Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

POLOKALAMA TAUTAI MO LE ASO FA’APITOA O MANU’A

 

Mai Siufaga, Ta’u Manu’a sa fa’atautaia ai le fonotaga muamua e talanoaina ai aiaiga o le Tauvaga Tautai o le Gataifale mo le aufaifaiva o le atunuu, ua mafai ona fa’atasi atu e lesitala mo lea fa’amoemoe, le Manu’a Flag Day Offshore Fishing Tournament. 

 

E lua aso ua lautogia e fa’atautaia ai lenei tauvaga fagotaga, ma e lusitana ai va’a fagota ta’itasi au fa’aaogaina mo le fagotaga, Iulai 14 ma le 15, 2021.

 

Mai le ulula’i aso o le lesitala mo i latou o le a tauva i lea faigafaiva e toavalu i latou na auai, ae na manino lava le saunaoaga a le susuga le fa’atonu o le DMWR, Taotasi Archie Soliai, ina ia taofia pea le faamutaina o le lesitala sei to’ai taunuu mai le vasega o tautai fagota mai Ofu ma Olosega. 

 

Ona e lei to’ai taunuu atu foi le peresetene o le Asosi Tautai Fagota a le Manuatele ona o loo auai o ia i le fonotele o lo’o faatautaia i le taimi nei a le EFKAS i Kanana Fou, o lea sa avea ai le susuga le Aoao o Sualevai ma sui e saunoa fa’apitoa mo le fa’amoemoe e tatala ai fa’afeiloa’iga o le fonotaga. Ina ua mae’a sa tulai loa le susuga le fa’atonu Taotasi Archie Soliai mo lana saunoaga e fa’apupula atili ai le fa’amoemoe.

 

“O le fa’afetai e tuuina atu fa’apitoa mo le vasega o tautai uma o le Manu’atele, aua e le o mapu lo outou fai pea o le faiva, ia sailia le sosia o le tamaoaiga mai le gataifale aua le tausiga o aiga ma mea uma e faaolaola atili ai ala sa soifua mai ai o tatou augatama.”

 

“E ui ina ua tatou suia ala e fa’atautaia ai fagotaga i nei vaitau, ae o lo’o tumau pea ia te’i tatou le naunau mo le faiva Tautai o le Gataifale. Ua le muta ai le faafetai ia te outou o sui o le Manu’atele ae ua matauina foi le to’atele o sui a fa’atonu mai le Malo o Amerika Samoa ma aumalaga uma ua masii mai mo le fa’amoemoe e sapaia uma tapenaga o lo’o fuafua e fa’amanatuina ai le Sisigafu’a a le Manuatele 2021.”

 

“Fa’afetai lo tatou loto fa’atasi ina ia sao ma uli mea uma ua tapena mo le Manu’atele. O le agaga atoa fo’i lea o tatou ta’ita’i, o e fa’auluulu i ai le tatou faigamalo, ina ia tatou fefa’asoa’i i manuia ua tatou maua, ia soifua tapena ma sogasoga ma le fiafia o tatou uso uma i le Manu’atele. Ia aluga tutusa uma i tatou i manuia ua tatou maua mai le Malo tele.”

 

Na fa’amuamua i mea uma le tima’iga, ina ia matau muamua le saogalemu o e uma e fagogota e afua mai le Kapeteni se’ia aofia uma ai auva’a o Sa Fagota uma. Ia usita’ia le tele o tulafono tamau o le saogalemu i luga o vaa fagota i le gataifale ua fa’amalosia e le DMWR ae maise le USCoast Guard. Ia atoatoa fo’i a latou mea faigaluega ina ia mautinoa e le pagatia faiva a’o i ai i le vasa mo le lua aso ua fa’atulaga mo le tauvaga fagota lenei.

 

“Manatua le tatou saoglemu, aua e poto lava le tautai ae le sao uma i’a i le liu o lona va’a,” O se toe fautua tima’i lea a Taotasi i le vasega o aufaifaiva.

