Ads by Google Ads by Google

TALA I VAIFANUA


Le tofa ia Tauese Vaaomala Sunia, le fofoga o le aso i le Susugafua i le aso Faraile ua te’a i le Malaeoletalu i Fagatogo. [ata: Leua Aiono Frost]

O se vaaiga i le Fagatogo Pavilion i le taeao o le aso Faraile ua te’a i le fa’amanatuina o le sisigafua o lenei tausaga. [ata: Leua Aiono Frost]

Pago Pago, AMERIKA SAMOA

 

MAEA SISIGAFUA FA’AMANATU 121 TAUSAGA – TAFATOLU O LE TAUTUA: ATUNUU EKALESIA & MALO

 

Na fa’atautaia le sauniga mamalu o le sisigafu’a i le Pavillion i le Malaeoletalu, Fagatogo ma sa sisi a’e le tagavai a le Iunaite Setete o Amerika fa’apea ma le tagavai a le malo Fa’ateritori o Amerika Samoa I le itula e 7:00  le taeao lava o Aperila 16, 2021, le Aso Faraile lea.

 

I le sauniga faapitoa sa mua’i avea ai le fofoga o le tofa le Tauese Va’aomala Sunia ma le fofoga fa’afeiloa’i o le malo i le atunuu fa’apea le mamalu o le faigamalo na mafai ona poto i lea nofoaga faapitoa mo le sisia a’e o le Tagavai a le Iunaite Setete fa’apea ma le Agiagia a le malo o Amerika Samoa i le atoaga lenei o le 121 tausaga o lea feagaiga osia.

 

O le sauniga mamalu e amatalia ai le fa’amoemoe sa tapena lea e le susuga le Fa’afeagaiga mai le afioaga o Sa’ilele, Rev Tautua Fuiava F.S. o le Ekalesia Fa’apotopotoga Kerisiano i Amerika Samoa.

 

I le faitauga o le Poloaiga fa’alauaitele i le gagana Samoa sa fofogaina lea e le tamaitai o Losivale Eliu mai le a’oga maualuga a Fagaitua, ae o le tamaitai o Fa’ailo Tali, peresetene o le Asosi a Fanau A’oga a Samoana sa ia fofogaina lea poloa’iga fa’alaiatele i le Gagana Peretania.

 

Ina ua mae’a ona faafofogaina lenei poloa’iga fa’alaua’itele i gagana e lua, sa tuuina aloaia loa le avanoa i le afioga Kovana Lemanu P.S. Mauga ma sa ia tula’i ma pese mai le amataga o lana lauga, o se mea muamua ua faia e se tasi o Kovana o le atunuu i lona avanoa faapitoa.

 

O le vi’iga o le fa’afetai i le Atua i mea lelei uma, ua tatou maua i lenei vaitau, ae maise o le tele o ana fa’amanuiaga ua sasa’a mai i tagata o lona malo ma ona tagata, e ui ina o vaitau o le pagatia o le lalolagi ona o fa’ama’i pipisi ma le mata’utia i le soifua.

 

Ia ua mae’a sa pau le mea o totoe e aga’i i ai le to’atele o le atunuu sa manatu ina ia auai i le fa’amanatuga o le Sisigafu’a lona 121 a le Malo o Amerika Samoa o le toe aga’i atu i le Fa’aaliga o Fuataulaga i le Veterans Memorial Stadium i Tafuna, lea sa tufaina atu ai le tele o pepa mo taumafa e tali ai le gagalala o le atunu’u i lea aoauli.

 

FAAALIG FUA O FA’AELEELEAGA A LE AUFAIFA’ATO’AGA:

 

I talanoa mai a le afioga le Fa’atonusili o le Matagaluega o Fa’ato’aga a le atunuu, ua faailoa ai le tele o fa’amoemoega o fa’aolioli mai a le matagaluega, ina ia matua una’ia le vasega o faifa’ato’aga o le atunuu, ia latou fa’amalolosi ma susu’e pea lava le vao, ma ia mautu le latou auaunaga, ia fagaina le atunuu i taimi pe a oo ina fa’aletonu feoa’iga o va’a ma le tatou atunuu.

