Pago Pago - AMERIKA SAMOA

ASO LULU TALUAI - TAOFIA AOGA AE FA’ATA’ITA’I LE FAIGA FOU O AOAOGA ALE DOE:

O le Aso Lulu, Oketopa 27, 2021 na faataunuu ai se fuafuaga a le Matagaluega o A’oga, e taofia ai le auai atu o fanau aoga I aoaoga I totonu o potu aoga, ae ua fa’aaoga komepiuta ma telefoni, mai o latou aiga, e fa’ataunuu ai aoaoga.

Pe afai ae lutia le atunuu i a’afiaga o se fa’ama’i pipisi, o le a faaaogaina loa lea faiga, Aoaoga i Upega Tafa’ilagi ma ala fa’ata’alise o sootaga fa’ainiteneti i aoaoga uma.

O le tapenaga lenei sa fa’amata’osi muamua i le vaitau na fa’apea o le a lutia vave le atunuu i le Covid-19, ma sa latou amata ai ona taumafai e muamua fa’aauupegaina aiga i sootaga o le Initeneti fa’atasi ai ma mea faigaluega o masini komipiuta ma Ipads ma Iphones e mafai ona fa’afeso’otaia ai mai ai upega tafailagi i le va o le fanau ma tamaiti aoga, ia mafai ona fa’ataunuu latou meaa’oga.

Lea ua atoa le tausaga talu ona tau amatalia lea sootaga o a’oa’oga e fa’aaoga ai ala tafailagi, ae ua fa’ata’ita’ia nei le tapenaga a le Matagaluega o A’oga i le Aso Lulu na te’a nei.

O le la’asaga na faia muamua, o le tufatufaina lea o laptops poo computer feavea’i a le fanau aoga ina ia fa’amalamalama ma amata tima’ia le fanau i ala o le a feso’ota’i atu ai faia’oga ia i latou. O nisi o fanau ua fa’aaogana Ipads, mo vasega laiti. 

A i ai foi fanau i totonu o a’oga, e mafai ona vala’au i ai e faaaogaina ai le sootaga o le messenger, po’o se avefe’au fa’alilolilo, poo a mai ma avatu i ai se fa’atonuga pe a tu’ua le a’oga. Peita’i a alu ese le fanau mai le lotoa a le a’oga, na le mafai ona va’aia lena fe’au, aua o lo ua motusia le sootaga wifi poo le malosi o le sootaga initeneti i totonu o le a’oga, pe o lo’o ua tape fo’i lana masini.

E pau lava tagata o le a o atu i le lotoa a aoga o faiaoga, ae afai o le a maua se faia’oga i le fa’ama’i, o le a le mafai fo’i ona toe alu le faia’oga i le lotoa a le a’oga, ae maua pea le so’otaga lenei pe afai e i ai le Initeneti a le faia’oga.

Ona e le’o tofusia uma fanau a’oga ma masini e fia fa’aaogaina mo aoaoga fa’ata’alise fa’avetuale, o lea ua tapena fo’i le faia’oga mo vasega e le o tofusia ma masini kompiuta feavea’i, ia tusitusia lesona ma taua’aoina i fanau a’oga o vasega e le o tofusia i tufatufaga o komipiuta feavea’i poo laptops ma Ipads.

O nisi o lesona o le a fa’auia uma lea i le tautua fa’atelevise a le KVZK-TV, ae maise i vasega a le ECE ma isi fo’i vasega maualuluega.

TATALA MAI E SAMOA FEMALAGA’IGA I LE VA MA PAGO PAGO, AMERIKA SAMOA:

I le aso Faraile na te’a ua fa’alauiloa mai ai ua toe tatalaina nei le fa’asa e le tamaitai Palemia o Samoa Fiame Naomi Mata’afa, ina ua ia mautinoa lelei, ua mavae ese atu le tau a’afia o Amerika Samoa i le Covid-19, lea na maua le ulua’i sui ua ulufale atu ae fa’amaonia lona suega o le Covid-19 i le masina ua tuana’i.