 

O le totogi o le auai o se Va’a Fagota ma le Auva’a tauva mo lenei Fagotaga e $100 mo le lesitala. O va’a ua lesitala e ao ina muai faia le asiasiga uma i le itula e 3:30 i le vaveao o le aso Lulu, mo le tulaga o mea faigaluega ma le saogalemu uma o le au fagogota.

 

E i ai le pepa fa’atumu e Kapeteni ma Auva’a uma o e fagogota, e lisia fa’apitoa ai igoa o le Kapeteni, auva’a uma o i luga o le lou vaa fagota, ma telefoni o le a outou avea ina ia maua ai se fesootaiga ma  e pele ia te oe, i latou e sili ona ootia pe afai o le a pagatia le fagotaga i le tai.

 

O le kopi o lea pepa fa’atumu, o le a tuua lea i lou aiga ma le Ofisa o lo’o fa’atautaia le tauvaga fagotaga 2021 mo le Sisigafua a le Manu’atele. 

 

Pe a uma ona faia asiasiga o mea uma e tatau ona i luga o le va’a mo le saogalemu o tagata uma, ona fa’atulaga loa lea o le amataga o le tauvaga faigafaiva i le itula e 6:00 i le taeao lava, e fa’ato’a toe fa’amauina le itula e taliu mai ai, o le 4:00 i le afiafi, e le silia lava ma lea itula.

 

Peitai o le aso lona lua o le a amata fo’i i le tapenaga lava e tasi, ae toe taliu mai i le itula e 11:00 i le taeao ona e tatau ona lava tapena tagata uma mo le sauniga lotu e tatala ai le sisigafua a le Manu’atele 2021 i le afiafi lava lea o le aso Tofi, pe a mae’a foi tufatufaga o fa’ailoga.

 

O nisi o fa’ailoga ua fa’atulaga ua lisia mai ai ituaiga i’a e sailia mai i le fagotaga lenei, e tolu lava fa’ailoga, i’a sili ona mamafa, tulaga lua le mamafa ma le tulaga tolu le mamafa. O i’a ia ua lisia mai o le Maligi, Asiasi, palu malau, wahoo, asoama ma isi. O le fa’ailoga fa’atulaga o le i’a e sili ona mamafa e $500, tulaga lua e $200 ma le tulaga tolu e $100 ae le mafai ona ave uma e vaa fagota faailoga, pe afai e tulaga muamua sana ia, tulaga lua le mamafa o isi o ana i’a.

 

O auvili ua fa’ataga o Auvili Samoa ma auvili masani ae le faatagaina auvili e fa’aaoga ai le ma’a e fa’aola ai.

 

O le isi fa’ailoga fa’apitoa o le I’a sili ona lapo’a ma mamafa i le tauvaga atoa, e $1000 ona fa’ailoga. Mo faiva e maua ai i’a lea e fia tausasami uma ai le mamalu o le atunuu, e gata i le 15 pauna le mamafa o le ia e faataga ona fa’aofi mai i lenei tauvaga.

 

O le isi fa’ailoga ua tapena mai o le Va’a Fagota e matua sili ona tele pauna o i’a ua maua i le latou faiva atoa ma o le a tuufa’atasia ai aso e lua o le tauvaga.

 

Nai fautuaga lava sa fa’aoo atu i le vasega o au faifaiva, ina ia fafagaina maa o telefoni, ia lava le sapalai o maa o moliuila, ma ia i ai fagu tinei afi lea e tolu ituaiga mu e mafai ona fa’ape ai i luga o lou va’a. Ia matauina mea uma e tatau ona i ai i lou va’a, ia usita’ia i taimi uma, ae maise o fa’ailo.

 

O le aofai o fa’ailoga ua tapena mai e le matagaluega o le Puipuiga o le Gataifale ma le Vaomatua, ua fa’ailoa mai e silia lea ma le $10,000.

