Pago Pago, AMERIKA SAMOA

TE-HINA PAOPAO - PINE AURO BASKETBALL TAMAITAI U19 MO USA:

Ese le tulaga ua ta’alo ai nei le tamaitai o Te-Hina Paopao, o se alo e fa’asino i le Aiga Sa Paopao mai Amerika Samoa ma o lo’o ta’alo mo le Iunivesite o Oregon, ua fa’ato’a amata ai fo’i ana a’oa’oga, o lona ulua’i tausaga aoga lenei.

Ua iloga le ta’alo a lenei alo o le atunuu, e le o fa’avaivai i le filiga ona o lo ua avea nei o ia ma tamaitai taalo Basketball a U19 a le Iunaite Setete o Amerika ma sa latou fa’ato’a se’ia le Ipu a le FIBA U19 World Cup i le latou ta’aloga mo le Siamupini ma Ausetalia i ‘ai na malo ai e 70-52.

O le igoa o le ‘au a tamaitai mai le Iunivesite o Oregon o le “Ducks” ma ua fa’afiafiaina lana au tapua’i mai lea Laumua ona o le latou taumafaiga, e to’afa i latou na piki mai le latou ‘au e ta’a’alo mo le USA U19 Women Basketball Team.

E toafa I latou na fa’amatuu atu e le ‘au a le Ducks Iunivesite o Oregon e ta’a’alo i le ‘au a tamaitai U19 a le Iunaite Setete mo le FIBA World Cup lea na aofia ai Sydney Parrish, Maddie Scherr, Kylee Watson ma Te-Hina Paopao.

O ‘ai nei sa mauaina e le tamaita’i Amerika Samoa, e matua tumati’e mai lava i lenei ta’amilosaga, e oo ane i le toe ta’aloga ua tula’i mai ‘ai ua togia ma fafao lelei e le tamaitai pe a fa’atusalia i ta’aloga uma ua ia ta’alo ai i le ta’amilosaga lea e 10 ‘ai, 4 rebounds a fa’alima fesoasoani e toe togi le polo ma le lua taimi ua ia kolosia ma gaoia mai le polo mai pasiga a le isi ‘au.

E tusa ai o le latou ‘au’au i le Iunivesite i Oregon, ua matua ta’a’alo le to’afa lea na piki atu mai le latou ‘au e fa’amausali atili le latou lea manulauti, “O le ta’alo fa’atalale, ua e avea le ‘au atoa i le to’ele!”

O le ta’aloga lenei o le Ipu a le Lalolagi a le FIBA U19 na fa’ato’a mae’a atu ona maua le siamupini a Amerika ia Aukuso 15, 2021, ma a iloga fo’i tulaga a’ao o le DUCKS ona o le taumafaiga a le to’afa lea sa fili fa’apitoa mai le latou laumua, ae maise ai lava le tamaitai Samoa o Te-Hina Paopao. 

Na muamua lava piki le tamaitai o Paopao e amatalia fetauiga ma ‘au uma sa fefa’ataua’ia maia Amerika i lea ta’amilosaga a le FIBA World Cup 2021. E fitu ta’aloga uma na fetaui ai le ‘au a Amerika ma isi au sa i le ta’amilosaga Basketball lea. E manumalo uma lava Amerika ia latou ta’aloga faitaulia.

Ua iloga le ta’alo a lenei alo tamaitai o Samoa, ma ua faailoa i tusitusiga ma faamaumauga, ua ‘ai silia o ia i ta’aloga uma, ma ua matua fa’afiafiaina le Laumua o lo’o aoga ai, le Iunivesite o Oregaon, ae silisili ai le aiga ma le atunuu sa fofoa atu ai le taumafai o lenei tamaitai.

2 MEA UA FA’AFETAIA AI E FAIPULE I LE KONEKERESI UIFA’ATALI AUMUA AMATA I LENEI VAITAU:

“Ou te fa’afetaia le agalelei ma le fa’aeaea mai o lenei sui e le Tina ma le aiga atoa o le ali’i ua lauiloa ai fo’i si tatou atunuu o Amerika Samoa, Troy Polamalu, ona sa latou vala’aulia ma talia lelei o a’u e avea ma se tasi e nonofo fa’atasi ma fiafia fa’atasi ma i latou, a’o talia e le atalii pele le fa’aeaga a lana ‘au Football o le Pittsburg Steelers i le fa’aofia o lona igoa i le lisi o tama ta’a’alo lelei ua lauiloa ai le latou ‘au Football i ta’aloga faitaulia ma le sailiga o le Siamupini a le NFL.” O se amataga lea o sana fa’asoa mai.