O le saunoaga a le Palemia o Samoa, ua ia fa’ailoa ai, “Ua mautinoa nei e le’o toe lamatia le saogalemu o Amerika Samoa i le Covid-19, aua ua mae’a lava isi suega mulimuli mai a le sui  na ulufale mai ma le Covid-19, ae ua le toe fa’amaonia lona maua i le Coronavirus, ma ua leai foi nisi ua pesia i le Covid ona o lona sui.”

Na fa’ataunuu lava malaga a Kamupani va’alele, e malaga mai ai sui mai Samoa i totonu o Amerika Samoa, ae o e fia malaga i Samoa, sa matua taofia lea i le vaitau atoa a se’i mavae atu nei. O lona uiga e matua leai lava nisi sa malaga atu mai Amerika Samoa i totonu o Samoa mo lea taimi umi.

O lo ua fa’atulaga nei malaga mai Samoa ma toe taliu i aso Tofi ma aso Toonai o vaiaso ta’itasi, i taimi a Samoa. O lona uiga o aso Lulu ma aso Faraile a Amerika Samoa e fa’atautaia ai nei malaga.

Sa ta’ua e le Palemia o Samoa, le afioga Fiame Naomi Mata’afa, le le faanofovaavaaia o tagata mai Samoa o lo’o malaga atu I Niu Sila.  Ma o lo’o fa’aauau pea ona o latou soalaupuleina ma Niu Sila le mataupu I alo ma fanau o Samoa e faa-sikolasipi I Niu Sila.

KAMUPANI TELEFONI A LE BLUESKY - FA’ATUPEGA MALOSI O LE TAUVAGA TAUSALA A AMERIKA SAMOA 2021-2022

Ua faalauiloa mai nei o le Kamupani a le Bluesky ua avea nei ma fa’amoemoega o le faalapotopotoga o faafoeina Tauvaga mo TAusala a Amerika Samoa (MASI), ina ia fa’ataunuu le latou tauvaga e sailia ai se tausala lalelei flifilia mo lenei tausaga 2021 - 2022, lea e fa’atautaia ia Novema 05, 2021.

O le tau sailiga o se tausala lalelei o Amerika Samoa, sa le fa’ataunuuina lea fa’amoemoe I le 2020, ona o le fa’asa o le Covid-19 i le atunuu, ma ua atoa ai le lua tausaga o tauavea e le tamaitai lalelei o Epifania Petelo le tofi sa ia mua’i manumalo ai mo le tauaga e 2020-2021.

Na tu’ua e Epifania Petelo ana a’oa’oga ae tau’avea lenei tofi maualuga ina ua ia manumalo ai. Ua faapea fo’i ona ia toe fa’amalosi e tau’avea lea tofiga, ma ua tolopoina ai pea le fa’aauauga o ana a’oa’oga maualuluga. Lea la ua maua lona avanoa lelei mo lea tulaga, pe a oo ina mae’a fa’atautaia le sailiga o se tausala lalelei o le atunuu ia Novema 05, 2021.

Sa ta’ua e le susuga ia Justin Tuiasosopo, le pulesili a le Bluesky, I sa latou feiloaiga ma vaega faasalalau I le vaiaso ua tuanai,  o lo ua latou fuafuaina e taua’aoina se tinoitupe e $5,000 ma nisi ituaiga o fesoasoani eseese mo le tauvaga tausala o lenei tausaga.

O le a aofia ai i nei fesoasoani o le Iphone mo le tamaitai manumalo i le tofiga tausala lalelei.

Ua faailoa fo’i le agaga fa’afetai tele o le tamaitai peresetene o le MASI, le faletua ia Meafou Imo, ona o lenei fesoasoani tele mai le BlueSky ma ia faailoa mai, ua aufa’atasi i latou e fa’afetaia lava le foa’i a le BlueSky i lenei tausaga mo le tauvaga tausala lalelei.