Pago Pago, AMERIKA SAMOA

UMIA ANEKA SEUMANUTAFA [SAMOA I HAWAII] IPU O LE JENNIE K. WILSON TAAMILOSAGA TAPOLO

O le Aso Gafa na te’a nei na matua fa’asalalauina mai ai ata o le tamaitai Samoa o Aneka Seumanutafa, ina ua tete’i le to’atele, ua manumalo le tamaitai i le Ipu a le Jennie K Wilson, sa tauva i ai le to’atele i le ta’amilosaga Tapolo i le setete o Ohio.

O le ta’amilosaga lona 70 lea mo lea Ipu, peita’i sa toe tolopoina mai le tausaga ua te’a, ona o le a’afia tele o tagata lautele i le Iunaite Setete o Amerika ma ona teritori fa’apea fo’i le lalolagi atoa, i le Coronavirus.

Na mua’i ta’alo Aneka Seumanutafa i le Ta’amilosaga Tapolo a’o 10 ona tausaga, peita’i na toe masi’i ese mai Aneka ma lona aiga i Maryland ona o tulaga o galuega a on a matua.

Na amata lea ona ia ta’alo i le setete o Ohio ina ia a’e i le High School vasega 9, ma avea ai ma ia mauaina ai le fa’ailoga “Big Ten Freshman & WGCA na avea ai o ia ma totino o le All American i le tausaga e 2019. Na toe taumafai loa lea mo le ta’amilosaga lea o le Ipu a le Jennie K. Wilson ma o le fa’alua ai lea ona tauva i le All Big Ten Team.

O lona tulaga sa i ai i le fa’asologa o Amateur Golf Rankings i le lalolagi o lo’o namera 38, ma o lo’o agava’a fo’i o ia tauva tapolo i le Augusta Womens Amateur, lea sa faia le ta’amilosaga a’o le’i oo i le ta’amilosaga a le Masters ia Aperila 27. Na mua’i taalo o ia i le Augusta National ma ana ta’amilosaga e lua i le Champions Retreat Golf Club, ma sa ia faailoa mai, “O lo’u tauva ai i na ta’amilosaga tapolo, ua pei lata fa’alagona ua avea a’u ma se tapolo polofesa. O le isi lea mea ua fa’amalosia atili ai le lagona e ao ina tauva loa mo le ta’amilosaga lona 70 o le ipu a Jennie K Wilson.”

Sa maua fo’i lona lna pine mai le ta’amilosaga a le US Women’s Open in Alexandria, Virginia ia Aperila 27, 2021 ma ua tapena atu nei fo’i mo lona auai i le ta’amilosaga a le Olympic Club i San Francisco ia Iuni 3-6, 2021.

E ese mai lona fiafia tele ua toe mafai ona oo i lona aiga mo sina vaitaimi, ae ua sili ona fa’afiafiaina Aneka ona ua mafai ona tauva i nei ta’amilosaga tapolo e koleni atili atu ai mo le faamoemoe e tauva i le US Open.

“O le ta’amilosaga lona 70 lea mo le Jennie K Wilson ua toe tatala ai se faitoto’a e tapena ai mo le fa’amoemoe o loma i San Francisco pe tua ma ni a le fa’amoemoe e fia auai i le Olimipeka. E le gata i lea ole US Open ia maua ai so’u avanoa e tauva ai. Ua ou sauni ou te tauva mo lo’u motu o Samoa, Hawaii ma Maryland. Ua leva na moemiti i lenei avanoa i le US Open,” o se tala fiafia lea a Seumanutafa.

O lona fa’ate’iga o le to’atele ina ua sola ma le ipu o le ta’amilosaga lona 70 Jennie K Wilson, ua toe fa’aoo ai lona igoa i le lisi numera tasi a le to’atele o e fiafia i lea fo’i fa’agatama.

