Pago Pago, AMERIKA SAMOA

UMUSA MALUMALU EKALESIA VOICE OF CHRIST AUA - MALUMALU O LE LIGHTHOUSE

Mai le tausaga e 1972 na mua’i fa’avaeina ai e le Tama Faife’au Rev. Elder Ta’afulisia Kalepo Tilo ma le Tina Fa’avaina Tilo, o e na amatalia le Ekalesia VOC (Voice of Christ) i Amerika Samoa,  le malumalu o le “Lighthouse Temple” i luga o le mauga i Aua. 

Lea ua toe fa’atula’ia ai fo’i i lona tulaga tuai le Malumalu Fou “LightHouse Temple” ma ua mati’e le taumafaiga a le pa’ia o le Ekalesia VOC Siufofoga o Keriso i Aua lava.

O latou matua faaleagaga i lenei vaitau, Pr Ted Leiato ma le Faletua Rachel Tilo Le’iato, o lo ua tau’avea nei le galuega i lenei vaitausaga, ma o fua na o le taumafaiga ma le soifua galulue ai i le VOC Full Gospel i Amerika Samoa nei.

O le aso Sa i le sauniga mamalu sa fa’atautaia ma tatala aloa’ia ai loa faitoto’a o lea galuega tele i le latou sauniga fa’afetai ma faapa’ia ai le malumalu fou ina ua mae’a lelei ona fausia fa’aonaponei, ma ua matagofie tele, lea sa fa’afao i ai a’ao o le Nana’s Construction Comapany o le Matuaofaiva, le tausi Fiapaipai Tuaolo Fruean ma le falefa o le Aiga Salemalama, le aufaigaluega tofia.

Ina ua fesiligia le umi na fa’atino ai lenei galuega toe amata atoatoa mai le tino atoa o le malumalu, ae fa’ailoa mai, o le tauaofai o mea uma e aofia ai le totogi o mea na fausia ai le falesa ma le totogi o le kamupani mo le fausaga, e silia lea ma le $250,000 le tau aofai.

Ona o le malumalu e fausia i luga o le mauga, o lea sa toe fa’aleleia atoa ai le pakaga o ta’avale ma fa’asima atoa le nofoaga e tulata i le malumalu i ona itu e fa. O se galuega e na’o le tolu masina na faatulaga e le Nana’s Consturction e fa’atula’ia ai, peita’i ona o le taimi na amata ai lea galuega a’o feagai fo’i le Nana’s Construction ma le fausaga fa’amae’a lelei o le Maota Tele o le DYWA i Tafuna, o lea sa taofi ai galuega a le Nana’s mo le Lighthouse Temple ae fa’asaga muamua i latou e faamae’a galuega a le Malo aua le faigamalo ua tuana’i a Kovana Lolo Matalasi Moliga.

Ina ua mae’a lena galuega ae fa’ato’a toe taliu mai loa Nana’s fa’amae’a le malumalu ma mae’a lelei ai i le na’o le 4 masina o le galuega atoa. Fa’afetaia le lima lelei ma le matagofie o le fausaga o le Malumalu, aua le folauga a le Ekalesia VOC Full Gospel i lenei vaitausaga e aga atu i le lumana’i.

I le sauniga mamalu e tatalaina ai lea malumalu sa tatau ona malaga fa’apitoa mai le Suparinitene Aoao o le VOC i le Vasa Pasefika, peita’i ua le gafatia ona o le tulaga o le fa’ama’i i nei vaitau ma femalaga’iga o lo’o taofia pea. O lea ua tatala mai ai le avanoa i le Taitai Aoao o le VOC i Amerika Samoa nei, Pr. Umaga ina ia ona ta’ita’ia le sauniga mamalu ma fa’amautu ai le i’uga o lea galuega tele na feagai ai ma le VOC Aua.

O le susuga fo’i Pr Umaga sa ia ootia le lipine e tatalaina ai le malumalu “Lighthouse Temple” i luga o le mauga o Pioa.

I lea sauniga sa malaga fa’apitoa mai nisi uma o Faife’au o lo’o galulue i Samoa a le VOC, Pr Paulo Tiumalu ma le faletua o Alice Tiumalu, fa’atasia mai nisi uma o le Ekalesia VOC i Amerika Samoa nei, ina ia molimauina le galuega ua mae’a, o le aso sa tuupoina ae ua fa’ataunuuina i le manuia mai le Atua, o le la’au lea o le soifua.

Sa auai fo’i le Matuaofaiva tausi Fiapaipai Tuaolo Fruean ina ia molimauina fo’i le tatalaga aloaia o faitoto’a o le latou lea galuega mo le pa’ia lasi o le Ekalesia ae maise le susuga le Auauna a le Atua ma le faletua ma aiga. Na maea le sauniga ae o le toona’i o le aso Sa o le latou ‘aiga fiafia lava lea mo le fa’amoemoe.

