Pago Pago - AMERIKA SAMOA

FA’ALAPOTOPOTOGA FESOASOANI TOTOGIA PILI MO AIGA A’AFIA

Ua tutu fa’atasi nisi o fa’alapotopotoga ua mu o latou loto e alolofa atu i nai aiga ua matua a’afia lava le latou tamaoaiga tausi ona o le fa’amamaluina o le Fa’asa Lanu Mumu i le atunuu e tau taofiofia mai ai le sasao tele o le Covid-19 i le motu o Tutuila.

O le tele o nei fa’alapotopotoga e aofia ai le Esther  generation, Foeoletini Chris Ledoux Foundation, Rotaract Club a le Rotary; Agency fo Better Living ma isi, ua latou tutu fa’atasi ma ua faia saogatupe ina ia taua’aoina i aiga o lo’o ua i ai le mana’omia tele i le totogia o latou pili eletise ma le suavai mama i o latou falenofo. Ua mafua lea tulaga, ona ua taofia galuega, ua le maua ai fo’i se alagatupe masani e tausia ai aiga ma totogia ai pili o utilia masani.

Ua latou taua’aoina atu lava le tinoitupe i aiga mo lea fa’amoemoe.

Ua le gata i lea, ae ua fa’atauanau atu sui iloga o nei fa’alapotopotoga, i fanau ma aiga a nei aiga pagatia o lo’o alaala i fafo ma o lo’o faigaluega pea, ina ia alolofa mai i nai o latou aiga, foai mai se tupe e totogia ai latou falenofo i nisi, o mea’ai i nisi o aiga, ma pili eletise ma le suavai taumafa mo nisi aiga.

“O le tele o nai aiga e vaivai le tamaoaiga tausi, a’o le’i fa’amalosia lava fo’i le Fa’asa Lanu Mumu, o i latou lava ia o lo ua atili ona fa’aletonu le tausiga o latou aiga i le taimi ua motusia ai galuega. O le to’atele o aiga Samoa e fa’asoa mai le totogi i le isi totogi le olaga o soifua ai. Lea ua motusia nei  le siaki totogi mo le isi tolu o vaiaso, ua matua le mailoa lava se isi ala e mafai ai ona tausia le lotoifale o le aiga,” o se tala lea a le sui mai le Foeoletini Ledoux Foundation.

O lo ua iloga ua a’afia o lotoifale o e faigaluega i isi galuega uma e le moomia tele mo le faiga o tuiga ma le tautua lautele o le soifua maloloina o le atunuu atoa.

O le meaalofa tupe ua taua’aoina e $50 mo le totogia o pili uila ina ia le motusia. E mafai fo’i ona e foa’i lava oe pe a e fia fesoasoani i le gofundme.com/f/givelightas.

O le itulau a le ABLE facebook e mafai fo’i ona fa’ailoa atu ia te oe se mea e mafai ai ona fa’auia mai lau fesoasoani mo nei aiga uma.

MULIMULI TAGATA MALO FA’ATONUGA A LE FAATONU

O le to’atele o le aufaigaluega a le Malo i ona matagaluega eseese uma lava, e le o mautinoa poo le a tonu le aso e amata ai ona toe faigaluega. O le taeao lenei o le aso Lua lea sa fa’apea e fa’amuta ai le Fa’asa Lanu Mumu i le 12:00am ae amatalia le faiga fou ua fa’atulaga e le Komiti Fa’afoe o le Covid-19 i le atunuu, ma o le a fa’alogo le tagata faigaluega i lona ta’ita’i i le mea e fai.

O ai lava ua fa’atulaga o le a galue i lea aso ma lea aso, o i latou lava na e faia galuega mo’omia tele e le Matagaluega i aso ta’itasi. Ua le fa’atulaga mai e le Faigamalo se faiga mo matagaluega ta’itasi, ae ua tuu atu i le latou fa’atonu na te fa’atautaia le Sa o lana lava matagaluega.

Pau le mea ua mautinoa, o lo ua fa’aititia le aufaigaluega e fa’atautaia tuite fai o matagaluega ta’itasi a le malo, i ona lala uma lava.

Ia utagia mai mea nei:  E fa’aititia le aotelega o sui e faigaluega i totonu o nofoaga ta’itasi o matagaluega eseese o le Malo. Ua mafai ona faigaluega mai isi mai tua i o latou aiga, pe mafai ona faia mai ai galuega, a’o i latou e tatau ona faigaluega ae le mafai ona galulue mai aiga, ave i ai le fa’amuamua ina ia faigaluega i ofisa.

E matua fa’amamafa lava le taumafai ina ia fa’atino mai le tele o galuega e tatau ona faia mai tua i aiga i le taimi nei o le pepesi ai o le Covid-19 i le atunuu.

