Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

FESOASOANI LE UCEDD FA’ATOSINA TAGATA FAI TUI PUIPUIA O LE COVID-19

 

Ona o lea ua i ai se fa’amoemoe maualuga o le Malo ina ia faia se latou taumafaiga tele, o le Se’i e fa’atosina ai agaga o tagata uma ina ia o atu e faia o latou tui puipuia o le Covid 19, o lea ua ofo mai ai fo’I le UCEDD poo le University Center for Excellence in Developmental Disabilities, e fa’apa’aga atu i ai ma le latou taumafaiga lea e fa’aupuina “Oe le Toa – Fai Lou Tui Puipuia”- “ Be A Hero, Vaccinate!”

 

O lea fa’amoemoe ua fa’atulaga e faia i le aso Gafua lea e malolo uma ai e fa’amanatu le Sisigafu’a o le Malo Tele o Amerika, ma ua faailoa mai o fa’ailoga e matele i ta’aloga mo le fanau i luga o masini feso’ota’i ma upega tafa’ilagi. O mea nei o lo’o naunau lava i ai loto o le fanau talavou, a’o i latou fo’I nei o lo ua fa’aauga i ai le taumafaiga ia faia latou tui puipuia.

 

Ua fa’atulaga lenei fa’amoemoe o le a fa’atautaia i le Paka Liona ma ua fuafua fa’ailoga e taua’aoina mo le fanau e afua I le 12 tausaga se’ia pa’ia le 30 tausaga le matutua.

 

“E le iloa le laki poo lena e ia te oe, o ta’aloga fo’I o lo’o taua’aoina atu, o mea na o lo’o e finau ai I nai ou matua e fa’atau, ae le taugofie, susu maim o lea fa’amoemoe.” O se tala fiafia lea a le tamaitai fa’atonu o le UCEDD Tafamamao Tupuola.

 

TALA’AGA MALUMALU O LE “EKALESIA O LE  SIUFOFOGA O KERISO I LE TALALELEI ATOATOA” -  I AUA

 

O le ata ole ulua’i tatalaina ole Falesa,Lighthouse Temple,  o lo’o pue’a mai ai le tamā Faifeau o Rev. TK Tilo o loo ua ia tatalaina le malumalu na fausia ile tausaga 1972.  Lona uiga, ua toeititi atoa le 49 tausaga ao lea ua toe fa’afouina atoa le Malumalu Tapua’i e avea ma ta’iala mai luga o le Mauga o Pioa. Ua i ai le suiga tele i le  taualuga ma le tele ole tino ole falesa, peita’i e tumau pea lona fa’avae ma le lautele ma le umi o ona puipui sa iai mai le amataga, i totonu atoa ma fafo. 

 

Ina ua tu’umalo Susuga ile Faifeau, le tamā peleina ole faalapotopotoga aoao, iā a’afulisia Kalpo Tilo, le ulua’i Peresitene ole VOC, iā Mati 2003, na soloa’i ane lona atalii matua o Rev. Elder Dr. Rudolph Ta’afulisia Tilo, Sr., e avea ma Peresitene lona lua ole fa’alapotopotoga ole VOCFGC, ma avea ai fo’i o ia ma Faifeau na tausia le lafu mamoe ile “Lighthouse Temple” i Aua, 2003.

 

O le tulaga ma le nofoaga o lo’o tū ai le Malumalu Tapua’i , ole tulaga lava lea na fa’avae ma fausia ai le ulua’i Malumalu ole Ekalesia Voice of Christ (VOC) Full Gospel i Samoa ma le lalolagi atoa, na fa’avaeina ē mātua peleina ole Faletua ia Rachel,le tina o le galuega i le taimi nei. Ua fai ile lagi la lā’ua folauga. “Founders of VOC International.”  O le Susuga ile Faifeau, ulua’i Peresitene ole fa’alapotopotoga Voice of Christ Full Gospel Church, o Rev. Elder Ta’afulisia Kalepo (TK) Tilo, Sr., ma le tinā Faifeau, Rev. Dr. Fa’avāina Tiumalu-Tilo.  Na mua’i fa’atuina le Ekalesia VOC ile aai o San Francisco, i Kalefonia, ia Mati 1965.

