Pago Pago, AMERIKA SAMOA

MANUMALO LE MUMBO I LE TAUVAGA FAGOTA SISIGAFU’A 2021 I LE MANU’ATELE 

O le aso 15 o Iulai na fa’amae’a ai le tauvaga fagota sa faia e fa’amanatuina ai le atoaga o le 117 tausaga o sisi a’e pea le tagavai a Amerika i eleele o le Manu’atele. 

O le fa’agatama lea i le tai, o se toe fa’amanatu fo’i i le Manu’atele ma e uma na auai, o le soifuaga sa soifua a’e ai o tatou tua’a, sa gasolo i le tai mo sosia uma o i ai, ma le vaomatua e fa’ato’a mo fa’aeleeleaga, aua le fofoga taumafa.

Ua iloga nei, e leai o lo’o lava le tamaoaiga i le tai o le Manu’atele, aua e to’a 10 va’a sa lesitalaina ina ua fa’ato’a fa’ato’ai atu Sa uma o Tautai Fagota mo le fa’amoemoe ia Iulai 14, 2021 i le taeao po lava.

O sa sai ai e 7 sa mai Ta’u Falesao ma Fitiuta, ae lua sa mai Ofu ma Olosega ma le Sa e tasi mai Tutuila o le Double Trouble a le susuga Tautai fou o Chris Banse.

O i latou nei sa lesitalaina mo le fa’amoemoe mo aso e lua, Iulai 14, & Iulai 15, ae faamuta i le itula e 11:00 i le aso Tofi na te’a. Na fuaina uma lava faiva o nei sui uma, ma ua fa’amauina ai o le MUMBO ua mauaina le fa’ailoga o Pauna ua sili ona tele mai fagotaga i aso e lua. O le matagaluega o le Puipuiga o le Vaomatua ma le Gataifale sa latou fa’atautaiga lea tauvaga fagota, ma sa auai atu fo’i le latou fa’atonu TaotasioAtua Archie Soliai aua le fa’atautaiga ia tonu ma sa’o o le tauvaga.

O le ulua’i tauvaga lenei ua fa’atautaia atu e le matagaluega lenei talu mai ona tula’i le faigamalo fou e fa’aauau le faigamalo fa’ateritori o Amerika Samoa. Ua matauina fo’i le sapaia lelei e le vasega o tautai fagota o le Manu’atele o le fa’amoemoe o lenei tausaga.

O le aso Lua sa usuia ai le ulua’i fonotaga a le vasega o Tautai ma le Matagaluega o le Puipuiga o le Gataifale ma le Vaomatua, ma fa’alauiloa uma ai le faatautaiga o le tauvaga, i ona tulafono tamau ma e ao ina usita’ia i aso e lua. O le mea taua e ao lava ina fa’amuamua o le saogalemu lea o le kapeteni ma le ‘auva’a ae maise fo’i o le Sa fagota.

“E muamua lava ona fa’amamafa atu ia te outou Tautai fagota, ia muamua atoatoa uma mea ua fa’atulaga ma pasia mai e le USCoast Guard mo so’o se taimi e tapena ai sau malaga poo sau faiva e fa’aaoga ai lou Va’a. Ia tausisia na mea uma ia i ai i totonu o lou Sa pe a oo ina e sau o le a e auai i lenei tauvaga Fagota. O le lisi ua mae’a saunia fo’i ma taua’aoina atu fa’atasi ma le pepa lesitala lea ua mae’a tapena e te sainia. O le ola o oe ma lou auva’a i luga o lou Sa, e fa’amoemoe ia te oe, le tautai folau ma fagota,” o le tautalaga matagofie lena a le susuga Soliai na fa’aleo i lea fonotaga.

O le aso Lulu lava e tasi na faatautaia ai loa le Fa’aaliga o Fua o Fa’aeleeleaga ae na fa’atautaia lea e le Matagaluega o Fa’ato’aga lena sao e faamau fa’ailoga ai le Fu’a a le Manu’atele 2021. O le aso lava lea e tasi ua fagotaina ai le tai o le  Manu’atele e le 10 va’a mo le tauvaga fagota.

