Pago Pago, AMERIKA SAMOA

FA’AILOA UIFA’ATALI AMATA - TALA MAI AFAKANISITANA

O lo ua i ai fo’i se isi fa’aaliga ua fa’auia a’e i le afioga le tatou Sui i le Konekeresi e tusa o le taumafaiga ina ia saogalemu le fa’ae’ega mulimuli mai o tagata uma ma mea totino o totoe a le tatou vaega au mai Kabul Afakanisitana, ua fa’ailoa ane ai e le o faigofie i le taimi nei lea tulaga.

Ua o faatasi lea tulaga mo tagatanuu Amerika, latou vaega au ae maise o nisi fo’i o fitafita a malo aufa’atasi sa fa’apa’aga fa’atasi ma tou fitafita i tiute i tafa o taua i sasa’e tutotonu atoa.

Ua faigata lava ona fa’alauiloa patino fa’amatalaga uma e tusa ai o nei taumfaiga mulimuli mo le fa’amae’a ai ona la’u ese mai tatou tagatanuu, fitafita o taua ma meatotino o totoe ona o le vevesi o lo’o ua sofa’i mai e le vaega a Talipana ma latou avea fa’amalosi le pulega o lea Malo.

Ua fa’ailoa mai e UIfa’atali Amata, “O le a fa’aauau pea lava ona matou taumafai e faaoo atu fa’amatalaga tau lea taumafaiga, ina ia nofo tapua’ia mai e le Atunuu atoa le taumafaiga a le Malo tele o lo’o fa’atino nei, fa’atasi ai ma le tapua’ia o faiva o tatou fanau i na nuu o vevesi ma fevaevaea’iga. O le mea o sili ona mataituina e le tatou sui i le Konekeresi, “Ia mautinoa e le o afaina ai se tasi o tatou Toa Samoa i lenei vaega o totoe o le vaega au ma o a’afia i nei vevesi. O lena tautua o lo faia lava e le matou Ofisa 24/7 ina ia taumafai atili e iloa patino pe o i ai lava se alo o Amerika Samoa o aofia ai nei fa’aletonu, ae ua mae’a auina mai ese mai Afakanisitana.”

“Ua mautinoa lava e i tatou uma, e le mafai ona le faia le tiute o tatou fitafita ma i latou uma ua tatou fa’apa’aga i lenei faiva, e latou te puipuia soifua ma ola o tagata uma e le sala, ae le faigofie ai le tulaga ua sofa’i mai e le vaega a Talipana, aua ua mautinoa e i latou o lo ua tu’uva’a ese mai fitafita uma ma fesoasoani a Amerika sa fa’amalosia le nofo lelei ma le filemu i o latou laueleele,” o sana toe fa’amatalaga lea e tusa ma le tautua tuavae a tatou fitafita faatasi ma isi uma sa latou tautua fa’atasi ia tausia le nofo filemu i na nofoaga o vevesi.

“O le mea ua taumafai vave i ai Amerika, o le ave’esea mai ma le saogalemu tatou fitafita uma ma isi fo’i sa latou tautua fa’atasi fa’apa’aga ia saogalemu le latou tu’uva’a ese mai, ae ua aumaia ai fo’i ma nisi ua talosagaina se fesoasoani ona o le fita o le a feagai ma i latou ona o le faigamalo fou ua sofa’ia le latou nofo filemu, le vaega lea a talipana.

Ua fa’ailoa i se tasi o tala mai aufaasalalau i Amerika nei, e to’a 23 nisi o fanau a’oga ma latou matua mai le Cajon Valley Union School i Southern California o lo’o ua omia fa’atasi ai i nei vevesi ona ua fetaui nei mea uma ma le taimi e toe taliu mai ai i latou i fanua, ae sa o atu e malaga asiasi i aiga i le vaitau lenei o le taumafanafana ma le tu’uaga umi o a’oga.

Ua fa’ailoa mai e se lipoti mai vaega au o taumafai e fa’asaogalemu mai nei malaga mai Kabul, o lo ua mae’a saogalemu mai le isi vaega muamua o le fanau a’oga lenei ma matua, ae o lo’o ua taumafai e fa’aoo uma mai le isi vaega i le malaga o Aukuso 31, 2021.

