Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

POLOKALAMA ESEESE MO LE TU’UAGA UMI O A’OGA FANAU

 

O lo ua amatalia nisi o polokalama fa’atulaga e amatalia i le tu’uaga umi lenei o a’oga a le fanau mai vasega i a’oga tulaga muamua se’ia oo i le fanau i vasega o a’oga maualuluga. O le vasega o fanau o le a a’e i a’oga maualuluga o lea ua amatalia le polokalama e mafai ai ona fa’ata’ita’i i galuega eseese le fanau, e maua fo’i nai totogi e fesoasoani i le toe a’e o a latou a’oga.

 

O lo ua va’aia la le to’atele o le fanau ua fa’afaigaluega i lenei vaitau i ofisa ta’itasi, peita’i, ua i ai nisi o matagaluega ua fa’ailoa mai, ua latou fa’amalulu mai ina ia fa’aititia latou fanau e auina atu, ona o tulaga e le talafeagai tiute o latou fa’atinoa, ma le silafia e le fanau o mea o talanoaina, pe o le lamatia ai fo’i o le soifua saogalemu o le fanau o lo’o galulue fa’ata’ita’i.

 

O nisi o ofisa ua va’aia le fa’aaoga tatau o fanau nei e fa’avasegaina o latou faila, toe fa’ai’ila lelei o latou fata o teuina ai latou sapalai, o nisi ua i fafo fo’i le fanau e fesoasoani i le fa’amamaina o lotoa, ma le fa’amama o lo’o sauni atu i ai le vasega o le aufaigaluega atoa a le malo, o le a matua aoga ai lava le fesoasoani a fanau faigaluega nei.

 

Peita’i e ese mai nei mea uma ua va’aia o fa’atino e le fanau, ua silafia lelei le saunoaga a le afioga le Kovana ina ua fa’atulaga lenei polokalama, ma o le aotelega o fanau ua faafaigaluega i lenei, o se aofaiga sili lea ona to’atele talu mai ona fa’atautaia lenei polokalama fesoasoani mo fanau a’oga.

 

Mai le vaega a le American Samoa Arts Council e to’a 17 o latou sui faigaluega ua fa’aaogaina tatau ai. O taulele’a ua matauina le fa’aaoga tatau e le vasega o i latou o loo faigaluega e taina fa’atagata, tapena le nofoaga atoa o lo’o fa’atula’ia ai lea Ofisa ma ua latou fa’aputuina ata uma o lo ua mae’a foa’ia atu mo le Falemata’aga, ina ia fa’aalia ai. O nisi o le fanau ua fa’amamaina le lotoa ma sui nei latou te va’aia i latou i le 4 itula o le aso.

 

E ese mai lea o tamaitai ua fa’aaogaina i totonu ina ia latou fa’avasegaina faila uma o fa’amaumauga ma fa’amatalaga taua tele o nisi o ata ua foa’ia mai mo le fale Mata’aga, o nisi ua fa’avasega measina ua mae’a fa’aalia i fata o le fale Mata’aga, ma nisi o i latou e fa’avasegaina Atavali ma isi uma measina ua foa’ia atu i le falemata’aga o Amerika Samoa latou te fa’alauiloaina mo le mamalu lautele o e fia maimoaina.

 

E i ai foi le Polokalama mo le Taumafanafana a le Arts Council lava latou e fa’atautaia mai ia Iulai 12 se’ia oo ia Aokuso 6, 2021. O lena fo’i polokalama e fa’atautaia lava i latou nofoaga tumau i Fagatogo ma ua mafai fo’i ona talia ai so’o se fanau lava e i le va o le 10-17 tausaga le matutua.

 

O mea masani o le a fa’ata’ita’ia i le fanau, o le tusia o mamanu mo siapo, ta fa’atagata, lalagaina o fala ma ie toga ma isi lava galuega taulima Samoa. A’o ai ma le Siva Samoa ma Pesega fa’asamoa e tatau ona silafia e le fanau sisiva fa’afetaui i ai i taimi o fa’afiafiaga fa’asamoa. O le a i ai fo’i ma nisi mea uma o Agaifanua Fa’asamoa o le a a’oa’oina ai le fanau talavou.

