Ads by Google Ads by Google

TALA I VAIFANUA


Le Toa Samoa, le lupe fa’alele a le Manumalo Academy, Dorvida Fonoifafo Fuiava lea ua fa’au’u mai le Preparatory School, le la’asaga muamua o le taumafaiga I totonu o le US Air Force Academy I Colorado Springs, Colorado. Ia manuia isi la’asaga uma o totoe o le taumafaiga ma ia manuia o faiva. [ata: foa’i]

Pago Pago, AMERIKA SAMOA

 

MANUIA TAUMFAIGA FANAU US AIR FORCE ACADEMY - DORVIDA FONOIFAFO FUIAVA

 

Ua fa’ailoa mai i le fa’asologa o le fa’au’uga mai pe Preparatory School a le US Air Force Academy i Colorado Springs, ua fa’amanuiaina ai le taumafaiga a le tamaitai talavou, Dorvida Fonoifafo Fuiava, o se tasi o lupe fa’alele a le tatou malo, sa fa’ato’a fa’au’u mai Manumalo Academy 2020, ma ulufale atu ai i le US Air Force Academy i Colorado Springs, Colorado.

 

Ua fa’ailoa mai i le taitai Spdt Lt Gen Clark ma le Chief Command CMSgt Sparks, “O le vasega o le tausaga 2021, o se vasega fa’apitoa aua ua latou taumafai fa’atasi ma omiga o le Coronavirus i le lalolagi. E le’I faigofie mai le amataga ona to’ai taunuu mai le vasega ina ia amatalia koleniga ma a’oa’oga fa’apitoa. Ua latou usita’ia le isi seti o tulafono fa’amamaluina e ese mai isi vasega uma ua mae’a pasia lenei taumafaiga.Ua iloga mai, e le fo’i ai le naunauta’i o le vasega lenei ina ia latou pasia mea uma, ma fa’au’u e pei ona i ai le aso.”

 

“I koleniga faapitoa sa faia ai tu’uga, o se tasi o tamaitai sa tauva Heather Domiden sa ta’imua mai, peita’i na pa’u ae le’i uma le tu’uga 600m lea sa faia i totonu o le faleta’alo. Na tu i luga o ia ma fa’aauau le tamo’ega ma toe sau lava toe mua. O le a se mea ua e lagona mai lea taumafaiga ua au? Ioe o le vasega lenei, ua mae’a aoaoina, e te pa’u ma e fetaiai ma puapuaga, ae e te toe tula’i ma fa’ai’u ou faiva ia e manumalo,” o le upu fa’amalosi lea  ma le fa’a’ita’iga lelei sa pa’u mai saunoaga mamalu o le fa’au’uga o le tamaitai Samoa Dorvida Fonoifafo Fuiava.

 

Ua mae’a le ulua’i tausaga, i a’oa’oga amata o le ulufale ai i le USAF Academy ma ua fa’asolo mai a’oa’oga faapitoa ina ia mae’a lelei le fa tausaga o lea taumafaiga, ua fa’ailoa mai fo’i e Dorvida lona agaga fa’afetai i le tapua’iga mau a Matua ma Aiga ae maise le Manumalo Baptist Church, lona aiga fa’aleagaga ma le mamalu lautele o Amerika Samoa le atunuu pele.

 

“Fa’afetai tele mo le tapua’iga, e moni lava, o faiva e tapua’ia e manuia, faafetai aua ua tumau pea le manuia o Amerika Samoa e le’i lofia i le Coronavirus, o se isi lea avega faigata, aua sa manatu e auai mai nisi o matua ma aiga mo lenei fa’amoemoe, ae leai, ua sili ona fa’amatanafana ma fa’amalosi mai le Atua ia i matou uma o fanau sailia se manuia mo a taeao. Fa’amanuia tutusa mai le Atua ia i tatou uma, ao fa’agasolo pea taumafaiga ua Ia fa’asino mai e tautua ai.”

 

O sana fa’afetai lea mo le tapua’iga ma le misia fo’i o le mafutaga fa’aleaiga sa latou ola a’e ai. Ua mae’a le fa’au’uga i le aso Lulu na te’a nei, ma ua ulufale atu o ia e fa’aauau le isi tolu tausaga o le USAir Force Academy i Colorado Springs.

 

O Dorvida o se alo tamaitai e fa’asino i le susuga le Malu o le Malo Michael Fuiava ma le faletua o Dorothy Tofilau Fuiava ma amata mai lava ana aoaoga mai le Manumalo Baptist Academy i lona la’ititi mai se’ia oo lava ina mae’a ana a’oga maualuluga i le tausaga 2020 ma fa’au’u ai. O lona avanoa fa’asikolasipi sa ia maua mai lava i ona togi maualuluga na ausia a’o i ai i Manumalo Academy lea na ulufale ai i lana sikolasipi e totogia atoa ai ana aoaoga mo le isi 4 tausaga lea ua ia tulitulimatagau ai se lumana’i manuia.

