Ads by Google Ads by Google

TALA I VAIFANUA


[ata; foa'i]

Pago Pago, AMERIKA SAMOA

ULUFALE URSULA TE’O MARTIN – TAUVAGA TEUTEUTINO 2021 NPC USA BODYBUILDING FIGURE WELLNESS:

Ua leva ona tulitulimatagau mai e lenei alo o le atunuu, Ursula Te’o Martin sona avanoa e tauva ai i se tauvaga Teuteu Tino mo le Iunaite Setete atoa ma ona Teritori ae fa’afetai tele o ia, o lea ua oo ina ausia e ia le agava’a e tauva ai ia Iulai 30 & 31, 2021, i Las Vegas Nevada.

O le afuaga ona ia maua o lenei avanoa, ina ia tauva o ia i le tauvaga Teuteu Tino a le Jay Cutler NPC Classic, e tolu vaega sa ia tauva ai, ma sa fa’amanuiaina uma ana taumafaiga nei, o lea ua ia agava’a ai e ulufale i le ta’amilosaga a le Malo atoa o le Iunaite Setete o Amerika, 2021 NPC USA Bodybuilding Figure Wellness.

O lenei tamaitai Samoa mai Faleniu, sa tautua fa’atasi ma lona to’alua i le US Air Force a le Malo Tele, peita’I ina ua maliu si ona to’alua I se fa’alavelave fa’afuase’I, sa ia talosaga mai i le avanoa e galue ai i Wellness Center i le Kolisi Tuufa’atasi a Amerika Samoa. Na tuua e ia lea galuega ina ua matua mautinoa  ia lona fia tauva e avea ma se tasi e iloga ai Amerika Samoa i lana tuamafaiga i lea fa’agatama.

 Na mautu mai lana pine Auro mo Amerika Samoa i le Teuteu Tino i Ta’aloga a le Pasefika. Peta’i, o lea ua aga’i atu nei ina taumafai e fa’amautu lana taumafaiga i le li’o tele o le Iunaite Setete o Amerika, ma ua ia fa’ailoa ai, “Ou te mana’omia a outou tatalo mai mo le taumafaiga, aua o le mafuaga lenei o le taumafai atili, ia iloga Amerika Samoa i le tino lelei i lea fa’agatama o le Teuteu Tino ia Amerika atoa ma le ma le lalolagi.”

Ua fa’ailoa mai e Ursula, o vaega e tolu sa tauva ai i Las Vegas e aofia ai le Open Figure, Class C, & Womens Over 40 Years ma sa mautulaga o ia i le tolu pito i luga i ana taumafaiga uma nei, lea la ua maua ai lona avanoa, e tauva ai i le tauvaga a le Malo tele ia Iulai 2021 i Las Vegas lava.

Ua fa’ailoa mai e Ursula, “Ua ou fiafia tele i lenei avanoa ua ou maua, o se fa’amoemoega ua leva ona tulitulimatagau mai pe ausia. Fa’afetai i le Atua ma le tapua’iga a lo’u aiga atoa, le nuu pele o Falemiu, ia i latou ua latou silafia la’u taumafaiga. Soo se taumafaiga e tapua’ia e Manuia e pei o lea upu a le atunuu. Tau ina tatalo mai mo lenei taumafaiga, ae o le vi’iga e fo’i i le Atua ae le o le tagata fa’atauva’a.”

Ua ia fa’ailoa mai fo’i, “I so’o sa’u taumafaiga lava e ‘au’au lava i le aiga ma le tapua’iga. Ou te alu e fa’atino le tauvaga ae o lo’o ave atoa atu ai ma loto o o’u uso ma tuagane ma le matou aiga atoa, e u’una’ia malosi atili ai lo’u loto e taumafai le mea sili ua gafatia. Ua auau fa’atasi fo’i ma lo’u faiaoga e fautuaina a’u i taimi uma, Roxie Beckles. O ia lea o se sui o le IFBB Physique Pro & Olympian Competitor.”