 

O itula masani lava ua mae’a faatulaga mai e faigaluega ai le fanau pe a’oa’oina ai fo’i le fanau i le taimi o nei polokalama uma mo le taumafanafana poo le tu’uaga umi o a’oga.

 

O lo ua tatala nei lea lesitala i le taimi nei, ua mafai ona gasolo atu matua ina ia lesitalaina lou alo, ae o le a tapunia le lesitala ia Iulai 02, 2021.

 

“FOLAUGA A LE TATAU MALAGA AGANUU” - FA’ATAUTAIA A’OA’OGA 

 

O le polokalama lenei ua fa’atula’ia e lenei Asosi o Atisi o Siapo ma Tagatatau, ina ia a’oa’oina ai nisi o le fanau ia fa’aleleia atili o latou tomai tusi ata, vali ata, tusi mamanu o le siapo ma Upeti mo Elei, Ta Faatagata ma ua fa’atulaga tonu lava mo le fanau e 15 tausaga seia oo i le 17 tausaga le matutua.

 

O le tele o taimi o nei fanau o le a fa’atalanoaina ai ma a’oa’o i latou i lea mamanu ma latou agatonu e tusa o le aganuu a Samoa. O lo ua fa’ailoa mai le agaga fa’afetai o le tamaitai o Reggie Meredith Fitiao, ona o le toina atu mo i latou o le fa’atupega e $5,000 mai le Amerika Samoa Humnities Council lea ua mafai ai ona fa’atautaia le latou lea polokalama mo lenei tu’uaga umi o a’oga.

 

“O lo ua fuafua lava le polokalama lea e le to’atele na’ua tamaiti e auai. Ua tatau ona matou fa’aaogaina lea avanoa mo le fanau ua amata ona mafaufau toto’a i le taua o mamanu, taua o le faiva ma measina o lo’o fa’afailele ai a le atunuu. O le Siapo lava latou ma ona manau Samoa moni lava, e aoga ona iloa patino e le fanau le uiga o mamanu ma latou fa’asinomaga i le aganuu a Samoa,” o se tala fiafia mai lea a Reggie Fitiao e tusa o le latou polokalama o le a amatalia ia Iulai 06, ae fa’amae’aina ia Iulai 29, 2021.

 

O le taina foi o mamanu Samoa moni i Upeti mo le gaosiga o Elei, o se tasi lea galuega e lelei ona fa’asino tonu lava i fanau ua mafai ona fa’aaogaina tatau o latou tomai pe a maua’a i o latou fiangalo.

 

O le isi vaega tele o lenei aoaoga mo le taumafanafana, o le a aofia ai ma ni fa’amatalaga ma aoaoga tau le tala’aga o le Siapo Samoa, aua o lea ua fa’atulaga e faia lava lenei polokalama mo le fanau talavou i le fale sa gaosia mai ai le siapo mo le tele o tausaga.

 

E va’ai i latou i le gaosiga o le siapo mai le amataga e oo i le valiga ma le tusia o ona mamanu, le taina o Upeti ma le tusiga o ona mamanu, atoa ai ma le sootaga o le soifuaga o talavou Samoa ma nei measina a le atunuu.

 

O lenei polokalama o le a leai se totogi mo le fanau e auai ai, ae o fa’amaumauga uma ma ata fa’asolo o le a pu’ea e fa’aaogaina lea e le Amerika Samoa Humanities e fa’amaumauina lea i o latou faila aua le lumana’i.

 

O le Folauga o le Tatau Malaga Fa’asamoa, o se fa’alapotopotoga tumaoti e le o fa’atula’ia e sailia ai ni tupe ae o le a fa’aaogaina lea e fa’amauina nisi o faamaumauga aoga tele mo nei measina a le atunuu, e aofia ai le Tatau, Siapo ma Taga Fa’atagata.

