Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

TO’ATELE FANAU AOGA POLOKALAMA FAIGALUEGA I LE TUUAGA UMI 2021

 

E tusa ai o fa’amaumauga ua mae’a ona fa’ailoa mai e le matagaluega o Tagata Faigaluega a le malo, ua fa’ailoa mai le aotelega o fanau ua mae’a fa’afaigaluegaina mo le tuuaga o a’oga i le polokalama fa’afaigaluega fa’amasani o fanau a’oga, i ni faiva e fiafia e galulue ai i le lumana’i pe afai o le a mae’a a’oa’oga.

 

Na tatala le polokalama lenei i le taeao o le aso Lua na tea nei i nofoaga e lua i totonu o Amerika Samoa. O le Faletaalo fou mo le DYWA i Tafuna, lea sa tula’I ai le afioga le fa’atonu o le DHR mo lana lauga fa’afeiloa’i le fanau a’oga o lo ua sauni e amata faigaluega fa’ata’ita’i, ma le Faleta’alo o le Manu’a High School i Ta’u, lea sa tula’i ai le susuga le Lutena Kovana Talauega Ale e faafeiloa’ia le mamalu o le fanau ile Manu’atele ua saunia mo faiva eseese.

 

Pau le mea e o gatasi ai nei nofoaga e lua, o le tausaga ese lea ua fa’amauina ai aofa’i sili ona to’atele o fanau ua manana’o e faigaluega fa’ata’ita’i ma ua mae’a taliaina fo’i mo lea fa’amoemoe. O le umi o lea polokalama e na’o le ono vaiaso.

 

O le auau o le polokalama i lenei tausaga ua fa’amauina “Va’ai Toto’a i lou Lumana’i” o le taumafaiga lenei a le Malo e fesoasoani ai i ona tupulaga talavou.

 

O le tamaitai fa’atonu o le Matagaluega o tagata faigaluega a le malo, Lynn P. Alaimalo sa ia fa’ailoa mai I le vasega o talavou uma ua aofia mo lea fa’amoemoe, “O le a aoga ia te outou lo outou amata taumafai e fa’aaoao i le olaga faigaluega, ia amata ona fa’ailoa ia te outou lo outou aoga i o outou aiga, ma le fatu aiga tausi e fa’atino e matua i taimi uma o lo outou tutupu a’e, o le taimi fo’i lenei o le a outou iloa ai le fa’atulagaga o le tatou Malo ma ona tiute fai ina ia aluga lelei le fa’afoega e o tatou ta’ita’i o le tatou faigamalo.E aoga fo’i enei tauimafaiga e aoao ai outou i amioga lelei ma le fa’atinoga sa’o o a outou tiute pe afai e tuuina atu ia te oe le fa’atuatuaga o e ta’ita’i ina ia outou faia se tiute ititi pe tele,” o se vaega lea o le lauga tima’i a le tamaitai fa’atonu i le vasega e to’atele na’ua o le fanau a’oga ua sauni e faigaluega.

 

“Pe afai e te amata vave ona fa’ata’ita’i i le fa’atinoga o tiute ma maua mai le totogi mo au galuega na faia, o le a amata ai ona mafaufau toto’a i lou lumana’i, ia matua’i mautu lou mafaufau ia le fesuisuia’ia au faaiuga fai aua lou lumana’i. O le taumafaiga foi lenei e tatau ona e amata aoga ai i le tamaoaiga tausi o lou aiga ma e taumafai ai e fa’aauau au aoaoga ma ia e to’aga I le aoga, aua le tia’I a’oga.”

 

“O lou iloa ona saili se galuega ma ia e faigaluega tumau ai ma le fa’amaoni, ma ia taumafai fo’i e e fa’ata’ita’i ona faia galuega lelei e tauleleia ai lou tagata i le lumana’i.”

