Pago Pago, AMERIKA SAMOA

3 FANAU AMERIKA SAMOA I LE US AIR FORCE ACADEM MO LE VASEGA FA’AU’U 2025

Ua mautu nei le to’atolu o fanau a’oga a le tatou atunuu ua fa’amaonia mai e le fa’atasiga a A’oga Fa’amiliteri a le Air Force i Amerika, ua aofia i vasega fa’aiuaso mo le tausaga 2025. O i latou nei sa mauaina le avanoa e ulufale ai i US Air Force Academy (USAFA) eseese i le Iunaite Setete, ma sa fa’atasia lea sauniga mamalu i le Stillman Field ina ia talia ai vasega fa’au’u mo tausaga uma e afua mai ia 2022, 2023, 2024 ma le 2025 lea e aofia ai alo nei  o Amerika Samoa e to’atolu.

O i latou o Victor Chen, Dorvida Fonoifafo Gretalei Fuiava ma Serena Iona ma sa faia lea sauniga tele e fa’amau ma fa’amautinoa ai le vasega faau’u 2025 ia Aukuso 06, 2021.

E ui ina eseese aoga a le USAFA o lo’o a’otau mai ai i latou nei e to’atolu, ae o le fa’aulufalega lea o i latou e tu’ufa’atasia uma ai Academies poo aoga fa’amiliteri nei i le Iunaite Setete, ma ua toe fetaui ai i latou i lea nofoaga, Stillman Field.

O nisi o fa’amanatu mai le vasega o matua ma aiga o lo’o tapua’ia le taumafaiga a le fanau i nei ituaiga o aoaoga, sa fa’ailoa atu ai ma fa’amanatu atu ina ia toe faitau i le Upu mai le Tusi Pa’ia e ta’ita’ia ai le fa’asologa o a’oa’oga fa’amiliteri, Fa’ataoto 16:3, “Ia e tuuina atu ia Ieova o au galuega, ona fa’amauina ai lea o ou manatunatuga.”

O le mau a le fanau ua latou fa’ailoa mai ai le latou taumafaiga, “Ua matou faia lenei ina ia ta’ua ai se auaunaga ua faia mo matou aiga ma pelega, faia e ta’ua ai lo matou atunuu pele.”

Peita’i o le latou mau autu, “Ia ou faia lenei mo a’u, ae sili atu, ia ou faia mo i latou ua le mafai ona latou faia lenei auaunaga. Peita’i o le ua mafaia mea uma ona o le fa’amalosi mai o Keriso Iesu ia te a’u.”

E tusa o fa’amanuiaga ma tapuaiga a matua uma, ua fa’ailoa mai ai e se tasi o tina, Dorothy Seiuli Fuiava, “E le mapu i talosaga ina ia faliu fofoga mamalu o le Atua le Tama, ma fesoasoani atu i le fanau i aoaoga fita o feagai ma i latou. Tau ina ia manuia outou faiva.”

“Le fanau e, ia outou iloa, o faiva e tapua’ia, e manuia.” O se tala lea a se tasi o tina, Mrs Iona. E mafai ona maimoaina e i tatou uma matua lenei sauniga mamalu ua ulufale ai le fanau i vasega fa’ai’uaso o le USAFA mo le tausaga 2025, i le upega tafailagi poo le uepesite www.usafawebguy.com/blog.

PILI SENATE SI’I AI TOTOGI KOVANA MA LE LUTENA KOVANA

O le vaiaso ua te’a na fa’aulu ai e afioga i senetoa ia Soliai Tuipine Fuimaono ma Togiola T.A. Tulafono se pili e si’i ai totogi o le Kovana ma le Lutena Kovana. Ma e taualoa lea si’itaga i le isi nofoaiga i le tausaga e 2026, pe afai e avea ma tulafono.

I lalo o le tulafono o lo’i i ai nei, o le totogi o le Kovana e $85,000 i le tausaga ae o le Lutena Kovana e $75,000 i le tausaga. 

Ae i lalo o le pili a le Maota Maualuga o lo’o talosaga ai le sii o le totogi o le kovana i le $105,000 i le tausaga ae o le Lutena Kovana e $95,000 i le tausaga. 

O lo’o fa’ailoa i le fa’atomuaga o le pili e faapea, e le gata i a la’ua lava fatuaiga masani, a ua tele foi le faaopoooga o le avega ona o le Koviti-19, mai lava i le pulega o le Vaega Galue o loo gafa ma le tulimata’ia o aga o lenei fa’ama’i, i le fesoota’i pea i aso uma ma le vaega a le FEMA i le fetarale, o le lagolagoina atili o le Ofisa o le Medicaid, o le Matagaluega o le Soifua Maloloina ma le Maota Gasegase o le LBJ. 

“O le taimi nei, ua faamuamua i le lisi o a la galuega le soifua maloloina ma le soifua lelei o le atunu’u,” o se vaega lea o le pili. “O lona uiga e nofo saunia la’ua i taimi uma a o taumafai le teritori e puipui le oo mai o le Koviti-19 i o tatou laufanua.”

Ma, “o le a faaopoopo pea nei tiute ma galuega a o aga’i atu pea le lalolagi i luma i taumafaiga e fo’ia pe tauivi foi i lenei fa’ama’i” o le Koviti-19. 

O lo’o taoto i l e Komiti o le Tupe Fa’asoasoa a le Maota Maualuega lea pili mo iloiloga i se aso o i luma. 

I tausaga ua te’a sa i ai foi pili fa’aulu i le Fono Faitulafono mo le siitaga o totogi o le Kovana ma le Lutena Kovana. Ae peita’i e lei maua i ai se faaiuga a le Fono i na vaitau.