 

O i latou o fa’apaaga e fa’atulaia le Filauga o le Tatau Malaga Aganuu e aofia ai Reggie Fitiao, Mary Anne Bordonaro ma ua i ai fo’i nisi o latou aufa’atasi i lea fa’amoemoe. O le latou lesitala ua faia lea i luga o Upega Tafailagi i le tuatusi  faasamoaarts.com/programs

 

FA’ATELE FA’AMANATUINA O LE FU’A A MANU’A - IULAI 16, 2021

 

Ua manatu le faigamalo o tula’i nei Kovana Lemanu ma sui Kovana Talauega Ale o le a fa’atele le fa’amanatuga o le Sisigafu’a a le Manu’atele i lenei tausaga, lea ua fa’atulaga mo Iulai 16, 2021.

 

Ua fa’amalosia uma e Kovana Lemanu P Mauga lana Kapeneta ina ia auai uma i lea aso i le Manu’atele, ua fa’atulaga fo’i malaga ale Va’alele fa’apea ma le MV. Manu’atele lll mo le faamoemoe ia lava ma totoe avanoa e malaga uma ai mo lea fa’amoemoe ma toe taliu mai i fanua pe a mae’a.

 

Ua mae’a asia fo’i le nofoaga fa’apitoa e sisi a’e ai le Tagavai a le Manu’atele ma tapena lelei i le malaga a le susuga le Lutena Kovana Talauega Ale a’o i ai i le fa’aa’ega o le polokalama faigaluega ale fanau a’oga i galuega matagaluega eseese a le malo. 

 

Fa’ailoa e Tuimavave Tauapa’i Laupola, “O nisi o vaega o le fa’amanatuga o le Fu’a a Manu’a i lenei tausaga, ua aofia ai ma le tauvaga Fagota, o le fa’aaliga o fua o le eleele ma le sauniga lotu tele fa’apea ma fa’afiafiaga i le afiafi. O le aso e sisi a’e ai le tagavai o le a muamua faia se solo fa’aaloalo, o saunoaga fa’apitoa fo’i ua fa’atulaga mai ta’ita’i o le Malo fa’apea ma le itumalo o le Manu’atele, o se ‘aiga fiafia ma fa’aaloaloga.”

 

Na fa’ailoa atu e Lemanu i lana Kapeneta, “E aoga foi lou oo i Manu’a ma e tagai toto’a i galuega o fa’atino e au tagata faigaluega i lau matagaluega i Manu’a, ma e silafia ai le tulaga o i ai galuega a lau matagaluega i le Motusa. O le isi mea ia mafai ona e auai fo’i i le sauniga lotu fa’atasi ma i latou i lea aso.”

 

“Ona o lo’o ua mautinoa e le taitai ona lava nofoa o le va’alele mo tagata uma i malaga o le a fa’atulaga, o lea ua fa’atulaga ai ma le va’a o le MV Manu’atele lll ina ia malaga uma atu ai le to’atele e malolosi i luga o le vasa.O lona uiga o le a i ai malaga fa’aopoopo a le MV Manu’atele lll i le va o i tatou ma le Manu’atele mai ia Iuni 28 seia oo ia Iulai 12, 2021.” O se tala mautinoa lea a Laupola e tusa o le pisi o le a i ai malaga i le Manu’atele ona o le latou sisigafu’a.

 

O le tauvaga fagotaga ma le Faaaliga o Fua o Fa’ato’aga a le Manu’atele o le a fa’atautaia lea ia Iulai 14, 2 021. O Iulai 15, e faia ai le sauniga lotu tuufa’atasi ona soso’o loa lea ma fa’afiafiaga ae ua leai se isi fa’aaliga poo ai e faia fa’afiafiaga nei, poo a fo’i ituaiga fa’afiafiaga o le a fa’atautaia. Ua manatu fo’i le Ofisa o le Kovana ina ia taofia lea vaega o le fa’aaliga mai le silafia a le atunuu i le taimi nei. O sina fa’amatalaga puupuu ua fa’ailoa mai ai o se “Koneseti”.

 

Peita’i o le polokalama e sisi a’e ai le fu’a lava ia, e faia lea ia Iulai 16 ma e faia ai le solo fa’aaloalo a tagata faigaluega uma a le malo o lo’o i le Manu’atele i lea aso fa’apitoa, sisi ai lea fu’a ma faia ai le ‘aiga fa’apitoa o le aoauli ae fa’ato’a mulita’i i fa’aaloaloga.