 

“I nei vaitau o lo’o le mautinoa fo’i le lumana’i pe tua ma ni a le feoa’iga o va’a oloa ma isi uma ala o feoa’iga, e tatau lava i le tatou atunuu ona va’ai toto’a i tulaga o faato’aga ma le sao o le aufaifa’ato’aga i le tausiga o le atunuu. O i latou o lo’o mau i ai le to’ovae mo lea auaunaga,” o se tala mautinoa lava lea a le ali’i fa’atonu Solia Mutini.

 

O ana fuafuaga uma o lo ua manatu e fa’agasolo e aofia ai le faia lea o tauvaga fa’alemasina o fua o fa’aeleeleaga, o le a fa’aaogaina ai le tatou Maketi i Fagatogo, ae fa’aaogaina le Malae o Suigaula e fa’aalia ai nisi o oloa gaosia i le atunuu, ua le tu’ua fo’i lena itu o le tautua, i le fofoga taumafa o le atunuu.

 

Ua fa’atulaga e ia nei mea uma e fa’ailoa atu ai i le aufaifa’ato’aga, o lo’o sapaia atoatoa e lona ofisa autu ma lana ta’ita’iga galuega uma e una’ia ma fa’amalosia ai lo altou soifua galulue i le laueleele, fa’apea fo’i ma le gaosiga o mea tausami eseese i le atunuu e le ‘au fai o’a po’o gaosi oloa fa’atau atu i le atunuu.

 

“O le masina o Novema 2021 i le aso Fa’afetai lea fo’i ua fa’atulaga ai le isi fa’aaliga tele fa’apenei ma o le isi lea taimi ua toe lelei ai foi le talo ma isi mea uma o lo’o ua mae’a totoina a le aufaifa’ato’aga. O lona uiga o le isi lea avanoa lelei e toe gasolo mai ai fo’i le atunuu e fa’afetaia fua o fa’aeleeleaga ua fa’aola e le Atua i o tatou eleele e ala mai i a’ao galulue ma le punoua’i o le mamalu o le tatou au faifa’ato’aga,” o se tala lea a Mutini.

 

O le a maua mai iuga o le tauvaga o fua fa’aeleeleaga a le aufaifa’ato’aga I le aso ma fa’alauiloa atu I latou na lautogia mo lenei tausaga.

 

TOTOGIA VAEGA TUPE E LE SUI MALAGA – LONA SAO I LE TAUSIGA O LE NOFOVA’AVA’AIA:

 

Ua fa’ailoa mai ua tele lava le suiga ua i ai nei i le to’atele ua mafai ona totogia latou vaega poo siea o le pasese ina ia mafai ona fa’atupe le nofova’ava’aia mo tagata uma o malaga mai i nei malaga fa’apitoa mai atunuu i fafo e fia oo mai i fanua ma aiga.

 

O le aumalaga lenei lona tolu ua sauni mai ua fa’ailoa mai ua sauni e totogia ma malaga mai loa i le aso ananafi.

 

O se tala mai lea a le tamaitai fa’atonu o le Medicaid i le tatou nei malo, Sandra King Young. Ua atoa lelei le to’a 155 o le aumalaga mai le 226 ua fa’atulaga mo le malaga ia Aperila 15, ua mae’a totogia latou peimeni e $500 mo le nofo vaavaaia, lea ua fa’atulaga mo le na’o le 7 aso, pe a fa’ato’ai mai i fanua nei.

 

E tusa ma le 60% o i latou na malaga muamua mai isi malaga e lua ua te’a, lea e le’i totogia latou nei vaega o le totogi mo le nofo va’ava’aia. Peita’i ua amata ona to’atele lava ua malamaama i le mafuaga e totogia ai lea vaega o le pasese e i latou, ona o le nofova’ava’aia e fai lava si taugata tele.

 

Ua mafai nei ona totogia fo’i vaega o totoe o le pili lea e $500. Mo e le’i mae’a o latou pili i le Ofis o le Medicid i le Ofisa o le ASTCA i Tafuna.