 

I le maua ai o avanoa e a’o’oga ai i USAir Froce Academy i fafo a’o le fa’asa fo’i ua amatalia ona o le Covid-19, sa le faigofie ai ona malaga i latou na ausia lea matati’a. Peitai na tapena i la’ua mo le masi’i atu ma Serena Iona mai Leone High School, ma uia Samoa, fa’asolo atu i Niu Sila ma fa’ato’a tu’uva’a ane ai i Amerika mo le fa’amoemoe e amata a’oa’oga i le Summer 2020. Maua fo’i le tala fiafia mai lea alo o le atunuu, Serena Iona o lo’o manuia lona taumafai i le Academy o lo’o aoaoina ai o ia, ae o le a maua se tala atoatoa mai lea fa’au’uga i se taimi lata mai.

 

Fa’amalo le taumafai i nei lupe fa’alele, tau ina ia mataala ma finau pea i ai, aua so tatou ‘ai, fa’atasi le Ieova ma outou uma o tausailia le manuia mo a taeao mo le tatou atunuu.

 

MO TAGATA FAIGALUEGA A LE STARKIST SAMOA

 

E faasilasila atu o le a toe amatalia a tatou galuega i le vaiaso fou ile Aso Gafua, Me 17, 2021.  Faamolemole ripoti  mai i lau sifi masani ua uma ona fa’atulagaina, se’i vagana ai le vaega o le Fish Room Sifi Po ma le vaega o le QA  e riporti mai I le itula e  5 i le afiafi o le Aso Sa, Me 16, 2021 aua tapenaga masani o tatou galuega. Mo le vaega o le fish coordination, e amata le sifi ao I le 6 I le taeao ma le sifi lua I le 6 I le afiafi I le Aso Sa, Me 16. O loo iai pasi togipau mo le Aso Sa.

 

Faafeso’otai lau ta’ita’i pe vala’au mai i le tatou ofisa o le HR I le 622-2050 po’o le 622-2025 pe a iai se fesili.

 

FESOASOANI EKALESIA LDS FAALELEIA FA’AMAUMAUGA ATUNUU ASO UA TUANA’I

 

O lo ua fesoasoani mai nisi o le Ekalesia a Iesu Keriso o le Au Pa’ia o Aso e Gata Ai, ina ia fa’aleleia atili, fa’atumau le manino ma fa’aumiumi le lelei o fa’amaumauga a le atunuu ua mautu atu i le Ofisa o Fa’amaumauga a le Administrative Department a le tatou Malo.

 

O le tele o nei galuega ua fa’amauina i ai fa’afanua eseese o eleele o le atunuu, ma sa fa’aaogaina ai Microfilms, ua fa’afaigata fo’i ona fa’atumauina lo latou lelei i nei vaitau, ua tele tausaga talu mai ona fa’amauina.

 

O le fale lea e nafa ma nei meatotino a le Malo, lea e i le Ofisa i autafa atu o le McDonalds American Samoa i Tafuna, o iina lea e matua fa’amautu i ai lea vaega o le tautua a lea matagaluega ole Malo.

 

Na tapena se konekarate i le va o le Malo o Amerika Samoa ma le Ekalesia LDS a Mati, 2019 peita’i na toe sofai mai le Covid-19 ma fa’atuai ai ona amatalia galuega sa tatau ona mae’a 2020. O lea la ua mae’a nei I le tausaga e 2021 ma ua mafai nei ona maimoaina e le atunuu mea uma ua fa’amaumau mai le tausaga 1931 ma ua maua i le Uepesite www.Familysearch.org

 

O se saunoaga a le ali’i fa’amaumau a le Malo, James Hamphill sa ia fa’ailoa mai ai, “Ua mafai nei ona fa’aaogaina e le mamalu lautele o le atunuu nei fa’amaumauga mo le sailiga o latou gafa, ma nisi o mea e sailia e aiga i vaitau 90 tausaga ua tuana’i, e fa’afetai tele lava i le fesoasoani malosi mai a le Ekalesia LDS ua mafai ai ona fa’aleleia le fa’amaumauga o nei mea taua i le tatou malo ma ona tagata.”

 

E ese mai isi mea uma lava ua fa’amaumau a le Malo e aofia ai fa’afanua o eleele ma fa’amaumauga masani a le Malo, ua aofia ai ma le tele o fa’aiuga a le fa’amasinoga i suafa ma eleele mai le 1900 se’ia pa’ia mai le 1974.

 

O le faiga fou ua mafai ai nei ona fa’amaumau nei fa’ai’uga a le fa’amsinoga, ua suia ai le faiga tuai sa teuina mai ai nei faila I tusaga e tele ua mavae. O la sa fa’aaogaina ai microfilms, ma ua amata ona leaga lusi ai le ata o mea na fa’amaumau.

 

O lenei tautua sa fa’aaogaina ai le tautua fa’aonaponei a le Ekalesia a Iesu o le Au Pa’ia o Aso e Gata Ai, ua leai ma se fa’atupega na totogia ai. Ua ofoina mai lea tautua mo le Malo o Amerika Samoa, ina ia toe fa’aleleia fa’amaumauga uma.

