Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

AUAI UIFA’ATALI AMATA SAPAIGA PILI  – “TERRITORIES HEALTH EQUITY ACT 2021”

 

O lo ua fiafia le afioga Uifaatali Aumua Amata e auai o se tasi o sui o le Konekeresi latou te aiaia ma fa’aulu le pili ua fa’aigoaina o le “Territories Health Equity Act” lea ua galulue fa’atasi i ai i latou ma isi sui o le Konekeresi Stacey Plasket ma isi sui iloga o le konekeresi a le Malo tele.

 

O lo ua aiaia lea pili ina ia fa’ailoa manino ai mea ua le tutusa ai ona maua e sui uma ua agava’a i le Medicaid ma le Medicare, pe afai e alaala i latou o teritpri o Amerika lea e fa’auia mai a latou vaega tupe ma alamaniuia uma i le Matagaluega o le Initeria o le Malo tele.

 

O se mea taua lenei pili pe afai o le a pasia nei, aua o le a maua tutusa ai e tagata uma ua agava’a i le Medicare ma le Medicaid i o tatou teritori ma i latou o lo’o alaala i setete o le Iunaite Setete o Amerika. O ke tele o nisi o vaega tupe ua fa’atulaga e maua e teritori ma maliliega i le fa’aaogaina ua fa’atulaga mai, e maea nei i le fa’aiuga o Setema 2021, ma tapunia atu ai ma le fa’atupega o le tausaga 20221.

 

O nisi nei o aiaiga ua fa’aupuina i lea pili: 

 

• E toesea ai limiti poo aiaiga tamau o le faaaogaina o fa’atupega a le Medicaid mo teritori uma o le Malo tele i le pasefika e afua lea ia tausaga faaletupe 2022.

 

• Fa’aleleia atili le sao o le Medicare e totogi i falema’i uma i teritpri o Amerika i le Pasefika.

 

Tatala ai le avanoa mo le medicare ma le Medicaid [DSH] “Disproportionate Share Hospital’ e totogi i falema’i i Teritori o Amerika.

 

  • Fa’ataga ai foi ma tagata uma o teritori o Amerika o alaala i teritori e maua le penefiti o le totogia o latou talavai ma vaila’au mo togaifitiga o latou gasegase e le Medicare ona e maulalo le latou tamaoaiga maua.
  •  
  • Faataga ai fo’i ma tagata o aumau i teritori ua le maua ni o latou inisua mai o latou galuega sa galulue ai, ma ua leai fo’i ni o latou aiaiga tau inisiua ma’i ua gafatia ona totogi, ae ia maua ai le latou avanoa e talosaga ai i ni inisiua e pei ona gafatia ona tuuina atu i sui o le Konekeresi ma e faigluega uma i le konekeresi.

 

“O le galulue fa’atasi o teritori uma ua mafai ai ona la’ala’a aga’i i luma le maua ai e o tatou tagata uma o le Medicaid i tausaga ua te’a, ma ua tele se suiga o mea ua maua mai i lenei vaitau, nai lo mea sa i ai mai le amataga. Ua tatau lava ona sofa’i atili atu lea avanoa ma fa’aulu atu mea ua tatou mo’omia ina ia matua maua atoatoa alamanuia e o tatou sui, e pei lava o i latou uma o lo’o alaala nei i setete tetele o le Malo o Amerika atoa. E alagatatau ona maua e o tatou tagata manuia uma,” o se tala manino lea a Uifa’atali.  

 

TALOSAGA MO GALUEGA FANAU A’OGA TU’UAGA O A’OGA 

 

Ua silia ma le 1,000 talosaga mo ni avanoa faigaluega ua mae’a fa’amauina nei i le Summer Youth Program a le Matagaluega o Tagata Faigaluega a le Malo o Amerika Samoa. O le polokalama fo’i lea sa saunoa ai le afioga Kovana Lemanu P.S. Mauga ina ia taumafai le fanau a’oga ua fa’au’u mai ma tikeri i le ASCC e fa’aaogaina tatau, ao taumafai e fa’amau avanoa e malaga ese atu ai mo le fa’aauauina o a’oa’oga i fafo.

