Pago Pago, AMERIKA SAMOA

Ua molia nei e le malo se ali’i e 41 tausaga le matua mai Iliili i lona umia faasolitulafono o fualaau faasaina, ina ua pu’e faapagota o ia e Leoleo i le faatupu vevesi i totonu o lona aiga atoa ai ma le faia o sauaga faasaga i lona to’alua ae maua ai fualaau faasaina ia te ia.

O le masina na te’a neii na tula’i ai Keneti Faapu’e i luma o le Fa’amasinoga Faaitumalo mo lana ulua’i iloiloga. O le ali’i Loia Fautua lagolago ia Ryan Anderson na tula’i mo ia, ae o le tama’ita’i Loia Sili lagolago ia Robert Morrison III na tula’i mo le itu a le malo.

E 5 moliaga ua tu’uaia ai e le malo le susuga a Fa’apu’e. O ia moliaga e aofia ai moliaga mamafa e 3 o lona taofia faappagota o lona aiga i se auala fa’asolitulafono; fa’aaoga fa’asolitulafono o se a’upega; faapea ai ma le umia fa’asolitulafono o vaega o le pauta fa’asaina o le aisa, o le vaega D lea o solitulafono mamafa, lea e mafai ona fa’asala ai se tasi i le toese mo le umi e le silia i le 5 tausaga, pe fa’asala fo’i i le salatupe e le silia i le $5,000, poo le fa’asala fo’i i fa’asalaga uma ia e lua; faapea ai ma moliaga mama e 2, le moliaga o le faaoolima i le tulaga tolu, atoa ai ma le faia o gaioiga e ono lamatia ai le saogalemu o fanau laiti, o le vaega A lea o solitulafono mama, lea e mafai ona fa’asala ai se tasi i le toese mo le umi e le silia i le tasi le tausaga, pe fa’asala i le salatupe e le silia i le $1,000, poo le fa’asala fo’i i fa’asalaga uma ia e lua.

E $25,000 le vaega tupe lea ua fa’atulaga e le afioga i le ali’i Fa’amasino ia Elvis P. Patea e tatala ai i tua le ua molia.

Afai ae mafai e le ua molia ona totogi le tupe ua fa’atulaga e tatala ai o ia i tua, ua fautuaina o ia e le Fa’amasinoga ina ia fesoota’i vava lalata ma lana loia, auai i soo se taimi e valaau ai lana mataupu, ma ia tausisi i tulafono uma a le malo.

E le mafai ona ia tuua le atunu’u pe taumafai fo’i e tuua faamalosi le atunu’u e aunoa ma se fa’atanaga a le Fa’amasinoga, ua poloaina fo’i le tuuina atu o lona tusi folau e taofi e le malo se’i vagana ua mae’a taualumaga o lana mataupu.

E mafai ona ia taumafai e faafesoota’i molimau a le malo i soo se auala, aemaise ai fo’i lona to’alua ma lana fanau. Afai latou te fetaui i soo se nofoaga, o lona tiute o lona tula’i lea ma alu ese mai ai.

Na teena e le afioga i le ali’i Fa’amasino ia Patea le talosaga a Anderson mo se avanoa e faaitiitia ai le tupe e tatala ai i tua Fa’apu’e. Na taua e Anderson e fa’apea, e mana’omia le faigaluega o le ua molia e tausi ai lana fanau, e le o ia o se tagata e masalomia lona sola ese ma le atunu’u, ae o ia o se tagata e galue malosi mo le manuia o lona aiga.

Na talosaga Anderson i le Fa’amasinoga ina ia faaitiitia i le $5,000 le tupe e tatala ai i tua le ua molia. 

Na tete’e malosi i ai le itu a le malo i lea talosaga. Na taua e le Loia a le malo ia Garvey e fa’apea, o le tupe lea ua mae’a ona fa’atulaga e tatala ai i tua le ua molia, ua talafeagai lelei ma le matuia o le solitulafono ua tu’uaia ai o ia.

Na taua e le loia a le malo e fa’apea, e le gata na fa’afefe e le ua molia lona to’alua i se a’upega malosi, ae na ia taofia faapagota fo’i le Tina ma le fanau mo se taimi umi. Ae sili ai i lo lena, na maua ai e Leoleo fualaau fa’asaina ina ua pu’e fa’apagota o ia mai le nofoaga o lo o faigaluega ai.

E talitonu le malo, afai ae tatala i tua le ua molia, e ono tele se avanoa e sola ese ai o ia mai le atunu’u. 

I le mae’a ai ona fa’afofoga o le Fa’amasinoga i fa’afinauga a itu e lua i uiga i le talosaga a le itu tete’e, na teena ai loa e Patea le talosaga ina ia faaitiitia le tupe e tatala ai Faapu’e. Saunoa Patea e fa’apea, o le tupe ua mae’a ona fa’atulaga, ua talafeagai ma le mamafa o le solitulafono o lo o tu’uaia ai le ua molia.

O le vaiaso na te’a nei na tula’i ai Faapu’e i luma o le Fa’amasinoga Maualuga mo lana ulua’i iloiloga, ma ia teena ai tu’uaiga fa’asaga ia te ia. 

