Pago Pago, AMERIKA SAMOA

FA’ATASIGA LONA “40 AIGA SA PEAU” - NOFOAGA O LE AIGA I TAFETA - AMERIKA SAMOA:

Na fa’atasia le auaiga atoa o Sa Peau i le latou maota i Tafeta ina ia fa’ataunuuina le latou fa’atasiga. O le toatele o i latou o loo i le tatou lotoifale i Samoa nei, lea sa maua le avanoa matagofie e fa’atasi ai. Ma ua faitaulia sa atoa le to’a 80+ o i latou i aso uma nei sa fa’atulaga mo le latou fa’atasiga lona 40 ai lenei o tausaga talu ona faia fa’atasiga a le latou auaiga atoa.

Mai ia Iulai 31 seia oo ia Aukuso 01, 2021 na faatautaia ai lenei fa’atasiga tele a lea Aiga atoa. O le to’atele o le auaiga o lo’o alaala tumau i fafo ua le mafai ona auai, ona o tulaga lava o le fa’ama’i Covid-19, ma lona fa’asa ua atili ai ona faigata ona mautinoa le auai mai o le to’atele o latou pelega uma na. Peita’i ua le taofia ai le fa’atinoga e ao ina faia, aua o le to’atele lava o lo’o alaala pea i laufanua o Amerika Samoa.

O le susuga le Faife’au Rev. Onalei Setu sa avea ma ta’ita’i o le sauniga na tatala aloa’ia ai le mafutaga fa’aleaiga atoa, ma o ia lea sa ia ta’ita’ia fo’i le sauniga mamalu e fa’apa’iaina ai le nofoaga fou ua toe fa’aleleia atoa mo oliolisaga tumau o Matua Peleina, “Peau & Mau”.

Na auai mai auaiga uma o lo’o alaala i Manua ma Fagasa i lenei fa’atasiga, ma o le aso Sa na soso’o ai na toe ta’ita’ia ai le sauniga fa’apitoa mo le Auaiga o Sa Peau atoa e le susuga Rev. Elekosi Lafitaga.

O lea fiafia tele ma le fa’atasiga a le Aiga Sa Peau, e fa’aauau lava i tausaga uma, ina ia fa’amauina fo’i nofoaga uma o lo’o alaala ai o latou suli i fafo atu o Samoa, ma sa faauia le tele o feso’ota’iga fa’aneionapo ina ia mafai ona fa’ailoa atu i o latou aiga e le’i auai mai, mea uma na fa’atino mo le aso faapitoa ole mafutaga fa’aletausaga a le latou auaiga atoa i  Amerika Samoa le nuu pele.

7 KAMUPANI TAUOFO POLOKALAMA E ULUFALE ATU AI I AMERIKA SAMOA

O Kamupani E 7 kamupani sa tauofo mo le konekarate a le malo, mo le Talofa Pass, e ala i le sootaga fa’ainiteneti e fa’atulaga ai aiaiga uma e tatau ona usita’ia e so’o se tasi e fia malaga ulufale atu i Amerika Samoa, ma ua faia i ai le filifiliga a le Komiti Fa’apitoa mo Tauofoga a le Malo, o i latou fo’i ia e galulue fa’atasi ma le CPO ina ia mautu le filifiliga tonu mo galuega tautua a le Malo.

O kamupani la nei e 7: Carahsoft Technology Corp; Dansis Solutions; DataHouse Consulting, Inc.; Kava Up LLC; Klaod Solutions LLC; Ledge Light Technologies; ma le Medical Web Experts

O le fa’aiuga a le SEB poo i latou na fa’atinoa le iloiloga o se fa’aiuga lelei mo se Kamupani lelei e fa’atinoa lea tautua, e toe fa’aulu e i latou i le CPO mo lana fa’amaoniga ona fa’ato’a taua’aoina ai lea o le galuega i le sui ua agava’a mo le tautua i le aso Tofi o le vaiaso na te’a nei, Aukuso 19, 2021.