O le aumalaga lenei e le’i fa’atulagaina e le a’oga, o se malaga lava sa fuafuaina e matua ma latou fanau ona e fia asiasi i o latou aiga ua loa ona latou tu’ua.

Ua fa’ailoa mai e le pulega o le Cajon Valley Union ia alofagia e fia maua lava latou avanoa e fa’aauau ai le a’oga pe a taunuu manuia mai. Ua faailoa mai e le a’oga, o lo’o mautu lava latou avanoa e a’o’oga ai i latou uma pe a fa’amanuiaina mai.

Peita’i, o se tasi o fitafiti Fiti sa tautua i tafa o taua i Afakanistana i lalo o le vaega au a le NATO, Kitione Bonakeli Leleavono, ua oo ane i lona malo o Fiti ua na’o le ofu lava o pipi’i i le tino, sa ia fa’ailoa mai, “Amuia outou uma, o lo’o outou nonofo pea lava i le saogalemu ma le lafulemu o tatou atunuu fa’aatumotu o le vasa sili ona to’afilemu o le Pasefika. O le mea sa i ai, e le toe fia manatu lava i ai.”

FA’ALAUILOA FA’ANANA JEROME GREY - ATISI 10 TAUSAGA

O le tatou ali’i pese ta’uta’ua o Faanana Jerome Grey mai le a’ai tele o Malifa, i le taulaga o Apia, Samoa ua fa’asuafaina nei o le Atisi Polenisia mo le 10 Tausaga. O lea fa’ailoga sa taua’aoina lea i le Asia Pacific Cultural Center i Tacoma, Washington ina ua mae’a le vaiaso atoa o Fa’afiafiaga Fa’aAtumotu o le Pasefika lea na fa’atautaia ia Iulai 25-31, 2021.

O le fa’ailoga lenei sa avea o se tasi o mea taua na fa’atulaga lona taua’aoina atu i lana tofa Fa’anana Jerome Grey, i le mae’a ai o fa’afiafiaga atoa a Samoa ma latou usuina ai le pese sa lauiloa ai le tomai o lea ali’i pese ma fatu pese, “We are Samoa.” 

O le tele o pese sa iloga ai le taleni a lenei ali’i pese Samoa, o le ala lea o le manumalo o lona sui i lea fo’i fa’ailoga taua ma ua fa’amaonia e tusa ma le 40 tausaga o tusi pese ma fofogaina e ia pese i lona soifua ai i Samoa, Amerika Samoa ma Hawaii foi.

O le soifuaga o Jerome Grey sa i’u ina oo ai lenei pese e fa’afofogaina e President Jimmy Carter ma le Konekeresi atoa a le Malo tele i le latou Malaga ta’amilo na masi’i ai ma le A’oga a Fa’asao High School i le tausaga e 1980. O le taimi tonu lea sa mae’a fatu ma fa’anota ma usuina ai e ia lana pese lea o le “We are Samoa.” O lea pese ua avea ma se pese fa’amau o le agaga Samoa moni i Samoa na lua, Amerika Samoa ma le usoga ia Samoa Tuto’atasi.

O le tasi o ana pese fatu sa ia fa’amauina ai lona tala’aga, “O se atali’i na ola a’e i Malifa, Apia, ma o se auaiga e matua lauiloa i Samoa Tuto’atasi i le taleni pese ma le fatu pese. O ona tuafafine sa latou fa’atula’ia se aufaipese lauiloa a le “Grey Sisters” i lalo o le ta’ita’iga a le latou tama o le Tufuga Fau Fale, Fa’anana Grey.

O lana taleni lenei o le pese ma le fatu pese, sa avea lea ma ona tusi folau i so’o se atunuu ua o’o i ai i le lalolagi atoa, ma ua atoa le 75 tausaga o lona soifua, ma ua fa’amautu atili ana pese ma ua fa’aauau pea lana lea taleni e nai ona aloalii o Tinifu ma Taumata.