Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

2 SUI FA’AMAONIA SUEGA MAUA I LE COVID I LE SUEGA #2 - TO’ATOLU I LE SUEGA #3:

Mai le ‘aumalaga o Novema 18, 2021 ua mae’a maua ane ai le to’alua o sui na malaga atu ua fa’amaonia suega e maua ai verusi o le Covid-19 ia ua mae’a latou suega lona lua, peita’i i le mae’a ai o suega lona tolu ma tatala ai i tua nisi o lea aumalaga, ua toe maua ane le isi to’atolu o sui e fa’amaonia ua maua ai verusi covid-19.

O le suega lona lua sa faia i le aso To’ona’i ua te’a, ae o le tui lona tolu sa faia lea i le aso Lulu. O le tala fiafia mo le to’atele 277 ua tatala i tua, ae o le to’alima lea ua fa’amaonia e maua ai le verusi o le Covid-19 ua fa’aauau ona latou nonofo fa’atasi ma e sa so’ofa’atasi i latou i le taimi o le nofova’ava’aia, mo le isi 14 aso.

E leai se isi toe fa’amatalaga ua mafai ona maua mai le fa’atonu o le Soifua Maloloina e tusa ai o nei sui ua fa’ato’a maua ane ua fa’amaonia suega o loo maua ai verusi o le Covid-19, pau o lea mea ua mae’a fa’anofoesea fa’atasi ma i latou sa feso’ota’i ma i latou i le taimi o le faigamalaga ma le taimi fo’i ua nofova’ava’aia ai.

Ua atoa i ai le to’afitu o sui ua fa’amauina ua fa’amaonia nei suega talu mai le aso To’ona’i ua te’a, mai le taimi na amatalia ai ona tatala feoaiga i le va o Honolulu ma Pago Pago.

Mai le aso 22 Novema, e faitau mai ai le 14 aso e nonofo va’ava’aia ai le to’alua lea ua fa’amaonia suega. Peita’i o le suega lona tolu lea ua toe maua ai le isi toatolu o sui ua fa’amaonia suega ua maua i le Covid-19, ae ua atoa fo’i le 325 o sui ua fa’aulu mai suafa e fia nofova’ava’aia i Hawaii mo le malaga muamua o Tesema 06, 2021.

Mai le to’atolu o nei sui ua faatoa maua i le tui lona tolu e to’a 16 i latou ua taofia fa’atasi ai e faanofova’ava’aia ona sa feso’ota’i ma sui nei ua fa’amaonia latou suega.

Ua tatala nei i tua le isi to’atele o le pasese, ae ua tuu i ai le vaiaso e tasi e le feoai solo ai ae nofo vaava’aia mai tua i aiga.

Mai le to’a 16 ua taofia nei i le fa’anofoesea, ua fa’ailoa mai e Dr Fiona Trail, le ta’ita’i o le fa’anofova’ava’aia, e leai ma se tasi ua iloga mai ai ni auga o le gasegase Covid-19, o lo’o malolosi uma lava i latou, peita’i e ao lava ina faia le galuega ina ia mautinoa a’ia’i e le o sao mai lenei fa’ama’i fita i le atunuu.

O le tolu lea o sui ua toe maua nei ua fa’amaonia suega o le Covid-19 ua atoa i ai le 10 o sui ua fa’amauina, ua maua ai verusi o le Covid-19 e ala i suega ua faia i le teritori, a’o sui uma fo’i e malaga mai fafo.

TATALA EKALESIA FOU EFKS I PORTLAND OREGON - TAELEGA I PETESA:

O le Aso Sa na te’a nei sa fa’atautaia ai se sauniga mamalu e amata ai galuega atina’e a le ekalesia fou “Taelega i Petesa”, i Portland, Oregon ma sa le faia se sauniga a le EFKS i Kent Washington, ma la latou taitai faaleagaga, le susuga Rev. Hector ma Herema Pouono, ae ua matua  masi’i atu uma mo lea fa’amoemoe maualuga, a le auuso i le Ekalesia Samoa fou i Portland Oregon.