O le itula e 4:00 i le afiafi na fa’atulaga e toe taliu ane ai, ma amata loa ona fuaina i’a o le ‘ai o faiva o va’a uma nei e 10. Matauina le lelei o faiva o tautai uma, e leai se tasi na asa le faiva. E toatasi lava o i latou, le va’a e tasi mai Faleasao, Keith Ah Soon, sa taliu mai lona faiva ua na’o i’a lava o le loloto, tama lelei i le tausami lona faiva atoa. Na fuaina lona faiva ma toe ave uma lava e fa’aaoga e le matagaluega i a latou suesuega.

O fa’ailoga sa tufatufaina e le Tausala Lalelei o Amerika Samoa, Epifania Petelo.

TALIA AIAIGA SIITAGA TOTOGI FAIAOGA E LE POLOKALAMA A LE FETERALE -ESF II:

Sa i ai fa’afesili e tusa o le fa’atupega e  fa’aauau ai le totogi ua siitia nei o faiaoga ua amatalia nei. Ua amata ona talanoaina e nisi, o tupe a le Covid-19 lea ua manatu le malo e fa’aauau ai siitaga o totogi o faiaoga lea ua mae’a amatalia.

I se pepa o fa’amatalaga mai le Ofisa o le Kovana, o lo’o fa’ailoa ai e l fa’atonu o a’oga, Talauega Samasoni Asaeli, “E tusa ma aiaiga ua fa’atulaga mai e se tasi o polokalama fa’apitoa ua agava’a ai le Matagaluega o A’oga mai le Feterale, ua fa’atagaina mai ai ona fa’ataunuu ai siitaga o totogi o faia’oga e pei ona fa’atautaia ai nei. O lea vaega o le fa’atupega ua toina mai ESF-SEA, Education Stabilization Fund-State Education Agency.”

“Ua mae’a ona talosagaaina e le tatou nei matagaluega ASDOE lea vaega e toina mai ai le tupe lea, ina ia mafai ona siitia ai totogi o faia’oga ua leva ona tatau iona faia e le matagaluega e tusa o aiaiga fa’aletulafono o latou tusi pasi maualuluga ua umia. O lea ua talileleia mai lea talosaga ona o lo ua tatou o soifua nei i taimi uiga o le soifuaga i le tele o luitau e feagai ma le Iunaite Setete atoa lava ona fa’ama’I pipisi ma le mata’utia lea e I ai le Covid-19.”

“Ua talosagaina faia’oga ina ia latou fa’atinoa nisi tiute e le’i masani ona faia e i latou,, le e aofia ai le faia o aoga i luga o feso’otaiga fa’avetuale, lea sa toe fa’atulaga ai nisi aoaoga fa’apitoa fo’I o faia’oga lava ia ina ia mafai ona latou fa’ataunuuina lesona mo le fanau. Ua fa’avave lava ona sofa’i mai isi galuega fou nei ma ua ao atu ai ma le fa’aaogaina o le metotia tau zoom e fa’aaoga mo nei ituaiga o aoaoga i le tausaga a’oga ua tuana’i.”

Ua fa’ailoa mai e le ali’i fa’atonu o A’oga, “O le toe siitaga o le totogi o faia’oga o se tasi lea o mea ua taumafai i ai le malo ia avea ma mea e fa’afiafiaina ai faia’oga e tumau i lea tautua aoga tele mo le lumana’i o le Malo o Amerika Samoa ma ona tagata, ina ia aoaoina lelei fanau, ma ia lava le numera o faia’oga i potu aoga, toe lava lo latou aoaoina lelei, ia gafatia e i latou ona fa’atino faiva ma le mautinoa ua mae’a ausia e i latou tusi pasi o tomai mo’omia mo faia’oga.”

Fa’ailoa e le Ofisa o le Kovana, ua mae’a fa’ataotolia se fuafuaga lelei ina ia mafai ona fa’aauau pea lenei si’itaga pe a mae’a le 3 tausaga lea ua mafai ona fa’atupe nei e le fa’atupega lea ua amata fa’aaogaina nei. 

Ua mae’a fo’i ona va’ai toto’a i ai Kovana Lemanu P Mauga i lea fuafuaga fa’ataoto ma ua fa’ailoa ua tuuina i le Compliance Review Committee latou se iloiloina. Fa’ailoa le agaga fiafia tele o ta’ita’i o lenei faigamalo ona o le sogasoga o le ali’i fa’atonu o A’oga, i lana fuafuaga fa’ataoto ua fa’auia atu mo le la’ua iloiloga toto’a i ai. 