O le masina fou o Oketopa lea ua fa’atulaga e faia ai le ulua’i iloiloga o le mataupu a Faapu’e i luma o le Fa’amasinoga Maualuga. O le taimi nei, o lo o taofia pea o ia i le toese i Tafuna ina ua le mafai ona ia totogi le tupe sa fa’atulaga e tatala ai o ia i tua.

TAGI A LE MALO

E pei ona taua e le malo i le latou tagi e fa’apea, pe tusa o le masina o Aperila na te’a nei na aga’i atu ai Leoleo e tali i se valaau mai se Tina talavou sa ia talosagaina se fesoasoani mo ia ma lana fanau, ona o faiga le alofa sa faia e le Tama o lana fanau ia te i latou.

E to’atolu Leoleo Suesue na aga’i atu e tali i le valaau ma maua ai loa le avanoa latou te fesiligia ai le Tina talavou na aafia e uiga i lenei mataupu.

Na taua e le Tina lea i Leoleo e fa’apea, i se taimi o le vaveao pe tusa o le 4:42, na fa’afuase’i ai ona vili atu se tagata i lana telefoni. E lei umi ni minute talu ona tuana’i le vili atu o le tagata, ae fa’afuase’i loa ona ia vaaia le faitoto’a o lona potu ua tatala faamalosi atu e se tagata, e ala i lona kiki o le faitoto’a

Na manino i le vaai a le Tina talavou na aafia, o le tagata na ia faaaoga lona vave e kiki ai le faitoto’a, o lona to’alua ua tele masina talu ona la nonofo valavala, le susuga a Faapu’e. Na avea le pao leotele o le taimi na kiki ai le faitoto’a ma auala na feala ai i luga le latou fale ma latou iloa ai le faalavelave ua tupu.

Na ona ulufale faamalosi atu lava o Faapu’e i totonu o le fale, ona aapa atu loa lea i lana telefoni feavea’i ua fao faamalosi ese mai i ona lima ae togi i lalo o le fola o le fale. Na mae’a lea, ona toe alu lea o Faapu’e i fafo ma le fale, ae o le taimi lea au tau fai tulioso atu ai si ana fanau ma lalafi i totonu o le isi potu o le fale.

Na taua e le Tina na aafia i Leoleo e fa’apea, e le’i umi ona alu Faapu’e i fafo ae vaaia le toe aga’i atu i totonu o le potu ma ona foliga ua matua ita lava. Na tago Faapu’e i le agaese sa uu iu lona lima ua tuu i lona tauau ma folafola lona faia o se mea leaga ia te ia pe afai e tumau pea lona le toe taliaina o ia e toe sosoo le la aiga. Na avea lea gaioiga ma auala na matua fefe ai lava le Tina ona o le saogalemu o ia ma lana fanau.

O le taimi lea na faatonu ai loa e Faapu’e o ia ma lana fanau, e leai se isi e mafai ona toe alu ese ma le fale, e le mafai fo’i e se tasi ona vili i se isi lava tagata.

O le taeao na sosoo ai, na mafai ai loa e le Tina ona tapena lana fanau e momoli i le aoga, ae maua ai fo’i ma le avanoa e sauni ai fo’i mo lana galuega. Sa na o lana tama teine e 6 tausaga le matua na mafai ona alu ma ave, ae o lana fanau matutua e to’a tolu na nonofo ma Faapu’e i le fale.

A o le i tuua e le Tina le fale, na faatonu e le ua molia o ia e aua nei talanoa i se isi e faatatau i le mea sa tupu. E le tatau fo’i ona ia taumafai e fai ni gaioiga e ono mafai ai ona alia’e le faafitauli i lo la aiga ina ne’i oo se mea matuia ia te ia.

O le fefe tele o le Tina atoa ai ma lona popole i le saogalemu mo ia ma lana fanau, na mafua ai loa ona ia talosagaina se fesoasoani a Leoleo e uiga i lenei mataupu, ma maua ai fo’i ma le avanoa na te fa’aleoina ai i Leoleo mea uma sa tupu i le po ua mavae.

Na aga’i atu Leoleo i le fale o le Tina e saili mai ai le ua molia peita’i e lei maua ai o ia, ae ina ua aga’i atu Leoleo i le Fale Faigaluega a le ua molia, sa latou maua atu ai loa o ia, ma pu’e faapagota mai ai loa o ia.

A o le i taofia faapagota e Leoleo le ua molia, na maua le avanoa e saili ai lona tino ina ia mautinoa na te le o umia se a’upega. Ina ua sailia e Leoleo le tino a le ua molia, sa latou maua i ai se tama’i pepa iila o lo o i ai vaega o le pauta fa’asaina o le aisa.

Na faailoa e le ua molia i Leoleo e fa’apea, o le tele o faafitauli o lo o tutupu i lona olaga ma lona aiga, ua mafua ai ona ia tagofia fualaau fa’asaina.

Na sailia fo’i e Leoleo le fale o le Tina na a’afia ma latou maua ai pepa iila ma straw ua tatipi tulimanu e masani ona fa’aaoga e tagata e tulei ai fualaau faasaia o le aisa.