 

Ae ole tausaga 1967, sa malaga mai ai i la’ua i Amerika Samoa ma la la’ua fanau e to’alima, Marilyn, Sandra, Rudolph Ta’afulisia, E.Kalepo ma Miracle Faigata.  Na toe maua ai lea o le isi fanau to’alua iinei lava i Amerika Samoa, ole Faletua ia Rachel Fa’auluuluga ma le ui’i o Ta’afulisia Jr..  Na muamua fai tapua’iga ma lotu ile faletalimalo o lo latou aiga sa Tilō, a’o suafa ai le uso matua ole Faifeau ia Ta’afulisia, o le Sa’o ole aiga, Tilo Eliga Tilo, i Aua lava.  Na tō mai ai le fanua “Pagaloa” e fausia ai le malumalu ole VOC, o iai lava e o’o mai i ona po nei.

 

O se mea na moemoe ile finagalo ole Faifeau iā Rudy Tilo, ia toe fausia se malumalu fou i Aua.  Ua va’aia le amata ona tuai ma leva le Malumalu Tapua’I ma ua mana’omia ona toe fa’aleleia.  Ae pagā lea, na afemoe le folauga a le auauna ile tausaga 2019. I le tausaga lava lena, sa tofia ai le Susuga iā Ted Le’iato & le Faletua iā Rachel e tauaveina le galuega i VOC Aua, “Lighthouse Temple”. Ma fetu’una’i ai loa muniao, ile finagalo ‘autasia ole Ekalesia, ile Ta’ita’ifono iā Talivaa Pita Talivaa aemaise Susuga i Faifeau lagolago, ole vasega o A’oa’o ma le malosi o le galuega a le Atua, i Afioga i Tiakono, ma le lautelega ole Ekalesia ma ona tagata lotu, ole a faia se falesā fou ua vea nei ma Ta’iala mai luga o le Mauga.

 

Mai ia Ianuari 2020, o le kamupani konekarate a le Susuga ia Sapati, ma lana ‘aufaigaluega mai Samoa Tuto’atasi sa mua’i faia le galuega.  Ae ina ua malaga i Samoa e pei ona iai aiaiga o pepa malaga, sa o’o atu ai ae fetaui tonu ma le tapunia alava’a ona ole Covid 19, ua le mafai ai ona toe taliu mai.  I le 6-masina talu ona tu’ua le galuega, sa toe tausaili ai lea o se isi kamupani e fa’aauauina ma fa’auma le fausiaina ole Malumalu “Lighthouse Temple”.

 

Sa nofo tatalo le Ekalesia i Aua ma tu’u atu lo latou mana’oga ile Atua, ina ia fa’asino mai se tasi e mafai ona faia le galuega.  Peita’i, na totō e le Atua ile loto o le Faifeau ia Le’iato ma le Faletua o Rachel, ina ia talosaga le fesoasoani mai le kamupani a “Nana’s Company”, le Faletua ia Fiapa’ipa’i Tuaolo-Fruean ma si ona alii, le Afioga ia Tuaolo Manaia Tuiletufuga Fruean, e fa’amae’a le galuega. Na fa’ao’o atu le savali a le Ekalesia ma talileleia mai ma fa’aauau ai le galuega ua i’u manuia ai nei fuafuaga uma. 

 

O le Aso Sa na mavae nei, Iuni 27, 2021, sa fa’apaiaina ai le malumalu ole Atua, “Lighthouse Temple”, Voice of Christ Full Gospel Church (VOCFGC, “Si’ufofoga o Keriso ile Tala Lelei Atoatoa,”)  ile alalafaga o Aua, ile atumauga e ta’ua o “Pagaloa”, ile fanua ole aiga sā Tilõ ‘autafa ane ole Rainmaker Mountain.  

