Pago Pago, AMERIKA SAMOA

TOE ASO O LE FONOTELE EFKAS – PASIA AI LIPOTI TUPE & KOMITI AU TOEAINA:

O toe taualumaga lava o le fonotele EFKAS lea sa usuia fa’atasi ma sui usufono mai fafo e ala i upega tafailagi i le sootaga (Zoom), na fa’afofogaina ai le Lipoti o le Tupe a le Ekalesia Aoao ma pasia lelei ai, ma fa’apea fo’i le Lipoti mai le Komiti a le Au Toeaina, le vaega faufautua o  le fonotele i soo se mataupu ogaoga lava e soalaupule e le Laulauatofi e soloa’i mai.

Mai le Lipoti o le Tupe sa tula’i ai le Paepae Iosefa Faiai e tolaulauina le latou lipoti ua mae’a saunia lelei e le susuga le ta’ita’i komiti tupe Sili Sataua ma le sui Taitai Rev. Lalomauga Pa’au. 

O le mataupu sa fa’aalia ai manatu ma mana’oga o le Komiti o Tupe pe fa’aauau pea ona totogia ia mae’a le vaega o totoe o le nogatupe tele mai le UCC a le EFKAS, sa tofu fa’aalia ai taofi ma faia le palota, ua fa’amautu ai, e fa’aauau ona fa’amae’a ona totogi le nogatupe i le tausaga lenei.

O le isi vaega sa faailoa mai i le mamalu o le au usufono le aotelega o le sailiga tupe na maua mai i le Matagaluega lea sa fa’atino i le afiafi o le aso Tofi Iulai 22, 2021 i le latou faleta’alo tele o le Toeafuamaitaeao.

O le aotelega sa mua’i fa’alauiloa i le faitauga le tumau na fa’ailoa mai ai le $162,372.00 peita’i o le toe faitauga ua fa’ailoa mai nei ma ua fa’amauina, o le aofaiga’iga atoa o le tinoitupe mai pulega ta’itasi i Amerika Samoa lava, e $157,849.00.

Mai pulega ta’itasi ua mafai ona fa’ailoa mai:Laulauafono ma le latou siva - $14,300; Mafutaga Tina $10,500.00; Mafutaga Manu’a $21,300.00; Matagaluega Sisifo $41,665.00; Matagaluega Tutotonu $37.065.00; Matagaluega Sasa’e $33,000.00; Siva o le Kaleve $19.00 lea ua tuufa’atasia ai le aotelega e $157,849.00.

Na fesiligia fo’i le meaalofa na fofogaina mai le afioga le Peresetene o le Senate Tuaolo E. Fruean lea e le’i fa’amalamalamaina mai i lea lipoti.

Mai le lipoti tupe maua a le Ekalesia na taua’aoina e le Komiti Tupe ua fa’amauina ai Tupe maua mai le tausaga fa’aletupe 2019: mai ia Iuni 2018 ia Me 31, 2019 e $303,315.00. Mai le tausaga fa’aletupe 2020 mai ia Iuni1, 2019 ia Me 31, 2020 ua fa’amauina ai tupe maua e $459,047.00. Mai le tausaga fa’aletupe 2021 mai ia Iuni 01, 2020 se’ia oo ia Me 31, 2021 ua $947,248.00. Tuufa’atasia tupe maua uma mai nei tausaga e tolu ua maua ai le $1,709,610.00.

Pe afai e tuufa’atasia ma le saofaiga mai le Mautaga a Tiakono a le Ekalesia Aoao lea e $150,000.00 fa’apea ma le saofaiga a le Au Toeaina, Faife’au ma Tiakono Toeaiina e $130,000.00 ua maua ai le aotelega o le tinoitupe atoa faapaketi o le tolu tausaga e $1,989.610.00.

I le taimi nei ua tula’i mai le paleni o le nogatupe mai le UCC e $1,940,404.00 fa’atasi ai ma le meaalofa ma faatulaga mo Rev. Elekosi e $10,000.00 ua maua ai le aotelega e $1,950,404.00 o le tupe fa’aalu. O lona uiga o le aotelega o le tupe ua totoe mai a le Ekalesia pe a to’esea mai le aotelega o tupe maua, ua fa’amauina nei e $39,206.00. O le lipoti lea o le tupe na sainia uma lona fa’amaoniga e le ta’ita’I Komiti Tupe Sili Sataua, lona sui ta’ita’i Rev. Pa’au Mauga ma le failautusi o le Komiti Tupe Paepae Iosefa Faiai.

