Pago Pago, AMERIKA SAMOA

SAILIA MAI TAGATA FAIGALUEGA A LE TAYLOR FARMS NORTHWEST INC. - AMERIKA SAMOA

Ua mae’a fa’asalalau i le tatou nusipepa Samoa News avanoa ua mafai ona toina atu e le Taylor Farms Northwest Inc. i Kent Washington, mo nisi e fia galulue ai, mai le tatou malo o Amerika Samoa.

O i latou ua mafai ona talia lea fa’atalau’ula atu a le Taylor Farms, ua i ai tusi talosaga ua mafai ona fa’atumuina i le Ofisa Loia o Moorse i le nofoaga sa i ai le Ofisa Loia o le U’una’i, i Nuuuli.

O le a mafai ona fa’atumu lau talosaga, ma fa’ailoa ai lou agava’a, ua i ai fo’i ma fa’amaumauga e ao ina mo’omia e iloga ai, o lo’o malosi lelei oe e te faigaluega, ae ua totogia atu le pasese mo lou malaga mai e le Taylor Farms Northwest Inc.

Na maua lo’u avanoa lelei, le sui o le tatou nusipepa i Amerika Samoa e asia ai totonu atoa o le Kamupani lea i Kent, ina ia mautu le manatu, e le o fa’ataga faia le tiute o le Taylor Farms mo le fanau talavou, ma nisi fo’i o le mamalu o le atunuu ua fai aiga, lea o lo’o a ulua’i malaga mai, ma isi e to’ai taunuu mulimuli mai.

O le susuga le Peresetene o le lala o le Kamupani a le Taylor Farms i Kent, David Lawrence, sa mafai ona ia fa’ailoa mai ni mea taua e tusa o le latou Kamupani. “O le Taylor Farms o se Kamupani e $5Piliona lona tau o lo’o ua fa’atautaia ai nei i le tulaga o maketi ma fa’afetaua’iga. I le tulaga o fefa’ataua’iga, ua tula’i mai le Taylor Deli Produce i le tasi o le to’atolu o tagata uma i Amerika atoa ua latou tausamia e tusa o fa’amaumauga o le faitauga o le atunuu i le 2020.”

“Ua matou mana’omia tagata o atumotu ae maise ai lava tagata Samoa aua ua matou fa’amaonia le malosi o latou tino e faigaluega, o le fa’amaoni i o latou taimi e fa’atuatuaina ai e matou e fa’atino ai faiva i le galuega, ua i ai fo’i nisi o alo o Samoa ma Tonga, ua mae’a faigaluega ia i matou, ua matou fa’amaonia ai nei mea lelei i atali’i ma afafine o Samoa o matou galulue.” O a Lawrence lea.

“O le aofai o le aufaigaluega o lo’o sailia e 300, peita’i, e fai si umi o le fa’ata’amiloga o le aumaiga o nei tagata uma, ona o le faigata o avanoa ua maua mai e o ese mai ai sui ua lautogia mo avanoa faigaluega ona o le puipuiga ma avanoa maua mo le Covid-19 i Amerika Samoa.” O se fa’amatalaga lea a Lawrence.

“O le taumafaiga lenei, e le toe motu le manana’o atu o le Taylor Farms Northwest Inc mo ni tagata faigaluega, poo le a lava le tulaga e i ai lenei taumafaiga i lona tau, ua fa’amauina i fa’aiuga o matou fonotaga faale - pulega o le Kamupani atoa, lea e 29 ona falegaosi oloa ma fa’ato’aga, o le a faaauau pea lava ona aumaia latou tagata faigaluega moomia mai Amerika Samoa ma Samoa pe afai e mafai ona maua ni o latou visa.” O se toe fa’amatalaga lea a Lawrence.

O nisi sa faailoa mai ua maea i ai o latou visa mo tafaoga ma asiasiga i le US, ae le o nisi e mafai ona faigaluega. Ua i ai le avanoa mo nei sui uma e talosagaina ai le avanoa mo se numera mai le “I 94” pepa fa’atumu a le Matagaluega o le Puipuiga o le Saogalemu Fa’alotoifale poo le Homeland Security, o lena fo’i pepa fa’atumu e mafai lava ona e mauaina i luga o laina o feso’ota’iga tau Initeneti.

