Ads by Google Ads by Google

TALA I VAIFANUA


[ata: foa'i]

Pago Pago, AMERIKA SAMOA

 

MUAMUA FA’ATAUNUU FONOTAGA KOMITI LAITI ONA FAIA LEA O LE FONOTELE EFKAS

 

Ua muamua lava ona faataunuu fonotaga a Komiti Fa’afoe ta’itasi a le EFKAS ona fa’ato’a usuia ai lea o le latou fonotele, ae ua fa’afeso’ota’i uma nei fonotaga ma sui usufono mai o isi malo eseese o lo’o avea ma totino poo lala o le EFKAS i Niu Sila, Amerika ma Hawaii e ala i sootaga o tafa’ilagi.

 

O le fonotele o lo’o ua amatalia i le aso Sa na te’a nei. O fonotaga nei a Komiti laiti ta’itasi e mafai ona faia ai fa’aiuga ma saunia ripoti faapitoa e tatau ona fa’ailoa i le fonotele o sui tofia uma lava o lo’o aofia fa’atasi mai iinei ma sui o lo’o feso’ota’i i upega tafa’ilagi o le “Zoom”.

 

O Komiti ia e aofia ai le Komiti a le Au Toeaiina, Komiti a le Mafutaga Tina, Komiti o Feau Eseese, Komiti o A’oga ma le Autalavou. O le fonotele lea ua fa’atasia uma mai sui mai fafo i ona taimi fa’atulaga e ala i le Zoom.

 

I le aso Toona’i na te’a, sa fa’atautaia ai folasaga fa’apitoa a le mafutaga a Tina, o nisi o galuega fa’atino a le vasega o tina lava latou o le Ekalesia.

 

O le aso Sa fa’atautaia ai le sauniga lotu faapitoa, ma sa filfilia lava i latou e ta’ita’ia lea sauniga mamalu, le ta’ita’i o le sauniga i le taeao o le Toeaina Hollister ma soso ai ma le ta’ita’iga a Rev. Faigata Manase.

 

O le isi sauniga fa’apitoa o le a amatalia i le itula e 9:00 i le taeao o le aso Sa o le a ta’ita’ia lea e le Toaina Tautalatasi Fanolua

 

Ae o le sauniga e tatala aloaia ai fonotaga o o le a ta’ita’ia lea e le failautusi aoao a le EFKAS le susuga Nafatali  Falealii. O le a talanoaina ai le tupe fa’asoa o lenei tausaga fa’aletupe e amata ia Oketopa .  O le a talanoaina ai tulaga o le fonotele i lea tausaga fou.

 

EMEPASA O AMERIKA MO SAMOA MA NIU SILA

 

O le sui ua tofia nei e Peresetene Joe Biden e avea ma Emepasa o Amerika i Samoa ma Niu Sila o se tasi sa mua’i avea ma Senatoa mai New Mexico, Tom Udall, o se tasi o le vaega Fa’aupufai a le fa’a-Temokalasi i le Konekeresi.

 

Ua faailoa mai na litaea lenei ali’i senatoa i le tausaga e 2021mai lana tautua mo le lautele o lona setete, ina ua mae’a ana nofoa’iga e lua i le Senate a le Malo tele, peita’i sa mua’i avea o ia ma Loia Sili o lona setete i tausaga e tele o lana tautua i New Mexico.

 

O Tom Udall e tupuga mai o ia i se aiga e to’atele ua avea ma sui tofia mo tofiga faigaupufai o malo. O lona tama o Stewart Udall sa avea ma Failautusi o le Initeria, o le uso o lona Tama o Mo Udall sa avea ma Faipule i le Konekeresi mai le setete o Colorado, ma lona tausoga o Mark Udall, sa avea ma Senatoa mai le setete fo’i o Colorado.

 

O sana tala mai e tusa o lona tofiga fou, ua ia fa’ailoa mai ai, “Ou te fiafia tele ina ua fa’ailoa mai lenei tofiga fou a Peresetene Joe Piden, ou te alu ou te tautua mai Niu Sila ma Samoa o le vasa pasefika. O se vala’auga ou te iloa ua i ai fo’i se malamalamaga taua aua sa avea a’u ma sui totino o le Komiti ma le Va i Fafo a le Senate i nofoa’iga e lua i le Senate a le Malo tele.”

 

Ua to’atolu ai nei ali’i senatoa ua mae’a latou tautua i le Senate a le Malo tele ua tofia  Peresetene Biden e tautua mai i avanoa fa’a-Emepasa o Amerika mai malo eseese o le lalolagi ina ia lelei so’otaga ma na malo.