I nisi o mataupu sa fa’ailoa ane i nai toe itula o le fonotaga sa fa’ailoa mai ai o lo ua mana’omia se faia’oga Musika mo Kanana Fou Elementary ma afai o lo’o i ai se tasi o lo’o maua’a lona tomai i lea fo’i taleni, e mafai ona talosaga atu i le Ofisa autu o a’oga a Kanana Fou, ma e mana’omia lava ona silafia e le tagata musika o le a talosaga mai ona faitau nota ma aoao ai le fanau i nota, ma ia iloa fo’i ona ta nota i le piano ma le okeni.

I le Tala o Galuega a le Au Toeaina sa taua’aoina, sa tula’i ai le afioga Senatoa Togiola Tulafono ma fa’atu le lafo ina ia pasia, a’o taumafai le latou failautusi e tolaulauina maeaea mai a latou mataupu ua mae’a pasia. I le lipoti ua taua’aoina, ua fa’atulaga mai ai galuega ua mae’a pasia lelei a le Komiti Toeaina ma mea uma e pasia mai e lea Komiti ua fa’apea fo’i ona pasia e fa’ataunuuina.

 E LE MALAGA SA’O MAI PASESE MAI HAWAII – NOFOVA’AVA’AIA I HAWAII 5 ASO:

Pe afai o le a fa’aauau nei faigamalaga a le Kamupani Va’alele a le Hawaiian Air ma femalaga’i i le va ma le tatou Malaeva’alele i Tafuna. O le a i ai fo’i gaoioiga taua e tatau ona fa’ataunuu e le sui o lo’o fia ulufale mai i Amerika Samoa. I le 10 o aso a’o loma lou fia fo’i mai i Amerika Samoa, e tatau ai ona e lesitala mai i le upega tafailagi ua fa’aigoaina o le Talofa Pass lea o le a fa’alauiloa ma tapena a le Komiti Fa’afoe o le Covid-19 a le Malo o Amerika Samoa.

E lima aso ua fa’atulaga e nofo va’ava’aia ai i Honolulu fa’ato’a mafai ai ona malaga mai i Amerika Samoa pe afai ae pasia uma ana suega o le Covid-19 ua fa’atulaga ma le va’aiga toto’a o lea sui pe o atagia mai ai auga o le Covid-19.

O fa’amaumauga ma gaoioiga uma e tatau ona fa’atino e so’o se tasi e fia auai o se tasi o le pasese a le Va’alele Hawaiian Air mo Amerika Samoa, o le a fa’amauina uma lea i le Talofa Pass, lea ua tapena mo i latou, e ao ina mulimulita’ia uma e i latou e fia ulufale mai i le teritori.

Mai le aso Faraile ua te’a nei, e le’I mafai ona fa’alauiloa aloaia mai le Talofa Pass, ae ua fa’ailoa mai e le’o toe mamao ona mafai lea ona maimoaina ma fa’aaoga e le atunuu fegasoloa’i lea tautua.

Fa’ailoa e Dr Aifili Tufa, “O le a mafai ona feso’ota’i ai le mamalu fegasoloa’i o le atunuu ma latou fa’aaogaina e tapena ai latou faigamalaga toe taliu mai ma aga’I atu fo’i i fafo aua o lea ua tatala le fa’asa o femalaga’iga.”

Ua ia faailoa mai fo’i,”Pau lava le mea ua fa’atulaga mo le nofo va’ava’aia i Honolulu o le faia lea o suega Covid-19, afai e maua ane lava e le o maua le sui i le Covid-19, ona kilia loa lea o lou malaga mai i Amerika Samoa.

AMATA FAIA FA’ATALANOAGA O AVANOA FAIGALUEGA A LE STAR KIST I SAMOA:

E aofia i le pasese a le va’alele tumu na malaga i Samoa, o le to’atolu o tagata faigaluega sinia a le Kamupani I’a ua malaga atu ina ia fa’atalanoa avanoa faigaluega i Apia mo le latou Kamupani I’a.

Ua silia nei ma le lua vaiaso talu ona fa’atautaia galuega a le Kamupani I’a Star Kist i le sifi lava e tasi, ma ua mae’a fa’atagaina fo’i e le Kovana o Amerika Samoa ona latou fa’afaigaluegaina mai nisi e to’a 200 mai Samoa e fa’aatoa ai le latou aufaigaluega o moomia, e toe fa’aatoa ai le aofaiga o latou aufaigaluega ina ia fa’agasolo lelei ai aotelega o latou oloa o apa I’a e fia fa’atau atu i maketi i fafo.

