Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

FA’ATULA’IA SE POLOKALAMA FA’ASALALAU I ALAATA I SOUTH CAROLINA - TAMAITAI SAMOA FA’APEPELE HUNKIN:

O se tamaitai Samoa, o se Fitafita Tuai a le USArmy, ua alaala tumau ma le fanau i South Carolina, ua ta’imua nei i lona fa’atula’ia o se polokalama fa’asalalau fa’alaua’itele i Columbia South Carolina ma e mafai ona maimoaina i le Fox News, Aperila 04,2021 i le itula 11:am, tusa lea o le itula e 5:00 I le vaveao i le taimi a le tatou Malo.

O le igoa o lea polokalama ua fa’aulutala “Pele Inspire Show” o se polokalama o fa’atalanoaga e fa’aosofia ai le agaga ma’ema’e ma le fiafia o tagata uma e soifua pea ma le fiafia e tusa po’o le fita ua e soifua ma oe, poo ni faitaga ma fa’afitama’i fo’i sa e savalia mai, i lou olaga taumafai i galuega, tiute ma faiva po’o le tamafaiga e atia’e o lou aiga.

“O lenei taumafaiga, ou te fa’afetai tele i le Atua ua mafai ona mautu ma amatalia, ae o se taumafaiga na lu’ia ai a’u ou te fa’atinoa, ona o lo’u misialofa i le mafutaga ma si o’u tina pele, Miriama Hunkin, ua fai i lagi le folauga, ae tumau ona uiga faamalosi, fa’afiafia tagata fa’aosofia fo’i le lagona mafuta fa’atasi ma isi e to’atele ua ia silafia. O se taumafiaga ou te manatua ai lana tausiga, lana fa’atonu ma le a’oa’iga sa ia faia mo i matou le fanau.” O se fa’amatalaga lea a Pele Hunkin ina ua fesigia le mafuaga o lenei taumafaiga ua a’emalo.

Ua ia filifili nisi o tina o lo ua mautofi, o nisi o tina o e sa tautua i le vaega au, ae ua fa’aiu manuia na faiva, ma ua tulaga lelei fo’i a latou taumafaiga i ni tofiga ua galulue ai i le setete o South Carolina. 

O isi tina ua filifilia, o tina mai atumotu, teritori ma tina o lanu eseese, ua mautu ma fa’aiu manuia latou sailiga ma taumafaiga. O Pele Hunkin fo’i, sa mua’i avea o ia o se tina na fa’atalanoa i lea ituaiga o polokalama ae o loo fa’atautaia e Les Brown.

E ese mai lea sa faia sana folasaga ina ua filifilia o ia e avea ma se tasi e saunoa fa’apitoa i le “Re-Discover Me” i le District of Columbia. Ua to’alima ia te ia tina, ae o le aotelega o e na fili fa’apitoa mo lena polokalama e 144 i latou, ae saunoa i ala o feso’ota’iga fa’a-upega tafa’ilagi.

O ia o le tamaitai muamua mai atumotu ua saunoa fa’apitoa i nei avanoa lelei, ma ua ia fa’alauiloa atu ai fo’i ma le tatou olaga fa’a-Samoa i le lalolagi.

“O lo’u avanoa lea, sa ou le moemiti ou te tautala i lea tele o atunuu, mae peita’i ua fa’amalosia a’u ona o le fa’anaunau ia mafai e lenei taumafaiga ona fa’ailoa atu ai, olaga o tatou tagata, ma o se sao ua mafai ona tuulima mai ia te a’u, ua ou faia ai ma le fiafia. E afua mai i la’ei fa’asamoa, e oo i le a’oaiga fa’asamoa o fanau ina ia soifua tautua ma ia iloa tu ma aga e fa’asino tatau i ai le soifua tautua mai le ititi se’ia matua. A’oa’oina lelei ia soifua fa’aaloalo i tagata matutua ma iloa lona tulaga i le nuu, ekalesia ae maise lava o lona aiga.”

