Ads by Google Ads by Google

TALA I VAIFANUA


Le taimi ua fua ai pauna o le tama o Jolando Lala Ta’ala mai Tafuna lea ua sauna ai mo lana fetauiga i Mexico i le afiafi o le aso Toona’i ua te’a. [ata: foa’i]

Pago Pago, AMERIKA SAMOA

 

MANUIA TAUMAFAIGA JOLANDO TA’ALA - FUSU I MEXICO AUKUSO 14

 

O le ulua’i fusuaga a le ali’i talavou o Jolando Lala Ta’ala mai Amerika Samoa lea sa koleni fa’apitoa ai i Las Vegas, ua fa’ato’a fetaui ai ma lana paga sa fa’atulaga mai e le Kalapu Fusu i Agua Prieta, i le a’ai o Sonora i Mexico. Sa fa’ataunuuina lea fusuaga i le aso Toonai na te’a nei, itula e 6:00i le afiafi, ma sa malaga atu ai le ali’i fa’atonu o Hugo Gebauer.

 

Sa mautinoa o lo ua lava tapena le alii faipele i lana fusuaga muamua lenei, aua ua sola mai ma le manumalo.

 

Ua maua fo’i ata fa’asolo na fa’asalalau sa’o mai i lea fusuaga ma ua iloga ai le manumalo a’ia’i o le alo o Amerika Samoa i lea lava fusuaga.

 

O le Jolando na filifilia mai e le Asosi Fusu a le tatou atunuu ina ia sau muamua e Koleni fa’alelei mo se sao o le tatou Asosi e auina atu i le Olimipeka.  Peita’i, ua oo mai le taimi e tatau ai ona fa’aulu atu i le Olimipeka e le’i mautu lelei ana koleniga ma ni ana fusuaga lelei e mafai ai ona tauva. Lea la ua amata ona fa’afetauia le tatou tama ma nisi o paga e mafai ai ona atina’e lana taumafaiga, ma i’u ane ai le tatou fa’amoemoe, o le i ai lea o ni tatou tama fusu lelei mo so’o se ta’amilosaga fusu fa’avaomalo.

 

O lo ua alaala tumau le susuga Jolando Ta’ala i le maota o le ali’i peresetene o le Asosi Fusu a Amerika Samoa ina ia mautu ai ni ana fusuaga pe 20 i le 30 ao le’i oo mai nisi ta’amilosaga fa’avaomalo e mafai ona tauva ai mo le tatou malo. O isi fusuaga e taulia lava o le fa’afusu ma nisi mai le vasa pasefika, Tonga, Fiti ma Samoa fo’i. Peita’i ona o lea e taofia lava femalaga’iga, ua atili ai ona faigata ona faia fusuaga amata a le tatou tama fusu lenei.

 

I le taimi nei, ua fa’ailoa mai e Jolando i sana talanoa mai i luga o feso’ota’iga tau upega tafailagi, “O le mea sili ua manumalo i le ulua’i fusuaga fa’avaomalo, e le’i mautinoa lelei e lo’u lava sui sa’u taumafaiga ae o le fa’afetai tele i le Atua ua mafai ona a’emalo faiva, ua mafai fo’i ona ou iloa ai, e leai se taumafaiga e faigofie. Ia lava le malosi ma le manava e fusu ai ma so’o se tasi, o le malo e le mautinoa lava pe maua pe leai, ae o le alu lava i ai, ave i ai le taumafaiga sili ua mafai, ona talileleia mai lea.”

 

O le fa’atonu ma o le faia’oga fo’i lea, sa totogia lava e le ali’i peresetene e aoina le tatou atalii fusu lenei o le susuga Augustine Sanchez, ma ua fa’aauau pea lava ona ia a’oina Jolando Ta’ala mo ana isi fusuaga o le a feagai ai.

 

Sa koleni mai lava o ia i le Floyd Mayweather’s Gymnasium i Las Vegas ma o le a fa’aauau ai foi iina ana koleniga ma sailia ai nisi ana fusuaga fa’avaomalo pe faipele fo’i ma nisi paga e maua lava i soo se setete o Amerika.

 

Ua toe taliu nei Augustine i Tucson Arizona, ae fa’aauau fo’i ona faia pea koleniga a Jolando, se’ia toe mafai fo’i ona fa’atulaga se isi ana fusuaga, ona toe malaga mai lea e kolenia fa’apitoa ma sipa le tatou tama fusu fa’avaomalo.

 

O lo ua fesoasoani malosi Hugo Gebauer e tausia lelei ma feavea’i le tatou sui fusu i ana koleniga, ia mautu lelei lona malosi e faipele ai. 

 

O le to’atele sa mafai ona maimoa i lenei fusuaga, ua iloga mai sa latou faamalosia le ali’i fusu Samoa ma ua faailoa mai fo’i le latou agaga, ia to’aga i ai, e maua lava le mea sili pe a fa’amalosi ma fa’amaoni i ana koleniga.