 

I Manu’a na tutula’i ai fo’i le Lutena Kovana Talauega Eleasalo Ale, ma ia saunoa fa’apitoa i le to’a 40 o le fanau aoga ua fa’afaigaluega ina nei i Manu’atele, o i latou ua sili ai fo’I ona to’atele lenei tausaga nai lo tausaga uma talu ona fa’atautaia lenei polokalama i le Manu’atele.

 

“O lou faigaluega a’o e I le a’oga e aoga tele lea ia te outou, ae maise lo outou lumana’i. E amata fa’amatua ai lou mafaufau ma e manatu ai fa’atagata matua, aua ua amata ona e faigaluega ma ua maua sou totogi, O lou totogi o le a e va’aia ai se aoga ua mafai ona faia mo lou aiga ae maise nai ou matua. E fa’aosofia ai lagona lelei e fia atina’e atili lau taumafaiga e te aoga ai i lou aiga, a’o e maua le avanoa. O lou gafatia fo’i ona  e fa’atauina lava e oe o se mea aoga mo oe, o le isi lena fa’alagona e taua.

 

Peita’i o le a lu’ia oe i lou va’ai atu e le taitai ona lava lea totogi mo le tausiga o le aiga, fa’atau ai se mea aoga, o iina e fa’amalosia ai lou va’ai mamao i lou lumana’i. Ia maua’a au a’oa’oga, ua sailia pea le poto ma maua fa’ailoga e mafai ai ona tele se totogi e maua, ona fa’ato’a amatalia ai lea o sou aiga.”

 

“O una’iga lelei na e afua mai le amata fa’ata’ita’ia o outou i galuega fai ma ni faiva e tou te fa’atautaia i lenei tu’uaga umi, 6 vaiaso, ae maua le totogi e fesoasoani ai i le tau o tou meaa’oga. O le avanoa lelei lenei e te amata faigaluega ai ma sailiili i lou mafaufau talavou, poo a ituaiga galuega e te fia faia i le lumana’i, ae o e galue fa’ata’ita’i ai.”

 

“I le tausaga lenei ua matua fa’ateleina atili e Kovana Lemanu le polokalama lenei, ina ia matua fesoasoani i le to’atele o fanau a’oga ia faia latou filifiliga tatau a’o le’I oo ina mae’a a’oga maualuluga, ma faia ai latou fa’aiuga tatau mo le lumana’i. Aua e te fefe e fa’ata’ita’I I galuega eseese a’o e maua lenei avanoa, va’ai le mea e te fiafia lava e fai, ma fai loa, aua afai e te fiafia e faia se galuega, e le taitai ona muta lou naunau I ai e fa’aleleia atili ma fa’alautele lau tautua, aua o iina o lo’o fagaina mai ai lou agaga galue e le Atua o tomai eseese ma le atamai lautele atoatoa.”

 

Sa saunoa fo’I le susuga le Lutena Kovana, Talauega Ale, “O loo matua taumafai atili lava ina ia maua avanoa lelei e fa’aleeia atili ai le polokalama e maua ai e aiga ta’itasi le fesoasoani e ala i ni galuega a le fanau, ae maise i le Lumana’i. Pe afai tou te fa’amaoni ma tutumau I avanoa ua tuuina atu nei e faigaluega ai i ni faiva ua atofa i ai i lenei tausaga, e mautinoa e mafai e oe ona e saili toto’a se ituaiga matata e te fia fa’atinoa ma galue tumau ai pe a mae’a au aoaoga maualuluga.”

 

Ua na’o le 20 i le 25 itula o le a faigaluega ai le fanau aoga lenei I le vaitau o le taumafanafana mo le ono vaiaso. Ina ua maea ona amatalia le polokalama o galuega a le fanau a’oga I le Manu’atele, sa asia loa e Talauega Elesalo Ale aoga I Fitiuta ma Faleasao ma Tau fo’I, ona fa’asolo atu ai lea i le nofoaga o le a sisia ai le Fu’a a Manu’a ia Iulai 16, 2021, o le isi lea malaga o lo’o soso’o mai a le afioga le Kovana Sii i malaeva’alele I Fitiuta. O le asiasiga lea e va’aia ai mea e ao ina fa’aleleia a’o le’i i lea aso ilogao le tatou malo. O lea laufanua o Avaloa I Ta’u, ma o iina e faia uma ai mea uma ua fa’atulaga mo lea fa’amoemoe.