SAUNIGA FALELAUASI TAMAITAI FAIA’OGA & AUAUNA A LE ATUA - PR. DR. LILIOLELAGI REPEKA R. ALAIMOANA-NUUSA

O lo ua fa’alauiloa mai e le pa’ia o aiga, ae maise le tama o le aiga, le afioga Leasi Vaiinupo Nuusa ma le fanau, le taimi o toe sauniga mamalu mo le latou tina peleina, ae o le susuga le Faife’au, le Faia’oga i le Kolisi Tuufa’atasi o Amerika Samoa, ma o se uo pele i le to’atele, ae o se uso moni i nisi o lo’o soifua pea, Pr. Dr Liliolelagi Repeka R. Alaimoana -Nuusa.

Na fa’amae’a ana galuega ina ua tu’ua e ia le malo ia Me 26, 2021 a’o i ai o ia i lona aiga i El Paso, Texas. Peita’i ua finagalo le tama o le aiga fa’apea le fanau ma le pa’ia lasi o Aiga, ina ia falelauasi mai o ia i lona aiga i Moanalua, Hawaii. 

Ua iloga le tautua a lenei tina o le atunuu e ala i lona tomai fa’afaia’oga ma le ta’ita’i tama i fanau a le atunuu a’o utuvai i le Laumua o Amerika Samoa, le Kolisi Tuufa’atasi o Amerilka Samoa.

O ia o le Polofesa o le Gagana Peretania, ma o lo’o ua to’atele alo o le atunuu sa latou uia lea alavai ma utufia le sosia o le atamai o lea fo’i faia’oga.

O fua o ana galuega e fa’ailoa mai ai le agaga sa ia tautua ai. O lo ua molimauina e ia ona uiga malu ma le agamalu. E le so’evale pe so’ona faia se tala, ae saunoa ma le atamai. E aoao ma le poto ma ua ia te ia faiva o le a’oa’o atu ma le onosa’i i fanau a le atunuu. Amuia lona ua ia te oe le pale o le onosa’i.

Fa’afetaia e le to’atele e ala i alofa’aga i ala o feso’ota’iga tau Upega Tafa’ilagi, lona aoao ma le tonu, aoao ma le onosa’i ma sa ia faia lava ona faiva ma tagai toto’a i le lumana’i o le fanau ae maise le tatou nei malo, ia atamamai a tatou fanau.

Fa’afetai mo lou titifaitama, sa e le tu’ua ai se mea ae sa e matua sasa’a le fafao, aua le fanau sa gasolo atu ina ia a’oa’oina lelei.

Ua e le tu’ua fo’i lenei olaga, a’o le’i faia sona sao mo le galuega Faife’au mo le Atua e ona mea uma. Ua molimauina ua avea oe se tasi o sulu iloga mo le Atua. Fa’afetai fai tatalo mo le to’atele, ma ua fa’amaloloina oe e le Atua e ona faiva.

E sili le 20 tausaga sa ia avea ai ma faia’oga, ma e to’atele fo’i ua molimauina lana auaunaga i ona faiva uma sa tautua ai. 

O ona toe sauniga ua fa’ailoa mai o le a faia lea i le First Assembly of God Church i Moanalua, Hawaii ia Iuni 30, 2021 i le itula e 10:00 i le taeao, taimi a Hawaii.

O lona falelauasiga o le a fa’ataunuu lea i lona Oliolisaga tumau i Kaneohe Veterans Memorial Cemetery i le itula 1:00pm i le taimi Hawaii.

O le aiga fiafia e fa’atasia uma i ai uo mamae, aiga ma le lasilasi o e uma e masani ma le tina peleina o le a faia lea i itula e 5:oo i le afiafi i Hale Ikena Ballroom  i Fort Shafter, Hawaii.

O lo’o soifua pea o ia i le Tama o le Aiga, le afioga Vaiinupo Nuusa, o le sa la’ua osi feagaiga mo le 42 tausaga lenei o le soifuaga ma le mafutaga fa’atasi i le alofa ma le fa’amaoni. Ua fa’apea fo’i ona fa’amanuiaina i la’ua i le fanau e to’atolu: Tavita, Solomona ma Talei ma i ai fo’i ma latou aiga. Ua tuuina mai fo’i le fa’afetai tele e i latou ona o le alolofa ma le masi’i atu o le pa’ia o aiga, ae maise lava i uso ma tuagane ma aiga o Repeka Alaimoana-Nuusa.