Pago Pago, AMERIKA SAMOA

TO’ATOLU MOLIA I LE FA’ALAVELAVE MALIU AI SE ALII I GUAM - 2 ATALII O SAMOA

E to’atolu alii talavou sa saisaitia ina ua maua atu se tasi o lo’o manu’a i fafo ane o le fale’aiga Kings Restaurant i Tamuning, Guam.

Ina ua to’ai taunuu atu leoleo i lea nofoaga sa lipotia mai ai se vevesi, ua maua atu le alii talavou e 23 tausaga le matua, ua taoto mai ua fa’amanu’alia ae ua matapogia fo’i. Peita’i e le’i toe malamalama mai lea ali’i talavou, na mulimuli ane ua fa’ailoa mai ua maliu lava o ia i ona manu’aga, o se tala mai alii foma’i mai le Guam Medical Hospital.

Fa’ailoa mai e le suesuega a ali’i Leoleo mai le Guam Police Department, le vaega o ali’i leoleo suesue, na fa’ato’a amata ai ona sailia e i latou nei ali’i e toatolu, e tusa o nai molimau a nisi sa va’ai i le mea na tupu.

Na sailia le laisene o le ta’avale, na matauina e se tasi sa sola ese mai le nofoaga o le fa’alavelave, ma ua matauina ai, o le laisene a se tasi o alii o fitafita tiute i le US Air Force i Guam lava. 

O i’ina sa fesoasoani ane ai loa ma le vaega a le Air Force Office of Special Investigations, i le sailiga a le DPS a Guam, sa’o o sui sa i ai i le taimi o le fa’alavelave.

O lo ua maua nei le to’atolu sa i ai i le taimi ole fa’alavelave ua maliu ai lea sui talavou, Fiataugaluia Ah Kee 31 tausaga le matua, John Mike Muliaga 22 tausaga le matua ma Joseph Decady, 36 tausaga le matua.

Ua saisaitia nei ma ua loka le to’alua o nei sui, Fiataugaluia ma Muliaga, i moliga o le fa’ao’olima matuia, faufau e fa’ao’olima i le sui ua a’afia, moliga ua fa’amaonia le fa’ao’olima, ma le amio le taupulea ma le mafaufau i nofoaga faitele ua fa’atupu ai le vevesi.

O le ali’i o Joseph Decady ua molia i lona auaufa’atasi e fa’ao’o le fa’alavelave, ma sa saisaitia ae ua toe tatalaina o ia i tua.

O le ali’i lea o John Mike Muliaga, sa asiasi fo’i o ia i El Paso mo sina taimi e le’i mamao atu, ona o lo’o tiute ai lona matua.

O lo’o ua fa’aauau pea lava suesuega auiliili i lea fa’alavelave ae ua fa’ailoa mai e leoleo ua faauia nei i le Ofisa o le Loia Sili lea lava mataupu mo le fa’auia atu i le faamasinoga.

MAUA LE FA’ATUPEGA E FA’ALELEIA ATILI AI GALUEGA TAULIMAINA O VAILA’AU OONA E ONO A’AFIA AI LE SOIFUA:

O le fa’aiuga o le masina o Setema sa fa’amautu mai ai se tinoitupe toina mai le matagaluega o le Homeland Security a le Malo Tele e $67,148. ina ia fa’aaogaina e fa’aleleia ai le fela’ua’iga ma le puipuiga mai o le vasega o le aufaigaluega ma le to’atele o le atunuu e ono a’afia i vaila’au o’ona e aafia gofie ai le soifua lautele o le atunuu pe afai e sese ona lafoa’ina pe taulimaina fo’i i taimi ua fa’aaogaina ai.

O ituaiga vaila’au ma oloa nei e lisia i le lisi o mea o’ona e fa’asaina fo’i ona fela’ua’ia ma e le mafai ona femalaga’i ma se tasi i luga o va’alele, a maua o le solitulafono fo’i fa’avaomalo pe afai o lo’o e taulimaina na oloa. 

