Ads by Google Ads by Google

TALA I VAIFANUA


[ATA: FOA'I]

Pago Pago, AMERIKA SAMOA

 

FA’AMANATUGA O LE SISIGA FU’A – AMERIKA SAMOA 2021

 

E tasi le aso o le Sisiga Fu’a i lenei tausaga ua na o le aso 16 o Aperila, aso a taeao lea, i se sauniga e faia i le Malaeoletalu i Fagatogo, e aofia ai le sisiina o le fu’a.

 

O se vaega o le fa’amanatuga o le Sisigafu’a o lenei tausaga o le a  fa’atautaia i le Veterans Memorial Stadium  i Tafuna. o lea o le a fa’atautaia ai le International Farm Fair ma ua  fa’aalia ai fua o fa’ato’aga a le atunuu, e oo lava i fugala’au manogi ma fuala’au ‘aina mata ma fuala’au ‘aina.

 

O le aso ananafi lea ua fa’atulaga e amata ai lenei fa’aaliga o fua o fa’ato’aga, ma e faia lava e amata mai le taeao ona tatala. Ua fa’atulaga ai fo’I ma fale’aiga o so’o se ituaiga mai le atunuu atoa se’ia oo lava i le aso To’anai, Aperila 17, o i ai pea lea auaunaga mo le mamalu lautele o le atunuu.

 

Fa’ailoa e le susuga le Fa’atonu, Solia Mutini, “O le avanoa lelei lenei e mafai ai e le atunuu ona maimoa, fa’atau ma fesoasoani i le mamalu o le aufaifa’ato’aga o le tatou malo. Sau e fa’atau atu sau meamata aua le fofoga taumafa o lou aiga, aua o fua sili nei ona lelei o fa’aeleeleaga a le atunuu, ua folasia mo le maimoaga, le fa’aaliga ae maise o fefa’ataua’iga.”

 

“O le taimi lenei e fa’aailoa ai le agaga me’eme’e o le atunuu e ala i fua o latou fa’aeleeleaga, o le a fa’alauiloa ai fo’i lo latou lima lelei ma le lima ola i fa’ato’aga o lo’o latou galueaina i aso ta’itasi. Ua le gata i mataiai o le atunuu, ae ua fa’asolo mai Ie vaseg ao fa’ato’aga o fuala’au ‘aina, fuala’au ‘aina mata, ma togafugala’au matagofie ma le manogi sasala e teuteuina ai maota ma laoa o le atunuu, ae totoina i tafafale, lumamaota ma  tuamaota o le atunuu.”

 

“Ona e tatau foi ona aumaia ma fanau i nei maimoaga, o lea ua fa’avasega ai ni fa’ase’e e fa’atutuina mo le fa’amalieina o fanau e fa’afiafia ai i latou. O le taimi umi o le a filifili ai ma maimoa matua i le fa’aaliga, ae o le a fa’ase’e ma ta’e’ele le fanauiti, le lumana’i o le malo mo a taeao, ma ia latou iloa lelei o le latou sisigafu’a lenei o le tausaga 2021 ua fa’amanatuina,” o se tala lea a Mutini e tusa o lea tapenaga mo le fanauiti se’ia pa’ia tupulaga talavou.

 

“E le o misia la le musika matagofie mo le mamalu lautele o le a asia le fa’aaliga, e matagofie mea uma i le matagofie o pesega o le a fa’afofogaina a’o fa’asolosolo lau maimoaga, fa’atau sau ‘aiga mai fale’aiga o lo ua mae’a fa’atutuina, ma fa’afiafia le fanau i a latou fa’ase’ega ma ta’elega,” o lana toe tala lea.

 

Ua fa’atulaga le nofoaga mo fale’aiga, fa’apea fo’i le tulaga mo le fa’aaliga a faifa’ato’aga o le atunuu, ua fa’apena fo’i ma le itu o lafumanu, ae maise o le a sasala fo’I le manogia suamalie ma fa’atosina o le BBQ ua masani ona fa’aosofia ai le fia taumafa i le atunuu. 

 

O le aso Gafua, Aperila 19, o le aso malolo lea a le malo o Amerika Samoa.

 

Ua fa’ailoa mai o le faia fa’afiafia ua mae’a fa’atulaga e le Arts Council i le afiafi o Aperila 15 ma Aperila 16 i le Stadium.

