Pago Pago - AMERIKA SAMOA

10 FANAU AOGA - LAUTOGIA POLOKETI FA’ASAEANISI AOGA MAUALULUGA:

Ua fa’ailoa e le Matagaluega o A’oga a le Malo o Amerika Samoa (ASDOE) le to’a 10 o e ua lautogia i fa’ailoga pito i maualuga o taumafaiga fa’asaeanisi a le fanau mo le Fa’aaliga Fa’asaeanisi lona 34 a le ASDOE mo lenei tausaga a’oga. O lea fa’aaliga sa faia lea ia Novema 23, 2021 i le Faleta’alo fou i Tafuna lea e fa’amautu i ai le DYWA.

Tulaga #1 :Pearl Eunice Munoz o Fa’asao Marist High School; Tulaga #2: Letiunasema Nuusila o Samoana High School; Tulaga #3: Josephine Elena Pereira ofFa’asao Marist High School; Tulaga #4: Liualevaiosina Leiato o Tafuna High School; Tulaga #5: Maricia Chanel o Leone High School; Tulaga #6: Elzira Noga o Tafuna High School; Tulaga #7: Princess Viesca o Fa’asao Marist High School; Tulaga #8: Kalista Koloi o Fa’asao Marist High School; Tulaga #9: Lily Feng o le South Pacific Academy; Tulaga #10: Ron Mendoza o le Manumalo Academy.

O le to’a sefulu lenei o fanau a’oga maualuluga a le atunuu o le a latou auai atu i le fa’aaliga fa’aitumalo a le tatou atuvasa, Pacific Science Symposium mo Mataupu Fa’asaeanisi & le Toe fa’aleleia o le Siomaga o le Atunuu, lea fa’atasia i Honolulu.

O lenei fa’aaliga fa’asaeanisi na tu’ufa’atasia lava e le Hawaii Academy of Science ma e fa’atupe mai e le Vaega a le USArmy, Navy ma le Air Force mo fanau a’oga i a’oga maualuluga i le tatou Itu o le Alamoana.

O le taumafaiga ina ia una’ia ma fa’amalosia le fanau a’oga ia tausaili ma sailiili atili i mataupu tau Fa’asaeanisi, Inisinia & Tekonolosi ma le Matematika poo le Numera.

Ua filifilia e le Hawaii Science Academy of Science le galuega fa’atino a le tamaitai o Liualevaiosina Leiato o Tafuna High o se tasi o galuega e tauva mo e sailia ai le galuega e tulaga muamua o lenei fa’aaliga.

I lea fa’aaliga mo le tatou fanau a’oga maualuluga i Amerika Samoa nei, sa faatautaia lea ia Novema 23, 2021 ma e to’a 21 i latou na fa’atasi ane i le DYWA i Tafuna mo le fa’amoemoe i sona avanoa lelei e tauva ai ma fa’aalia latou galuega fa’asaeanisi i le tauvaga lenei a le PSS i Honolulu Hawaii. O iina lea na fili fa’apitoa mai ai le to’a sefulu lenei o i latou mo lenei fa’aaliga tele e ali’i ma tamaitai sa latou fa’amasino lea aotelega o galuega fa’atino.

O le to’alima maualuga mai lea lava fa’aaliga ua fa’atulaga ina ia latou toe auai i le Junior Science and Humanities Symposium [JSHS]. O i latou na e malaga i Hawaii mo lea fa’aaliga, e totogia uma le latou malaga atu i Albuquerque, New Mexico ia Aperila 20-24, 2022.

O sikolasipi ma malaga atu i lenei fa’aaliga fa’asaeanisi e aofia uma i le JSHS ua atofaina mo i latou nei e to’alima.

