Pago Pago, AMERIKA SAMOA

MAUA SUEGA O LE COVID-19 AUMALAGA #3 – LEAI SE TASI E MAUA I LE FA’AMA’I:

O le aso Faraile i le taeao lava ua tatala uma ai Iitua i latou sa nofova’ava’aia, o le aumalaga numera tolu a le Malo o Amerika Samoa sa toe fa’afo’ia mai ai nisi na opea i fafo ona o fa’asa a le Covid-19. O le ulua’I taimi lea ua taalaina I tua nisi o aumalaga nei ae ua na’o le  fitu aso atoatoa na nofova’ava’aia ai. O I latou nei sa nonofo pea lava I le faletalimalo, peita’I o se tasi o le pasese lea sa fa’amaonia mai I sana suega ua maua Iile Covid-19, lea sa toe si’itia ese uma mai ma lona aoga ma fa’anonofo ai I le falema’i fa’apitoa  i Tafuna, e le o maua mai la se tonu i lea gasegase ma lona aiga i le fa’asalalauga lenei.

O isi malaga e lua ua tuana’i, sa ta’i 14 aso sa nofo va’ava’aia ai i latou i le faletalimalo o le Tradewinds fa’ato’a tatala ai i latou i tua.

“Ua mae’a faia suega uma a le aumalaga, e le’i toe i ai ma se tasi ua faamaonia mai sana suega mo le fa’ama’I, o lea la ua faia le fa’aiuga a le Komiti o le Covid-19 ma le Matagaluega o le Soifua Maloloina, ua saogalemu lava ona tatala i latou uma nei i tua i aiga.” O se fa’amaoniga lea ua maua mai se tasi o sui o le Potu Suesue i Tafuna, lea sa latou faia tuiga nei mo le aumalaga.

Ua matua fa’alauiloa mai fo’i e nisi o le aumalaga e ala I a latou ata fa’asolo sa pu’ea i le taimi ua oo atu ai le aveai o i latou o le a malaga i aiga, ua saogalemu tagata uma.

A’o le’i oo mai i le taeao e tuu va’a ese ai i latou mai le faletalimalo, sa mua’i faia se latou aiga tele ma le sauniga lotu fa’atasi a i latou uma i le afiafi o le aso Faraile e fa’afetaia ai lo latou avanoa lelei, ua mautu ai, e le o i ai se tasi o i latou o maua i le Covid-19, o le latou fa’amavaega aloaia fo’i lea.

O lo ua fa’ailoa mai o le tama ma lona to’alua ma le fanau e to’atolu lea sa mana ane le suega a le tama e maua i le Covid-19, o le a tumau pea ona nofo va’ava’aia se’ia mae’a le latou 14 o aso, afai ae maua ane lava suega ua kilia le tama ma i latou uma, ona fa’ato’a tatala lea o i latou i tua.

Ua fa’ailoa mai fo’i o se iuga o le fonotaga a le Komiti Fa’afoe o le Covid-19, ua fa’ailoa ai, e tusa ma le 260 o i latou ua tapena e o mai i le va’alele lona fa, ia Me 2021 e toe fa’afo’i mai ai lena to’atele i fanua ma aiga. O le a mae’a tuufa’atasia fo’i le lisi o le pasese malaga mai i lenei vaiaso ua savalia nei.

O le a toe nofoia fo’i e lea to’atele le faletalimalo o le Ohana Waikiki East Hotel mo le 14 aso a’o le’i malaga mai.

Ua mafai ona faia peimeni mo nei sui e malaga mai I le Ofisa o Tupe a le tatou Malo poo le faauia mai fo’i i ala feso’ota’i fa’aupega o tafailagi i le uepesite a le Malo americansamoa.gov

Ua fa’atulaga fo’i e mafai ona piki mai le pepa fa’atumu mo nei peimeni totogi auaua’i mai le Medicaid Office, fogafale lona lua o le ASTCA Bldg i Tafuna. E mafai fo’i ona oo ane i ai sui o aiga o e fia malaga mai mo niei fa’afesili pe vala’au ane fo’i i le telefoni numera 699-4777.

 TAFUNA HIGH - MANUMALO I LE AOTELEGA O TOGI AOFAI O LE HOSA 

E ui ina umi ona fa’atalitalia e le vasega o matua ma i latou na tapua’ia faiva o le fanau na tauva i le Polokalama a le HOSA i le aso Faraile ua te’a, ae sa fa’atautaia lea tauvaga  i lona atoaga ma sa fa’atulaga ai fo’i ma le latou tufatufaga o fa’ailoga., o e na lautogia a latou galuega fa’atino i lenei tausaga.

