Pago Pago - AMERIKA SAMOA

TOE SOSO’O ATU TAIMI MO TALOSAGA I PEPA MEA’AI A LE P-EPT - TESEMA 31, 2021:

O lo ua toe soso’o atu le taimi e mafai ai ona talosagaina e le mamalu lautele o aiga a latou alamanuia mo fanau a’oga, lea e taua’aoina mai ai pepa e talafua ai oloa tau taumafa ma vaiinu mai le DHSS, i lalo o se polokalama a le Pandemic Electronic Benefits Transfer ma e fa’atupe mai e le Matagaluega o Fa’ato’aga a le Malo Tele.

O lea polokalama sa tuu e fa’amuta le talosagaina ia Oketopa 30, 2021 peita’i ua toe soso’o mai nei ma ua fa’amutaina talosaga i le aso 31 Tesema, 2021.

Ua fa’ailoa mai o lea polokalama ua toe tuuina mai ai le avanoa i aiga e talosagaina ai mea taumafa a le fanau sa misia mai le vaitau na fa’aletonu ai a’oga ma motusia ai ona o le fa’asa o le Covid-19, ma ua mafai ona fa’atauina na’o oloa tau mea taumafa ma vaiinu i nei pepa e talafua ai oloa.

Na talosagaina e le fa’atonu o le DHSS Muavaefaatasi John Suisala ia toe soso’o atu le taimi e talosagaina ai e aiga lenei alamanuia mo latou fanau, ma ua maua mai ai le tusi ia Tesema ua talia mai le talosaga ma e fa’amuta ai talosaga ia Tesema 31.

Ua fa’ailoa mai o nisi o nai aiga e agava’a, ae le lava le taimi na atofa mo le talosagaina mai o nei fa’amaumauga ia mafai ona mautu ai lo latou agava’a i lenei alamanuia.

O le tusi na fa’ato’a maua mai ia Tesema 10, mai le USDA, ua talia mai ai le talosaga lea.

O le tinoitupe aofai mo lea polokalama e $6.1 miliona ma ua le a’afia le aofaiga o lea tinoitupe i le toe soso’oga ua i ai nei mo le polokalama.

2 ISI MALAGA A LE VA’ALELE MA LE MELI - AO LE’I OO MAI LE KERISIMASI:

Ua fa’ailoa mai o le a i ai isi malaga e lua ua fa’aopoopo nei i malaga masani a le Va’alele mo le Cargo a le tatou teritori. O se tala fiafia lea aua o nei malaga uma e lua ua fa’aopoopo mai a’o le’i oo i le aso o le Kerisimasi 2021.

O se mea lelei lea mo le atunuu, aua o lea ua matele ina fa’atau mai oloa mo meaalofa a tagata e fa’aaogaina ai fefa’ataua’iga i luga o meli mai kamupani tetele i fafo e i ai le Amazon ma isi uma kamupani eseese ua mae’a faia latou Uepesite mo fefa’ataua’iga.

O le isi mea lelei ona ua fa’atau e tatou aiga i fafo meaalofa ma lafo sa’o mai i o latou aiga i Amerika Samoa nei, ma ua fa’atalitalia uma nei mea i le fa’ataunuu mai o malaga a va’alele ma le Cargo.

Ua fa’ailoa mai e ese lava malaga a le Cargo lea e masani ona tulaueleele mai i vaiaso e ta’itasi, ae ua fa’aopoopo nei le malaga ia Tesema 20 ma Tesema 24, 2021.

Ua fa’ailoa mai e le tatou Pule Sili o le Falemeli I Amerika Samoa, Tao Suani, “Ona o lo ua i ai le va’alele i le aso 24 Tesema, e mautinoa lava e tatala le falemeli i le taeao o le Kerisimasi, se’i vagana ua i ai se isi suiga o le va’alele lea ma le aso e tulaueleele ai. O le naunau lava ina ia fa’afiafiaina le mamalu o aiga uma o le a maua latou afifi mai lea malaga a le meli.”

Ua fa’ailoa mai fo’i e Tao Suani, “Pe afai o le a suia itula e tatala ai le falemeli, pe tuai fo’i ona tapunia, o le a fa’ailoa atu lava i ni fa’asalalauga fa’alaua’itele i le falemeli, ia utagia lea tulaga e fa’afaigofie ai ona silafia e le mamalu lautele taimi e oo ane ai e piki latou fa’amomoli.”