“O le taimi nei, o le malo o nai ou matua, Samoa, ua avea i so’o se mea ona o lo’u igoa, Seumanutafa peita’i na ou ola a’e i Hawaii, e matele ina ou manatu o lo’u lava lea nuu na ou fanau ai, ae le mafai ona avea ai, e te tupuga mai le atumotu. O le malosi ma le agaga e tumau i le aiga, aua o le ta’ita’iga lea na amata fofoa mai ai le olaga, ma e le tu’ua i lalo i so’o se taimi, o le mafanafana lea o le alofa ma le agaga mautu e te toe fo’i lava i ai i taimi uma. Pe manuia pe leai se taumafaiga, o le aiga lava e sapaia oe ma lou fa’amoemoe i mea uma, i taimi uma. Fa’afetai mo le tapua’iga i mea uma i nai ou matua ma lo’u aiga atoa, e le misia a’u i tou talosaga, ae ua iloa fo’i le mea e fai, ia fa’amaulalo le loto, ma sa’o le va’ai i le puna o manuia uma, o le Atua lava,” o sana toe tala lea e tusa o lona tupuaga ma lona fa’amoemoega i le lumana’i o lana taumafaiga, ae maise o lona aiga o lo’o tapua’ia ona faiva i taimi uma, e pei ona ia fa’ailoa mai i feso’ota’iga i le facebook.

MALAGA LUTENA KOVANA – ASIA GALUEGA E FIA FA’ATAUNUU MO MANU’A

O le malaga asiasi a le afioga le Lutena Kovana Taualauega Eleasalo Ale ma le ‘au malaga fa’apitoa na tu’ua Tutuila i me 18, 2021 ma au asia muamua ai e i latou le FaleTa’u. 

O le malaga lea ua toe asiasia ai mea sa fa’atulaga e ao ina mua’i fa’aleleia mo galuega uma e tatua ai le Manu’atele, ma ua amata mai i galuega sa fa’atulaga e mua’i faia mo le malae va’alele i Fitiuta, ma ua toe taga’i toto’a fo’i Talauega i isi galuega uma ua amata ona soloa’i atu ina ia fa’aleleia atili lea Malaeva’alele fa’atasi ai ma nisi o totoga o loli o le tineiafi o lo’o i ai ni mea e ao ina toe fa’aleleia atili ai le masau o le vai e fa’apasi mai i fa’aga’au pe afai e tapeina se mu.

O le taumafaiga lenei ma le toe asiasiga a’o le’i pasia le afa o le ulua’i tausaga o le la’ua faigamalo, o le toe taga’i toto’a lea o Kovana Lemanu P. S. Mauga ma lana ta’ita’iga, pe o fa’amaonia le fa’ataunuu o mea na la’ua fuafua e tatau ona fa’aleleia mo le olaga o tagata o lo’o soifia ma papa’a’ao i le Manu’atele, ona o lo’o tautuaina tutusa e le tatou faigamalo.

O nisi o mea tetele lava e ao ina mataituina lelei, o le tulaga o Faia’oga ina ia mafai ona fiafia nisi o faia’oga e galulue ma a’oa’o mai fanau a le Manu’atele. O le si’itaga o totogi o Faia’oga i le taimi nei, masalo o le a avea lea ma mea e fa’aosofia ai le gaua’i o nisi o faia’oga, o alo lava o le Manu’atele, ina ia toe fo’i e galulue faia’oga mai i Laumua o lo’o ua i Faleta’u ma Ofu ma Olosega fo’i latou. 

Ua i ai nei le Tane Vai fou a el ASPA e tatau ona lelei atoatoa ai le tautuaina o aiga i Manu’a, ma ua mautinoa ua fa’aleleia lea ala o le tautua mo aiga uma e ala i le Suavai Mama.

Ua faailoa mai o se fa’afitauli lava lea i le afio’aga o Fitiuta i Manu’a, e le lava le sapalai o le suavai mama i laoa ma maota o aiga. Ua matauina ua fai si leva o Paipa na fa’ataoto mo le ta’ia ai le suavai, ma ua toe fa’afouina nei lea tautua atoa, ina ua fausia le Tane vai fou ua i ai nei i le afio’aga.

Ua fa’ailoa mai o lo ua aga’i lava ina mae’a le tele o galuega o mea na fa’atulaga e toe fa’aleleia i auaunaga a le malo i le Faleta’u, Fitiuta, Ta’u ma Faleasao. 

“Ua iloga mai o lo’o mana’omia nisi faia’oga mo vasega laiti o a’oga tulaga muamua poo Elementary, ma o se mea ua matauina e le o toatele nisi e fia galulue mai ai, peita’i atonu ua avea nei le siitaga o totogi mo faia’oga e pei ona fa’ataunuuina nei, o le a fa’afiafiaina ai nisi o alo o le Manu’atele o lo’o faia’oga, e toe taliu e galulue mai i le Manu’atele,” o se saunoaga lea a le Sui Kovana Talauega E. Ale.