Sa mafai foi ona auai mai I lenei asiasiga ia se tasi o alo o Amerika Samoa, le susuga Bernard McFarland, le pule sili o fale tu’u oloa (warehouse). O lea asiasiga, na faatautaia e le pule sili o le Taylor Farms, o le 

O le falegaosi mea taumafa o mea’ai paleni, poo Deli Foods, e lima ona vaega tetele. 

Ua fa’amautinoa mai e Lawrence i lana saunoaga amata, “O le falegaosi mea taumafa paleni lenei a le Taylor Farms, o lo’o ua lalamua i ana oloa o alumia ma polofiti maua a Kamupani uma a le Taylor Farms atoa. O le ala fo’i lea o le talia mai e le Komiti Fa’afoe Ulu o le matou fa’aiuga ina ia aumaia uma i Amerika Samoa matou tagata faigaluega, ae totogia atu pasese, mea e faia ai latou tusi folau, fa’atasi ai ma le totogia o latou nofoaga mo le vaiaso e tasi, se’ia maua ni latou tupe e fa’aauau ai ona totogia latou fale mautotogi mo le nonofo ai ma faigaluega iinei.”

Ua fa’ailoa mai foi e Lawrence, “Pe afai ua matou manatu ina ia fa’aalu lea tele o le tupe, ona silafia lea e le mamalu ma le pa’ia o aiga o lo ua fa’amatu’u mai o latou aiga i lenei taumafaiga, o lo’o ua matou manatu i le pisinisi, ona e sili ona i ai tagata faigaluega nai lo le taumafai e toe tau amatalia nisi faiga fou e fa’alava ai le aofai o tagata faigaluega ua tu’ua galuega ona ua tetele fo’i vaega tupe ua maua e i latou e nofo fale ma le faigaluega talu ai penefiti o le Covid-19 i le setete lava ia o Uosigitone.”

Sa manatu i tatou Amerika Samoa ua na’o i tatou o a’afia i nei ituaiga o fa’afitauli, ae peita’i ua iloga nei, ua le fuatasi i tatou i le fa’aletonu lea, ua oo mai lava i nei setete uma o le Malo tele, ua i ai le fa’afitauli nei tau le le toe fia faigaluega tagata, ae tali alamanuia ua maua mai ona o le Covid-19.

O le umukuka ma le itu atoa o le Taylor Farm o lo’o gaosia ai meataumafa paleni e oo i salati fuala’au ‘aina ma taga pepa o fuala’au ‘aina ua mae’a tipitipi ma fa’atagapepa mo le la’u atu e fa’atau atu i faleoloa i le mamalu lautele, e fa’aea malulu uma lea itu. O le Potu Teu Oloa Siiatoa e le fa’amaluluina, ae malulu lava le tau o Uosigitone latou.

Pe afai e to’ai taunuu mai le ulua’i aumalaga, o le a fa’afeiloa’ia e le Pulega ma o latou faletua. A mae’a ona auina atu lea i nofoaga ua mae’a fa’atulaga, ma ua fa’amauina fo’i le fa’amatalaga ua mae’a fa’ailoa mai e le sui talosaga i lana talosaga mo se avanoa, e tatau ona ta’ito’atasi lava le tagata faigaluega i lona potu, ma ua fuafua fo’i fale ma latou potu i le aofai o tagata faigaluega ua masii mai.

Mo aiaiga uma lava o latou galuega ma le totogi amata ua mae’a malilie i ai i latou i a latou talosaga mo galuega ua sauni mai e faigaluega ai. 

Ua fa’ailoa mai fo’i e Diaz, “A o mai i latou nei e sailia lava mea ua fiafia i latou ua agava’a e faia, e le o ni tiute mamafa pe faigata, ae mautinoa o le a i ai o latou lagona e fia suia mai i se isi faiva, ina ia maua fo’i le avanoa, a misia mai se tagata e tiute i lena itu o le auaunaga, ae o lo’o ua silafia fo’i e i latou ona fa’atino mai lena tiute. O le galuega e fa’asolo aga’i i luga lau taumafaiga, afai lava e mautu lou fa’amaoni ma le galue malosi e le tia’i galuega, e fa’apena ona si’itia lou totogi ma lou tulaga.”

