Pago Pago, AMERIKA SAMOA

TALOSAGA UIFAATALI AMATA E FAAGAFUA FA’ASALAGA MO TUSI FOLAU A I LATOU NA SILIA MA TAIMI FAATAGAINA I AMERIKA ONA O LE FAASA COVID-19

O se tala mai Uosigitone DC mai le Ofisa autu o le tatou Faipule i le Konekeresi, Uifa’atali Aumua Amata ua ia fa’ailoa mai, ua mae’a faia lana tusi ma ua fa’aoo atu i le Pulega o le Homeland Security, le susuga le Failautusi Alejandro Mayorkas, ma fa’auia fo’i le isi kopi o lea lava tusi i le Ofisa Autu o le Failautusi o le Setete Anthony Blinken  ia Aukuso 12, ina ia talosagaina e fa’agafua Sala o Visa Femalaga’i o Tagatanuu Samoa o lo’o ua ova le taimi ua alaala ai i Amerika ona o le fa’asa o le Covid-19.

“O le fa’asa lea, e le o se mea e mafai ona faia i ai se suiga a le tagata e to’atasi, aua ua fa’atulaga e pulega o malo uma o le lalolagi, o se mafuaga tatau ona toe faliu le pulega o Visas ina ia latou fa’agafua le fa’asalaga o visa o tagata femalaga’i uma na a’afia feoaiga ona o le fa’asa fa’avaomalo.”

Ua toe fa’ailoa manino atu fo’i e le tatou Faipule i le Pulega a le Setete ma le Homeland Security a le Malo tele, “O le faigamalo fo’i a Kovana Lolo Moliga, sa matua leai lava se malaga e toe fa’afo’i atu ai tagata i Amerika Samoa na faia ai, o lona uiga sa matua leai lava se ala e mafai ai ona toe fo’i nei sui i Amerika Samoa.”

Mai se molimau a se tasi o tamaitai sitiseni Samoa ae ua loa o a’oa’oina, faigaluega ma alaala tumau i Amerika Samoa, sa ia fa’ailoa ai, “Na taumafai le vaega o Femalaga’iga ma le Homeland Security e faafo’i sa’o i matou o sitiseni Samoa i Samoa, lea sa faia mai a latou malaga e toe fa’afo’i ai tagata Samoa i Samoa i sisifo, ae o le finauga a i matou, e leai, e fia o matou i Amerika Samoa, aua ua i ai fale ma aiga iina, o iina fo’i sa amata mai ai le malaga ulufale mai i le Iunaite Setete.”

Ua fa’ailoa patino i le fa’aupuga o lea tusi ua mae’a taua’aoina i ofisa autu nei o le Malo tele, le tulaga usita’i e tagata Samoa o le aiaiga o le latou visa femalaga’i, peita’i e le’i gafatia ona fa’ataunuu le latou malaga toe taliu i Amerika Samoa, ona o le fa’asa fa’avaomalo.

“Ou te talosagaina e ao ina silafia lelei, o le avea ai ma tagata nofomau ma faigaluega tumau i Amerika Samoa, ua talia fa’aletulafono ai tagata Samoa mai le Malo Tuto’atasi o Samoa e alaala ma faigaluega ma faamautu o latou aiga i Amerika Samoa. Ua agava’a ai i latou i visa B1/B2 e malaga mai i Amerika mo so’o se mea lava e manatu ai i le umi e oo i le 10 tausaga, ae ono masina e fa’ataga ai e alaala ai ma tafao i Amerika ma toe taliu i Amerika Samoa.”

“O le tele o maga umi e faia mai e i latou nei, e malaga mai ai mo togafitiga o latou gasegase ma asia mai fanau ma aiga i soo se setete ua fa’amautu ai i latou.”

“O le tapunia fa’afuase’ia ai o feoa’iga, na lamatia ai latou fa’atagaga e alaala na’o le 6 masina ma toe taliu i le malaga e tasi. Ua fa’atalosagaina le pepa talosaga e toe soso’o ai le latou nonofo ai iinei, ua silia ma aso fa’atulagaina o le fa’asa, peita’i e le o se ala faigofie fo’i sa uia i le fa’atumuga o nei talosaga. E taugata ma e le faigofie ona fa’amasani ai sui femalaga’i i faiga ua mana’omia ona fa’atumu ma totogia ai nei talosaga.”

“Ua fa’ailoa mai e nisi sui ua fa’alua ma fa’atolu ona fa’atumu nei pepa talosaga e toe soso’o le fa’atagaga o visa, o le fa’alua fo’i lea pe fa’atolu ona totogia latou pili mo nei talosaga. Ina ua matala mai le avanoa e toe taliu ai le to’atele i Amerika Samoa, sa le fa’atali nisi o sui nei ae malaga loa lava. Peita’i, e le’i talosagaina ni a latou pepa fa’atumu ma mae’a tapena i o latou fa’amaumauga ua a’afia ona o le fa’asa.”

“Ou te talosagaina ai le mamalu o a outou matagaluega, ina ia alofagia toe siakia lelei uma i latou sa malaga mai i visa i vaitau pagatia uma o tagata ona o le fa’asa, ina ia fa’amama mai a latou fa’amaumauga mai ni a’afiaga e taofia ma fa’aleaogaina ai latou femalaga’iga ona o le ova ai o le taimi i Amerika, ae le toe fo’i i le taimi atofa mo latou visa.”

“E mautinoa lava, e leai ma se tasi sa manatu ina ia latou solituina tulafono ma aiaiga o latou visa femalaga’i, ae ona o le usita’ia o le fa’asa, ia le maua fo’i Amerika Samoa i lenei fa’ama’i, ua mafua ai ona latou loto ina ia usita’ia le fa’asa mo le puipuiga o le Covid-19.”

Na fa’aiu lana tusi i lona fa’afetaia o le Matagaluega o le Puipuiga Fa’alotoifale o le Malo tele ma le Ofisa fo’i o Femalaga’iga, ona o le latou fo’i galuega fai e le o faigofie i lenei vaitau o le tele o aiaiga e tatau ona usita’ia e tagata femalaga’i uma, ia mautinoa e fa’aitiitia ai le tulaga a’afia o le mamalu lautele o tagatanuu uma i setete eseese o le Iunaite Setete o Amerika.