Ads by Google Ads by Google

TALA I VAIFANUA


[ata: foa'i]

Pago Pago - AMERIKA SAMOA

 

1,005 FA’AMAONIA MAUA COVID-19 E OO MAI IA MATI 16

 

O le aso ananafi sa fa’alauiloa ai e le Matagaluega o le Soifua Maloloina e fa’apea e o’o mai ia Mati 16, 2022, o le faitau aofai o i latou i le atunu’u ua fa’amonia e maua i le COVI-19 e 1,005. 

 

Mai lea faitauaofa’i, e 94 i latou ua fa’amaloloina - pe ua uma foi aso 14 sa fa’anofoesea ai talu mai ona fa’amonia ua pesia i le COVD-19.

 

Mai le aofaiga e 1,005 ua maua i le Koviti-19 e to’alua i latou mai le motu o Aunu’u ae o lo’o saofia pea Manu’a.

 

O fa’amaumauga a le Matagaluega o le Soifua Maloloina o lo’o fa’ailoa ai o le afioaga o Tafuna e sili ona maualuga le numera o i latou ua fa’amonia i le 200 soso’o ai ma Nu’uuli e 100.  

 

SOSO’O LE TAIMI E FAILA AI LAFOGA A LE ATUNUU:

 

Ua fa’amaonia mai nei e le Matagaluega o le Tupe a le tatou Malo, o lo ua i ai le fa’aiuga o le a tolopo le aso e fa’amuta ai failaga o Lafoga o le tausaga ua tuana’i a le mamalu o le aufaigaluega a le Malo ma isi pisinisi uma i le atunuu, ona o le a’afiaga fo’i o le Fa’asa o le Covid-19 sa fa’amamaluina i le atunuu.

 

O le taimi na tuu e fa’amuta ai fa’amaumauga uma o Fepuari 28 lea ua toe fa’aumi atu nei ia Iuni 30, 2022. O le failaina o Lafoga a Kamupani sa tuu e ao ina mae’a ia Mati 15, lea ua tolopo atu ia Iulai 15, 2022.

 

O le failaina o lafoga a tagata faigaluega uma a le Malo ma soo se pisinisi lava i totonu o le atunuu lea sa tatau ona fa’amuta ia Aperila 15, 2022 ua tolopoina nei mo Iulai 15, 2022.

 

Ua fa’ailoa atu fo’i ia i latou o lo’o totogia pea lafoga, e ao ina fa’aauau peimeni o lo’o ua mae’a fa’atulaga taimi e tatau ona fa’ataunuu ai, ina ia le a’afia ai nisi tupe fa’asili e toe totogia.

 

FA’ATUPEGA MO AUMAGA MAI OFISA O JUSITICE A LE MALO TELE:

 

Ua fa’alauiloa mai ua talia mai le fa’atupega na talosagaina mai le Matagaluega o Fa’amasinoga a le Malo tele, ina ia fesoasoani lea i fa’alapotopotoga i tua i afio’aga pe a oo ina lutia le atunuu i le Covid-19. 

 

Ua fa’ailoa mai e le Fa’atonu o le Criminal Planning Justice Agency, Mariana Timu Faiai, o lo ua mafai nei ona talosagaina le ta’i $3,000. mo le aumaga e tasi

 

I le taimi nei e 49 le aofai o aumaga e aofia ai ma aumaga mai le Manu’atele, ma o i latou na ua mae’a faila mai latou talosaga. O le poloketi lea e fa’aigoaina o le 2020 Fa’atupega Fa’anatinati i le Sofa’i mai o le Coronavirus i le tatou atunuu.

 

O loo fa’atautaia uma nei fa’atupega e le Matagaluega o le Criminal Justice mo Aumaga ina ia mafai ona fesoasoani malosi i latou i le galuega lavea’i o le soifua lautele i afio’aga ona o le pipisi vave ai o le Covid-19 i le atunuu atoa.

 

Ua fa’ailoa mai fo’i le agaga fa’afetai tele o le afioga le Kovana Sili, Lemanu Peleti S. Mauga ona o le vave tali mai o le Malo tele e fesoasoani mai i tatou aumaga i tua i afio’aga e latou te fa’ao’o atu le fesoasoani i o tatou aiga ta’itasi pe a moomia ma lutia i le Covid-19, lea ua tatou i ai nei.

 

“O le vave talia mai o lenei talosaga, o se mea ua iloga ai le nofo sauni o le Malo Tele e fesoasoani mai i ala ua moomia e i tatou ona o le lutia ai o le tatou teritori i le Covid-19. O lea fesoasoani ua tuu sa’o atu lava i le auga malosi o le tatou atunuu, o tatou afio’aga lea, ma le malosi o nuu ta’itasi, le Aumaga.”

 

Ua fa’ailoa fo’i e le susuga le Taitaifono o le Komiti Fa’afoe o le Covid-19, Talauega Eleasalo Ale, “O tatou Aumaga o le malosi’aga a’ia’i lea o le Ofisa o Mataupu Tau Samoa, lea e mautu i ai le tapenaga o afio’aga ta’itasi, ma fa’amoemoe i ai le fesoasoani sili mo tatou aiga ta’itasi i tua i afio’aga ta’itasi. O lo’o latou fesoasoani i le leoleoina o afio’aga ta’itasi fa’apea fo’i ma so’o se taumafaiga lava e fia fa’aoo atu i nuu ta’itasi. Ua iloga le latou aoga i le taimi o faia ai nei tuiga i le teritori atoa. E silafia uma e i latou aiga uma o nuu ta’itasi.”

 

Ua manatu fo’i le CJPA ina ia feso’ota’ia lelei a latou fesoasoani mo Aumaga fa’atasi ai ma matagaluega o le tupe fa’asoa a le malo, le matagaluega o le tupe ma le Ofisa o Mataupu Tau Samoa.

 

Ua moomia ona fa’amaumau mai e nuu ta’itasi sui e feso’ota’i atu ai le CJPA ma le Aumaga atoa poo le saofaiga fo’i o le pulega a afio’aga ta’itasi ina ia vave ona fa’ataunuu uma pepa fa’amaonia mo peimeni o latou fa’atupega.

 

Ua mafai ona tuuina mai fo’i le tuatusi emeli o le tamaitai fa’atonu ina ia feso’ota’i atu ai le sui atofa mo lea afio’aga ma lea afio’aga ina ia le fa’aletonu feso’ota’iga ma tapenaga mo latou alamanuia. Fa’atonu Mariana Timu - Faiai, marianafaiai@gmail.com poo le tamaitai faigaluega a le CJPA, Valelia Sefo valeliasefo@gmail.com poo le telefoni fo’i a le Ofisa 633-5221.