 

Ua mafai ona talosagaina ni kopi faaeletoronisi a le mamalu o aiga lautele o le atunuu pe afai o le a fia maua mai lea Ofisa o le malo nei fa’amaumauga uma.

 

Ua mafai fo’i ona fa’atalosaga sou taimi e te nofo ai faitauina nei fa’amaumauga uma pe afai o le a mana’omia lava, ma e mafai ona e nofo ma faitau nei fa’amaumauga uma pe afai e te asia le nofoaga autu o le Ofisa o Fa’amaumauga a le Administrative Department I Tafuna.

 

“O le fa’afetau ona o le vave ona mae’a fa’amaumauga fou nei mo faila tuai aua sa matua tuu mai le tauau ma le fesoasoani a le LDS mo le matou fo’i vagea o le tautua lautele. Fa’afetai tele i le vave ona fa’amae’a o mea uma, ma o le a tatala atu le tautua mo nisi e fia faitau fa’atasi ai ma nisi fo’I e fa’aaogaina nei fa’amaumauga mo ni poloketi aoga mo le lumana’I a fanau aoga ma suesuega fo’I a nisi mo a latou pepa tusia ua tonu ma lelei fa’amaumauga o lo’o ta’ua ai.

 

AMATA LA’U ESE MEATOTINO & VAEGA AU AMERIKA MAI AFGHANISTAN & SASA’E TUTOTONU:

 

Mai Kanaahar, Afakanisitana, o le a’ai poo le nofoaga muamua lava lea sa fa’amautu i ai galuega uma na tapena a le Vaega Au a Amerika I eleele o le vevesi i Sasa’e Tutotonu, ma ua fa’ailoa mai nei, ua amata ona gaogao ma ua iloga mai ua le toe mautu i ai ni feoa’iga ma tapenaga o vaega au, aua ua tu’ua nei e le vaega au lea nofoaga i le mliteri a Afakanisitana lava ia.”

 

Ua mae’a fa’alauiloa e Peresetene Biden o le a tu’ua e le vaega au uma a Amerika nofoaga autu sa fa’amautu i ai latou galuega fa’amisiona fesoasoani i le taua fevesia’iga i Sasae Tutotonu, ae le’i manatu le to’atele o fitafita ma vaega au a Pakisitana ma Afakanisitana, o le taimi lenei o le a vave tula’I ese ai vaega au.

 

I le saunoaga a le Peresetene o Amerika sa ia fa’ailoa ai, e oo atu ia Setema 11, 2021 ua mae’a o ese ai uma vaega au a le Malo o Amerika mai o latou laufanua.

 

O le mae’a ai o le 20 tausaga talu mai ona fesoasoani atu Amerika i nei malo mo se taumafaiga ia to’afilemu, ua iloga ai le tele o vaega tupe ua fa’aalu e le Malo tele e taumafai ai ona soalaupule se to’afilemu o Malo i Sasa’e Tutotonu, peita’I o lo’o ua iloga mai e fa’aauau pea lava ma ua upuia ai foi Amerika e nisi o latou vaega au, i lo latou aia fua i mea tau le latou malo.

 

I le nofoaga lava lea i Kandahar i Afakanisitana, ua va’aia ai le toe talai uma ese mai o televise sa fa’atula’ia i totonu o le Base, ua aveesea mai meafale, ua la’u ese mai uma le sapalai o meatau sa fa’aagaaga ma ta’avale sa fa’atutuina aua feoa’iga, ua le taitai ona tutusa ai le taimi na fa’ato’a ulufale atu ai vaega au a Amerika i lea nofoaga, ma le taimi ua tu’ua ai e i latou lea a’ai.

 

O le to’atele o alo o Amerika Samoa sa latou tautua mai nei nofoaga o le vevesi, ua i ai fo’i nisi sa fa’amanu’alia mai i nei nofoaga ona o le taua lenei. O le to’atele o tagata Amerika ua fiafia i latou ua saogalemu nisi o fanau sa tiute i na atunuu i laufanua o Amerika lava latou.

 

Ua va’aia le to’atele o fitafita ua fa’atonuina e sauni mai mo va’alele e masi’I ese mai ai i nofoaga o taua, ma amata la’u ese fa’atasi mai i latou mea faigaluega uma sa fa’aaogaina e i latou mai nofoaga sa fa’amautu i ai vaega au i malo uma o Sasa’e Tutotonu.

 

Peita’i e tasi le mea ua molimauina, e le o fa’aitiitia le meli e la’u atu i totonu mo fitafita o le vaega au sa tiute ai. O lea ua fa’aaoga e le to’atele o fitafita latou fa’amomoli mai latou aiga, e tufatufa atu i nai tagatanuu i nofoaga sa latou tiute ai. E mautinoa lava, o le to’atele o nei fitafita ma latou fa’amomoli o alo ma fanau mai atumotu ma teritori o Amerika.