“I le taimi ua ou tu mai ai i luga mo la’u fa’aaliga, ou te mautinoa 100% o lo’o ou tauavea lo’u aiga atoa, lo’u nuu pele o Faleniu ma lo’u malo o Amerika Samoa, o’u tagata nuu uma lava. O se fa’alagona e fia malo ai, ia fai se mea e fa’aea ai Samoa i le lalolagi o tagata eseese ma nei fa’agatama.” O sana toe fa’aopoopo mai lea.

“Ina ua mae’a le tauvaga ma ua solo mai le anoanoa’i o fa’amanuiaga, e le’i ela lava le iloa, o lo’o tapua’ia nei taumafaiga e le to’atele ou te le iloa o lo’o latou tatalo ma tu’u atu mana’oga ina ia fa’amanuiaina nei faiva. O le fa’afetai e momoli faapitoa atu, ou te fa’afetai lo outou lagolagosua, ae fa’amoemoe tou te le tu’ua au i le isi la’asaga faigata ua fa’aolioli mai nei. Ia tatou tumau i le agaga maulalo e maua ai malo, ae o le taumafaiga ma le koleni malosi mo lea fa’amoemoe, o lo ua tuu atoa i ai le loto ma le malosi.”

O lana taumafaiga lenei, ua ofoina o se taumafaiga e fa’amanatu ai pea ia te ia si ona tuagane la’ititi o Damon Whitney Te’o lea na tu’ua le olaga nei, a’o toetoe oo i le aso mo lenei taumafaiga. “Lo’u tuagane pele, sa fa’alogoina lava i lo’u mafaufau lou leo fa’amalosi, e te manatu ai ou te mafaia ona una’ia le taumafaiga i se tulaga fa’amanuiaina. Ou te misia oe ae ua ua iloa lou loto atoa, ia ou mafaia lenei lu’iga. Ou te taumafai ina ia ausia lou fanoga. E mana’o i ai le loto ae fa’amoemoe i le alofa e toina mai e le Atua malo.”

“Ou te talitonu e leai se mea e le mafai i le fa’amalosi mai o Keriso ia i tatou, ua le ese lea taumafaiga ma isi uma ua feagai ai ma nisi o fanau a Samoa o lo’o tauva i isi fo’i fa’agatama, ae ia mautinoa, o le tino polenisia, e matua matagofie i le maimoa, pe a oo ina tauva i nei fo’i fa’agatama ua ou savalia. Ia o gatasi le futia ma le umele, aua nei o tatou tu’ua le fa’amoemoe i le fesoasoani mai o le Atua.” O sana tala fa’atauanau lea i nai ona aiga ma lona nuu pele ae maise Samoa uma.

E tasi le mea ua mautinoa nei, ua tautino mai e Ursula Te’o Martin, “Ou te tau’avea outou uma i so’o se taimi ou te tauva ai, aua ne’i e tu’ua a’u.”

“O se fa’alagona ese e fa’aosofia ai lo’u nei tagata I so’o se taimi, i lo’u tu ai e tauva, ae mautinoa, o lo’o o’u tau’aveaina o’u tagata uma I la’u taumafaiga. E su ma fefete atili ai maso i lagona fa’agae’etia ua alofaina ma tapaua’ia tele o’u faiva e outou uma. Fa’afetai fa’afetai lava.”

“Fa’afetai tele mo le TANOA Samoa i o latou oloa o lo’o la’eia i aimi uma e koleni ma fa’amalositino ai. Fa’afetai Aaron Forsgren ma le Kamupani o la’ei ta’alo, fa’apea fo’i Willie Salave’a mo mea uma ua fa’aaogaina. O le fa’afetai tele o le faia’oga ona o lona silafia ua sasa’a mai ma ua fa’aaogaina, tau ina ia toe fa’afo’i e le Atua le poto atili ia te oe Roxie Beckles.”