Ona ua mae’a taga’i toto’a le matagaluega o A’oga a le malo i le tuufa’atasia o a’oga tulaga muamua i Manu’a, ua manatu ai fo’i le fa’auluuluga o le Malo, tauau o le a fa’ataunuu lea tulaga, ina ia taumafai e ave’esea ai le mamafa o le tulaga tau le lava o faia’oga. 

“A tuufa’atasia a’oga ona toatele lea o fanau a’oga i vasega ta’itasi ma e gafatia lava e le faia’oga e tasi ona tauavea vasega i lena faitau aofai o le fanau a’oga. Nai lo le faia o aoga eseese e lua, ae sioti uma faia’oga i a’oga uma e lua,” o se tau fa’amalamalamaga lea o lena tulaga ma le suiga e fia faia, ia lava ai faia’oga mo fanau i vasega uma.

Ua i ai galuega o auala na fa’atonuina ia fa’ataunuu ma galueaina faatasi ai ma ala o feoa’iga ia fa’aleleia fo’i. Ua matauina i le malaga asiasi lenei ua amatalia ona faia galuega na ae maise lava le Poloketi o le galuega o le alatele o Matasaua. O le fa’aleleia o lea ala, o le a fa’afaigofie ai i tagata galue ona feoa’i ma le tele o Turisi e fia maimoaina nisi o eleele sili ona matagofie o le Manu’atele.

“O le ala lea e maimoaina ai e tagata uma e maua le avanoa, le Taeao muamua o Samoa, le taeao nai Saua.”

Ua fa’amatalaina pea lea Alatele o fausia, ina ia mafai ona oo i ai le to’atele ma maimoaina le oso a’e o le La ma sulugia le ulua’i malae na faia ai le uluai ava usu o le feiloa’iga i Samoa atoa.

Ina ua mae’a le asiasiga i galuega uma nei ona usuia lea o le fono a le sui Kovana ma le aufaigaluega ma lava a le malo i le Faleta’u. O le fonotaga lea o le a fa’aalia ai e le aufaigaluega mea uma lava o fa’afaigata ai le galuega ma fa’ataunuu o latou tiute.

“Ua fa’ailoa mai e i latou le mana’omia ona i ai o masini e fa’atino ai latou auaunaga. Ua maea fa’ailoa atu ia i latou uma, le aoga tele ona galulue fa’atasi o i latou uma, ia fa’atanuu a latou galuega uma mo le tautuaina o tagata lautele. Ua fa’ailoa fo’i e i latou, e mana’omia ona faia aoaoga i tomai e mana’omia ona fa’aleleia mo i latou ina ia fa’atino ai latou tiute ma le toto’a. A latou mauaina avanoa e toe poleni ma a’oa’o leleia ai i tiute fai, e mautinoa e fiafia fo’i i latou e fa’atino galuega uma.”

O le aso Lua na asia ai Faleluasaga i Ofu ma olosega ma Sili.

FA’AFETAIA UIFA’ATALI AMATA VAEGA TUPE $472,791 MAI CDC

Mai Uosigitone i le Laumua, ua fa’ailoa mai ai le agaga fa’afetai ma le fiafia fo’i o le tatou Faipule i le Konekeresi, ina ua toe to’ia fo’i le malo o Amerika Samoa i le foa’i tupe mai le Center od Disease Control [CDC] mai lona itu e tapena ai le vaega e muamua mai i fesoasoani uma e puipuia ai le atunuu mai fa’ama’i pipisi, poo le Center for Preparedness & Response [CPR].

O le tinoitupe lea o le a fa’aaogaina lava mo nei tapenaga ina ia le ulufale mai lava le Covid-19 i le tatou atunuu ma ua ala eseese fo’i lona fa’aaogaina tatau mo lea fa’amoemoe.

Ua fa’afetaia tele le galue malosi o le Emergency Preparedness Director  Ben Sili ona o lona una’ia malosi o lea poloketi, fa’amalo fo’i i le susuga le Fa’atonu ona sui Fa’atonu i le mata’alia i avanoa fa’apenei e mafai ai ona talosaga ni seleni e fesoasoani tele e fa’amautu le saogalemu o Amerika Samoa mai le Coronavirus.