Pago Pago - AMERIKA SAMOA

TATALA AVANOA LESITALA FANAU A’OGA - AOAOGA AFIAFI A LE PYCD

Ua mae’a fa’atulaga se polokalama aoga tele mo le fanau a’oga o lo’o ua tapenapena mo latou suega mai fafo ma ua amata fo’i ona tatala lesitala mo nei fanau ina ia talosaga mai ai mo lea ituaiga o fesoasoani aoga, ina ia atili mautinoa e pasia e i latou nei suega fita i lo latou soifua a’oa’oina.

O nei a’oa’oga faapitoa o lo’o ua tau’avea lea e le Pacific Youth and Community Development (PYCD), ma ua latou fa’avasegaina fo’i faia’oga agava’a mo nei a’oa’oga afiafi fa’apitoa a le fanau a’oga.

O le PYCD o se fa’alapotopotoga e le o galulue mo se polofiti ae latou te fa’atinoa galuega aoga mo le aotelega o tautua eseese mo le lautele o le atunuu, o se vaega fo’i o le Empowering Pacific Island Communities, lea e fa’atautaia e le tofa Toleafoa Kathryn McCutcheon.

O lo ua fa’atulaga ina ia amatalia aoaoga fa’apitoa nei i le amataga o le masina fou, ma ua fa’amuta fo’i le lesitalaina o avanoa mo fanau a’oga i le aso 31 Ianuari, 2022.

O le susuga Darius Vaofanua le sui o le PYCD o lo’o nafa ma le fa’atautaiga o lea polokalama aoga mo le fanau a’oga i afiafi, ma ua fa’ailoa mai e ala eseese a’oa’oga eseese o le a fa’atautaia mo fanau, e fa’alautele atili ai lo latou silafia i mataupu e aoga mo i latou i suega mai fafo, ma isi fo’i mataupu uma o tauavea i a latou a’oa’oga i potu a’oga.

Ua matala le ofisa autu o lea Polokalama i le Maota o Pisinisi Fogafalelua, Ofisa o le PYCD, maota e soso’o ma Milovale’s i Nuuuli, poo le Ofisa Autu o le EPIC , Maota o Pisinisi a le Fa’atamali’i Center i Malaeimi mo nisi e fia lesitala o latou fanau mo nei a’oga afiafi.

ATOATOA FAIA TUI PUIPUIA COVID-19 AUFAIGALUEGA ASPA

Ua tula’i mai le ASPA ua atoatoa a’ia’i le latou aufaigaluega uma i ona vaega eseese, ua tofu ma tui puipuia o le Covid-19 ma ua mae’a taua’aoina i le latou Ofisa o Tagata Faigaluega faamaoniga o lea tulaga.

O le susuga le CEO Wallon Young, lea sa ia fa’ailoa fa’alaua’itele lea matati’a ma ua ia fa’ailoa mai ma le fiafia, e 419 le aofai o le aufaigaluega fa’aopoopo i ai ma le to’alima o sui totino o le Komiti Fa’afoe o le ASPA ua mae’a faia uma lava ma fa’amauina latou tui puipuia o le Covid-19.

E to’a 14 o latou tagata faigaluega ua mae’a ona fa’agafua le faia o latou tui e pei ona fa’atonu mai ai e le afioga le Kovana Sili e tatau ona tuuina atu. E to’avalu latou sui e afua ona fa’agafua ona o ala o fa’atuatuaga o lo’o latou auai ai, ae to’aono ona o tulaga o gasegase o lo’o fa’aauau fo’i ona inumia ai nisi o vaifofo e le mafai ai ona toe faia ni tui puipuia nei o le Covid-19.

O le aso ua mae’a fa’atulaga mai ina ia oo atu i ai ua mae’a uma ona taua’aoina fa’amaoniga o le faia o tui puipuia o le Covid-19 poo le talosagaina fo’i le fa’agafua o nei tui, o Ianuari 15, 2022.

O se lipoti mai le fa’atonu o le DHR poo le Matagaluega o Tagata Faigaluega a le Malo, Lynn Pulou Alaimalo, i lana saunoaga fa’apitoa e tusa o lea mataupu ia Tesema 27, 2021, sa ia fa’ailoa ai, “Mai le aotelega o le aufaigaluega atoa a le Malo i ona matagaluega ma Ofisa eseese ua maua ai le 5017, e na’o le 3,199 ua mae’a faia uma tui e lua o le Covid-19.

E to’a 142 o i latou ua na’o le tasi le tui ua mae’a faia, 70 i latou e le o faia lava se tui puipuia ae 36 i latou ua mae’a faia talosaga e fa’agafua a latou tui nei.

TELE AVANOA HAWAIIAN AIR -MALAGA IANUARI 06, 2022

Ua fa’ailoa e le pulega a le Hawaiian Air i Amerika Samoa, o le va’alele lea na to’ai taunuu mai i Amerika Samoa ia Ianuari 06, 2021, na tele lava nofoa sa le nofoia, ma ua iloga ai, e i ai se mea ua tupu i le to’atele sa fia malaga mai fanua ma aiga ae ua le mafai i le toe taimi lava o tatalia le malaga mai i Honolulu.

“Mai le silia ma le 300 o i latou sa lesitala mai mo lenei faigamalaga ae na’o le 175 i latou na mafai ona malaga i lea aso, ma ua silia ma le 60+ nofoa sa le nofoia o le va’alele i lea malaga.”

“O lea to’atele ua le mafai ona malaga, ona o latou suega ua maua ane ua fa’amaonia o i ai le Verusi, pe ua mae’a fo’i ona feso’ota’i ma i latou ua fa’amaonia ua i ai le verusi. O le ala lea ua le mafafai ai ona malaga le isi to’atele i le faigamalaga ia Ianuari 06, 2022.”

Ua maua fo’i se fa’amatalaga, “O le suega lea sa faia i le toe tasi le aso malaga, lea na matua to’atele ai nisi sa toe fa’amaonia suega a le Covid-19 ma ua le mafafai ai ona malaga.”

O se tala mai se tasi na malaga mai, ua ia fa’ailoa ai, “E 60 nofoa na mafai ona ou faitauina, ua le mafai ona fa’atutumu mo le malaga lenei, ae o se mea e fa’anoanoa ai, ona o le to’atele o i latou sa naunau ina ia o mai i le aumalaga lenei, ae ua taulau ma o le a toe fa’atalitalia nisi avanoa e malaga mai ai.”

O le malaga na tu’ua le teritori sa matua tumu lava i le atoaga e 268 le pasese na malaga atu ai Honolulu Hawaii ma o le isi malaga o soso’o mai o Ianuari 27, 2022.