 

Ua faailoa mai la e le Matagaluega o tagata faigaluega a le Malo, o lea polokalama o le a tatalaina lea ia Iuni 21, 2021, i le mae’a lelei ai o le vaiaso o fa’au’uga o le fanau fa’aiuaso mai a’oga uma i le tatou malo, ae fa’aiu ia Iulai 30, 2021 mo le fanau a’oga e amata mai le 14 tausaga se’ia oo I le 24 tausaga le matutua.

 

O le taumafaiga lenei a le Malo ina ia maua ni avanoa e galulue fa’ataitai ai le fanau i so’o se galuega a le Malo, sailia ai ni galuega e fiafia i latou e galulue tumau ai. E mafai lava ona fa’atalosaga ai e so’o se matagaluega nisi ina ia galulue tumau, i latou ua mae’a fa’au’u mai a’oga maualuluga ma tusi pasi Tipiloma, ma i latou fo’i ua fa’ato’a maua ai lea oni avanoa e galulue fa’amasani ai i ni galuega, ae ua leva ona mae’a a’oga maualuluga ma sailia fo’i ni avanoa faigaluega.

 

O oe le tamaititi ma le teineititi ua mana’o e fia maua tumau sau galuega, o le a fa’amoemoe le maua e oe o lena avanoa pe a e fa’amaoni i tiute e fa’asino atu e fai, fa’amaoni i le taimi e te amata ma toe manava ai, ma ia usiusita’i i le pulega pe a fa’atonu atu, ae le o le matele i le telefoni omiomi ma talanoa ai i taimi uma.

 

O lo ua fa’atulaga mai o lo ua i ai avanoa i ofisa o le malo faapea ma pisinisi tumaoti e tele ina ia galulue ai nei sui uma o le polokalama lenei.

 

FESOASOANI BLUESKY COMMUNICATIONS FA’ATUPE LE TAUVAGA TAUSALA SOFIAS 2021:

 

Ua fa’alauiloa mai e le Kamupani a le Bluesky Communications ise pepa o fa’amatalaga le talosaga na avatu a le Sosaiete a le SOFIAS e fia manaomia le latou fesoasoani mo le fa’atupega o le latou tauvaga Tausala lea e faia ia Iuni 05, 2021, ma ua talia nei e lea Kamupani Telefoni ma Feso’ota’iga Tau Tafa’ilagi Lea fanoga o le Asosi.

 

O le sao Faraile talu ai na fa’atasia uma ai sui o le a tauva ma le latou Asosi a Fa’afafine Amerika Samoa i le fale’aiga o le DDW ma ua faalauiloa ai fo’i ma auga o tapenaga a sui tauva ta’itasi i lea afiafi ina ia le tutusa ni fa’amoemoe e sui tauva e to’alua.

 

Ua i ai fo’i ni fa’afesili mai le vasega o fa’amasino sa latou auai fa’atasi i lea ulua’i ‘aiga e feiloa’i ai le Asosi ma sui tauva o lenei tauvaga 2021. Ma o lea lava fo’i fono ua fa’amautu ai ma le numera e tauva ai tausala eseese o lo ua lautogia e tauva mo le fa’amoemoe e siali tupe ai le SOFIAS mo se latou sao e taua’aoina atu mo le Hope House i Fatuoaiga, le Nofoaga o Fa’amoemoega.

 

O le taimi nei ua fa’ailoa mai le fesoasoani a le Bluesky Communications e $11,000 ma e aofia ai i lea meaalofa, o le a fa’auia ai ala o feso’ota’iga fa’atafa’ilagi o le polokalama atoa i lea afiafi a tamali’i. O le fesoasoani lenei e le o taua’aoina atu le seleni ae ua fesoasoani le Blue Sky e fa’ataunuu nisi o tautua uma ina ia mafai ona fa’ataunuu le latou fa’amoemoe lelei, mo se i’uga lelei e alolofa ai i le Hope House.