 

Mai le aufaifaiva, ua aofia ai ma le va’a e tasi mai Aunuu ma Tutuila, le va’a o le susuga Christopher Banse.

 

Ole sei sa faia mulimuli e fa’afiafia atili ai le aufaifaiva ma i latou uma sa auai, ma fa’aalu ai le 10 fa’ailoga o pepa e talafua ai oloa mai pisinisi i Tutuila, ma sa iloga fo’i ona fa’amanuiaina ai le to’asefulu o sui sa auai, o se mea na fa’afiafiaina ai le to’atele na auai i le ulua’i fonotaga mo le faigafaiva fa’atauva o le sisigafu’a a le Manuatele 2021.

 

Na tufatufaina le kesi ma le ‘aisa mo le au faifaiva ina ia vave atili ai tapenaga mo le taeao e amatalia ai le fa’amoemoe.

 

Ia manuia faiva uma o le au faifaiva i lenei tauvaga ma ia lala pea le liu o lou va’a.

 

MAEA TAPENA LE NOFOAGA & SOOTAGA MO LE SISIGAFU’A MANU’ATELE

 

O le fa’amoemoe o le Malo ina ia sisi a’e le Tagavai a le Manu’atele ae ua mae’a lelei ona tapena, fa’amama ma ua matagofie le malae mo le fa’amoemoe o lo ua toe o se aga ona fa’ataunuuina lea.

 

O le galuega lea ua mae’a faia e le vasega o leoleo ma le aufaigaluega a le Malo ua atoa le vaiaso talu ona malaga mai i Ta’u e tapena mea uma. Ua oo fo’i i sootaga tau le Initeneti ma telefoni feavea’i a le ASTCA, ua mae’a fa’alelelei i le Faleta’u.

 

Talu ona to’ai taunuu mai i le taeao o le aso Lua ua fa’aleleia mea uma tau fesoota’iga a le ASTCA, ua mafai ona faafesoota’i atu i tautua eseese ua mana’omia mo ala o fa’asalalauga faalauaitele. 

 

O le aso ananafi fo’i sa amatalia ai le Fa’aaliga tele o fua o faaeleeleaga a le Manu’atele. O lo’o aofia fa’atasi mai i ai ma le faleluasaga ia Ofu ma Olosega i lea lava fa’aaliga tele o lo’o fa’atautaia i le Faleta’alo o le Aoga Maualuga a le Manu’atele, le Laumua o le Segaula.

 

O matagaluega eseese o le Malo ua saunia fo’i a latou laulau o fa’aaliga o latou tautua eseese, ma o le isi lea mafuaga tele na ala ai ona ta’ito’a fitu agai i le 10 sui e malaga mai matagaluega ta’itasi o le tatou Malo, aua lo latou sao lelei lenei mo le Manu’atele.

 

O le vaega a le tatou Kolisi Tuufa’atasi na amata mai lava le latou fa’aaliga i le taeao o le aso Lua lea sa fa’atasi atu ai le fanauiti i le Manu’atele nei, ina ia latou fa’aaogaina lelei a’oa’oga ua ofoina mai mo i latou e ala i le 4H, o aoaoga masani ona fa’atautaia e i latou i vaitau nei o tuuaga umi o a’oga i le tatou motu i Tutuila.

 

I le fa’aaliga tele o Fua o Fa’aeleeleaga, o le a soo tauau atu i ai ma lea fa’aaliga a matagaluega ta’itasi i a latou polokalama e aoga mo le Manu’atele. O lo ua i ai nei le tapenaga a le Faletupe o Atina’e, i le tamaitai fa’atonu Ruth Matagi Fa’atili ma le aufaigaluega mamalu.

 

Ua fa’apea fo’i ona vave usu le fanauiti i le latou pasi a’oga a le DOE ina ia molita’i i latou mo le latou i e nofoaga mo le latou malu taeao i le 7:30 ma fa’asolo atu ai i le maimoaga i le Fa’aaliga o Fua o Faaeleeleaga a le Manu’atele.