O le polokalama lea e toina mai ai lenei fa’atupega, ua mafai ona ofoina mai ai nei fesoasoani fa’aletupe mo setete, teritori ae maise o nofoaga fa’apitoa o lo’o alaala uma ai sui totino poo sitiseni o le Iunaite Setete o Amerika, ina ia fa’aleleia atili le taulimaina o Hazadrous Materials nei, ia lelei fo’i ona fa’atino ala e mafai ona lafoa’ia ai pe afai ua le toe fa’aaogaina. O ala nei ua mae’a fa’atulaga e tia’ia ai nei mea uma, ua mae’a fa’atulafonoina, ma e le mafai ona suia e se setete poo se teritori, a suia o se solitulafono matuia lea.

Ua aofia i le faaaogaina o lenei vaega tupe, ua fa’ataga ona fa’aleleia atili ai le faaaogaina, ala e taulimaina ai, ma ala e fa’aleleia atili ai le fuafuaga fa’ataoto mo le fa’aaogaina o nei mea uma se’ia oo lava i le tiai’ina, ia le solituina tulafono.

Ua mafai fo’i ona fa’aaogaina lea tinoitupe e faia ai se aoaoga fa’apitoa mo sui uma o lo’o aofia i le taulimaina ma le fa’aaogaina fa’atasi ma le tiaia o nei vaila’au oona, a’o le’i oo ina uma le taimi e fa’aaogaina ai.

“Afai e i ai se mea e ao ina mua’i faafetaia, o le 18 masina lenei ua tuuina mai ina ia fa’aleleia ai uma le taulimaina, teuina ma le fa’aaogaina, fa’atasi ai ma le fe’avea’iga o nei ituaiga o vaila’au oona i totonu o le atunuu, atoa ai ma le tia’ina o nei mea uma, ia fa’amalosia ona tulafono uma aua le saogalemu o le lautele o taulimaina ma le lautele o le atunuu e mafai ona fa’afia ai pe afia o le a le malupuipuia nei vaila’au e pei ona fa’atulafonoina ai.” O se tala lea a le tamaitai Faipule o Amerika Samoa i le Konekeresi a le Malo Tele, Uifa’atali Aumua Amata.

“Fa’afetai tele i le mataala o ta’ita’i o le atunuu, Kovana Lemanu Mauga ma lona sui, ae maise fo’i le susuga le fa’atonu o le Homeland Security a Amerika Samoa, aua o lea ua gafatia ona toina mai lea vaega tupe tele mo lea ituaiga o galuega i totonu o le teritori. O lo’o mataala lava i tatou i nei faiva, aua e le faigofie pe a oo ina le gafataulimaina nei ituaiga o vaila’au oona i totonu o le atunuu.”

O lana toe fa’afetai o le fa’amalo lea i le susuga le Failautusi o le PHMSA Pete Buttigieg, le susuga le Sui Pule o le PHMSA Tristan Brown mo le la’ua lagolagosua i lenei taumafaiga ia maua se vaega tupe mo le tatou malo fa’ateritori o Amerika.

MAUA ALAGATUPE A LE MATAGALUEGA O LE VAOMATUA & LE GATAIFALE MAI LE RAWA:

O le aso Faraile na te’a sa fa’auia mai ai le fa’amalo a le tamaitai Faipule i le Konekeresi UIfa’atali Aumua Amata i le tapua’iga a le atunuu ae maise lava le sogasoga fo’i o le ali’i fa’atonu o le Matagaluega o le Vaomatua ma le Gataifale, Taotasioatua Archie Soliai ma lana matagaluega, aua o lea ua mafai nei fa’aulu se pili o lo’o ua sapaia atoatoa e Uifa’atali Amata ma nisi o sui iloga o le Konekeresi, e mafai ai ona fa’amatuu mai nisi faitau Miliona o fa’atupega e fa’aagaaga lea mo le fa’aleleia o tautua fa’asao o le Vaomatua ma le Gataifale i le atunuu mai le RAWA, Recovering Americas Wildlife Act HR 2773.

I le taimi nei, o le pili lea e mafai ai ona toina mai le $3.6miliona i tausaga ta’itasi ina ia fa’aleleia, puipui ma fa’atumauina le ola o meaola uma i le vaomatua ma le gataifale o le atunuu, e pei ona lisia uma i le Fuafuaga fa’ataoto a le DMWR o le tatou malo.

