le toe fa’afaigaluegaina o faia’oga ma latou fesoasoani sa tete’e, ma o le  tala, a aluga lelei mea uma, e amata lava ona toe tula’i i latou i potu a’oga mo vasega a le fanau i le aso Lua.

Ua fa’ailoa mai e le Komiti Fa’afoe i le latou tusi na faailoa mai i le au fa’asalalau, “Ua maea nei le solo tete’e sa le mafai ai ona fa’ataunuuina a’oga a le fanau. Ua atoa le lua vaiaso o taumafai ona soalaupule ni suiga lelei mo i matou le komiti Fa’afoe ma le vasega foi o Faia’oga ma Faia’oga Fesoasoani sa solo tete’e. E mautinoa ua i ai lesona aoga ua matou maua mai i lenei fo’i mataupu, ua talafeagai le mafai ona matou feutaga’i i mea e sologa lelei ai a’oga a le fanau i potu a’oga, ma le fa’ataunuuina o matou tiute ma le fa’amaoni.”

E le’i taofia a’oga a le fanau i le aso Gafua na te’a nei, ae ua mautinoa e faia le a’oga i le aso Lua, ma o le a toe i ai o latou faia’oga ma o latou fesoasoani sa latou valavala mo le lua vaiaso. Ua fa’ailoa atu fo’i i faia’oga nei, “O outou o le a outou fa’ailoa i le fanau a’oga le mafuaga sa motusia ai la outou mafutaga i le potu a’oga.”

Ua fa’ailoa mai fo’i, o le mataupu i faia’oga e to’alua na fa’amalolo mai galuega, o lo ua fa’aauau ona soalaupule ai le Komiti Fa’afoe ma e fa’ato’a fa’ailoa mai se latou tali ia Mati 19, 2021. 

Peita’i ua le talia nei sui faia’oga i totonu o le lotoa i le taimi nei, ae le mailoa fo’i pe toe fa’afaigaluega, fa’asala mo sina vaitaimi toe talia ai e faia’oga, pe o le a fa’amalolo motu i la’ua na mai le toe avea ma faia’oga i le SPA.

Pe afai ae uma ane le fa’aiuga a le Komiti Fa’afoe e fa’amalolo faia’oga nei mai le galuega i le SPA, ua mae’a fo’i ona fa’amauina i le MOA, ua sainia ma malilie fa’atasi i ai Faia’oga na tete’e ma Komiti Fa’afoe.

Ua aofia i le feagaiga malilie fa’atasi lea ua mae’a sainia, e ao i le Komiti Fa’afoe ona siakia fa’afou mai fa’amaumauga fa’aletulafono uma e fa’atautaia ai le South Pacific Academy, ma o le latou matafaioi lea e ao ina mataituina a’o fa’agasolo ina matua ma to’atele le a’oga.

O le isi tiute fo’i o le Komiti Fa’afoe, o le faailoa lea i le vasega o faia’oga o nisi mataupu e ono a’afia ai latou galuega a’o faiao’ga i latou i latou i le SPA.

Ua fa’ailoa i le tusi na taua’aoina i le vasega o sui fa’asalalau, ua faailoa mai ai, “E mautinoa lava ua i ai le a’afiaga o le soifua o le fanauiti ona o le solo tete’e. O le a fa’amama avega ia i matou lo outou o atu i potu a’oga, ma outou fa’amalamalama le fanau ma outou fa’ailoa atu le mafuaga ma le maliliega ua faia, lea ua toe a’e mai ai outou i le a’oga.”

“Ua tatou malilie ma ua autasi o tatou manatu, o le a tatou fa’amuamua le aoaoina o fanau i potu a’oga. Ia fa’amae’a lenei tausaga aoga, ina ua tatou loto fa’atasi i lenei maliliega ua fa’amautu nei ma aga’i atu i le lumana’i manuia o aoaoga a le fanau.”