 

MAUA TOTOGI O NISI O FAIA’OGA – A’O ISI O LO’O FA’ATALI PEA

 

Ona sa faalauiloa muamua lava o le totogi o lenei vaiaso e maua ai siitaga a faia’oga, ae maise ia i latou ua mae’a umia fa’ailoga maualuluga, lea ua fa’avasegaina i ai le si’itaga o totogi, ina ua mae’a le fa’atulagaga fou a le matagaluega ua i ai nei. Ae o lea ua fa’ailoa mai, e le o tofusia faiaoga uma i lenei siitaga. O lo ua i ai se vaega tele o faiaoga ma le aufaigaluega ua le maua ni a latou siitaga, ma ua taumafai le pulega ma le aufaigaluega e nafa ma lea itu o le matagaluega e maua a’ia’i pe aisea ua fa’apea ai le siitaga.

 

Ua mautinoa e i ai nai fa’aletonu, ua le maua ai nisi ae o faia’oga lava latou o a’oga tumaoti ua fa’ailoa mai ua maea silafia e le maua i le totogi o lenei vaiaso. O nisi o faia’oga ua mautinoa e le o maua latou siitaga, ae o nisi o faia’oga o lo ua le maua ma siaki totogi, ua fa’apea fo’i i faia’oga ua le maua mai latou siitaga ae fa’auia latou totogi i a latou teugatupe, ua matele ina latou fa’aaogaina le DOE facebook e fa’ao’o mai ai latou fa’asea i le fiu o tatali pea lenei siitaga.

 

E le o se mea fou lenei mea o le fiu e tatau siaki totogi a nisi ua faato’a faigaluega, pe o i latou fo’i ua siitia o latou totogi mo le ulua’i taimi. O nisi ua fa’ailoa mai, “E oo mai fo’i le siaki ua matua tigaina ma lailai tagata e tatali nei manuia.”

 

E ese mai lea ae o nisi o faia’oga ma le aufaigaluega a aoga tumaoti o lo’o totogia lea I le tupe toina mai le ASDOE ma le feterale mo nei a’oga, ua le maua ni latou siitaga o totogi i lenei vaiaso o le totogi, ma nisi o latou siaki totogi.

 

Ua fa’ailoamai e le fa’atonu Talauega Dr Samasoni Asaeli, “O le to’atele o faia’oga lea ua fa’amanuiaina ua maua latou siaki ma siitaga ile aso Faraile ma le aso Gafua nei, peita’I e I ai ni fa’aletonu le ma’a;lofia I le fa’auluina atu o suafa o nisi o faia’oga i totonu o faila mo le lisi o tagata totogi ma o latou tulaga fou ua galulue ai I lenei tausaga aoga fou.O le ala lea ua mafai ai ona maua mai siaki a nisi ma o latou siaki ua mae’a I ai siitaga.

 

O lo ua fa’ailoa mai e le fa’atonu o a’oga, “Ona e tolu matagaluega o le malo e fa’auia uma I ai nei siitaga, suiga o tofiga e galulue mai ai, ma ia mafai loa ona totogia le tagata faigaluega I le totogi ua fa’atulaga fou nei, o le isi lava lea fa’afitauli, aua e pule lava fo’I na vaega I le fa’agaoioiga mai o latou matata. O le tele fo’i o faia’oga nei e totogia I le vaega tupe toina mai a le Cosolidated Grant, o le isi lea fa’atuai ona maua o siaki totogi a nisi.”