Ads by Google Ads by Google

TALA I VAIFANUA


O se va’aiga lea I le ER a le tatou falema’i i le taeao o le aso Gafua, ma faleie fo’i o lo ua fa’atulaga ina ia faatautaia ai talavai a i latou o le a fa’amaonia o lo’o ua i ai le verusi o le Covid-19. [ata: Leua Aiono Frost]
ausage@samoanews.com

Pago Pago - AMERIKA SAMOA

 

FESOASOANI AUMALAGA FOMA’I MO TALAVAI - ER LBJ

 

O le vasega o foma’i fa’apitoa, tausima’i ma foma’i ua agava’a i le togafitiga o tagata ua a’afia ai i gasegase, ua latou fesoasoani lea i togafitiga o e na gasolo atu i le Potu Talavai ER i le  falema’i tele i Faga’alu e afua i le aso Lua na te’a nei.

 

O le aumalaga fa’apitoa lea na malaga mai le aso Toona’i e to’a 15 o le fesoasoani fa’apitoa na tuufa’atasia mai e nisi o lala uma o le Malo tele, lea sa fa’amatalaina aloa’ia mai e le lipoti a le tamaitai o Allison Pfaendler o le FEMA i le fonotaga fa’atasi ma le Komiti fa’afoe o le Covid-19 a le tatou malo, i le aso Gafua.

 

O le to’afitu o sui uma na malaga mai o nisi iloga o le CDC Centers for Disease Control & Prevention, USArmy Corp of Engineeers ma le Health & Human services lea sa malaga mai i le vaiaso ua te’a. Ua toe taliu nisi o le vaega na mua’i malaga mai, ae o le isi va’alele lona lua ua fa’ato’ai mai i le aso Toona’i na te’a nei, lea e to’a 15 sui o foma’i fa’apitoa ma Tausima’i fa’apea ma Medical Techs lea ua fesoasoani malosi nei i le togafitiga o i latou ua fa’amaonia a latou suega o i ai le verusi o le Covid-19 i le atunuu. O le tali fo’i lea i le talosaga sa fa’auia atu e le tatou ta’ita’i ina ia fesoasoani mai le Malo tele i le tau toe soloia o le so’ona pipisi o le Covid-19 i le tatou malo nei.

 

O nisi o mea ua fa’amautu atili mai ona o le fa’afesili a nisi o sui fa’asalalau i le fonotaga fa’atasi ma le Komiti Fa’afoe o le Covid-19, lea sa fesiligia ai, pisinisi uma ua fa’aauau pea ona taofia le tatalaina o latou tautua mo le lautele, pe mafai ona maua se latou fesoasoani tupe mai le Malo mo le totogia o latou tagata faigaluega?

 

Na talia lea fa’afesili e le susuga le Taitaifono o le Komiti Fa’afoe o le Covid-19 ma ua ia fa’ailoa manino ai, e leai. 

 

“O lo ua mae’a tufatufaina atu le fesoasoani a le Malo mo Aiga e ala i le fanau a’oga ma le tinoitupe ua atofaina mo le tamaititi e to’atasi e $200. e talafua ai mea taumafa i so’o se faleoloa o lo’o agava’a mo pepa talafua ai oloa tau mea’ai a le Food Stamp.”

 

“Ua tatala foi le tautua a le malo mo mea taumafa vela a le vasega o matua matutua ua agava’a ai mo lea alamanuia e fa’atolu ona maua i le vaiaso. Fa’atasi ai ma le tatala fo’i o faitoto’a mo pepa talafua ai mea’ai a le Food Stamp ina ia fa’aaogaina e i latou ua agava’a ai. Peita’i ua maua fo’i ma siaki o lafoga mo i latou ua mae’a failaina latou lafoga.

 

E ese mai nei alamanuia uma ua fa’amatuu atu e le malo mo aiga uma e agava’a ai, ua leai se isi alamanuia e mafai ona taua’aoina atu e le Malo mo Pisinisi o lo ua fa’aauau pea ona tapunia i le taimi nei. Ole tali mautu, e leai!”

 

O pisinisi nei ua tapunia nei e aofia ai: Pa Pia; Bingo; Nofoaga e tausia ai fanauiti; Fale Fa’amalositino & Pisinisi Fa’amalositino; Fale teu Ulu, Teuteu tino ma Fale Oti Ulu; Fale Tifaga; Taofia ai ma Fale’aiga fa’atau atu i le Lautele; Taofia ai ma Fa’atasiga fa’alaua’itele a aiga ma isi uma fa’atasiga e to’atele e aofia i ai.

 

Peita’i, e ese mai lea fa’asa, ua mafai ona talosaga atu so’o se pisinisi lava nei ua lisia ma e iloilo toto’a e le Komiti Fa’afoe o le Covid-19 le talosaga e fa’aulu atu e so’o se pisinisi ua fia tatala.