 

TOLOPO A’E O AOGA A LE MALO IA SETEMA 07 - FAIA’OGA AMATA AUKUSO 16

 

Ua fa’alauiloa le auau o lenei tausaga aoga, “Ia tatou faia Mea Sili mo Fanau A’oga!” ma ua fa’ailoa fo’i ma tima’ia faiaoga, pule a’oga ma latou sui, ina ia taumafai ia ausia lea fa’amoemoe maualuga.

 

Ua fa’ailoa e le malo ma le Matalauega o Aoga, ua tolopoina ia Setema 7, le aso e a’i ai aoga a le malo, ae le o Aukuso 23. Ua mafua ona tolopo le tatalaina o aoga mo le tausaga aoga fou 2021-2022 ona o nisi o tulaga fa’aletonu i nisi o aoga.

 

O lo ua fa’ailoa, e tatau ona fa’amae’a uma galuega fa’aleleia o falea’oga ma laumua uma ona faatoa tatala aloaia lea o aoaoga a le fanau. O lona uiga e toe fa’asolo atu le asiasiga a le DOH pe ua a mai le fa’amamaina o mea uma i a’oga na le pasia le latou asiasiga muamua.

 

O le sauniga lotu mo le toe a’e o aoga a le malo sa fa’ataunuu i le Malumalu “Ua Taunuu” i Kanana Fou. Ma na saunoa fa’apitoa ai le afioga le Sui Kovana Talauega Eleasalo Ale ma ia toe tima’ia le vasega o faia’oga uma, “O le tatou fa’amoemoe maualuga, ia a’oa’oina fanau a Amerika Samoa e feagai ai ma lu’iga o le latou vaitau e avea ai i latou ma ta’ita’i o le tatou atunuu.”

 

“Ia tofu faiva le fanau, ua leai se mea e oge ai i latou e fa’ataunuu ma sologa lelei ai le folauga a Amerika Samoa i le lumana’i.” O sina vaega lea o le tima’iga a le ta’ita’i sa saunoa i ai i lona avanoa o le polokalama fa’asolo i le sauniga lotu mamalu.

 

O le ta’ita’i o le sauniga mamalu sa fa’afoea lea e le susuga le Taitaifono o le Fonotele a le EFKAS i lenei tausaga Rev. Fa’aeteete Saifoloi. O le faitauina o le Tusi Pa’ia na fofogaina lea e le Fa’atonu o A’oga Kerisiano a le EFKAS Rev. Setefano Lafaele.

 

O toe upu fa’amalosi sa fofogaina lea e le susuga le Fa’atonu o a’oga,Talauega Dr. Samasoni Asaeli e tima’ia ai le vasega o pulega o aoga a le malo ma le vasega o Faia’oga uma i potu aoga ua auai i le sauniga e amatalia ai le tausaga a’oga.

 

FA’AMALOSIA LE FANAU TA’A’ALO - TA’ITA’I NA A’O’OGA MAI LE LATOU LAUMUA:

 

I le Laumua o le Liona i Leone, ua tapena ai e le ali’i faia’oga o le Au Football, Duke Elisaia, se faiga fou e ono aoga tele i le toe fa’atepa ole fanau ta’a’alo i le agaga moni e fia fa’amautu i o latou loto, e ala ai ona ta’a’alo ma tauva fa’atausala.

 

O le aso Tofi o le vaiaso na te’a sa oo atu ai nisi o sui o le fanau a’oga tuai uma a le Liona ina ia latou fa’amalosi i le fanau a’oga o lo ua a’otauina i le Football i lenei tausaga, ia ae manumalo ai latou faiva i malae.

 

O Marian McGuire Ale sa avea ma sui o Tama ma Teine Tuai o Leone, mai le vasega fa’aiuaso o le tausaga 1998, na fai ma fofoga o i latou e saunoa tima’i i le fanau ta’a’alo.

 

“Soo se tama poo se teine ta’alo, e ao ina paleni lelei lona tino ma lona mafaufau i so’o se mea. Ia iloa fa’agaoioi lona tino ia ausia le sini o tausinio i ai. Ia mautu fo’i ia te ia le tomai e mafai ai ona ia gaoioi ia ausia le manumalo. Ia e iloa lelei le ua e manatu e te fa’ataututuina i le taumafaiga. E le faigofie ae mafai pe afai o le a to’a lau va’ai, mita’i lelei le isi ana gaoioiga o le a faia, ma ia le fa’alavelave ia te oe le lava o le manava e fa’atino ai so’o sau taumfaiga. O le manumalo, e fa’ato’a iloa lava i le taimi o le ta’aloga. Ia e lava tapena i le malosi ma lou silafia o tulafono ma aga o le ta’aloga o e tauva ai.”

 

“Aua le maumau lou taimi e te fia malovale ai, ae ia fa’atino lau taumafaiga ma lou iloa e tatau ma e te manumalo i le fa’aiuga o le filigamaea i malae. Ia faaaoga lelei lou iloa ma lou mafaufau i so’o sau taumafaiga e te sao atu i le sikoa, pe fa’asao atu se tasi o lau au e kolosia le laina sikoa. Ia outou ta’a’alo fa’atasi, o le mafuaga lena na fa’aulu ai oe i le ‘au atoa, ae le na’o o oe lava le ‘au.”