Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

FOAI O PUPUNI FOFOGA MO VETERENI - KONESULA O KOREA & ASOSI A KOREA:

I le Aso Lua o le vaiaso ua tuanai, na masii mai ai ni sui iloga o le Asosi a Korea i Amerika Samoa fa'apea ma le Sui Konesula o Korea mai le Ofisa Autu o le Konesula o Korea mai i Hawaii, ina ia fa'aoo mai se meaalofa taua tele mo sui Vetereni uma i Amerika Samoa. O lea meaalofa o ituaiga "pupuni fofoga" gaosia faapitoa e tolu afe mo sui Vetereni latou te fa'aaogaina.

O le susuga Mr Hyun Lee sa auai fa'atasi atu ma le Sui Konesula Hyun-Chul, Yoon, na te taua'aoina lea foa'i taua i le Fa'atonu o Mataupu Tau Vetereni a le tatou malo, Paepaetele Mapu Jamias ma le mamalu o le latou Ofisa o le VEterans Affairs i Tafuna faapea ma se tasi  Vetereni Samoa, sa tau I taua i Korea i Saute i le vaitausaga o le 1950-1953.

"O le ituaiga o pupuni fofoga nei, ua fa'aigoaina o le KF94 ma e fa'apitoa lava mo i latou ua i ai gasegase, aua e mautinoa lava o nei Vetereni o lo'o soifua ma gasegase e afua mai le tautua sa gafa ma i matou a'o puipuia le saogalemu o le atunuu mai le fili a'o talavou ma o tautua fo'i i vaega au a le Militeri a le Malo tele." O se fa'amatalaga amata lea a le susuga Paepaetele Mapu Jamias.

"Ua ou taulimaina nei le 3,000 o nei pupuni fofoga, na malaga fa'apitoa mai lava ma le Sui Konesula o Korea mai le latou Ofisa Autu i Honolulu Hawaii, o lea ua fa'afetai fai a'e ai le agaga ona o le manatu fo'i i le vasega o Vetereni, o i latou ua malolo manumalo mai tiute ma faiva sa tautua ai i tafa o taua ma nofoaga o le vevesi i le lalolagi."

"O le fa'afetai e mua lava i le Atua ona o le manatu mai, peita'i o lo'o molita'i mai nei pupuni fofoga ma se fe'au taua tele mo Vetereni uma, o le fa'afetai fa'apitoa mai le Konesula o Korea ma le latou pulega ma le aufaigaluega i Hawaii, fa'apea ma sui mamalu fo'i o le Asosi a Korea i Amerika Samoa nei."

"Fa'afetai tele mo le sao o Amerika Samoa i le puipuiga o Korea i Saute mai lena vaitausaga o le vevesi, se'ia oo mai lava i le taimi nei, o lo'o i i pea lava nofoaga o le Militeri i Korea i Saute, o lo'o latou puipuia malu pea Korea i Saute, fa'afetai fa'afetai tele." O se amataga lea o le tautalaga a le Yoon Hyun Chul ma ua ia fa'ailoa mai fo'i alofa'aga o le Konesula o Korea ma le latou Ofisa atoa i Honolulu Hawaii.

"O lo ua momoli mai le fa'afetai tele i le tautua a Vetereni uma sa i le taua, ma ua oo mai i nei ona po, o lo'o latou tausia pea le va lelei ma so'otaga o le tautua mo le puipuiga o le saogalemu o le soifua lautele o tagat Korea i Saute e ala i nofoaga fa'apitoa o mataituina le filemu i totonu o Korea i Saute e oo mai i le taimi nei."

"E mautinoa o loo toatele lava fanau a Amerika Samoa o lo'o tautua mai i na nofoaga o le Militeri i Korea i Saute, e le fa'atauagavale Korea i Saute i la outou tautua e afua mai le taimi o le vevesi, e oo mai nei. O lo ua i ai le fa'amoemoe, e tu mai lava Korea i Saute i soo se taimi e mana'omia ai fo'i e le Iunaite Setete se fesoasoani, o le taui o le agalelei ma le alofa i taimi faigata."

O lo ua i ai nei ituaiga pupuni fofoga nei mo le fa'aaogaina fa'apitoa e sui Vetereni ma o le a fa'asoa atu fo'i le vasega o ta'ita'i o le tatou Malo, ae maise i taimi e toe tau lutia ai i tatou e le fa'ama'i fita o le Coronavirus.

MAUA SIITAGA O TOTOGI O FAIA'OGA - AMATA I LE VAIASO TOTOGI FOU

O se tala fiafia ua fa'alogoina e le vasega o faia'oga, ina ua mae'a ai le fa'asologa a le afioga le Kovana Sili ma le taiulu fo'i o le latou Matagaluega i a'oga maualuluga ta'itasi i le atunuu e fa'ataunuu fa'au'uga o vasega fa'aiuaso i lenei tausaga, ae ua toe maua ma le tala fiafia, o le a fa'agasolo le si'itaga o totogi o faia'oga i le totogi e sosoo mai o le matagaluega o a'oga.