O le fa’atupega o lenei tausaga, ua mafai ai onafa’aaogaina lenei vaega tupe ina ia fa’aleleia atili ai le tautua a le Matagaluega ia fa’atumau ma tausia lelei uma meaola i le vaomatua ma le gataifale o le atunuu. O meaola fo’i ua matauinaua tauau ina mou atu, e ao ina toe galueaina ni fuafauaga e toe fa’atupeteleina mai ai.

Ua fa’afetaia tele e le tatou Faipule i le Konekeresi le fesoasoani ma le galulue malosi mai o le susuga le Fa’atonu Taotasi Archie Soliai ma le aufaigaluega mo lenei fa’amoemoe, ae maise ai lava le ali’i Foma’i Suesue tau meaola i le vaomatua ma le gataifale Adam Miles, aua o le galuega mae’ae’a sa latou fa’atinoa ina ia vave ona pasia mai lea fo’i vaega tupe mo le fa’amoemoe o le matagaluega.

“O meaola uma o lo’o ola i le vaomatua ma le gataifale o le atunuu, o se tasi lea vaega tele e fa’atamaoaigaina ai ma fa’amatagofie atili le tatou atunuu, afai ae pasia a’ia’i mai lenei pili ua fa’aulu, e le toe fesiligia le fa’aaoga tatau e le tatou Matagaluega o lenei fa’atupega tele mo le fa’amoemoe ua mafua ai ona talosagaina. Ia fa’asaoina lava ma fa’apolopolo meaola uma o loo ola fesootai ma o tatou vaomatua ma le gataifale.” O se toe upu mai lea a le tatou sui i le Konekeresi Uifa’atali Amata.

O le RAWA ua iloga le latou fesoasoani tele i so’o se setete ma teritori o le Iunaite Setete atoa, ina ia fa’aleleia atili le olaga o meaola uma o lo’o i vaomatua, gataifale ma vaitafe fa’aepa punavai o setete eseese, ma ua fa’aaogaina nei meaola uma, la’au ma manuvaefa, iniseti ma mea fetolofi, e oo i le gataifale ona ona sosia uma o i ai, e fai ma va’aiga o le matagofie o le Iunaite Setete o Amerika mai tausaga e tele. 

O le RAWA ua avea nei ma se isi una’iga malosi tele e fa’aleleia atili ai lea itu o le matagofie o Amerika ma lona talafatai ma ala eseese o le soifua laulelei o lo’o ua sapaia ai.

I le tulaga o i’a mai le gataifale, o se tasi lea o vaega tupe o le a toe atina’e ai le tulaga o i’a ua tau le toe va’aia ona ua vave tele ona fagotaina, ae ua tuai le toe ola lauolaola mai o i’a ia lapopo’a fa’ato’a fa’aaogaina.

SUIA LE TAIMI MO LE SUEGA COVID-19 MULIMULI I HAWAII - MALAGA AI I AMERIKA SAMOA:

O le suiga fou ua i ai nei mo e malaga uma i Amerika Samoa mai Hawaii, ua fa’atulaga ina ia faia ai le suega mulimuli a’o le’i malaga i Pago Pago i le 24 itula malaga loa, ae ua le faia e tusa o le 48 itula malaga ai i Amerika Samoa.

O le suiga lea sa faato’a toe suia nei ina ua mae’a maua le to’atolu o tagata i le Covid-19, o e na malaga atu mai Honolulu, e toe taliu atu i aiga.

Ua faato’a fa’ailoa mai fo’i lea suiga i le taimi na faia ai le fonotaga fa’apitoa i le va o le Fono Faitulafono ma le faigamalo, ma sui o le Komiti Fa’afoe o le Covid-19 a le tatou malo e aofia fa’atasi ai sui o le Malo i ona matagaluega eseese ae maise ai o le Matagaluega o le Soifua Maloloina ma Foma’i.

Na fesiligia e Senatoa Faiivae Galea’i le Komiti o le Covid-19 pe o i ai ni suiga ua fa’atula’ia i le tautua mo i latou e malaga mai i Amerika Samoa, talu mai ona maua sui nei e to’atolu ua faamaonia mai a latou suega Covid-19.