 

Fa’ailoa mai e Kovana Lemanu Peleti Mauga, “Avatu le fa’amalo i le ali’i fa’atonu o Fa’ato’aga i lona tula’I mai ma tuufa’atasia lenei fa’aaliga tele o fua o fa’aeleeleaga a le atunuu, e avea ma mata’aina o lenei sisigafu’a 2021, ua le gata ina avea ma ala e toe fa’afo’i ai le fa’afetai i le vasega o Faifa’ato’aga eseese o le atunuu ma Failafumanu, ae o le fa’afetai fo’i i le Atua, i lona agalelei tausi i galuega o fitaituga ai le atunuu e ala i le galueaina o le eleele ma fua ua tatou maua mai ai ina ia fa’aaoga tatau mo le tausiga o tatou tino, o lona lea finagalo. E le o laititi le fa’amoemoe o lenei tausaga, ma ua tatau fo’i ona fa’afetaia i latou uma ua latou galulue fa’atasi ina ia fa’aalia lo latou fiafia ma fa’afetaia le galuega ua tino mai ma ua matagofie.”

 

“O faaaliga tetele fa’apenei, e fa’aosofia ai le fiafia ma le agaga fa’agae’etia o le aufaifa’ato’aga ma le ‘au faifaiva, ae maise le aufai Lafumanu ina ia galueaina le eleele, ma le Sami e saili atili mai puna’oa, e fa’aalia faapenei ma fefa’ataua’i ai ma le agaga fa’afetai,” o se tala lea a le kovana. 

 

ASO FA’ATAUA AOAOGA & VAI FAFO MA ISI ATUNUU I PISINISI

 

Ina ia mautinoa e manuia le taumafaiga a se pisinisi I ala o fefa’ataua’iga, e ao ina latou opogi tu ma agaifanua a isi atunuu uma o lo’o aofia i o latou ala o fefa’ataua’iga. O le autu lea o se tasi o vasega a le fanau o loo tau’avea kosi fa’apisinisi a le ASCC, ma o latou fa’atinoga nei, e aotelega i lo latou togi fa’ai’u o lenei fo’i tausaga a’oga.

 

“Ina ia malamalama lelei le fanau o tau’avea kosi pisinisi, i so’o se atunuu e i ai latou tu ma aga, o ituaiga oloa latou te fia fa’atauina, ma aso patino i o latou soifuaga e ao ai ona tete’e a latou fa’atauga, ma ituaiga oloa e ao ina sapalaia mo i latou i fa’atasiga iloga i  latou aiga, sosaiete ma le atunuu atoa. O le ala lea e fa’atino ai uma nei tu ma aga i atunuu eseese o lo’o feso’ota’I fa’apisinisi i ai faipisinisi i le atunuu. O le fanau o tau’avea kosi fa’apisinisi, e ao ina latou mautinoa nei mea uma,” o se tala fiafia lea a le tamaitai o le Fa’auluuluga o Kosi Fa’apisinisi i le ASCC Dr Faofua Va’apuu Fa’atoafe.

 

O le fanau a’oga sa vaevaeina lea oi atunuu e lima ua mautinoa e i latou o lo’o feso’ota’i ma Amerika Samoa i ana faiga fa’apisinisi. Ua filifilia Filipaina e to’alima i latou na fa’atulaga e fa’aalia mai tu ma aga ma le soifua lautele o lea Malo, aua o lo’o to’atele na’ua tagatanuu o Filipaina ua nonofo ma faigaluega i Amerika Samoa nei. O I latou nei o Fa’au’uga Matautia, Wilene Parungo, Osana Laulu, Precious Tavete ma Mauga Fa’aea.  

 

O lo ua filifilia foi ma le to’atolu i latou na fa’atinoa Tu ma Aga a Fiti i lenei foi tausaga. Le susuga Emmanuel Suemai, Tutuila Fualefau ma Telesia Uti.

 

O le malo o Aferika e to’a fa i latou ma sa fa’atinoa a latou siva ma fa’ailoa a latou mea tausami e Patricia Tongol, Marie Fagalilo, Florita Paselio ma Faigaupuomaloaufa’atasiolelalolagi Visha Mavaega.