“Ona o le matou galuega i Kent nei, le EFKS, o se tasi lea o galuega sa galulue mai ai nisi o aiga ua amatalia ai le galuega i Portland, ma ua avea fo’i o se fa’amalosi’au i le fa’amoemoe ua amata fa’amumu nei, ona matou fa’atasi i ai mo le latou sauniga amata.” O se tala lea a le susuga le Faife’au Samoa Hector Pouono.

O le galuega fou fa’amisionare ua amatalia nei, Taelega i Petesa Fou a le EFKS, e fitu aiga ua loto tetele ina ia latou amata faamumuina le Lamepa ma ua aofia ai:

Misionare o Iona Lea’ana ma le faletua o Peka Lea’ana; Aoao Fesoasoani - Tanu ma Elesa Tofi; Craig ma Tasi Keener; Papali’i Manumalo Ala’ilima; Suli Atulu o le tina matua o lea fo’i mafutaga; Ken ma Omeka Luafutu; Ave ma Malaga Menke ma Paul ma Lagipoiva Cherelle Anderson.

O lea sauniga sa ta’ita’ia e le susuga i le Faife’au Toeaina Fa’atonu o le Pulega a Amerika mo le Ekalesia Fa’apotopotoga Kerisiano i Samoa, Makerusa Porotesano lea o lo’o la’ua tausia le Ekalesia “Ola ia Keriso i San Diego, Kalefonia.

O le Failautusi o le Pulega a Amerika le susuga le Faife’au Leaoga Tanuvasa sa ia si’itia le talosaga mo lea lava sauniga mamalu, ae o le Faitauina o le Upu mai le Afioga a le Atua sa fofogaina lea e le susuga I le Faife’au Samoa Hector Pouono mai le Ekalesia Malua Seattle i Kent, Washington.

O le susuga i le Failautusi o le Pulega Amerika, Rev Leaoga Tanuvasa ma le Faletua o lo’o la’ua tausia le Ekalesia i Hacienda Heights i Kalefonia.

O le Lauga poo le Upu fa’amalosi i le Taelega i Petesa Fou, Portland Oregon sa fofogaina lava lea e le Toeaina Fa’atonu o le Pulega, lea sa ia ta’ita’ia le sauniga Rev. Elder Makerusa Porotesano.

O pese ma vi’iga o le sauniga sa usuina to’atele lava e le fa’apotopotoga i lea fa’amoemoe maualuga peita’i o le ta okeni o le sui tala’au mai le Ekalesia i Kent.

O le nofoaga ua fa’atautaia mai ai lenei Ekalesia Fa’amisionare mo l EFKS ua fa’ailoa mai lona tuatusi ina ne’i sailia e nisi e fia mafuta atu i ai i nisi aso Sa: 4790 South East Logus Road; Milwaukie Oregon, 97222 ma e faia latou sauniga i le itula e 1:00pm i aso Sa ta’itasi.

“O le nofoaga lenei sa tau tuufa’atasia atu ai fo’i le Ekalesia ua mautu nei mo le EFKAS i Portland Oregon nei, lea sa galulue ai le susuga le Fa’afeagaiga Otto Galea’i ma le Faletua ma le fanau. O le tamaitai fo’i o Jacinta Galea’i sa matou faatasi i lea sauniga amata, ina ua mautu mea uma na fesoasoani mai ai mo le tau tuufa’atasia o lea nofoaga mo le ekalesia fa’amisionare nei.” O se tala fiafia mai lea a le faletua o Herema Pouono.