Na amata le fa’amoemoe o le fanau a’oga i le sauniga pu’upu’u na siitia ai le fa’amoemoe e ala i le tatalo e le susuga Bro. Shute Tautu, ina ua mae’a le lesitala le fanau tauva mai a’oga ta’itasi ma fa’avasega fa’amasino i o latou potu e galulue mai ai e fa’amasinoina le fanau Iia latou taumafaiga ua tapena i ai.

Ua faamanino atili foi vaega o le a faatauva ai le fanau i lea aso, e lima lelei vaega ua tapena. 

Folasaga Tapena Fa’afoma’i; Folasaga Tapena mo Fa’asalalauga; Health Career Display; Health Career Photography ma le Community Awareness.

Ina ua pu’eina ata amata o le fanau ua vaevae i vaega ta’tasi ma matauina ai, e to’atele na’ua le fanau ua oo mai e fa’atauva ai nai lo isi vaega e lua, peita’i ua tuuina lava  filifilliga i le fanau a’oga, e pule latou i a latou tapena e fa’atauva ai.

O aoga maualuga sa fa’atauva e aofia ai Fa’asao Marist High, South Pacific Academy, Fagaitua High Leone High, Samoana High, Nuuuli VocTech ma Tafuna High School. O le fa’atasiga sa faia lea i le DYWA fou i Tafuna, ma sa amatalia le polokalama i le itula e 8:30 i le taeao.

Na umi le taimi o le fa’atauvaga a le fanau ina ia mafai ona oo uma le fa’amasinoga i taumafaiga a le fanau na fa’atauva. Na fa’atoa toe potopoto mai i le 1:30 i .le aoauli  sui uma o totoe i le DYWA ina ia fa’afofogaina le fa’aiuga o le tauvaga lenei.

O le taimi fo’i lea na fa’ato’a tuua ai le avanoa i le sui na fa’atulaga e faia se upu mo le fanau na latou talia le vala’au ma latou tapena fa’apitoa ai mo lea tauvaga. O le sui fa’atonu, Netini Sene o le OCI.

“O le HOSA e le o se polokalama ua leva ona fa’atautaia mai, ona ua manatu fo’i le Matagaluega o A’oga o le a amata tima’ia le fanau talavou ua i ai i a’oga maualuluga, e tusa ai o ni agava’a e mafai ai ona fa’aosofia i latou e fia avea ma nisi e faigaluega i Falema’i, ma tiute tauave o le tausia fa’apitoa ma suesue gasegase o so’o se ituaiga. Ina ia mafai ona fa’alauiloa atili ituaiga tomai ma aoaoga faapitoa e ao ina ia a’otau ai talavou e fiia faia nei tautua, o le  vave lava ona timaia tatou a’o i ai i a’oga maualuluga. O le ala lea o le fa’aulu mai o le Poloakalama o le HOSA ina ia amata sofa’i ai mafaufau o fanau i upu e fa’aaogaina, o folasaga esese e fa’alauiloa ai fa’ama’i eseese, ma amata fa’ailoa atu ai galuega a foma’i ma tausima’i i le fanau a’oga a’o le’i mautu a latou fa’ai’uga i a latou kosi e tau’avea i Kolisi.”

Ina ua mae’a lea saunoaga matagofie ona mafuli loa lea o le fa’atonu o le HOSA, Magdalene Augafa e amata mai le tolaulauina o vaega e lima o le fa’atauvaga a le HOSA ma i latou ua lautogia ai.

O le vaega muamua o le Prepared Speaking, na maua ai e Tootooalii Anoa’i le Tulaga 3. O le sui tauva lea mai e a’oga a Fagaitua. Tulaga lua na maua lea e Averil mai le a’oga maualuga a Fa’asao Marist ma le sui  na la’ua tutusa  i le tulaga lua o Letoee Launiu mai Tafuna High School.  O le togisilia sa mauaina lea e Miss Seva’atasi mai Samoana .

O le Vaega Lua o le Tauavaga  le “Public Service Announcement “ Tulaga tolu na maua lea e Apolonia Tulautiso,  Princess ma Iolei Atofau. O le tulaga lua na maia lea e Maria Deandro ma Talita mai Fa’asao Marist High. O le tulaga tolu na maua lea e le toatolu mai Tafuna High School: Marlene Iuli, Jerome Asalele ma Richard Lolesio.

O le vaega lona tolu o le Medical Career Photography lea na maua le tulaga tolu e le sui mai Fa’asao Marist High o Atiliana Tufono, tulaga lua na maua lea e le tamaitai o Lucille  mai Tafuna High School e tulaga silia ai le South Pacific Academy o Ambrose Leota.