“O mea ia sa mafai ona fa’asoa atu i o’u avanoa na lauga ai i le “Inaternational Day of Enterprsing Women,” le avanoa mo le Re-Discover Me, ma le fa’atalanoaga fo’i e le susuga Les Brown lea sa i’u ane ina maua ai le avanoa ou ta’ita’ia ai lenei polokalama fa’atalanoa i le televise, “Pele Inspire Show.” O se tala fa’amemelo lea a le tamaitai ona o avanoa lelei sa ia maua e fa’alauiloa ai lona olaga o se tamaitai Kerisiano Samoa na oo i le sasa ma le fa’atonu ma aoaiga le ‘alo a matua, ia iloa ola ma taumafai i le olaga, ia le galo le Atua i mea uma.

O lana polokalama ua fa’afoliga i le polokalama sa fa’atautaia e le Peresetene o Mr Samuel Pough, o le Re-Discover Me, lea sa fa’afoea e le “Just Because We Care Organization!” e aofia fa’atasi ai ma Mr Terence le fa’atonu, ma Mr Kenneth le alii le sui Peresetene.

O lana polokalama ua fa’atautaia o se toe fa’amanatu mo lona tina peleina Miriama Hunkin o Nuuuli Amerika Samoa, ma Vaiusu, Samoa.

O nei sui e to’afa ua fllifili Pele Hunkin o le a faafofogaina latou saunoaga mo le “From Pain to Gain, Pele Inspire Show,” ia Aperila 04, 2021 mo so’o se tasi e maua le sootaga lea o le a fa’alauiloa atu mulimuli e te maimoaina i ai.

O Fa’apepele [Pele] Hunkin o se tina mo le fanau e to’atolu, o le Vetereni ina ua mae’a lana tautua mo le 19 tausaga i le USArmy. Ua litaea o ia ma le tofia Sergeant First Class. O lo ua fa’amautu o ia i Columbia, South Carolina, ae o lona aiga atoa o lo’o tala fa’auto i Samoa ma Amerika Samoa nei, fa’apea foi le Iunaite Setete o Amerika.

Ina ia maua lona tulaga taualoa e fa’atautaia ai lenei polokalama e ao ina mua’i fa’afofogaina e nisi ana saunoaga faalauitele, i polokalama sa vala’aulia e saunoa ai ma fa’ailoa fo’i lana foi lana folauga.

“O le tele o manatu fa’aalia i saunoaga a le tamaitai mai Samoa, na avea ma se fa’amalosi’au i lagona o le to’atele, ma ua fa’aosofia ai le to’atele e fia fa’afofogaina polokalama nei e fesoasoani i nisi o tina e to’atele i so’o se atunuu ua mafai ona sootaga i ai laina feso’ota’i o lea polokalama ua ia fa’afoea, ua amatalia i le aso ananafi.” O se tala lea a le susuga le Peresetene o Samuel Pough.

O Fa’apepele Hunkin o se tamaitai Samoa na soifua a’e i Nuuuli, Amerika Samoa i ona matua o Miriama ma Malae Hunkina. Sa avatua o ia e tausia e lona tina matua, tina o lona tina, o Fa’apepele Auva’a o lo’o fa’aigoa i ai o ia i Vaiusu, Samoa i le 10 o ona tausaga, peita’I na toe aumaia o ia I Amerika Samoa ma fa’aiu ana a’oga maualuga i Fa’asao High School, ma ulufale atu ai I le USArmy ina ua fa’aiu manuia ana a’oga maualuga I le tausaga 1994.

O le tausaga 2013 na mae’a ai lana tautua i le USArmy ma lona tofiga o le Sgt First Class, peita’I ua mae’a umia fo’i lona fa’ailoga o le Associates Degree in Science mai le KolisiTuufa’atasi o Amerika Samoa. O lo ua umia fo’i lona fa’ailoga Associates of Arts Degree in Business Management, BA in Business Administration; ma le Masters in Helath Care Administration  mai le University of  Management & Technologyi Arlington, Virginia.