Peita’i ua fa’apea fo’i ona amanaia ma taualoa e le ASDOE nisi o le to’a 11 na fa’aulu a latou galuega fa’asaeanisi na fa’aulu mai mo lea tauvaga: Gabrielle V. Gayapa o le South Pacific Academy; Michel Sun o le South Pacific Academy, Sydney Clemns o le South Pacific Academy, Carlos Leonel A. Sanchez o Samoana High School; Geogina Alofa o le Manumalo Academy, Darrel Jualo of Manumalo Academy, Marissah Ioane o Nu’uuli Vocational Technical High School , Aifo’l Levu III o Nu’uuli Vocational Technical High School, Brian Kim o Manumalo Academy, Rain Harvey Santiago o Manumalo academy ma Paleso’o Vaoga o Leone High School.

LIPOTI MAI FA’ATONU O TAGATA FAIGALUEGA A LE MALO - TUIGA MO LE COVID-19

O le fonotaga a le kapineta a le kovana i le aso Faraile ua te’a sa mafai ai ona tula’i le tamaitai fa’atonu o le Matagaluega o Tagata Faigaluega a le Malo Lynn Pulou Alaimalo ina fa’ailoa fa’alaua’itele lana lipoti atoatoa ua mae’a faamauina e tusa ai o le fa’amalosiga o tuiga mo tagata faigaluega uma o le Covid-19.

O lea lipoti sa fa’alauiloa i le fonotaga fa’apitoa a le afioga le Kovana Sili ma lana taupulega o fa’atonu uma ma fa’auluuluga o matagaluega ma Ofisa ta’itasi o le Malo.

Ole aotelega fa’amaumau o tagata faigaluega mo le Vaega Fa’amalosi Tulafono - Executive Branch - e 5056. Mai lea aotelega e 3,998 ua mae’a fa’aoo atu fa’amaoniga o latou tui puipuia atoatoa ua mautu atu i le Ofisa o le DHR. E 154 o i latou nei ua na’o le ta’itasi tui puipuia ua mae’a faia ma le 38 o i latou e le’i faia lava ni o latou tui puipuia nei.

E to’a 44 i latou o tagata faigaleuga ua mae’a talosagaina le fa’agafua ona o latou togafitiga o lo’o fa’atautaia pea ma ua le tatau ai ona faia ni o latou nei tui puipuia Covid-19, ua fa’atasia ai ma i latou ua talosagaina le fa’agafua ona o talitonuga maumaututu a latou tapua’iga e le mafai ai ona faia o latou tui nei.

E to’a 904 i latou e le o faia mai e i latou se fa’ailo poo fea o i ai se latou filifiliga tatau.

Ua toe tima’i mai pea le tamaitai fa’atonu o le Matagaluega o Tagata Faigaluega a le malo, “Ia alofagia ma ia amana’ia le poloa’iga a le ta’ita’i, ia silafia lelei o le aso e fa’amuta ai le avanoa e fa’ailoa ma fa’ao’o atu ai se fa’amauga o latou tui puipuia ua mae’a faia, o Ianuari 15, 2022.”

Ua fa’ailoa e Pulou Alaimalo, “Ia mautinoa lelei afai e te talosagaina le fa’agafua o lou tui puipuia lenei, e ao ina i ai se fa’amaoniga o le mafuaga tatau ona le faia ou tui nei.”

O i latou ua fa’ailoa mai o le talitonuga o le latou faife’au ua mafua ai, ae tatau ona matua’i fa’ailoa aloaia mai i se tusi lea tulaga, ma ia fa’amauina fo’i se mau e afua ai ona faia e ia lea talosaga, e fa’agafua ai mai nei tui puipuia.

“Pe afai e mae’a le aso 14 Ianuari 2022, o le a fa’ailoa atu ia i latou e le’i faia lava ni tui puipuia nei, ina ia tu’ua le nofoaga o lo’o faigaluega ai, ma ia le toe taliu mai i le galuega, sei vagana lava ua mae’a faia o latou tui puipuia o le Covid-19, ma faailoa mai se fa’amaumauga ua mae’a faia nei tui,” o se tala lea a Pulou-Alaimalo.