“Tau ina ia silafia e le susuga le Misionare Iona ma le uso i le galuega Peka Lea’ana, o lo’o agaga atu e tatalo pea mo le la’ua galuega  fa’amisionare i le Ta’elega i Petesa Fou nei. Ia fesoasoani mai le Agaga Paia ole Atua ma faatupuina lana galuega ma faamanuia ia te oulua male aulotu ia maua ni agaga se tele mo le Alii. Fa’amanuia le Atua!” O se fa’amanuiaga lea mai le susuga Ainuu Fa’amaile ma Luamanuvae Kolisi Frost, lea sa auai fo’i i le sauniga mamalu, ae o lo’o asiasi mai fo’i ma fa’amautu i Kent Washington mo a la’ua talavai masani.

FAITAUGA O TUI PUIPUIA UA FAIA MO LE MAMALU LAUTELE - MAULALO AI LAVA NOVEMA:

O lo ua matauina mai fa’amaumauga o tuiga o tui puipuia o le Covid-19, ua maulalo ai lava le faitauga o tagata lautele ua mafai ona faia tui nei i le masina o Novema, talu mai le amataga o lenei galuega ae a le puipuigamalu o le atunuu atoa mai le Covid-19.

Ua fa’ailoa mai e le foma’i mo fa’amaumauga o fa’ama’i pipisi i le atunuu, Dr Aifili John Tufa, “Mai le amataga o Novema se’ia oo mai ia Novema 22, ua faamauina ai le aofaiga o tui puipuia ua faia e 1,530, o se faitauga sili lea ona maulalo ua fa’amauina mai mo se Masina talu ona faia tui puipuia nei o le Covid-19, e ui fo’i ona o lea e toe tasi le vaiaso o le masina, ona mae’a lea.”

“E 66.6% pe 33,158 tagata ua mae’a ona faia uma tui e lua mo le Covid-19, 70% ua mae’a faia tui muamua ae o lo’o tatalua le tui lona lua ma le 21.3% e lei migoi mai lava e fai nei tui puipuia, ae o le 8.6% o le fanau lea e i lalo ane o le 5 tausaga le matutua e le o mafai ona tuia i latou.

AMATALIA LE SIFI LONA LUA A LE STARKIST - O SE FA’ATAITA’IGA:

I le vaiaso au te’a na amata ai le Sifi Lona 2 a le Kamupani I’a a le Star Kist Samoa, peita’i ua fa’ailoa mai ua fa’atinoina lea tulaga o se fa’ata’ita’iga amata, pe tua ma ni a.

Talu mai le amataga o le Masina o Iuni 2021 na matua iloga ai ona faigata ona fa’atino galuega masani a le Star Kist ona ua le lava a latou tagata faigaluega, ona taofia ai lea o le sifi lona lua a le Kamupani, ae ua fa’atautaia na’o le tasi le sifi.

Ona o lea fo’i mana’oga tupito sa fa’atagaina ai e le Malo ona o atu sui mamalu o le Star Kist Samoa ina ia talosagaina nisi e fia fai galuega mai Samoa Tuto’atasi e fa’alava ai le latou aufaigaluega. Ua mae’a fa’ailoa mai, ua fa’afaigaluegaina mai lea polokalama fa’apitoa a le Malo ma le Star Kist le to’a 300 o tagata.

E tusa lava la pe ua fa’afaigaluega lea to’a 300 fou, ae ua talia lava fo’i ma nisi o le aufaigaluega  lo’o talosagaina atu avanoa mai le atunuu lautele. Ua fa’afetaia fo’i e Michelle Faist, sui fa’asalalau o le Star Kist le fesoasoani tele mai o ta’ita’i o le Malo mo le latou pagatia sa i ai.

Sa tapunia la le Kamupani i le fa’aiuga o le vaiaso Aso Tofi ma le aso Faraile ina ia matua si’i a’e le fa’afetai mo manuia fa’apenei e maua mai ona o le tele o le fesoasoani ua maua i lenei tausaga. Mo le Kerisimasi ma le Tausaga fou ua fa’atulaga ai le lua vaiaso e tapunia ai le Kamupani ona toe amatalia lea o galuega.

O le aso mulimuli o galuega a le Kamupani I’a a le Star Kist mo le 2021 o Tesema 17, 2021.