“O se mea lelei ua folasia nei, e i ai nai suiga ua mae’a iloiloina ma ua fa’aofi i ai, ina ia mautinoa e mafai ona tino mai lea fuafuaga fa’ataoto i lona taimi tonu e mana’omia ai ona fa’aauau ai le si’itaga o totogi o faia’oga, pe a mae’a le 3 tausaga ua fa’amauina. Soo se fuafuaga fa’aoto fa’apea, e ao ina mataituina ia leai se sasi o lona fa’aatautaiga e afua atu i le taimi nei, se’ia oo ina tino mai ma fa’aaoga loa i lona taimi tonu e tatau ai.”

MANA’OMIA ONA I AI TUSITUPE  - LATOU FIA TALA SIAKI ILE TBAS

A’o fa’aauau pea ona toatele i latou e fa’aaogaina tautua a le tatou faletupe o le Territorial Bank of American Samoa i Utulei ma Tafuna, ua fa’ailoa mai nei e afua Iulai 01, 2021, sa tatau ai ona fa’amalosia lou susu atu e tatala sau teugatupe i le faletupe o le TBAS ona fa’ato’a mafai lea ona talaina so’o sau siaki lava i lea faletupe.

O le mafuaga lea o le a le mafai ai ona toe talaina nisi siaki o penefiti o lo ua maua nei a le to’atele, se’iloga ua mae’a tatalaina sau teugatupe.

Talu mai i le taimi na amata maua ai nei stimulus ua mavae atu, sa pau lava le mea sa faia e le TBAS o le tala o siaki eseese sa gasolo atu ma le mamalu o le atunuu.E oo lava i sui sa leai ni teugatupe i le faletupe lea, sa mafai lava ona tala latou siaki, ae ia i ai lava fa’amaoniga o latou nei e ona nei siaki ua o atu ma latou e tala. Lea la ua suia nei i le aso muamua o Iulai 2021 lea faiga sa sau a’i.

Ua fa’ailoa e le susuga le Peresetene o le Faletupe David Buehler, ua fai si leva o fa’asalalauina a matou fa’asalalauga e fa’atatau i lea suiga. O luga o le itulau a le faletupe TBAS i le facebook fo’i ua fa’alauiloa atu ai lea suiga o le tautua. Ua fa’apena fo’i ona faia lea fa’asalalauga i a latou so’otaga tafa’ilagi lea o lo’o avea ma sootaga o le TBAS ma le Malo ma ona tagata lautele i le latou uepesite.

O lo ua mana’omia la sau tusitupe pe afai o le a e toe aga’i atu e fia tala sau siaki. O le to’atele ua na’o na tala o le siaki stimulus mai le amataga ae le faia se teugatupe, o lona uiga ua avatu uma lava i tua le siaki atoa. O le faitalia lea a le sui, ae ua fa’amalosia mai lea suiga o le tautua a le faletupe, ina ia fa’aaoga tatau fo’i lau seleni, teu sina vaega ae fa’aaoga auauai ai. O le aiaiga lea e mafai ai ona mafai ona toe tala so’o se siaki i le TBAS.

I le matau atu i le laina umi o lo ua fa’agasolo nei, ua aofia ai ma le laina umi fo’i o e fia faia teugatupe fou. Ua sili ona to’atele lea laina nai lo le mea sa masani ai i le vaega sa maua siaki stimulus ua te’a.

“O le faiga lea, ua fa’amalosia atili ai tulafono tau faletupe, e fa’aititia ai le avanoa e mafai ai ona alu atu se tasi tala le siaki e le o sana siaki. O lo ua matauina e i ai nisi sa mafai ona talaina siaki sese ma ua ave seseina ai tupe a nisi i le vaitaimi ua te’a. O le suiga lenei, ua atili faigata ai ona toe faia lea ituaiga solitulafono e se tasi,” o se toe fa’amatalaga lea a Buehler.

Ua mafai ona pule lava le sui, i le ituaiga teugatupe e faia mo ia, poo se teugatupe Tusi Siaki poo se teugatupe Savings. Poo le a lava fo’i le teugatupe e te faia, e mafai lava ona talosagaina ai sau Pepa Tala Tupe mo masini Tala Tupe ina ia le toe to’atele ai nisi e gasolo mai i laina talatupe i aso ta’itasi.