“E mafua ona ou taumafai atili, ona o le fa’anaunauga ia ou gafatia ona tausi ma aoao la’u fanau e to’atolu ia le faiaina gofie i fita o le olaga, tusa poo le a tiga i le tino ma le mafaufau e oo mai. Ia tumau le mafaufau ma le mautinoa, “O lo’o soifua lava le Atua, e mafaia ai mea uma.” O se tala mai lea a le tamaitai o pele Hunkin I se talanoaga ma ia a’o sauni atu e tatala lana polokalama fa’asalalau i luga o le televise tele a South Carolina.

“O la’u mau tau’ave mo a’u uo mamae, le fanau talavou, i latou o faigaluega ina ia sao i ama se taumafaiga o tauivi i ai, Ia faia mea uma ma le loto fa’amaulalo, ia le faiaina ma iloa e mafaia, ia mausali i lou fa’amoemoe, ia lu’ia lou tagata e te mafaia!”

“O la’u fa’afetai ona ua ou gafatia ona fa’ataunuu le tele o mea sa ou nanau i ai, o nisi mea sa molimauina e o’u matua, ae o le tele ua maua ae ua toe o le fanau o latou patipatia faatasi ma a’u ma o’u aiga, peita’i, e le mafai ona e le maua, pe afai e tumau i lou sailiga ma lou fa’amoemoe i le Atua e fesaosoani mai. O le fa’afetai ma le vi’iga e foi i le Atua, ae tumau le fa’atauva’a o le tagata.”

Sa ou naunau i se suiga, o le suiga ou te iloa lelei e fa’afiafiaina ai a’u ma nai ou matua ma o’u aiga uma ae maise o a’u uo mamae, o i latou uma sa nofo tapua’ia o’u faiva, fa’afetai i le Atua ua mae’a ma ua fa’amanuiaina o’u ala.”

E moni lava le fuaitau, “E sili ona aoaoina oe i mea tiga e oo mai, aua e tumau lea a’oaiga se’ia oo ina mavae le ola.” O se toe upu lea ma le fiafia a le tamaitai o Pele Hunkin o Silver Springs  Columbia, South Carolina.

TOFIA DANIELLE CLEMENS KING – AVEA MA TAUSITUSI A LE FALETUPE TBAS

O lo ua tofia nei le tamaitai tausitusi o Danielle Clemens – King e avea ma Tausitusi / Suetusi a le tatou faletupe tele o le Territorial Bank of American Samoa i le atunuu. O le tofiga lea ua ta’ua o le CFO ma ua fai fo’i si umi o avea le tamaitai o Danielle ma Tausitusi a le Kamupani o le Bluesky Communications.

E valu tausaga o avea o ia ma Tausitusi a lea Kamupani Telefoni tumaoti i le atunuu, peita’i sa galue muamua fo’i o ia i lea ituaiga o tofiga mo le ASPA . Ua atoa le 27 tausaga o avea o ia ma Tausitusi ma Suetusi i le tatou atunuu.

Na muai galue fo’i o ia i lea lava ituaiga o galuega i le tatou falema’i tele i Faga’alu, LBJ Medical Center.

O le susuga le Pule Sili o le tatou faletupe TBAS, David Buehler sa ia fa’alauiloaina lea tofiga taua ua tula’i ai King i le faletupe o le teritori I le vaiaso ua te’a. O le tamaitai Tausitusi o se tasi sa fa’aiu lelei ana a’oga maualuga mai le Fa’asao High School , ua mae’a umia lona Masters Degree in Business Administration  ma le Bachelors in Accounting & Finance.

O le isi sui foi ua va’aia ua fa’afaigaluega nei e le TBAS o le susuga lea a Ethan Lake, o se tasi sa galue foi i le Matagaluega o le Saogalemu Faalotoifale a le tatou Malo.O ia lea ua avea nei ma Chief Credit Officer ale tatou faletupe lea.

E lua nofoaga autu o le tatou faletupe lea o tautuaina ai le mamalu o le atunuu lautele ma le aufaipisinisi fa’apea le malo atoa, o Tafuna le lala fou ma le nofoaga autu i Utulei.