 

Ua mae’a ona tofia Ken Salazar, o se sui temokalasi sa tautua i Colorado ma sa avea ma failautusi o le Initeria i le vaitau o le nofoaiga a Peresetene Obama, lea ua avea nei ma Emepasa o Amerika i Mexico. O le Jeff. Flake o se sui sa repapilikana ae ua suia mai i le Temokalasi ina ua ia sapaia Biden i le palota o le 2020, ua avea nei ma Emepasa o Take.

 

FA’AAOGA E SAMOA OFO LEOLEO AUSETALIA I SUESUEGA TA’AVALE ESIKEGI

 

I se lipoti mai Apia, ua fa’ailoa ai ua talosagaina nei e le Matagaluega o Leoleo a Samoa le fesoasoani sa ofo muamua mai a le Matagaluega o Leoleo a Ausetalia, ina ia latou suesueina le fa’alavelave tau ta’avaleafi lea na maliu ai se tasi ae sola ese le taavale sa so’aina lea ta’avale. O se tasi o alo e aoga i le Iunivesite sa lavea ma maliu ai i lea lava fa’alavelave tau ta’avaleafi ia Aperila o le tausaga nei lava.

 

E tusa ai ma se lipoti mai le Sui Komesina o Leoleo Papali’i Mosalisa Tia’i-Keti, sa ia fa’ailoa maia, ua mae’a fa’amauina ata mai se atafa’asolo o mea pu’eata nana a Leoleo, ma e ui ina sa mua’i nenefu lea ata, ae o lea ua mae’a fa’aleleia mai i fafo ma ua iloa patino ai nisi o mea sa fia mautinoa e tusa ai ma fa’amaumauga a le leoleo suesue o le matagaluega o Leoleo a Samoa.

 

“O le taimi nei ua matou fa’atagisia fo’i le fesoasoani mai a matou pa’aga, le Matagaluega o Leoleo a Ausetalia, ina ia fa’amanino atili lava le ata o le ta’avale lea sa sola ese mai le nofoaga o le fa’alavelave ma iloa atu ai le aveta’avale. Ona e le o mautu mai uma nei ituaiga mea faigaluega e moomia e leoleo suesue mo fa’amaumauga tonu o mea nei, o le isi lea vaega e moomia ai lava ona galulue ma pa’aga nei mai Ausetalia i le taimi nei.”

 

“I le taimi nei ua matauina e matou e tolu ituaiga veni nei e mafai ona fa’amautu ai matou suesuega. O le ituaiga lea ua matauina i le ata fa’asolo o le mea na tupu.Ua fa’aaogaina fo’i e i latou a latou faila o fa’amaumauga o le lesitalaina o ta’avale nei ina ia vave ona maua. O le aofaiga o ta’avale nei e 300 ua fa’amauina i faila o lesitala o ta’avale, o lona uiga e matua tele le galuega e ao ina faia, e tatau ona suesueina atoa lava nei ta’avale uma e 300, ia mautinoa lava e le o se tasi o nei taavale, lea sa a’afia i le fa’alavelave. Ona o le tele o lea suesuega, e fa’apea ai ona matua mana’omia lava le fesoasoani mai a pa’aga nei mai Ausetalia,” o se tala lea a Papali’i.

 

O lo ua mautu mai le ituaiga ta’avale e ao ina sailia o le Van ituaiga o le Nissan Elgran, poo le Nissan Delica poo le Van Toyota Toyoace. I le taimi nei, o lo’o fa’amoemoe lava matua o Tuuau Maletino o le a mafai ona maua ane e le vasega o leoleo suesue  ni fa’amaumauga mautu e iloa patino ai lava le sui ua mafua ai ona maliu fa’afuase’i le la’ua afafine lona fa o le fanau.

 

Ua fa’ailoa mai e i la’ua, “Ma te le taumafai e taui ma sui, o a le Atua lea, ae mate taumafai e fia maua lava le filemu e ma’ua loto ina ua mautinoa poo lea na mafua ai ona maliu o ia i lea taeao o le aso Lulu o Aperila.

 

Ua talosaga mai le vasega o leoleo suesue i le mamalu lautele, ina ia alofagia, aua nei toe fela’ua’ia tala fatu ma tala sese e fa’ateteleina ai le ootia o nai matua ma aiga.

 

“Mai lenei taimi, o fa’amaumauga uma lava tau lea fa’alavelave ua mafai ona faato’ai sa’o lava i le vasega o leoleo suesue a le Matagaluega o Leoleo. O i latou na e mafai ona aumaia sa’o ai lava faamatalaga tau lea fa’alavelave tau ta’avale.”