O tautua masani e tatau lava ona fa’atinoa mai totonu o OFisa Autu o le Matagaluega e aofia ai le DPS, DOH, LBJ, EMS DPA, ma isi, o matagaluega na ua ave i ai le fa’amuamua ina ia to’atele o latou tagata faigaluega e faigaluega i lea aso ma lea aso o lenei fa’asa.

Ua fa’ailoa atu i nisi o tautua e ao lava ona fa’ato’ai i tagata lautele o le atunuu, ua alagatatau ona fa’ailoa atu i le atunuu nisi ala o feso’ota’iga e mafai ai ona fa’ataunuu a outou tautua moomia e le lautele i le taimi nei, ae le o le manatu ina ia motusia a’ia’i la outou auaunaga.

Le aufaigaluega uma a le Malo, “Ia outou mulimulita’i i le fa’atonuga ma le fa’atulagaga o galuega ua fa’ailoa atu e tou fa’atonu o tou matagaluega ma le pulega.”

555 TAGATA FA’AMAONIA MAUA COVID-19, MATI 13, 2022

E to’a 28 i latou na fa’amaonia suega o le Covid-19 mai le falema’i tele i Faga’alu i le aso Sa na te’a nei, Mati 13, 2022 ae to’a 153 i latou na faia su’ega. E le’i faia ni suega a le Matagaluega o le Soifua Maloloina i lea aso, ma ua maua ai le aotelega o e uma na fa’amaonia suega Covid-19 i le atunuu e 555 e oo mai ia Mati 13.

Mai lea faitauga, ua fa’amauina fo’i le aofai o i latou ua toe kilia mai lea aotelega ua 63 i latou, ma e oo mai i le taimi nei, e le’i fa’amauina se tasi ua maliu mai le Covid-19 talu o a lutia le atunuu i lea fa’ama’i pipisi.

Mai le tuiga na faatautaia i le aso aso Toona’i Mati 12 i le Malaeva’alele i Tafuna fa’apea ma le Maketi i Fagatogo ua fa’ailoa e 1,072 i latou na faia tui, o le to’atele e 985 o i latou o tui Booster ae o isi uma o tui puipuia o le Covid-19 e ta’i lua tui e ao ina faia.

Ua fa’ailoa mai fo’i se atugaluga o nisi o lo’o ua alaala tumau nei i Manu’atele, ona o lea ua matua sasao le fa’ama’i i Tutuila nei, ae ua fa’apefea mai le soifuaga o i latou i le Manu’atele, e fia faia fo’i ni a latou suega, ae leai ni suega Covid-19 ua oo atu mo i latou.

Ua mafua ona fa’ailoa mai e Will Thompson lona lagona lea, ona o auga nei e fa’ailo atu mo le gasegase Covid-19, e tali tutusa lelei lava ma auga o lo ua masani ona fa’alogoina e ia pe a maua i le Influenza, o lo’o fai lava ma maua ai. Ae fa’apefea la ona fai se fuafuaga pe afai o lo ua i ai le Covid-19 i le Manu’atele, ae le o mautinoa ona e le o i ai ni suega ua fa’aoo atu i le DOH i Ta’u ma le DOH i Ofu mo i latou i le Manu’atele?

“E moni o lo’o ua taofia le o’o atu o ni va’alele ma va’a folau i le Manu’atele, ae le o taofia ai le fia oso atu lava o le va’a alia o le aiga ia, malaga atu aua o lo’o i Tutuila fo’i le isi vaega atoa o le aiga. O afioaga lea e matua to’atele ai aiga o le Manu’atele lea ua sasao mai ai le fa’ama’i, o Nuuuli ma Tafuna lea ua matua fa’ateleina le latou faitauga o e ua maua i le Covid-19,” o se tala lea a Thompson.

“Ua leai se fa’atulagaga a le Komiti Fa’afoe i se faiga e faia ai tagata e malaga atu mai Tutuila i soo se itu o le Manu’atele, e le o fa’atulaga fo’i se fa’anofoesea pe afai o tumau le mama o le Manu’atele mai le Covid-19. E le o fa’ataga ona o mai va’alele, ae mautinoa o lea e faamauina iinei o lo’o malaga mai va’a fagota a aiga. O le mea mautinoa aua o lea ua to’ai taunuu mai le va’a folau ma le uta o le aufaigaluega a le Kamupani iinei.”

E ese mai le fa’aletonu o le leai o ni suega covid-19 ua oo atu mo le Manu’atele i Ofu ma Ta’u fo’i, ae ua fa’apena foi ona le oo atu ni tui puipuia o le Covid-19 i Ofu ma Olosega, ua gata lava i Ta’u le sapalai na oo atu mo le Manu’atele.