O le molimau ola a le ali’i pule sili o Vladimar Diaz, “Na ou maua le tofi lenei, ae sa ou amata mai lava mai le gaosiga ma le la’uina mai o fuala’au ‘aina ma le sapalai e gaosia ai mea’ai, i lo’u amata ai ona faigaluega mo le Taylor Farms.”

O lana tala, “Afai ua mafai ona faia mo a’u e leai ni ou tusi pasi maualuluga, e leai fo’i se mea e mafai ai ona taofia so’o se tasi o malaga mai, lona le mauaina o lea tofiga aua, o lo ua va’ai toto’a le pulega i fa’amaumauga uma o lau galue ai.”

O lo ua fa’ailoa mai, o le totogi maulalo lava e amatalia ai tagata faigaluega o le $15. i le itula, ae o i latou e i ai fa’amaoniga o latou tusi taulima mai sa galue ma ua lelei o latou silafia ma tomai i galuega fa’apenei, e mafai ona oo atu i le $18. i le itula o latou totogi amata.

“O le mea sili ua mana’o i ai lo’u to’alua, o se tamaitai lalelei mai Samoa, afai e oo mai ona tagatanuu, e tatau ona faia lelei se fa’atasiga e ave ai i latou e a’ai lelei i le Buffet ma fa’amasani ma le pulega, ina ia mafai ona maua lo latou avanoa e fa’ailoa mai ai ni o latou manatu e tusa o le latou avanoa ua maua mai, ma soo se isi lava fa’afesili tau le latou galuega o le a galulue ai.”

FAFAGAINA E LE DYNASTY CAR CLUB & ANA PA’AGA - TAGATA NONOFO SOLO I TACOMA:

I le aso Toona’i na te’a nei sa mafai ai ona tutu fa’atasi nisi o Kalapu Ta’avale a alo o Samoa i Washington State nei, le Dynasty Car Club ma ana pa’aga o le Pacific Savage, o le kalapu o e ti’eti’e pasika, ina ia latou Fafagaina ma fa’asoa atu nisi o mea e moomia mo le tausiga o le soifua maloloina lelei, ia i latou e leai ni aiga, ae o lo’o nonofo solo i lalo o auala laupapa, autafa o alatele, ma isi nofoaga ua matauina e i latou ua avea ma mea e nonofo ai i latou.

“O se galuega lenei ua faia ina ia fa’atino se alofa i nai nei uso ua maumau solo, ua mautinoa lo latou mana’omia, ma avea lea avanoa e faia ai se galuega lelei e logomalie fo’i i le fatu ma le agaga, aua ua tatou iloa lelei, o lo’o i ai pagatia e feagai pea ma nai nei usoatagata i taimi uma.” O se tala lea a le alii peresetene o le Kalapu Ta’avale a le Dynasty, Charlie Jr.

O oloa na taua’aoina ua aofia ai Ipu Mea’ai ituaiga eseese ua faapusa e 400+, 45+ pusa ua tapena i ai oloa eseese e fa’aaogaina e tamaitai, 40+ pusa oloa ua tapena faapitoa mo tamaloloa ma le 35+ o pusa apainu suamalie ma isi oloa eseese ua mae’a fa’aofi i ai mo le gaosiga lelei o mea taumafa.

O nisi sa fa’apa’aga ma le Kalapu Ta’avale a le Dynasty i lenei fa’amoemoe ua aofia ai le Pacific Savage o nisi o kalapu Tietie Pasika o aofia ai fo’i nisi o fanau a le atunuu.

Peita’i o kamupani sa fesoasaoni e fa’atupe le fa’amoemoe ua aofia ai le Lend a Hand Community Outreach ma le Simplified Staffing. 

Ua fa’ailoa mai nisi o le laulauatofi galulue malosi a le Dynasty i lenei tausaga ua aofia ai le ali’i peresetene o tula’i nei, Charlie Jr. mai Atuu, le sui Peresetene o Victor Tanielu mai Nuuuli, le failautusi o Maple mai Pago Pago ma Mau le Teutupe mai Aua.

O le fa’amalo ma le fa’afetai e fa’auia fo’i i nei alo o le atunuu, i lo latou loto alolofa i nai uso ua pagatia i nei a’ai tetele, e le vale le taui ona o le agalelei, ma e iloga lava alo o le tatou atunuu, e mautu lava le agaalofa e fa’asoa atu i e ua pagatia.