O le a si'itia le totogi o faiaoga uma e tusa o latou fa'ailoga ua umia i le taimi nei. O se mea matagofie lea ua fa'alogoina e le vasega o faia'oga, ua loa ona umia nei fa'ailoga, ae sa le siitia o latou totogi ia gatusa ai ma le agava'a e ala i fa'ailoga ua mae'a maua ona o le sogasoga i a'oa'oga maualuluga.

O le a fa'asolo mai le vasega o faufautua, taita'i o a'oga ta'itasi i a'oga tulaga muamua ma aoga tulaga lua, o tagata uma ua faigaluega i le Polokalama a le School Lunch Program ma le isi vaega eseese a le Matagaluega o A'oga, ua fa'asalafa ai lenei si'itaga, ae ua muamua lava ona fa'asolo mai vasega o faia'oga.

"Malo le onosa'i, sa outou nonofo ma fa'atali ma le onosa'i, e i ai lava malama, oo mai manuia. Lea ua i faitoto'a na manuia, e moni lava e fai aso le Atua i so'o se mea lelei." O se tala fiafia lea a le susuga le Fa'atonu o A'oga, le tofa Talauega Samasoni Asaeli.

O le vaeluaga o le po Iuni 18, o le a va'aia ai e faia'oga lea suiga lelei i o latou totogi ia i latou o lo'o ua fa'auia a latou totogi i a latou teugatupe, peitai o Iuni 20 o le a maua ai le suiga lelei lenei e le vasega o faia'oga o lo'o taua'ao a latou siaki totogi.

O Me 07, 2021 na mua'i iloga ai le fa'aaluina e le Malo o le $2.9miliona e siitia ai totogi o i latou e taita'i i matagaluega ta'itasi, ma ua fa'ailoa mai, e fa'atuai faia'oga ona o le tulaga o lo'o iloilo toto'a o latou totogi ua mautinoa o loo tonu le si'itaga ma le taimi na amata faigaluega ai fo'i i latou.

O se talanoa mai lea a le susuga Tuimavave Tauapai Laupola, o ia lea e faufautua a le Kovana Sili Lemanu Peleti Sialega Mauga i lona ofisa.

O le siitaga la lea o totogi o faia'oga ua fa'asolo mai e faapea:

* $20,000 mo i latou ua umia fa'ailoga AA ma ua suia mai le $16,000, sa i ai

* $31,000 mo i latou o lo'o umia fa'ailoga BA ma ua suia mai le $23,000, sa i ai.

* $41,000 mo i latou ua umia faailoga Masters mai le $27,000. sa i ai.

* $50,000 mo i latou uma ua umia fa'ailoga o Ph.D ma e fai lava fo'i si to'atele o i latou ua umia nei fa'ailoga i le taimi nei. Ua suia mai le mea sa i ai.

O le vaiaso na te'a ua mae'a fa'atulaga ai siitaga o faia'oga ma ua fa'ailoa mai ua mae'a i ai nei i le Ofisa o le Paketi fa'asoa mo le fa'amalosia loa o le siitaga i le totogi o loma nei.

O faia'oga uma fo'i o lo'o fa'afaiaoga e Aoga Tumaoti i totonu o le atunuu ua fa'ailoa mai, o i latou nei o le a totogia mai le vaega tupe ua toina mai le Consolidated Grant lea e maua ai latou vaega tupe toina mo a'oga tumaoti, ma o lo ua fa'ailoa mai o le a siitia fo'i lea fesoasoani mai le malo tele mo a'oga nei ina ia mautinoa o si'itia totogi o  faia'oga uma nei.

MALAGA FA'APITOA A LE VA'ALELE MO LE MEDICAID -  IUNI 24

Special Medicaid charter to Honolulu on June 24, 2021:

Ua fa'alauiloa mai e le ofisa o le Medicaid i le mamalu lautele ona ua tele na'ua le aofai o e fia malaga i fafo mo talavai ma ua fa'auia nei talosaga i le tatou Ofisa o le Falema'i Tele i Faga'alu, o lea ua toe fa'atulaga ma fa'ataga ai e le Kovana Sili ma le Lutena Kovana le isi malaga  le Medicaid e faia lea ia Iuni 24, 2021.

O malaga e tolu ua fa'atulaga nei mo le masina o Iuni 2021ma Iulai ua matua tutumu lava ma ua tele lisi o e fia malaga ua fa'atalitali avanoa ai. O le to'atele o i latou e tatau lava ona malaga mo a latou talavai e tatau lava ona faia.

O lea la ua fa'atulaga ai lenei malaga mo le vasega lava o tagata e fia faia talavai a le VA ma le LBJ ma ua fa'atulaga lea mo Iuni 21, 2021.

O nisi o gasegase ua mae'a fa'atulaga e malaga ia Iuni 19, 2021 poo Iulai 10 ma Iulai 29, 2021 ua fa'ailoa atu ia i latou pe le o manatu ina ia vave o i lea malaga ia Iuni 21, 2021.

O le va'alele lenei o le a malaga mai e leai sana pasese e aumaia, ae ole a i ai nisi e malaga ai, e si'itia la le pasese o i latou na e fa'atumu ai lea malaga, e na'o le malaga atu iinei e sau lea va'alele e avatu.

Pe afai e i ai se isi fa'afesili e manatu se tasi e fia malamalama ai, e mafai ona vala'au ane i le numera 699-4777.