Ua fa’ailoa mai lona taofi, “E foliga mai o le sui ua mae’a faia lana suega e fa’amoemoe o le a malaga mai, ua le fa’asaina ona fealua’i, ae ua toe fa’ataga lava e alu e fai ana fa’atauga ma isi mea uma, ua mafua ai ona maua i le Covid-19 ae ua sau lava.”

O le taimi lea sa fa’ailoa ane ai loa e Dr Elizabeth Lauvao, “O le afuaga lea o le toe faia o le suiga fou lea ua fa’atulaga e le Fa’atonu o le Soifua Maloloina le suiga i le taimi e faia ai le suega mulimuli fa’ato’a sau ai le sui i le malaga i Amerika Samoa. O le suiga ua toe 24 itula malaga mai, fa’ato’a faia le suega mulimuli.”

E tele fa’afesili sa fa’auia atu i le Komiti Fa’afoe e tusa o le TalofaPass lea ua fa’atulaga ai mea uma e moomia ona faia e le tagata a’o le’i malaga mai Amerika Samoa, ma ua le toe faia ai se nofova’ava’aia i Honolulu fa’ato’a o mai ai le pasese i le teritori.

Ua tasi lava le tali ua fa’ailoa mai e sui iloga o le Komiti Fa’afoe a le Covid-19, “Ua le lava le tupe a Amerika Samoa e totogia ai le nofo va’ava’aia i Honolulu fa’ato’a o mai ai le malaga.”

Ua fa’ailoa mai e le fa’atonu o le Medicaid le tau aofai o nofova’ava’aia e 8 sa faia i Honolulu mo malaga uma ua mae’a, e latalata i le $20miliona na fa’aalu ai a le Malo. Peita’i afai ae o le aofai lea o malaga e faia i le taimi nei ua fa’aaogaina ai le TalofaPass, e na’o le $7miliona mo le 4 tausaga.

Mai malaga e lua ua mae’a faia a le Hawaiian Air talu mai ona fa’aaogaina le TalofaPass e t;a 196 i latou o pasese ua toe ave’esea mai le lisi ona o lo ua mae’a maua ane suega sa faia e i latou e maua i le Covid-19.

Ua fa’amalie atu fo’i le ali’i Loia Sili i le mamalu o le atunuu o lo’o fia malaga mai i aiga, ona o le faigata tele o le ala ua fa’atulaga ina ia toe gafatia ai ona fo’i mai i fanua ma aiga. Peita’i e leai se isi mea e tatau ona faia pe afai o le fa’anaunauga o tagata uma ma ta’ita’i o le atunuu, ia le ofi mai lava le Covid-19 i Amerika Samoa.

Ina ua mae’a fa’afo’isia mai le 2,389 tagatanuu i o tatou aiga ma laufanua, ua fa’ailoa mai, ma le agaga fa’afetai e le Komiti Fa’afoe, o lo’o fa’atumauina lava le mama o Amerika Samoa mai le Covid-19 o pepesi nei i le lalolagi.

Ona o lo’o fa’atulaga le tolu lava suega e faia mo sui uma e fia malaga mai i Amerika Samoa, o le nofo ai i se nofoaga e sefe ae e te le malaga, o se faiga lea ua mafai ona gafatia tausia ai le tulaga mama pea o Amerika Samoa mai le fa’ama’i Coronavirus.

Ua faailoa mai e Ala’ilima Utu, le Loia Sili, mai le 56,000 o tagata uma o le faitauga o Amerika Samoa e tusa ma le 5% o tagata ua mafai ona fesoasoani i ai le malo tele i ana fesoasoani tau tupe o le Covid-19, faitau miliona ua mae’a fa’aalu mo le to e fa’afo’ia mai o tagata o le atunuu o loo opea i fafo ona o le Covid-19.

Ua fa’ailoa e Peresetene Tuaolo Fruean, “O le galuega a i tatou e ao ina fa’aautu i le puipuiga o tagata uma o le atunuu mai le Covid-19, ae le o le puipui o le tupe.”