 

Mo tagata faigaluega uma lava ua le maua se siaki mo le silia ma le tolu vaiaso, ua le mafai fo’i ona fesoasoani le malo e maua mai se fesoasoani mo lea sui i le taimi nei.

 

AUMALAGA HAWAIIAN AIR MATI 10

 

Ua fa’ailoa e le Matagaluega o le Soifua Maloloina e fa’apea, o le aumalaga e to’a 264 a le Hawaiian Airlines na fa’ato’ai mai i le atunuu ia Mati 10, 2022 ua mae’a ona toe tatala atu nei e feiloa’i ma latou aiga i le aso Sa na te’a nei.

 

“Ua mae’a ona tatalaina le fa’anofoesea ai o lea to’atele ina ua mama uma i latou mai le verusi o le covid-19 e ala i suega ua mae’a faia ae leai ma se tasi o i latou o maua ai le verusi. E tolu aso sa fa’anofoesea ai i latou, ma ua fa’atulaga fo’i aso e ao ina faanofoesea ai i latou i o latou aiga, mo le malu puipuia lava o le lautele o le atunuu. E oo fo’i i le aufaigaluega uma lava a le DOH sa faia uma lava suega, ua fa’amaonia fo’i e leai se tasi o i latou uma o maua ai le verusi.”

 

Ua amata tapenapena le Matagaluega mo le isi malaga a le Hawaiian Airlines mai Honolulu ia Mati 31. 

 

$450,00 FAIA AI SUESUEGA MO LE ATO I ATUMAUGA

 

O se tasi o mata’aga ua loa ona i ai i le atunuu, peita’i na toe fa’aleagaina ma ua le toe i ai i nei vaitau, le Ato e femalaga’i i atumauga o Tutuila mai Mt Maugaoali’i e aga’i atu i Mt. Alava, le Cable Car, lea ua toina mai e le US Economic Development Administration e fa’atino ai le suesuega ina ia mafai ona toe faatula’ia le tautua a le Cable Car i le atunuu. O le poloketi lea ua fa’aigoaina nei o le “SkyTram” i luga a’e o le Uafu Matagofie o Pago Pago, ma o se poloketi fo’i e aoga tele mo le vaega o Turisi.

 

Ua fa’ailoa mai le agaga fa’afetai ma le fa’amalo o le afioga le Faipule i le Konekeresi ia Uifa’atali Aumua, i le afioga le Kovana Sili, Fa’atonu Petti Matila ma le susuga le ali’i o fuafuaina alamanuia eseese mo le fa’aleleia o le tamaoaiga tausi o Amerika Samoa, Michael McDonald o le Matagaluega o Fefa’ataua’iga, ona o le latou sogasoga e tausailia mea lelei e toe atina’e ai le tamaoaiga o le atunuu.

 

Ona o le fa’amoemoe maualuga lava a le DOC Ofisa o Turisi e toe fa’aleleia atili le sailiga o le tamaoaiga tausi o le atunuu, ua mafai ona fesoasoani tele lenei galuega i lea poloketi SkyTram.

 

O le a fa’aaluina lenei seleni atoa i le tuufa’atasiga o le suesuega fa’apitoa o le nofoaga e amata atu ai le malaga, se’ia oo i le isi itumauga e fa’ai’u ai ma toe fo’i mai. O le a fa’amausali atoa ai fo’i ma ni ituaiga o fausaga e ao ina faia ia mautu lelei ai le nofoaga mo le Ato ma Uaea e fa’aaogaina ma isi mea uma lava e tatau ona mautu fo’i le saogalemu o feoa’iga i le ea i le seleni lava lea ma ona suesuega uma o le fa’atautaia ma fa’atupe ai.

 

O le taumafaiga lenei ua fa’ailoa ai le faigata tele fo’i ona fa’atautaia o galuega i le Satelite o le tatou Televise KVZK-TV talu mai ona le toe fealua’i le Ato lenei, ma ua le faigofie ai fo’i ona fa’ataunuu tiute uma sa tatau ona faia e Inisinia mo nei galuega moomia, ia fa’aaogaina lelei pea feso’ota’iga o alaata mo fa’asalalauga a le tatou televise fa’alotoifale.

 

“O se tasi lenei o fiafiaga e le’o toe maua e le tupulaga o lenei vaitau, ae ua toetoe a mou uma atu i latou na mafai ona fa’aaogaina lenei tautua. O le tausaga e 1980 i le sisigafu’a lea na motusia moni ai loa le uaea o le Cable Car, peita’i, a’o le’i oo i lea tausaga,ua le toe fa’aaogaina lava le Cable Car mo feoa’iga masani sa faia ma totogia pe afai e te fia tietie ai i Mt Alava ma toe fo’i mai i Maugaoali’i.” O se tala lea a se tasi o tama matua sa masani ona fiafia e malaga matamata i le Cable Car.