Ads by Google Ads by Google

TALA I VAIFANUA


O se va’aiga lea i nisi o le vasega na fa’au’u a le EMS, ma sa taua’aoina latou tusi pasi i le aso Faraile ua te’a i le sauniga mamalu sa fa’atautaia lea i le latou Ofisa Fou i Tafuna, le nofoaga tuai sa i ai le FAA Club House. [ata: Leua Aiono Frost]

Pago Pago, AMERIKA SAMOA

 

11 SUI TAUA’AO TUSI PASI MA FA’AU’U MAI KOSI A LE EMS – APERILA 09

 

O le aso Faraile i le nofoaga fou ua fa’amautu uma i ai le auaunaga a le EMS i Tafuna, na fa’ataunuu ai le fa’au’uga ma taua’aoina ai tusi pasi mo i latou e to’a 11 na a’otauina i faiva e tatau ma le tagata e tautuaina le atunuu i lea fo’i matata, o le tau toe fa’asaoina o le soifua, ma molita’i atu fa’ata’alise atu i le falema’i. O le itula e 11:00 i le taeao na amatalia ai lea sauniga mamalu.

 

O le auau o le latou fa’auuga i lenei tausaga, ua fa’ailoa ai, “O le tatou taimi lenei!”

 

“O lenei ua mae’a fa’amautu le tatou auaunaga i le nofoaga fou, ma ua fa’atautaia fo’i tatou aoaoga e tatau ai mo i tatou ina ia fa’ata’alise atu ina ia fa’asaoina le soifua, poo fea lava e aga’I mai ai le vala’au. O lo’o i o tatou lima ma lo tatou iloa le soifua ma’ale’ale o le atunuu atoa, ia faia le tatou galuega i le mea ua gafatia ona fa’atino ai, a’o le alofa e mafua ai. O le tatou taimi lenei,” o se tasi lea o vaega o upu tima’i sa fa’amalosi atu e le ta’ita’i o lea tautua i lana aufaigaluega.

 

O le leo o le fa’amalo, ona o tiute fai ma le faigata ona oo atu o auala i vaipanoa, eseese o le atunuu, atoa ai ma le taumafai atili ina ia silafia lelei ala e fa’asaoina ai le ola o i latou o lo’o taumafai e fa’avave i le falema’i. O i latou i le EMS, o sui na e fa’amoemoe i ai le fa’asaoina o le soifua i le tele o taimi. O le fa’afetai i le tautua e le fa’atuaoia mo so’o se tasi ua vala’au mai.

 

I le polokalama sa taua’aoina e fa’asolo i lea aso fa’apitoa na tofia ai le susuga Lesolo P Kalio e avea ma fofoga fa’atalofa ma fa’asolo le polokalam fa’ataoto mo le latou aso fa’apitoa. O le tatalo na tatala ai le sauniga mamalu na siitia lea e le Faife’au Rev. Marcy Tuifatu, ona soso’o loa lea ma le saunoaga fa’apitoa mai le sui mamalu o le Falema’i Tele i Faga’alu, e tima’ia le vasega o sui fa’au’u ma fa’afetaia lo latou sao i le galuega, aua  o i latou uma lava ua mae’a fa’atino o latpu faiva e tautua ai le atunuu, ma o le isi fo’i lea vaega o le a’oaoga fa’apitoa mo i latou ina ia silafia lelei le fa’atinoga o le galuega.

 

O le susuga Popo Avegalio le ta’ita’i o lea aufaigaluega i le tatou atunuu, sa ia tula’i fo’i e saunoa fa’apitoa i le ituaiga o aoaoga ua maea fa’atautaia mo lenei vasega o le aufaigaluega, ma sa ia fa’alauiloa fo’i i latou uma ua agava’a mo le tusi pasi o le a taua’aoia i lea fa’atasiga ma pelega ma aiga o sui taito’atasi.

 

O le taimi fo’i lea na tutula’i ai i latou uma le vasega fa’au’u ma latou taulotoina le latou tautoga a le EMS, ina ua mae’a taua’aoina latou tusi pasi.

 

O I latou nei ua fa’amanuiaina Duncan Pitone Manase mai Futiga; Talalelei Arieta Afalava mai Aoloau; Jody Sa’au mai Aunuu; Paeai Fusilua Milikini o Faga’alu;  Preciousjasmine Feleni Su’a-Kalio o Iliili; Marlena Leatulevao o Leone; Fangupo Tafoki Jr o Vaitogi; KelemeteFagamanu Ifopo mai Nuuuli; Aloali’i Ruta Ualisao Kokoland; Melema Sivatia o Pago Pago ma Leuteofuiono Lafaele o Utusi’a.

 

Fa’amalo le tauivi ma saili tomai e aoga mo le fa’atinoga o tiute ma faiva ua galulue ma tautua ai.