O le vaega a le Health Career Display na maua ai e Tafuna High le tulaga tolu, tulaga lua ai le fa’atinoga a Michael ma Iosefo mai Tafuna High ae tulaga muamua ai le taumafaga a tamaitai mai le WildCats  Bianna ma Leilani.

I le vaega mulimuli o le tauvaga a le Community Awareness, na maua ai e le Sharks le tulaga tolu i le taumafaiga a Meripa ma Ms Ulu , tulaga lua ai le taumafaga a Michael Sun ma lana soa mai le South Pacific Academy, ae sola ai le Fa’asao Marist ma le tulaga muamua i le galuega na fa’atino a le tamaitai o Talalelei Roberts ma lana soa o Princess Viesca.

I le aotelega o Togi uma mo galuega na fa’amasinoina e le au fa’amasino fa’apitoa mo lenei fa’amoemoe, sa maua ane ai, le tulaga tolu o Samoana High School, tulaga lua o le Fa’asao Marist ma le Tulaga muamua i togi a’ofa’i o galuega fa’atinoa  a le HOSA i lenei tausaga 2021, ua mautu lea i a’ao malosi o le Toa, Tafuna High School.

E ese mai nei fa’ailoga uma sa taua’aoina mo le fanau sa tauva, ae sa tufatufaina fo’i i le mamalu o sui fa’atonu o le HOSA i tua i a’oga ta’itasi, a latou fa’ailoga fa’apitoa e fa’ailoa atu ai le agaga fiafia ma le fa’afetai o le fa’atonu o le HOSA ile OCI ma  le pulega a le DOE.

O fa’ailoga matagofie sa tapena lea e le Bluesky Communications, ASTCA, Manu’a Store mo latou Ipu eseese ma le All Stars mo le tele o Saini sa fa’alauiloa ai lenei tauvaga a le fanau.O le fa’afetai  e ao ina fa’ailoa atu i le lautele, aua o fa’ailoga o le tauvaga i lenei tausaga ua maoa’e fo’i lo latou matagofie ma o mea e aoga tele i le fanau a’oga.

MATUA MATAITUINA LE LAUFANUA FA’ASAO O AMERIKA SAMOA:

O le masina o Aperila 17 - 25, 2021 o le vaiaso fa’apitoa lea  e mataituina pe fa’ataua ai Laufanua Fa’asao uma o le Malo tele. O lona uiga ua  taga’I fa’apitoa fo’I le Malo tele I le tausiga lelei o tatou fa’asao, ma le pulega fo’i ma le fa’atautaiga o nei laufanua, pe o talafeagai mai aiaiiga uma o le maliliega na fa’atula’ia nei Laufanua Fa’asao mai le amataga, pe o a mai fo’i se va’aiga lautele i nei aseta, pe o lelei ona tausia..

O le Vaiaso lenei o se fa’atofalaiga fa’aletausaga a le Malo tele ma e matuaina mai e le Peresetene, ina ia fa’ataua atili puna’oa o le Iunaite Setete ma Teritoti uma o Amerika.

Ua fa’ailoa mai e Uifa’atali Aumua Amata, “E ese mai lava le silasila a le alii Peresetene Biden I le National Park o Amerika Samoa. O le Iunaite Setete atoa e aofaiga I ai le 63 o Laufanua  Fa’asao, ma nofoaga fa’asao e 423, e aofia ai ma’a fa’amanatu, malae o taua, nofoaga fa’amau mo le tala’aga ma ala  sopo e matagofie tele lona va’aiga lautele.”

“O le tatou Laufanua Fa’asao, ua ese le va’aiga I ai, aua ua pau lava lea o le laufanua fa’asao o lo’o i le itu I saute o le Ekueta mo le Iunaite Setete o Amerika. O lo’o aofia ai eleele fa’asao mai ni motu laiti o le alamoana o Amerika Samoa, o se atunuu e ofaga i ai manu felelei ma meaola ta’aloa i le vaomatua, o la’au masani o le atunuu I ona laufanua ma fa’asao o le Gataifale ua mae’a fa’amauina ai fa’asao o loo ofaga ai ‘amu e ese mai mai lava i ‘amu ua mae’a va’aia ma  fa’amaonia e ese mai i se isi lava ‘amu  o isi ogasami o le lalolagi atoa.

O lo ua fa’amanatuina ma fa’amauina le fa’atautaia pea o le Vaiaso mo Fa’asao o Laufanua ma le Gataifale e le tatou National Park Services Foundation, ma o se vaega tele lea o le Matagaluega o le Initeria, lea latou te vaia toto’a fo’i ma fa’asoa mai le seleni e tausia lelei ai le tatou atunuu i ona galuega foe fa’aleleia, ma galuega atina’e i le atunuu ma ona tagata o tausia ai..