“Samoa, tou te le silafia le fiafia ma lagona o le atoaga pe a oo ina e tula’I e tauva, ae maiutinoa o lo’o avea oe ma sui o lo’u malo ma ou tagata e pele ia te oe! Fa’afetai tele mo le tapua’iga.” O sana toe tala lea sa ia fa’ailoa ai lona agaga fa’agae’etia, ona ua saofaga se taumafaiga e amata ai ona tauva i le Iunaite Setete ma afai ae fa’amanuiaina, o le ulufale ai fo’I lea mo se avanoa i le Oimipeka, e tauva ai.

TATALA LE FALETA’ALO O LE A’OGA MAUALUGA AOGA MATATA ESEESE – NU’UULI VOC-TECH

O le taeao o le aso Faraile na tatalaina ai le Faleta’alo o le A’oga Maualuga o Matata Eseese i Nuuuli.

Lea ua mae’a, ua fai fo’i i ai le lima lelei o le afioga le Agaiotupu ma le Falefa o le Aiga Salemalama, Nana’s Construction, aua ua lanu fa’atasi apa o le fale ma ona puipui i lanu a le a’oga maualuga. 

O lea taeao sa umi se taimi o tatalia le oo ane o le afioga le Kovana ma le Lutena Kovana mo le amatalia o le fa’amoemoe, peita’i, ua iloga e i ai fo’i le tasi faatasiga sa muamua oo atu i ai le faigamalo, e tatalaina ai laina o so’otaga ma nisi e a’afia o latou mafaufau.

O le susuga le Faife’au Toeaina Tusi Seanoa o le EFKAS i Petesa Uta sa siitia le fa’afetai ma se upu fa’amalosi’au i le fanau a’oga ina ia fa’aaoga tatau le fale ta’alo ua fausia mo i latou, ia maua ai malo, ae le afua mai ai ni mea fa’aletonu i lo latou olaga.

O le itula e 11:00 na fa’ato’a amatalia ai loa le fa’amoemoe ma sa na’o na ootia lava o le lipine e tatala ai maimoaga a le faigamalo o le nofoaga, ona faia loa lea o le fa’atasiga i totonu o le faleta’alo. O le lipine sa ootia lea e le faletua o le Kovana ia Ella Lemanu Mauga.

O le galuega o lona tau na tauofo ai ma malo ai le Nana’s Construction e $700,000+ peita’i na mae’a ane ua i ai isi vaega na fa’aopoopo ma ua maua ane ai le tau aofai e $880,000+. Ua fausia le faleta’alo, fa’aopoopo faleta’ele matagofie, fa’apea fo’i ma le latou fale’ai ma potu a’oga e lua ua fa’aofi i ai.

Na tutula’i le tamaitai fa’atonu o le Matagaluega o Galuega Lautele ia Faleosina Voigt ma ia fa’ailoa mai, “o fanua nei ua fa’atulaga ai le faleta’alo, o le eleele ua fa’asino mo pisinisi. O le faigata lea aua sa maua ane i le eliga o le fa’avae, e i ai nisi o mea o lo’o tanumia i le nofoaga lenei, e le tatau ona lotea fa’atagafai e le Kamupani. Sa toe vala’auina le Ofisa o le Historical Preservation ina ia latou o mai e taga’i toto’a i ai ma fa’ataga mai e fa’aauau le galuega. O le isi lea mea sa fa’atuai teisi ai ona fa’amae’a le galuega o le faavae.” 

“Peita’i o le eleele fo’i lenei sa toe tuu mai e le faipisinisi sa toina i ai le eleele, ia fausia ai le faleta’alo o le Laumua o le Pusi Aivao. Lea la ua tatou i ai i le aso nei, ua fiafia fa’atasi i tatou uma, ua mae’a ma ua amata i le aso, ona le toe tagimaiala outou le fanau, i le leai o se nofoaga lelei e faia ai tou ta’aloga ma fa’atasiga tetele. Fa’afetai i le lima lelei o le Kamupani a Nana ona o le matagofie o lenei faleta’alo, a’o le vave fo’i ona mae’a fausia.”