 

Sa tu’uina atu le fa’aaloalo maualuga ile Sa’o ole Aiga sa Tilõ, le alii o le Faleono, Afioga Tilo Vasaga Tilo e tatalaina aloa’ia le Malumalu. O ia lava lea sa ‘o’otiina le ripine, tulou, e taualoaina ai le fa’aaogāina o le Malumalu Tapua’i mo tapua’iga a le ‘aulotu.  O le Afioga Tilo Vasaga, o ia foi ole alii Senatoa ole Itumalo ile Maota Maualuga ole Fono Faitulafono o Amerika Samoa.

 

O se avanoa matagofie sa tu’uina mo se molimau fa’amomoi loto a le tinā, a’o le Faletua o Fiapa’ipa’i, le Agaiotupu o le galuega ua mae’a, a’o le tautua a lana kamupani ma le afioga le Peresitene o le Senate, a’o lē na Faleagafulu iai le Motu, Tuāolo Manaia ma le lā fanau, “O le manuia mai le Atua e lē mafaitaulia. Ua matou maitauina o sosia e tele ua liligi mai, ina ua matou fa’amuamua le alolofa ma fesoasoani i le fausiaina o Malumalu Tapua’i aua sauniga fai i le Atua Silisili.”

 

O le fa’amae’aina o fafo ma le fa’alauteleina o le tulaga e pakaga mo ta’avale ma teuteu lelei o lumafale o le maota tapua’i ma ona ‘autafa, o le galuega lea sa gafa ma nisi ole ‘au uso Kerisiano, le Susuga ia Silo ma lana kamupani “Silo Services”, sa mafai ona tauave lua e ia  ma le galuega a’o fausia le fale nofo mo Theodora Le’iato-Meredith ma Joseph Meredith, lea o loo soso’o.

 

O se fesoasoani tele lea mo le fa’amoemoe o le “Lighthouse Temple” o le sao lea o le susuga le fai uila, o Misiona Tasi,lea sa ia faia sulu ma fa’amalamalamaina o le Malumalu Lighthouse.  Na fa’afetai fa’apitoa foi i le Susuga Ziggy Wolwrath ma le ICS Cargo ina ua mafai ona fa’ataunu’uina mai mōlī fa’apitoa o le malumalu ile cargo flight ole po o le Aso To’ana’i, peita’i o le vaveao o le Aso Sa, 2am ae ama fa’apipi’ia nei totoga uma, ao loma le sauniga i le taeao lava.

 

O le fa’atupega o lenei fa’amoemoe, na fa’amatalaina e le Faifeau Ted Le’iato, o le aofa’iga ma le tele o foa’i, na fa’atupega o se aotelega o sefulua’i ma taulaga” a le Ekalesia i Aua, o totino o le  VOC “Lighthouse Temple”, tagata lolotu ma matāfale o le Ekalesia, fa’atasi ai ma alofa’aga ma fesoasoani mai le tele o aiga pele, uõ ma ‘aumeamamae aemaise o Ekalesia ta’itasi na tufa i ai tusi talosaga mo se fesoasoani.  E le’i gata iinei i le atunu’u a’o fafo foi. O le tu’uaofa’iga e $127,988.52.  a’o nisi o le agalelei ma alofa’aga fa’aopoopo sa sasa’a mai le to’atele o tagata o le Atua e  $52,329.48.

 

O le Aofa’i atoa ole Tau ole galuega ole Malumalu Tapua’i “Lighthouse Temple”, VOC Aua, na saunoaina i fa’amaumauga a le Susuga ile Faifeau ia Theodore Le’iato, e  $243,116.94. Peita’i e le’i aofia i lea tuufa’atasiga le vasega o lisiti mulimuli o le totogi o le aumaia mai fafo i le meli o le tele o totoga mulimuli o le malumalu. Pe afai ae tutu fa’atasia ma na vaega tupe fa’aalu,ua silia ai le tau aotelega o le malumalu i le $250,000. Na fa’aatoaina lava ona totogi atoa ile oloa faula’i o le Atua, e ala mai i ona lava tagata ile Ekalesia i Aua lava.