Pago Pago, AMERIKA SAMOA

SEATTLE, Washington--I le taimi nei i le setete o Uosigitone, ua tele kalapu ua fa’atasi i ai atalii o Samoa na lua. Ua matele ina fiafia i latou e teuteuina a latou ta’avale, ma ua fa’atasitasi e foliga mai o se fa’atautaiga o se aiga lautele, ae o le latou agaga fiafia, ina ua mafai ona latou fa’atauina latou aseta taugata ma teuteuina lelei.

Peita’i, ua le tasi se Kalapu Ta’avale ua autasia i ai fanau a Samoa. Ua fitu lelei kalapu i totonu o Uosigitone ma ua fa’apena fo’i ma Alaska, ona ua masani nei setete e lua i le soofa’atasi o alo o Samoa o lo’o alaala ai.

O le susuga Bernard McFarland, lea fo’i e pule sili i le Warehouse a le Taylor Farms Northwest Inc. lea o lo’o latou sailia maia latou tagata faigaluega e 300 mai le tatou atunuu, o ia fo’i lea o le Peresetene o le Kalapu Ta’avale sili ona to’atele a le Muamua Le Atua.

O le latou galuega masani e faia o le fa’atasitasi lea ma latou tapena esea le lapisi i nofoaga o lo’o fa’amautu i ai e leai ni aiga, ae ua nonofo ma maumau solo i lalo o ala laupapa, autafa o alatele, ma isi nofoaga e mafai ona fa’atutu ai latou fale’ie ma nonofo ai. E ese mai lea, ua latou tapenaina ni fa’amomoli o le alofa, ma latou o atu e tufatufa ia i latou o maumausolo ma ua faigata ona maua se tupe ona e le o faigaluega.

“O le agaga masani o tatou i Samoa, o le alofa ma le lima foa’i. O le ala lea e faia ai nai matou nei fa’alapotopotoga, o mea e masani ona fa’afiafiaina o matou loto pe afai ua fa’amanuia le Atua i galuega ma ua gafatia ona fa’atau sa ta ita lava ta’avale. O le ala lea e toe agaga ai e tuufaatasi o matou loto ae matou asia nai uso ma tuafafine o matua fo’i ua maumau solo, ma ua mautinoa lava e mana’omia le fesoasoani,” o se tala lea a McFarland e tusa o le agaga tonu e fa’apotopoto ai i latou.

“E le tu’ua le agaga e pei o se aiga to’atele. E aoga lea e matou te fetufa’i ai i ala e fa’aleleia ai o matou aiga, ma fefa’asoa’i i ala e mafai ai ona teuteu ma fa’aumiumi ona lelei pea ma aoga matou masini mo le tausiga o aiga. O le to’atele fo’i o matou matutua i nei fa’alapotopotoga, matou te fuatuaina lava nai fanau talavou, pe a va’aia ua amata ona tau se’e ese atu mai le fa’avae o le soifua lelei ma fa’amaopoopo latou mafutaga fa’aleaiga.” O sana toe fa’aopoopo mai lea e tusa o le aoga foi o le fa’atasitasi.”

“E i ai lava fa’afitauli e feagai ma nai uso talavou, fa’ato’a oo mai ma ua galulue malosi ma maua tupe i lima, e va’aia loa e matou e i ai se mea e ono fautuaina ai, e le tu’ua fo’i lena uso e pa’u atu, ae fa’amaopoopo mai. O tatou e lagona le alofa fa’ale-uso, ua fusia fa’atasi ma le alofa fa’aleaiga.” O sana tala fiafia lea ona o le fa’atasiga e aoga mo le mafutaga.”

O le Kalapu a le Muamua le Atua la lea o lo’o avea ai Bernard McFarland ma latou peresetene. O lo ua i ai fo’i ma le Spartans Car Club, o le Ulafala Car Club,  USO Fealofani Car Club, Dynasty Car Club, Island Pride Car Club ma le Sin City of Las Vegas Car Club.

O nei uma lava Kalapu Faita’avale, ua mautinoa e to’atele atalii o Samoa ua aofia ai. Ua latou fagaina fo’i e maumau solo ma ua latou taumafai i ala eseese e vaai toto’a ai nisi ala e mafai ona fa’atino ai e i latou latou tautua mo le mamalu lautele o tagata o nei setete.

E matele ina faia fa’apotopotoga nei e pei o fanau mai a’oga sa fa’au’u ai i Amerika Samoa ma Samoa, o nisi ona o aiga, ae o nisi o afio’aga e malaga mai ai i Samoa na lua. Poo le a lava le mafuaga na fa’atasitasi ai ma amata se Kalapu, ae o le mea ua iloga mai, o le agaga faaleaiga e afua ai ona amatalia e i latou nei fa’atasiga.

O le masani o fa’aiuga o vaiaso ta’itasi e faia ai latou galuega tautua lautele. A mae’a ona faia lea o latou solo ta’avale mai lea nofoaga i le isi nofoaga o lo’o aumau ai nai tagata maumausolo, e fa’atino ai latou galuega fa’amama ma le fagaina o i latou uma.

O le to’ai taunuu mai o uso nei o le a fa’afaigaluegaina e le Taylor Farms i le aso, Aso Lua Aukuso 31, 2021 lea ua mae’a fa’alauiloaina, o le a fa’atasia uma ai Kalapu uma nei ua mae’a i ai sui i le Setete o Uosigitone ina ia latou fa’afeiloa’i i uso ma tuafafine o le a to’ai taunuu mai i malae va’alele i Seattle/Tacoma.

O se mea lelei tele lea mo se ata o le a fa’alauiloa atu ai le to’atele o e ua auai i nei Kalapu, i latou o le a mafai ona auai, mai kalapu eseese ua i ai sui totino i Uosigitone nei, ma o lo’o avanoa mo lea fa’amoemoe.

Ua fa’ailoa mai e to’a 31 i latou ua maua nofoa e malaga mai i lea va’alele, ae to’a 40 i latou ua mae’a totogia o latou pasese, ae o lo’o fa’ailoga fesili avanoa e malaga mai ai.

O lo ua tumau pea le fa’anaunauga e fa’aauau lava ona la’uina mai sui uma ua mae’a ona talosaga mo nei avanoa, ae o lo’o ua tatalia avanoa o nofoa i va’alele mai Pago Pago i Honolulu, aua o lo’o tele lava avanoa mo le malaga mai i Hawaii i SeaTac.

O so’o se taimi o le a mafai ai ona oo mai ni sui mai Samoa, ua fa’alogoina le tala, e tatalia uma lava e kalapu Ta’avale uma i Uosigitone i latou e malaga mai.