Na taua’aoina le tusi na saunia e le Matagaluega o Galuega Lautele e fa’ataga ai le fa’aaogaina o lea faletele, i le tamaitai pule a’oga Valasi Apulu.

O le avanoa mo le afioga le Kovana Lemanu P.S. Mauga sa ia fa’ailoa ai lona agaga fa’afetai i le faigamalo ua tuana’i, le afioga Kovana Lolo Moliga aua o ia lea sa ia fa’atulaga lenei galuega ina ia fausia, lea ua mae’a ma ua tatala. O lona agaga ia lelei falea’oga ma faleta’alo mo a’oga uma a le malo, aua o le toe a’oga maualuga lea ua fausia ma mae’a lona faleta’alo, ae ua amatalia poloketi i aoga tulaga muamua i le atunuu atoa.

Ona ia fa’ailoa mai loa lea e tatau fo’i ona ave le fa’afetai i le susuga le Faipisinisi o Steven Shalhout, o ia lea na ia te’ena le fausia o lona fale’aiga i le tulaga lenei, ae suia atu i se isi nofoaga lana pisinisi, ae tuu le nofoaga mo le faleta’alo a Nuuuli Voc-Tech.

Peita’i o lana fa’afetai o le vasega o Matua ma faia’oga ae maise le fanau a’oga, sa autova’a mai i lenei a’oga maualuga Matata Eseese ma mae’a a’oga a’o le’i maua lava se faleta’alo mo I latou. “Sa outou faia le mea sili, ma sa outou le va’ai ai i le fale, ae o le anoafale! Sa outou ausia le tele o matati’a i ta’aloga ma aoaoga, ua fa’amoemoe ia te outou sa a’o’oga atu iinei le fausaga o le tatou Malo. O foliga o le fausaiga o le Malo, o la outou maftafaioi tausi lea i lo tatou ola tautua ai.”

“Lea ua oo mai i lenei augatupulaga, ua outou se’ei nei i fa’amanuiaga sa momo’o i ai i latou ua mae’a tausaga a’oga iinei, ia fai malu le faiva. Ua tutupu atu i’inei mea lelei, ae le o ni mea fa’aletonu e pei ona tima’i muamua atu ai le fa’afeagaiga.” 

O le tina Matuaofaiva sa tula’i mo lona avanoa, “O le faafaigata sa feagai ma le Kamupani Kamuta ona sa feagai ma le fausaga o le faletele o le DYWA lea ua mae’a tatalaina. Peita’i ina ua mae’a lelei lea faleta’alo tele, sau loa le to’atele o le aufaigaluega e fa’amae’a lelei le galuega lenei ia maua le fanoga o le fanau. Lea ua tatou i ai, fa’afetai i le Atua mo lana ta’ita’iga ma le malosi ae maise o le mafaufau tonu e fa’atautaia ai galuega uma.”

“Pau lenei o le a’oga, e o atu lava tamaiti a’oga e tauanau a’u ia vave na uma le latou galuega aua o lea ua toina mo i latou le latou ulua’i mana’o, ia ou fausia le latou faleta’alo. Fa’afetai i le Atua ua toina mo outou e le Atua lo outou mana’o. O le mea e faia e outou mo le Atua, ia afua atu Iinei ni manuia mo outou matua, aiga ae maise le Galuega a le Atua. Ia outou amio lelei ma fa’aaoga tatau lenei fale ua fausia mo outou le fanau talavou, o le lumana’i outou o le tatou malo.”

O le talanoaina o le faleta’alo o lea a’oga na amata mai le faigamalo a Tauese ma Togiola.