TU’UA LE MALO - AFIOGA LE TAPUNUU TIUMALU THERESA LAGAREJOS SCANLAN

O le aso Toona’i na te’a nei sa fa’atautaia ai toe sauniga o le afioga le Tapunuu, Tiumalu Telesia Mulipola H. Scanlan i lana Ekalesia sa tautua ai o ia i lona soifuaga atoa, mai le 1927 -2021, se’ia oo ina vala’auina e lona Matai e malolo ia Novema 20, 2021, ina ua atoa fo’i le 94 o tausaga o lona soifua.

O le malumalu o St Joseph i Fagatogo, Ekalesia Katoliko Roma, sa fa’atautaia ai ona sauniga mamalu uma. 

O le afioga le Tapunuu, sa matua iloga lana tautua i lona afio’aga ma le itumalo o le Ma’oputasi aua sa amata mai le soifua i le avea ai o i la’ua ma le tama o le aiga, Mulipola Herbert Scanlan ma Faipisinisi, soso’o lea ma le fa’aea a lona aiga ia te ia e tauavea le suafa Tiumalu mo le aiga potopoto.

O ia lava o se tasi e talenia i le musika ma e fa’aaoga tele fo’i e ia lana lea taleni mo pese ma vi’iga o le Atua i aso Sa uma ma sauniga fai uma a lana Ekalesia, e pese ai lava ma lana fanau ma le aiga, e fai fo’i le latou aufaipese.

O ia fo’i o se tina e lalamua i le tele o tulaga i le malo ma le aufaipisinisi ae maise i le afio’aga ma le itumalo. O ia o se ulua’i tamaitai ua solaupule ma le vasega o Matai Ali’i ma Tulafale o lona afio’aga ma le itumalo, ina ua se’ei o ia i suafa o lona aiga.

Sa tautua o le Pulenuu i lona afioaga na avea fo’i ma Senatoa o lona itumalo. I ana taumafaiga tumaoti sa ia fa’afoea mai ai pisinisi uma a lona aiga se’ia oo ina fa’amatuu atu e fa’atautaia e le fanau. Ma ua iloga fo’i fatuga sa latou fatua ma lana fanau, ua lauiloa ai fo’i i latou i le atunuu ma le Iunaite Setete.

Peita’i i lona faiva o le tina o le aiga, e matua misia ai o ia e lana fanau, fanau a lana fanau, fanau a fanau a lana fanau ma latou aiga.

O le tina o le afioga le Tapunuu Tiumalu Telesia Mulipola H Scanlan o le afioga Tiumalu La’ila’i o Fagatogo ae o lona tama o Charles Anacletos Lagarejos mai Filipaina, ae o ia lea sa avea ma Taitai Kuka fa’apitoa a le vasega o Kovana sa soloa’i i le nofoaiga o le faigamalo fa’ateritori o Amerika Samoa.

Ina ua toe taliu le latou tama i Filipaina, sa malaga ma ave nisi o le fanau, ae nofo lava Tiumalu Telesia ma nisi o nai ona tei laiti. O iina loa na fa’amalosia ai loa ona alu Telesia e sailia sana galuega ae ua oo ana aoaoga i le vasega 8 i le St Francis Elementary, ina ia tausia lelei ai o ia ma si ona tina ma nai ona tei laiti.

Na maua lana galuega muamua lava i le faletalavalava o le US Navy, ma o lana galuega muamua lava lea i lona soifua taumafai e tausi lona aiga. Ina ua mae’a ona fa’aipoipo atu o ia i le tama o le aiga, Mulipola Herbert Scanlan, ona masi’i ai lea i Hawaii i la’ua ma le fanau ma nonofo ai. Peita’i na toe taliu mai ina ua talosaga atu si ona tina o Tiumalu Lailai e toe o mai e fesoasoani mai i le tapenaga o lana saofa’i ina ua fa’asuafaina o ia, i le afioga le Tapunuu suafa “Tiumalu” a lona aiga.