“Ae silisili ona fa’afetaia le Atua ona o le alofagia o so’o se taumafaiga a so’o se alo fo’i o Amerika Samoa o lo’o ta’a’alo fa’atauva i nei ta’aloga faitaulia i le atunuu tele o Amerika, e le gata ai i Football ae maise o isi ta’aloga uma e aofia ai le Volley Ball, Basketball, Pi’iga ma Fusuaga. Poo fea o outou taumafai ai, ia manatua tatalo i le Atua e fa’amanuia mai ia te oe, aua o lou manumalo ma lau fa’aea, e matua fa’afetaia lea e lou atunuu fa’apea ma nai o outou aiga uma o lo’o tapuaia o outou faiva.” O se isi lea vala o lana fa’afetai. 

“O le fa’aeaga e Troy Polamalu o Amerika Samoa, o se fa’aeaga lea ua lauiloa atu ai ma uiga o tatou fanau ma le tatou aganuu e aoaoina lelei ai i latou. Ua ia saunoa i lea fa’atasiga tele, ua molimauina fo’i e ona ta’ita’i uma sa latou galulue fa’atasi mai mo le Pittsburg Steelers, ua ta’uleleia ai i tatou uma, fa’afetai Troy, aua e le ‘asa lava le upu a le Tusi Pa’ia, ‘O la outou amio e iloa ai outou ma lo outou olaga a’oa’oina i luma o tagata!’ E sili ona leotele o la outou amio, nai lo se isi lava mea e fa’alauiloaina ai outou.”

O le fa’atasiga tele lea sa faia lea i Canton Ohio, i le aso Toona’i Aukuso 07, 2021. 

O le isi mea ua fa’afetaia tele ai e le taotu Faipule i Uosigitone le alofa ma le agalelei o le Atua, ona sa fa’alogoina e ia fafatala, e i ai se alo o Amerika Samoa ua aumaia uma fitafita a le Malo tele mai Afakanisitana, ae le aumaia.

“Na ou matua fa’afeso’ota’ia ta’itai maualuluga uma o le Vaega Au ma le Matagaluega o le Puipuiga Lautele o Amerika, ina ia latou sailia mai pe tonu nei fa’amatalaga ua alia’i mai, ma ua fa’avevesia ai tagata uma o Amerika Samoa, o e sa tiute latou fanau i vaega au a le malo tele i eleele uma o Sasa’e Tutotonu, le laueleele sa nofo vevesi, lea ua auina ese mai ai tatou vaega au.”

“Ua matua fa’ailoa mai ma le toto’a e sui uma na fa’afesoota’ia i le Dept. of Defense ma le Vaega Au a le USArmy, o lo’o i ai nisi o fitafita o lo’o i ai pea i na nofoaga ona o lo’o i ai se feutagaiga ma gaoioiga e ao ina faia a’o tatalia lea fa’ate’aina mai uma o tatou fitafita. O lo’o aofia ai ma nisi o lo’o latou tapenaina mai malaga nei a fitafita tiute mai Afakanistana.”

“E tatau ona tatou tatalo mo i latou uma o lo’o totoe pea i Afakanistana. O loo i ai fo’i le taofiofiga o fa’amatalaga mai le Pentagon ina ia le a’afia le tulaga fa’alilolilo o latou feutagaiga, ae moni o loo i ai pea nisi o fitafita ma le aufaigaluega a le vaega au i Afakanisitana mo toega o le galuega.” O sana tautalaga lea e fa’amaonia ai le i ai o fitafita ma isi sui galulue a Amerika i nofoaga o vevesi.

“Ua tatou iloa o agaga o tatou fanau o le alofa, e i ai nisi o lea lava atunuu ua a’afia tele ona o latou faigamalo, ma ua masani fo’i tatou fitafita i le taumafai ona ia fa’asaoina nisi e to’atele. Tatalo i le Atua ia foa’ia i o tatou fanau ma isi fitafita uma a Amerika le malosi o le tino ma le mafaufau mo latou tiute ma faiva, ia saogalemu mai i latou i o tatou laufanua.”