Ua fa’apea fo’i ona fa’afetaia mai e le vasega o faia’oga, “Le vasega o matua uma sa latou tutu fa’atasi ma avea o nisi o ni toomaga mo leo latou fa’amoemoe. Fa’afetai tele. Ona o lea ua fa’afetaia le tali mai o le Komiti Fa’afoe, ua matou fa’ato’ese atu ai i so matou sese, ia fa’amagalo le tagata e agasala ma le atoatoa. Peita’i e lagona le fa’atauva’a, aua e mautinoa ua a’afia a’oga a le fanau ona o lea mau. O le a toe fuli e fai le galuega o le a’oa’o atu ina ia toe soso’o le fau ma le fau i a’oga a le fanau, a’o le’i mae’a lenei tausaga a’oga.”

MAUA LE FA’ATUPEGA E TOE FA’ALELEIA AI MALAEVA’ALELE:

Ua fa’ailoa mai i le aso Faraile ua te’a e le tatou Faipule i le Konekeresi, ua mae’a fa’auia mai e le Matagaluega o Feoaiga a le Malo tele [USDOT] ma le FAA le Tinoitupe e toe fa’aleleia ai Malaeva’alele uma i Amerika Samoa, ma sa aumaia fa’atasi ma le tinoitupe na fa’ataga mai e le Konekeresi mo le Covid-19 i le tausaga ua te’a.

O le aotelega o lea tinoitupe e $1,050,816.

Ua fa’afetaia e Uifaatali Aumua Amata le tula’i mai o le alii fa’atonu o Chris King ma isi uma lava o lo’o galulue fa’atasi ma ia i lenei mataupu, faatasi ai fo’i ma le nofoaiga fou Kovana Lemanu Mauga, ona o le sogasoga i mea lelei.

“O tatou malaeva’alele o le tatou sootaga lea ma atunuu uma o le lalolagi atoa ae maise le tatou malo Tele, ma e matua fa’afetaia lava le maua mai o nei fesoasoani tupe e fa’aleleia ai le tatou Malaeva’alele, fa’apea isi malaeva’alele laiti uma o le tatou teritori.”

“O le fa’afetai tele ia Steve Dickson, le FAA Administrator ona o lona fesoasoani mai pea ma lona fa’ataua tele o tatou so’otaga nei ma le malo tele e ala i feoa’iga.”

Fa’afetaia fo’i e ia le Failautusi o Feoa’iga Pete Buttigleg, ona o le fa’atupega lea ua toina mai e $1,020,127. o le a mafai ai ona fa’aleleia le fausaga o le Malaeva’aiele i Tafuna.

Ua mafai fo’i ona maua ai vaega tupe e mafai ona fa’aaoga e faaleleia ai feoa’iga ma galuega feso’ota’i ma isi malo uma, totogi o tagata le fa’amamaina aiai o le malaeva’alele ma isi tautua uma ia mautinoa o mama le malaeva’alele mo feoa’iga a i latou o lo’o fa’aauau ona malaga i lenei vaitau. O le fa’amamaina lea o le a fa’aititia ai avanoa e mafai ai ona a’afia tagata i siama po’o verusi o fa’ama’i pipisi e pei ona i ai nei le Covid-19.

O le isi tinoitu ua agava’a ai lava le tatou Malaeva’alele Fa’avaomalo e $12,689. o lo ua toina lea mo le totogia o totogi o lisi o faleoloa ma isi ituaiga pisinisi e i ai pisinisi o Rental Cars ma tautua eseese e tatau ona i ai i malaeva’alele e fa’aaogaina e tagtata femalaga’i, pakaga o ta’avale. O se va’ega tupe lea e tau fa’afetauia ai pisinisi masani ua misia e le pulega o Malaeva’alele ona ua tapunia femalaga’iga sa tele ina lauolaola ai nei tautua.

O isi vaega tupe e ta’i $9,000. e lua ua fa’atulaga lea mo le Malaeva’alele i Ofu ma le malaeva’alele i Fitiuta e fa’aaoga lea e tau fa’afetauia ai le totogi o lisi o pisinisi laiti mo fefa’atauaiga o lo’o i ai i nei malaeva’alele, tagata faigaluega, fa’amamaina o le malaeva’alele mai siama ma verusi o fa’ama’i pipisi, tautua mo le fa’amamaina o faleta’ele, totogia ai ni pili o lo’o nofo aitalafu ai, ma ia mautinoa o fa’amama atoa le malaeva’alele ae maise i nofoaga ulufale ma ulufafo atu ai pasese o faimalaga pea.