 

O le malo o Jamaica ua fa’atino mai a latou tu ma aga e le to’afa o lea lava fo’i vasega, Salota Sparrow Mamea, Molila’auifoga’a Salave’a, Faith Aukuso ma Lui Lolesio Filimaua. Ua i ai fo’i sui e to’a lima mo le fa’aaliga mai le malo o Mexico lea e aofia ai Brandon Foleni, Josvini Voseci, Bella Sagote, Mallory Afatia ma Amaryl Hollister.

 

O le aotelega o lea vsega atoa e 21 tamaiti ma tamaitai ua loto ina ia avea ma faipisinisi i le lumana’i.  O mea’ai na folasia mo le maimoaga ma le fofoga taumafa sa fa’atinoa uma lava e le fanau a’oga, ua latou fa’aalia ai lo latou tomai i le gaosiga ma le folasaga o nei mea taumafa, ina ia lelei fo’i ona maketi mo tagata lautele, aua a taulia, o le lauolaola fo’i lea o le pisinisi i ana tupe maua.

 

“O le taimi lenei, ua ou ‘aia nei mea’ai a Aferika, ae o ai na latou fa’ailoa ia te outou le kukaina ma le gaosiga o nei mea’ai i ona se isi?” O le tala ‘ata lea a se tasi o matua na auai e fia maimoa i fa’afiafiaga fa’aleatunuu eseese a le fanau a’oga. “O le aoga lena o feso’ota’iga tau initeneti ma ua koneti atu i Aferika ma fesiligia i latou Ia latou mea tausami o lo’o avea ma latou mataiai, ae fa’ailoa mai ai mea e gaosia ai, le kukaina ia sa’o lelei ma le tofo lelei e ao ina maua ai e i latou o le a taumafaina.”

 

Ina ua fesiligia fo’i, ona e le o maua mai le tele o nisi o soifua i Amerika Samoa mai Aferika, ae taua le tali mai a le fanau, “O le tele o oloa e fa’atauina mai Aferika i faleoloa ae maise i lavalava ma ie lavalava o loo fa’atauina atu i le mamalu o le atunuu, o oloa fo’i tau ‘auro, siliva ma ma’ataua, e sau uma nei oka mai Aferika, ona o ona ia puna’oa o avea ma latou oloa fa’atau mai i le lalolagi.”

 

FA’AITIITIA MAI LE NOFOVA’AVA’AIA MAI LE 14 – ILE NAO LE 7 ASO:

 

O le aumalaga o le faigamalaga lona tolu lenei ua foufou mai i le aso lenei, Aperila 15, o le a le nofoia e i latou faletalimalo mo le Nofova’ava’aia ona o le fa’ama’i o le Covid-19 i le atoaga o le 14 aso, peita’i, o le a na’o le 7 aso mo lea fa’amoemoe. O le nofoaga lava o le Faletalimalo o le Tradewinds.

 

I le fonotaga ale Komiti Fa’afoe a le Covid-19, na mae’a i le aso Gafua na te’a nei, sa fa’ailoa manino ai e Dr Cecilia Ala’ilima, ua mae’a suesueina ma fa’amaumau uma fa’amaumauga o le Covid-19 i le atunuu, mamua fa’ailoa ai, e tatau ona toe aiaia se isi umi mo i latou e malaga mai e nofo va’ava’aia ai.

 

“O le a fa’atulaga le suega e faia i le aso lona lua ma le aso lona fitu o le latou nofova’ava’aia. Afai loa ae leai se tasi e maua ane ua maua i le fa’ama’i, ua tatala loa i latou i tua. E le tatalaina i le aso 8, e tatala lava i le aso lona fitu,” o se tala lea a Dr. Alailima. 

 

E to’a 226 le aumalaga lenei o le malaga lona tolu. 

 

I le fonotaga a le komiti faafoe, sa fa’ailoa ai fuafuaga fou a le Hawaiian Airlines ina ia mafai ona auamaia tagatanuu o Amerika Samoa i o tatou laueleele ma aiga, ma ua ta’ua ai le ta’I $315,000. i le malaga e tasi, tusa lava pe fia le pasese e aumaia.

 

O lea la ua matua talisapaia lava e le tatou faigamalo lea fo’i fesoasoani tele a le Hawaiian Air.