 

FA’AMANATU LE SISIGAFU’A FAIA LE BBQ TELE MO LE ATUNUU ASO FARAILE NEI

 

Ua fa’ailoa mai e le faigamalo, o le a le fa’ateleina fo’i le Aso o le Fu’a Amerika Samoa 2021, ae o le a fa’amanatuina i se BBQ tele o le a faia lea i le Aso Faraile nei, pe a mae’a le sauniga mamalu ma sisi a’e Fu’a i le Malaeoletalu i Fagatogo, ae tapena ai lea ‘aiga tele i le Malae o le Suigaula a le Atuvasa i Utulei.

 

O lenei tausaga ua faamanatuina ai le atoaga o le 121 ai tausaga talu ona sisi a’e le Agigia a le Malo Tele o Amerika i laueleele o Amerika Samoa ia Aperila 17, 1900.

 

O se tasi lea o mataupu sa fa’alauiloa mai e le afioga Kovana Lemanu Peleti Mauga ma Lutena Kovana Talauega Eleasalo Ale i le latou fonotaga ma le kapeneta, sa fa’atautaia i le potu fono o le Matagaluega o Fa’ato’aga i Tafuna i le aso Faraile ua te’a, itula e 9:00 i le taeao, ma sa tatala mai ai avanoa e oo atu ai nisi o suitotino o le au fa’asalalau tumaoti i le atunuu, le nusipepa ma le leitio.

 

Ua valaaulia tagata uma ina ia fa’amautu ane i Utulei o iina e piki ai le mea’ai, ma e taua’aoina mea’ai i tagata uma o le a auai. O le Malo o le a fa’atautaia ma fa’atupe atoa lea BBQ.

 

Peita’i, ua na’o le fanau a’oga i le atunuu o le a le faia ni a’oga, ae faigaluega lava tagata uma o le malo aua e le o se aso malolo le aso Faraile. O le Aso Gafua loa, ua fa’ato’a malolo uma ai loa le malo. O le a fa’ato’a totogia ai fo’i i latou e tiute i lea aso, o le taimi male afa.

 

Ua saunoa fo’i le afioga Kovana Sili, “Ua fa’ailogaina le Fu’a a le tatou malo i le aso Faraile ina ia fa’aavanoa ai le taimi o le fa’aiuga atoa o le vaiaso mo aiga. O le faiga fo’i lenei e masani ona fa’aaoga e le Vaega Au atoa, e faigaluega ai tagata faigaluega a le Malo, ae le totogia aua e le o se aso malolo. E fa’ato’a malolo le atunuu atoa i le aso Gafua, Aperila 19, 2021, ma totogia ai i latou e faigaluega pea, ma e tatau ona totogia latou ovataimi.”

 

O galuega o le a fa’atino i le aso Faraile e le aufaigaluega a le malo, o le a aofia ai ma le kiligi fa’asoloatoa o le Fagaloa, o galuega na e fa’atulaga mai e Fa’atonu o Matagaluega taitasi mo lana aufaigaluega.

 

Ua fa’ailoa mamao mai fo’I e Kovana Lemanu Mauga, “O i latou uma lava e aofia i le tapenaga ma le kukaina o le BBQ, e le totogia le ovataimi, e totogi lava o latou totogi masani, aua o le aso lea e le o se aso malolo.”

 

O le aso Faraile nei o le a leai ni aoga a le malo. 

 

SIITIA TOTOGI MAULALO AUFAIGALUEGA A LE MALO $16,000 TAUSAGA

 

O lo ua amata nei ona suia le totogi maulalo lava e faigaluega ai se tasi i le malo, lea sa masani ona maua le $11,000 i le $12,000 i le tausaga, ae ua siitia nei i le $16,000 i le tausaga.

 

O le saunoaga faapitoa a Koavana Lemanu Mauga i le fonotaga ma le Kapeneta ma le au fa’asalalau, lea sa ia fa’ailoa ai lea siitaga. Sa manatu maualuga lava i la’ua e tatau ona oo le si’itaga lenei i le $16,000 i le tausaga peita’i, ua va’ai toto’a i ai ma ua le talafeagai lea mana’oga.

 

Ua fa’ailoa mai, ua i ai nisi ua mae’a ona siitia totogi, ae le’i oo atu i isi matagaluega ma tagata faigaluega le si’itaga, ae mautinoa e tatau lava ona fa’aauau lea siitaga se’ia mae’a faia mo e uma e agava’a i ai.

 

Ua fa’ailoa mai e Kovana Lemanu, sa fuafua fa’atasi lava le siitaga lenei ma le toe fa’afo’I o totogi o isi lea na siitia ae le o tusa ai ma aiaiga o le tulafono tau totogi e galulue ai, peita’i ua manatu ina ia toe fa’afo’ia muamua siitaga ia na faia sese, ona fa’ato’a fa’asalafa mai loa lea o le siitaga lenei mo tagata uma o lo’o mau pea i le totogi maulalo.

 

Ua fa’ailoa mai fo’i e le tatou ta’ita’i o le faigamalo, ua maea toe fa’afoia i tua totogi o e na siitia sese latou totogi, lea sa tauaaoina mai e le tamaitai fa’atonu o le Matagaluega o Tagata Faigaluega a le Malo, Lynn Pulou Alaimalo.