 

O le tausaga lenei o le tu’u ese atu e Vanessa Simau Ta’amu lona pale sa ia tauavea mai ile tausaga atoa o le Tausala Filifilia o le 2019-2021, ona e le’I faia fo’I se tauvaga tausala a le SOFIA 2020-2021 ona o le fa’asa o le Covid-19.

 

O le fa’aiuga o lenei taumafaiga, o le a filifilia ai fo’I se tasi ua sili ona agava’a mo le tauavega o le tofi “Tausala SOFIAS 2021-2022.

 

ULUA’I LAUGA KOVANA LEMANU FA’AUUGA KOLISI TU’UFA’ATASI 2021 O LE KOVANA

 

O le faau’uga lona 74 o le vasega fa’au’u o le Kolisi Tuufaatasi o Amerika Samoa ua avea ma se avanoa muamua o le afioga le Kovana Sili Lemanu P.S. Mauga ma ua ia fa’afetaia ai le fanau a’oga ua fa’au’uina nei, ona o lo latou onosa’i ma taumafai atili pea, aua o lea ua a’e malo o latou faiva ma ua fa’au’u mai ma o latou fa’ailoga sa tausailia i ala e fou ia i latou uma. 

 

O le isi mea ua iloga mai, o i latou ua fa’au’u ua avea ma ala e la’asia ai e le Kolisi Tu’ufa’atasi le isi la’asaga fou o le aga’i i luma o le ala o a’oa’oga mo fanau a’oga o lo’o soloa’i mai.

 

“O le taeao lenei e tele ona lagona, ae silisili ai le lagona o le fiafia ma fa’amanuiaga ua tatou maua. Sa ou nofo fo’i i le nofoa ua outou alaala ai i lenei taeao, ma ou te manatua pea le fa’aupuga, Afai o oe o le Matai, O oe lava le Matai i le olaga atoa.”

 

“Aua ne’i outou e fa’ata’atu’u mai lou fa’anaunauga e te fia maua ou manuia, e tatau lava ona e manatua i latou sa tofu sao mo lau taumafaiga a’o e taumafai mai ala fita ma le sousou ona o filifiliga eseese e tatau ona fai. Aua ne’i galo ia te oe ou matua, aua ne’I galo ou faia’oga, aua ne’i galo lou malo, aua ne’i galo ou matua fa’aleagaga ma lau ekalesia, ae silisili aua ne’I galo ia te oe lou Atua, ua e manuia ai.”

 

Sa faailoa atu e le Kovana i le vasega fa’aiuaso, “O lenei le faigamalo a le tatou Malo ua vaai toto’a i o outou fa’ailoga ua ausia i a’oga, mo le fa’avasegaina o totogi amata i galuega. O lea o le a amatalia le polokalama mo galuega e fa’aagaaga mo le fanau a’oga i tu’uaga o a’oga, aua la e te popiole o le a e amata mai i totogi amata, ae o le a fa’atulaga lou totogi i le fa’ailoga ua e umia i le taimi nei. Ia faaaoga tatau lea fo’i avanoa ua maua mai nei a’o e taumafai e fa’avasega lau malaga i fafo e sailia se isi fa’ailoga, faatumu muamua sou avanoa faigaluega e maua ai se isi vaega tupe ona tu’ua ai lea o le atunuu.”

 

“Ia outou o atu e fa’ailoga lenei taumafaiga ua maea, ia faia ma le saogalemu ma ia manatua o lo’o i ai ou fa’amoemoega i le lumana’i e ao ina fa’amautu.” O sana toe fa’amalosi atu lea I le vasega fa’aiuaso.