I le taimi nei, e le o aofai le aotelega lea e 200 tagata e fa’atumu ai avanoa faigaluega a le Star Kist Samoa i le aofai o tagata faataga ona ulufale mai i Amerika Samoa ma fa’atalosaga latou pepa nonofo ai i le teritori.

Peitai o le fa’ataga i latou e nonofo mau ma e ta’i tausaga ma fa’afou o latou pepa nonofo mau ma ID, ae na’o le Kamupani I’a lava e fa’ataga ona faigaluega ai.

O i latou o le a malilie e malaga mai i ituaiga konekarate faigaluega a le Kamupani I’a ma le Call Center, ua pau lea o sui e ulufale mai o le a talia mo avanoa faigalouega ta’I tausaga ma fa’afou i pemita ulufale mai i Amerika Samoa mai Samoa. O lo’o fa’aauau pea lava ona taofia isi ituaiga o pemita uma lava e ulufale mai ai nisi i Amerika Samoa. Talu mai le masina o Mati 2020, ua taofia pea le toe talosagaina o ni pemita e ulufale mai ai nisi i Amerika Samoa.

O lo ua fa’atulaga e faia latou fa’atalanoaga ma sui ua manatu e fia ulufale mai e faigaluega iinei i le Kamupani I’a, ma e tatau ona pasia muamua le latou fa’atalanoaga lenei ona faato’a lisia ai lea o latou suafa e fia talosaga ai pemita ulufale mai.

AUAI LE TATOU AUTA’A’ALO OLIMIPEKA I LE SOLO FA’AALOALO OLIMIPEKA I TOKYO, IAPANI:

Ua maimoaina e le mamalu o le atunuu tatou tama fanau ua auina atu mo ta’aloga fa’avaomalo o le Olimipeka 2021 lea e fa’atautaia nei i le a’ai o Tokyo Iapani ma sa fa’ataunuuina lea solo fa’aaloalo i le aso Faraile ua te’a, Iulai 23,2021.

Ona ua fa’aaogina e Iapani le latou alafapeti e fa’asolo ai le latou solo fa’aaloalo, ua fiu ai le atunuu e tatalia le taimi e oo ane ai Amerika Samoa i luma o le televise. O le savaliga a le Au ta’a’alo a Amerika Samoa na lona 156 i le 206 o atunuu ma latou au ta’a’alo ua solo fa’aaloalo nei mo le tatalaina o le Olimipeka 2021.

O ave fu’a lautogia mo le Olimipeka 2021 i Tokyo Iapani ua fa’atulaga mai e to’atasi le tama ma le teine e to’atasi. O le au avefu’a fa’atulaga a le tatou au taaalo ua tofia ai Tanumafili Jungblut ma Tilali Scanlan.

O le toniga na fa’atulaga e savavali ai le tatou au ta’a’alo ma latou faia’oga ma le aumalaga uma o latou toniga uluulu le ie ma le Ofu Elei mumua ma le uliuli. O tamaitai sa la’ei latou puletasi ae o taa sa sulu le lavalava uliuli ma le aloha elei mumu uliuli ma tatou avefu’a ua la’eia ma ulafala e avea ma fa’asolo.

Ona o le tulaga a’afia ai o le lalolagi i le Covid-19 i lenei lava tausaga, ua matua fa’aititia ai lava au ta’a’alo ua fa’ataga mai Tokyo, ma ua fa’apea fo’i i le mamalu o e maimoaina i lenei tuufa’atasiga o le Olimipeka.

E tusa ai ma se fa’amatalaga mai a Kent Yamada, “E leai ma nisi ua fa’atagaina e maimoaina lenei tauaofiaga o le Olimipeka ae ua nao Peresetene ma Failautusi o NOCs  ma sui mamalu o IOC, ua talia e maimoaina le solo fa’aaloalo ona o tulaga o le fa’ama’I Covid-19.”

O tatou sui ta’a’alo o lo’o ua avea ma ave fu’a a Amerika Samoa

Runner/Track & Field o Nathan Crumpton

Tuuga Aau o Tilali Scanlan

Tuuga a’au o Micah Masei

Weightlifter Siisii Uamea Mamafa o Tanu Jungblut

Sailor Sui Folau o  Adrian Hoesh

Sailor Sui Folau o Tyler Paige

Maua ni iuga i a latou taumafaiga i se taimi o i luma.