O le toe taliu mai lea o Herbert ma Sia Scanlan na la’ua fa’atuina ai loa le Fale Talimalo o le “Herb & Sia’s” i Fagatogo. O iina sa matua tele fa’afiafiaga fa’aatumotu sa fa’atinoina ai, ma sa avea ai lea nofoaga ma ala e fesoasoani i le to’atele e mafai ona fa’atino ai fa’atasiga tetele ma tali ai malo. O ausiva ma sui e pepese ua fa’asolo atu lava i ai o la’ua alo ma latou fanau e sisiva ai i fa’afiafiaga fa’aatumotu o le pasefika.

E masani ona faia fa’atasiga o fiafiaga fa’apitoa e fa’atino i po aso Faraile e fa’ai’u i ai le mamafa o galuega a le to’atele ma o iina fo’i sa fa’aosofia ai le to’atele e fiafia i le taleni pese, latou te taumafai atili ma pueina ai latou lipine e le la’ua atali’i matua o JR Scanlan.

O lenei fo’i le vaitau, e masani ona faia ai le Polokalama o Pesepesega Kerisimasi a le Auaiga lenei ma e pu’ea e le fale televise KVZKTV ma fa’asalalauina mai mo le maimoaga a le atunuu lautele.

E masani ona fa’aliliu e lenei tina pesega fa’alatino ma Faaperetania, ae usuina e i latou i le Gagana Samoa.

Na ia auai i sui patino na fa’atuina sosaiete a le Ekalesia e i ai le Sacred Heart Society, lea sa latou fesoasoani malosi i le fausiga o le nofoaga o tausia fa’apitoa ai matua matutua ma tagata mama’i le Hope House i Fatuoaiga ma le Mapuifagalele i Samoa.

O le eleele fo’i ua mae’a fa’atuina ai nei le Fatuoaiga, na faalauleleia a’ia’i i le tinoitupe sa tuufa’atasia mai sailiga a le Sacred Heart  Society.

O se isi galuega tele e Tiumalu Telesia o lona fa’aliliuina mai lea o tusi mo Fesoasoani Pope a le Katoliko i le Gagana Samoa ina ia malamalama lelei ai nai o tatou ta’ita’i fa’aleagaga.

I le tele o taimi o le soifua auauna o Mulipola ma Tiumalu Telesia Scanlan sa la’ua talimalo ai i le tele o petele, fesoasoani pope, ae maise o Katinale Pio Taofinuu, ma oo mai lava ina tumaoti mai le Pule’aga Samoa Pago Pago ma auina mai ai Epikopo Quinn Weitzel e avea ma latou Epikopo.

O le aufaipese a le St Joseph Co-Cathedral i Fagatogo mo le tele o tausaga.

E tele fo’i fa’atasiga a le afio’aga e lalamua ai le afioga le Tapunuu i lona fa’ataunuuina. Ina ua matua si ona tina ma ua le mafai ona ia tauavea tiute e patino i le suafa o lona aiga, sa se’e atu loa Tiumalu Talesia e tauavea le suafa Tiumalu mo lona aiga potopoto.

O le tausaga 2012 na tofia ai o ia e avea ma Senatoa i le Maota Maualuga poo le Senate o le Fono Faitulafono a le Malo o Amerika Samoa. Peita’i e le’i mae’a lana nofoaiga lea ona o tulaga o lona soifua maloloina ma gasegase ua maua ai, ona soloa’i ane lea o le afioga le Aloali’i, Afoa Moega Lutu, e na te tauavea le tofi mo le afio’aga ma le itumalo.

Ua fa’ailoa mai se finagalo fa’aalia o lana tama teine pito i matua, Annie Anderson, “O le matou tina o se fa’ata’ita’iga sili lea mo i matou i le auauna i el galuega a le Atua ma ia tumau i le fa’atuatua i el Atua i mea uma. Ua ia mae’a fa’ataoto fo’i le alafua e tautua ai i le pa’ia o aiga, ia ola tauivi i so’o se taumafaiga e finagalo i ai aiga, le afio’aga ma le Ekalesia, o ala ia e le o mau silafia e i tatou o maua mai ai manuia e tele ma le soifua tulu’i.”

O lo ua fa’amauina o alo a Tiumalu ma Mulipola H. Scanlan a e to’a 9; tutupu mai ai a latou fanau e to’a 34 i latou. Ona maua lea o fanau a fanau e 75 ae fa’ato’a fanaua e fanau a fanau a fanau le to’a 10 o fanau.