O le Kamupani ua manumalo o le Data House Cosulting Inc. i lana tau ua ofo mai e $6.35 miliona mo tausaga e tolu.

O le Data House o le kamupani sili lea ona umi le latou tautua i nei ituaiga o tomai i le Setete o Hawaii ma ua latou ua silia ma le 40 tausaga talu ona latou fa’afeso’otaia ma tautua Hawaii e tusa o fa’amaumauga o lea ituaiga.

I se pepa o fa’amatalaga ua fa’ailoa ai e lea Kamupani o lo’o fa’aauau pea lava ona fa’atupula’ia le kamupani lea e ala i le latou sootaga ma le lautele i tulaga o fa’amaumauga patino i femalaga’iga ma isi uma ituaiga o fa’amaumauga ma masini fa’atekonolosi mo le fa’atinoga ma fa’ao’o atu fa’amaumauga i sui ta’ito’atasi, kamupani ma setete faapea ma malo ma o latou ofisa ma matagaluega eseese.

Fa’ailoa e le afioga le Sui Kovana Talauega Ale, “Ua fiafia le agaga ua mae’a fa’atino lea tiute o le CPO ma le latou fo’i Komiti a le SEB ina ia mautu mea uma tau le tulafono mo le taua’aoina o lenei konekerate. Ua lelei fo’i le latou sailiga ma ua mautinoa le mau fa’atuatuaina o le latou galuega e fa’atino aua lava le faamoemoe, ia tumau le fa’asaoina o le atunuu mai le ulufale mai i ai o lenei fa’ama’i pipisi ma le faigata o le Covid-19.”

“O le saogalemu pea o Amerika Samoa mai le Covid-19, o se mea o taumafai lava e fa’amuamua i taimi uma, ina ia mautinoa lava o ave le fa’amamafa a le aufaigaluega iinei ma fafo, ia mautinoa o mama le atunuu mai le Covid-19. Ia mafai fo’i ona to’aga tagata lautele e usitaia mea uma ua fa’atulaga ina ia mautinoa e le o maua se tasi i lenei fa’ama’i, ae ulufale mai i le tatou malo.” 

“Ua tele lesona ua mafai ona maua mai e le aufaigaluega ma ta’ita’i o le Malo talu mai ona mae’a galulue fa’atasi e taumafai ona taofiofi lava le ulufale mai o le Covid-19 i o tatou laufanua. Ua aofia i lenei mau lesona o le fa’amamafa lava lea ina ia fa’atino atoatoa le tiute o le aufaigaluega a le malo i matagaluega uma o lo’o latou galulue fa’atasi ina ia mautu le mama o Amerika Samoa mai le Covid-19.”

O le tamaitai o Ms Hong Phan, peresetene o le DataHouse, sa ia fa’ailoa mai, “O i matou i DataHouse ua masani ma le tele o tautua e agatonu mo Amerika Samoa ma ona tagatanuu. Ua fa’afetaia fo’i lenei avanoa matagofie mo i matou e fa’atautaia ai lenei tautua. Mo le tatou tatou TaofaPass lenei ua fa’atulaga ina ia ulufale atu ai le to’atele i Amerika Samoa, o le a tuu i ai le matou mafai e sili ona fai, aua e toe pau lava lea o se vaega o le USA o lo’o mama mai lenei fa’ama’i, Covid-19.”

“O le a matou fa’aaogaina fa’amaumauga uma lava tau tui ua mae’a faia e tagata fia malaga i totonu o Amerika Samoa, fa’atasi ai ma isi aiaiga uma ua mae’a pasia lo latou fa’amauga e ao ina fa’amalosia a’ia’i mo i latou uma e fia ulufale i Amerika Samoa, e fa’aaogaina ai le pasi ua mae’a fa’atulaga nei.”